Ka Nupepa Kuokoa, Volume LXV, Number 29, 22 July 1926 — Page 6
| | |||||||||||||||||||||||||||||||
| | Nupepa Kuokoa KE KILOHANA POOKELA NO KA LAHUI HAWAII | | |||||||||||||||||||||||||||||
| | NA MOOLELO HOONANEA, NA NUHOU KALAIAINA ME NA NUHOU O KA MANAWA | | |||||||||||||||||||||||||||||
| | AOAO NO NA MANAO PEPA SOLOMON HANOHANO, LUNAHOOPONOPONO | | |||||||||||||||||||||||||||||
| | |||||||||||||||||||||||||||||||
| | |||||||||||||||||||||||||||||||
| | |||||||||||||||||||||||||||||||
| | NUPEPA KUOKOA. HONOLULU. T. H. POAHA, IULAI 22, 1926 | ||||||||||||||||||||||||||||||
| | |||||||||||||||||||||||||||||||
| |
| | |||||||||||||||||||||||||||||
| |
| | |||||||||||||||||||||||||||||
| | MAI HOOHEMAHEMA I KA PONO KOHO BALOKA. Eia na aoao kalaiaina kuloko o kakou, ke liuliu hoomakaukau mai nei iloko o keia mau la no ke komo aku iloko o ka hoouka kalaiaina e hookokoke mau mai nei i kela ame keia manawa; no keia kumu, a no na kumu lehulehu e ae he nui, i makemake ai keia pepa, e hoeueu aku ia kakou na Hawaii ua hoea hou mai i ka manawa no ka hele ana ae e hoopaa i na inoa maloko o na keena o na kakauolelo kalana, o ko lakou mau kalana iho. O ka poe i loaa ia lakou ka mana koho baloka mamua aku nei, aka i hele ole ae nae, e koho i na moho, ma ke kau koho baloka laula o na hoa o ka ahaolelo aku nei i hala, malalo o ke kanawai koho baloka e ku nei i keia manawa, ua holoiia ko lakou mau inoa mailoko aku o ka buke hoopaainoa o ka poe kupono i ke koho baloka, a aole e hiki ia lakou ke koho baloka hou, aia wale no a hoopaa hou i ko lakou mau inoa. O ka poe hoi i koho baloka ole mamua, aka i oo nae ko lakou mau makahiki i keia wa, e hiki ai ia lakou ke koho baloka o lakou kekahi e pono e hele ae e hoopaa i ko lakou mau inoa i keia manawa, i kuleana ai lakou ma ke koho ana aku i na moho, ma keia kau koho wae moho, ame ke koho baloka laula aku. Ua manao kekahi poe, he mea liilii loa ka ninau koho baloka, aole pela ka mea oiaio maoli, he pono nui keia i loaa i kela kane ame keia wahine, no ka mea me ka mana auanei o ko lakou mau baloka, e hiki ai ia lakou ke koho a hoonoho ae ma na kulana oihana, i na kanaka a lakou i hilinai ai, no ka makaala ana mai i na pono o ka lehulehu, maluna o na ninau apau, i kaa aku ai ka noonoo ame ka hooholo ana maluna o lakou, Me ka mana o ka baloka, e hiki ai ia kakou, ke kapae ae i ka poe a kakou i ike maoli ai no i ke kupono ole e lilo i poe kauwa na ka lehulehu, a hoonoho aku i poe hou ma ia wahi. Ke auamo nei ka lehulehu, i kekahi mau haawe kaumaha i kau aku maluna o lakou, ma ka uku ana i na auhau kiekie; ua hooneleia aku hoi kekahi mahele o na makaainana, me kekahi mau mea e pono i'o ai lakou; a no keia mau pono nui, i konoia mai ai kakou apau, e makee i ko kakou pono koho baloka, i hiki ai ia kakou ke koho i ka poe kupono i'o, e hiki ai ke lawelaweia mai na hooponopono ahaolelo maluna o ke ana o ke kaulike ame ka pololei; aole hoi e kaa aku ka hoohana ana, iloko o ka poe, i ake wale no, no ko lakou pomaikai iho, a no ka pomaikai o ko lakou mau hoaloha. O ka poe i nee ko lakou noho ana i keia manawa, mai ko lakou mau wahi mua mai i noho ai, o lakou kekahi i makemakeia e hele ae e hoololi i ko lakou wahi e koho baloka ai, he mea hoomaalahi mai keia i ka hele ana ae e koho baloka; a he mea no hoi e hoonele ole ia mai ai i kela pono koho. KA HOOMANAO KENEKULIA. E malama ae ana na ekalesia Kalawina apuni ka Mokupuni o Oahu nei, he anaina hoomanao, no ka piha ana o hookahi haneri makahiki, o ka huakai hoohulihuli e lilo i Kristiano, a ka Moiwahine Kaahumanu ame ka Rev Hiram Binamu ame kekahi poe e ae, i kaahele ai ia Oahu nei, ma ke Sabati, Augate 1, 1926. O keia kekahi o na hana kupono loa o ka hooholoia ana, e malama aku na ekalesia Kalawina ma Oahu nei, i anaina hoomanao, no ka hana i lawelaweia e ka Moiwahine Kaahumanu ame ka Rev. Hiram Binamu; no ka mea o na anoano o ka pono Kristiano i luluia he hookahi haneri makahiki ae nei i hala, ua pa-haneri ae ka nui i keia manawa, e o mau aku ai kela hana i lawelaweia mai kekahi hanauna a i kekahi. E loaa ka manao haaheo iloko o kakou, no kela hana kilakila a ka Moiwahine Kaahumanu, e kokua ana i ka Rev. Hi-ram Binamu, ma ka hoohulihuli ana i kona lahui kanaka ma keia mokupuni, e lilo i poe maka'u i ke Akua oiaio, a e ku-e aku i na akua, e ae, i hoomanaia e keia lahui kanaka mamua aku, e kau mau aku ai kela hana, i kiahoomanao iloko o ko kakou mau hoomanao ana, no ko kakou pulama i ka noho Kristiano ana o keia lahui kanaka, i na manawa apau, ma ka hookaawale ana aku i na hana apau e ku-e ana i ka pono. O na manao hoakaka e pili ana i Ka olelo hooholo a na lunakanawai i kohoia ai, no ka hookuku himeni, i malamaia mai nei ma Kailua, Hawaii, e puka aku nei ma kekahi wahi o keia pepa, malalo o ka inoa Mokuaikaua; he hoakaka ia i kulike me ka manao o keia pepa o ia ka hookahuaia o ka olelo hooholo maluna o na loina apau i pili i na hoailona i kauia ma ka himeni hookuku. I poe ike himeni na lunakanawai apau e pono ai a e hookamaaina mua ia hoi kela mau lunakanawai no ka himeni hookuku, a ua paanaau mua paha kela himeni ia lakou; a o ka mea oi loa aku paha o ka pono, i mau lunakanawai mawaho aku o na hoa o ka aha paeaina; malia he mea ia e oili mai ai na olelo hooholo kaulike, e loaa ole ai na nema ana ma kekahi ano. Mamuli o kekahi noi, i hookomoia mai, a e puka aku nei ma keia pepa, ia Z. P. K. Kawaikaumaiikamakaokaopua, e koi okoa aku ana iaia, e hoike ae i ke akea i ka inoa o ka laau hele pu me ke kanaka, o ka nane ana i kukulu mai ai, a i hoopukaia maloko nei o ke Kuokoa no na mahina eono ae nei i hala, no ka paakiki maoli, me ka loaa ole o ka haina pololei, pela i kapaeia ai na haina apau e waiho nei ma keia keena, i pau ole i ka hoonohoia, mai ka hoopukaia ana aku, a koe wale no na haina i paa mua i ka hoonohoia; no ka mea ua lalau wale no ia mau haina apau. Nolaila e hoike ae oe e ke keiki o ka pali kapu o Keoua i ka haina o ko nane, i ike mai ai na loea huli nane apuni o Hawaii nei, i ka hiki ana ia oe ke hoopahu'a aku i ko lakou ike ame ke akamai, ma keia hana hooulu noonoo. Mamuli o ka hoohemahema, me ka hoopalaleha maoli o kekahi poe lawe kumau i ka Nupepa Kuokoa, i ka hookaa ana mai i ko lakou aie i ka nupepa, ua konoia mai makou, e hoike aku ia lakou, ina aole e ukuia mai ana kela aie mamua ae o ka pau ana o keia mahina, alaila e paaia ana ka lakou nupepa, me ka hoouna hou ole ia aku, aia wale no a ukuia mai ko lakou aie mua. Lehulehu wale na manawa i hoeueu mau aku ai makou i ka poe noho aie i ka nupepa e hoopau ae i kela pilikia ; ua maliu mai no kekahi poe, a ua hoopalaleha no hoi kekahi poe; a no ka poe hoopalaleha keia kauleo hou ana aku no ka manawa hope loa, mamua o ka paaia ana o ka lakou nupepa. | ||||||||||||||||||||||||||||||
| | Mahope iho o ka hoohala ana i kekahi mau la kakaikahi ma 1! 'i, Hawaii, i huli hoi mai ai ka li kanawai Federala W, T. Rawlins ma ka Haleakala o ka Poakahi iho nei, no keia kulanakauhale. | | |||||||||||||||||||||||||||||
| | |||||||||||||||||||||||||||||||
| | |||||||||||||||||||||||||||||||
| | |||||||||||||||||||||||||||||||
| | |||||||||||||||||||||||||||||||