Ka Nupepa Kuokoa, Volume LXII, Number 29, 19 July 1923 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

 

He Moolelo Walohia

 

Ko Vekinia Waiwai Hooilina

 

Hoopuhiliia na Hana a ka Mea Manao

Ino---Kau i ke Aki i ka

Manawa Hope

 

"Aole  o oe wale, ia hoka ana, owau pu kekahi, e Rupata, " i hoike mai ai o Veki i kona manao me ka oiaio.  "Ua manao au he hana hoohoka loa ia'u ma ka manawa o ke kauka i kauoha mai ai ia mama e hele no kekahi wahi mamao, kahi e loaa ai iaia ke ola kino maikai, ma ka manawa a'u e kau nui aku ana o kou hoea mai, a oiai he nui no hoi ko‘u aloha ia mama, aole hiki ia‘u ke keakea aku i ma manao o ke kauka, no ka mea o ka loaa o ke ola maikai i ko'u mama he mea waiwai loa ia i kuu noonoo mamua o na mea e ae ; ia manawa ua ike iho au i ko'u ku ana mawaena o na mea aloha elua, ke aloha hoi o ka makua a o kou aloha hoi ko ka ipo, nolaila, e ike mai oe he manawa hoao ikaika loa ia ia'u, a ua hoomanawanui no nae au elike me ka ikaika hiki ia'u oiai nae-"

"Oiai heaha e Veki?" i ninau aku ai o Rupata i ko Veki manawa i oki pokole ae ai i kana olelo ana.

"Oiai aole au i maopopo loa o ka mea a'u e noonoo aku ana nou he kuko maopopo ole wale no ia, a he mau manao maopopo i kukaia mawaena ou ame a'u no ko kaua hooliloia i hookahi i kekahi manawa maopopo e hiki mai ana, he moeuhane palaualelo wale no, pela paha oe e olelo iho ai, aole au i ike aku i ka paa o kou manao no'u; ia'u i noonoo nui ae ai nou a no kuu mama hoi, e hai aku au ia oe i ka mea oiaio, ua eha loa au a ua lupeaia hoi loko e ka mano ana ole."

"Alaila, mai ia manawa mai no anei kou hoomaka ana e aloha ia'u?" i ninau aku ai ke kanaka opio, alaila kulou aku la oia imua a honi aku la i na lehelehe i huai mai la i na mea oiaio loa mailoko loa mai o ka papaku o kona puuwai."

Ia oe e noonoo nui ana no'u, eia nae, ma ko'u aoao hoi, ia'u paha e hele mai ai a noi aku ia oe no ka lilo ana mai na ' u e kipaku mai ana oe a nele iho la au i ka manaolana no ka lilo mai ou na'u."

"Pehea auanei au e kipaku aku ai ia oe, a no ke mea hoi ua aloha loa hoi au ia oe, e Rupata."

"Pela anei ka mea oiaio, e Veki.  O, o keia no ka'u mea i manaolana mau ai i kuu manawa e ala ae ai e ike iho ana au aole he hihio wale no, aka, he mea oiaio loa, a nolaila ke haawi aku nei au i kuu hoomaikai piha ia oe; akahi no au a ike maopopo iho la na'u oe a mau aku, a e lilo ana hoi oe i onohi daimana no kuu puuwai." alaila apo mai la oia ia Veki iloko o kona mau lima a hoopili mai la i kona umauma.

"Mai nei manawa aku e hoopau loa oe i kou mau manao kanalua a pau no kuu lilo ole aku nau; ke hooiaio aku nei au imua ou i nei manawa he nui na hoike oiai i loaa ia'u he mau mea hoike maopopo aole he hihio wale no kau mea i ike i nei manawa, aka, he mau mea oiaio loa au e ikemaka nei iloko o kou manawa e ala ana, a in a oe e olulu mai ana mai hoopukalaki ae hoi oe i ko'u oho i hanaia a maikai i nei manawa, elike me ia au e ike iho la.  no keia kumu, he hora mai keia manawa aku e hoea mai ana o Miss Hatinekona ianei no ke kii ana mai ia ' u, a no ke kokua ana mai hoi no ka hoomakaukau ana ia'u no ka aha hulahula nui a Mrs. Danafota e haawiia ana i keia pule ae."

Nee ae la o Rupata i ka akaaka no nei mau olelo a Veki, me ka hooponopono hou ana iho i ka lauoho o Veki ana i hoopukalaki ae la; i kona hoi hou ana ae maluna o ka punee a noho iho la ma ka aoao o Veki ninau mai la:

"E ninau aku ana au ia oe i keia, he wahine ʻ Amerika opio oe-pehea la, ina no ko kaua hoohuiia nei a lilo i hookahi, e ae ana no anei oe e noho mau iho ma Enelani naei, a i ole e uhu ana no anei kou manao e hoi e kou onehanau?"

"Ua oleloia." wahi a Veki, "ma kahi oa ka home aia pu malaila ka naau,' a in a no kou noho mau iho ma Enelani nei kou onehanau, ke manao nei au aole no e lilo ana o Amerika i mea ume nui aku i ko'u noonoo no ka hoi aku ilaila, aiai nae, e ike mai oe i keia, o ko'u onehanau a kulaiwi ia, a no keia kumu no, e oi aku ana kuu aloha ia oe mamua o kuu onehanau, " wahi a ka Veki pane, e hoike ana hoi i ka mea oiaio loa iloko o kona puuwai.

"Alaila aole no oe e hoahewa ana la no kou lilo ana i makuahine Pelekane ma o'u la?" i ninau hou iho ai o Rupata, me ka hamohamo pu ana iho i ke oho o Veki i like ka hinuhinu me ka kilika la.

"Ke manao nei au aole no e lilo ana ko'u lilo ana i makuahine Pelekane, a i ole no kekahi mau kumu e ae, a no keia kumu no, he makuakane Pelekane no hoi ko'u."

"Pehea, he mea oiaio anei ia au i hoike mai la?  Aole anei au i manao o ka inoa Alekanedero he inoa Pelekane?  Ina he kanaka Pelekane oia o ka hapa hea o Enelani nei kona onehanau?"

"No ia ninau au ua hiki ole e loaa aku i haina no ka mea aole au i ike, e Rupata." i pane mai ai o Veki, me ka helehelena kaumaha; "eia wale no ka'u mea i maopopo aia he moolelo pohihihi e pili ana me ko'u makuakane, a no ia kumu i hoike maopopo ole mai ai o mama ia'u i kahi mea nona.  I kuu manawa e haupu ae ai no ko'u makuakane a ninau aku la ia mama e ike koke aku ana au i ka haikea loa o kona helehelena me ka hoihoi ole o kona noonoo i ka'u nana aku, no ia kumu, i ka wa i loaa ai ia'u ka ike ua hoopau loa au i ka hoouluhua hou ana aku iaia, aka nae, ia'u i ulu mau ae ai a nui kupono i ka hoounauna.  ua ulu nui pu kuu makemake e loaa ia'u ka ike maopopo no ko'u makuakane, no ka mea i kekahi manawa, ia'u e' ike aku ai i kekahi mau kaikamahine me ko lakou mau makuakane, e ui mau iho ana au ia'u iho aia la ka ihea ko'u makane, o kuu makane, o kuu mama wale no ka'u e ike mau aku nei imua o ko'u alo a iaia wale no ko'u aloha e holo aku ai, oiai nae, in a nei no ka noho pu mai o ko'u makuakane aole no e nele ana ko'u mahele like i ko'u aloha mawaena o laua a elua."

"He wahi mea iki no anei kekahi e hiki ai ia oe ke hoomanao ae nona?" i ninau aku ai o Rupata.

"Aohe; e i auanei e ua ike au iaia.  Mamua o ko'u hoopukaia ana mai i keia ao ua kauohaia ae la oia e hoi mai i Enelani nei he mau pule kakaikahi mamua aku, a mai ia manawa mai ana o ka hoi ana mai no ka ma'i o kona mkuahine, mai ia manawa mai kona nalowale ana ahiki i keia la.

"Nalowale! Auwe, ua haule anei oia iloko o ke kai a piholo! O, he mea kaumaha loa maoli ka kela! Aole no e nele aku la ka hoehaeha loa ia o ko Mrs. Alekanedero noonoo, a ke manao pu nei au he wahine opiopio loa aku la no hoi paha oia ia manawa o laua i kaawale ai, no ka mea, o ia mau no kona ano opiopio i ka nana aku."

"Ae: he iwakalua a oi liilii wale no kona mau makahiki ia manawa," wahi a Veki.

"Ae: pela no ka'u hoomaopopo aku," i pane ae ai o Rupata.  "A malia paha o hele aku olua e makaikai i ka home o ko makuakane oiai eia hoi olua i Enelani nei i nei manawa."

"Ua ninau aku au no ia hele aku o maua i kekahi la a o ka mea kupaianaha loa a'u i ike aku ai ma kona helehelena ua keokeo loa oia oia no oe o ka apana lole keokeo i hoopiliia aku ma kona papalina, a no ia anoe ana on a o ko'u hooki loa no ia aole au i ninau hou aku no ia mea ia mama.

"Wahi  a mama o ka pane ana mai ia'u i kekahi la, hookahi wale no kumu koikoi nana i hookokono mau iaia e holo mai i Enelani nei, aole nae oia i hoike maopopo mai ia'u, o kana wale no o ka hoike ana mai no ka imi ana no ka ia no ko'u pono, a ia manawa i pau ai o kana kamailio ana mai naka wale ae la no kona kino me he mea la ua haukeke paha i ke anu, a i ole he mea hoehaeha loa paha kekahi iaia iloko o kona noonoo, a i ole he mea paha kekahi ana i weliweli a i ole i piha ai i ka inaina.  Hamau!  E i aku oia ke hele mai la iloko nei e hui me kaua."

O ko Mrs. Alekanedero manawa ia i komo mai ai iloko a ka rumi a laua e noho ana, a iaia i ike mai ai i na helehelena hauoli o na opio haawi mai la oia i kekahi minoaka; ma ka Veki manawa i ike mai ai i kona mama ua hoohuoi koke no oia he mea huna kana e hoike mai ana ia laua, a i ole he nuhou hookaumaha noonoo paha, mamuli o ka ula o ko ka makuahine mau maka, me he mea la he uwe kana hana o ka noho ana mai maloko o kekahi rumi aku.

"E Mrs. Alekanedero, ua haawi mai nei o Veki nei i kona puuwai na'u," wahi a Rupata o ke kamailio koke ana aku, a hopu koke iho la no i ka lima o Veki a alakai aku la iaia imua o ka makuahine.  "Hoohiki mai nei o i nei imua o'u e lilo ana oia na'u, a e apono pu mai ana hoi i ko Veki nei manao no kona ae ana e lilo i wahine mare na'u.   Pela ana anei, e. Mrs. Alekanedero?"

"E haawi aku ana au ia mea me ka oiaio loa," a he ano pihoihoi nae kona i ka manawa i huki aku ai ia Veki a pili iaia a honi iho la ma ka a-i o ke kaikamahine a i ka papalina pu.  "E haawi aku ana au iaia nau a no ka mea ua ike au he kane kupono loa oe no i kuu milimili i mea punahele nau a e hoolilo ana oe ia olua iho i mau mea e ola ana me ka hauoli mau.  Eia nae, e ike mai no oe i keia, he hana mama ole a maalahi hoi na kekahi makuahine ka hookaawale ana aku i kana mea hookahi i aloha ai i ke kanaka e, oiai o ka'u hanaukahi wale no keia, a o ka momi hoi o ka puuwai, a i ike iho hoi ua huhukiia ae kona aloha mai a'u ae a kanuia aku iloko o ka puuwai o kekahi mea okoa."

"O, e mama, aole loa e huhukiia ae ana kou aloha mailoko lilo ae o kuu puuwai a kanuia aku a pau loa iloko o ka puuwai o ka mea okoa!" alaila apo mai la i ka makuahine, me ka haale mai la o na waimaka ma kona mau lihilihi, "aole loa e hiki ia mea ke hanaia.  Aole kuu mare ana aku i ke kane he kumu ia e hoemiia  mai ai o kuu aloha nou. aole, oiai nae au-"

"Oiai oe e aloha aku ana ia Rupata nei a oi aku ea, i kahamaha koke aku ai ka makuahine.  "O ka'u no ia e ike nei a e pili mau mai ana i kuu alo.  aole hiki ia oe ke hoopoina i ke aloha ana aku nona, o kuu makemake no ia o ko olua aloha kekahi i kekahi, a mai ae hoi i kekhi ao hakumakuma e hoopouli ae mamua o ko olua alahele; mai ae i kekahi mau mea alalai e ku mamua a i ole mawaena o olua e hoopauia ai ko olua aloha a hilinai ana o kekahi i kekahi.

"O, e kuu keiki!" me ka leo ka ehaeha, oiai oia e puliki mai ana i ke kaikamahine a pili i kona umauma, a i ka nana aku aneane loa oia e poina aia la mahea oia kahi i ku ai ia manawa.  "Ua oi aku kuu pono e hoomoe aku ia oe iloko o ka luakupapau i keia la mamua o ka ike ana aku e ola ana oe me ka hoehaehaia elike me ko'u hoehaehaia ana!"

"E mama, heaha kou manaoio ma kena mau huaolelo, au i kamailio mai la?  Ke maopopo ole aku la ia'u la kou manao; eia hou aohe a'u manawa mamua aku nei i ike aku ai ia oe i kou hoopihoihoi loa ia elike ma ia i keia la.  E mama, in a he ma'i kou a nolaila mai ke kumu o kou hoopihoihoihoiia ana, mai huna mai oe ia mea ia'u, e hoike koke mai ano."

"E huikala mai oe ia'u, e kuu milimili, no ko'u hoike ana aku i kekahi hiona e hookaumahaia aku ai kou noonoo, a i ole no ka hoike ana aku paha i kekahi aka e lilo ai ia i mea alalai i kou hauoli ma keia manawa au i ike iho ai ua loaa ia mea ia oe, aka nae, na ia hauoli ou i keia la i hoala hou mai i na mea hoehaeha he nui i hala a lilo ko'u hauoli i mau manaolana poho, na manaolana hoi i o'u kokokeia ae iloko o na la makamua loa o ke kupulau o ka noho hauoli ana ia'u iho me he mea kuewa la e hele ana i ke ala me ka waimaka.

"Eia nae, e kuu Veki aloha, mai nana mai oe i ko'u ehaeha  o na la i hala, mai lilo i mau mea noonoo nui nau, no kou ola ana ma keia mua aku; ke ike e aku nei no au he malaelae kou alahele a e hauoli ana oe, e nui a hu ana kou hauoli, ke olina mai la, i ka'u ike aku, na kukuna malamalama o ka noho hauoli ana, a ke ike e nei no hoi au i ko'u hewa no ka hoakaka mua ana aku nei ia oe i mea nou e hookaumaha ai."

Emi aku la o Veki ihope he mau kapuai a haka pono mai la kona mau maka maluna o kona makuahine me ka piha loa i ke kahaha a me ke pahaohao pu no ka ka makuahine mau olelo o ke kamailio ana aku la iaia me he olelo nane la, a i ole me mau olelo la i kamailioia mai me ke ohewahewa o ka noonoo, a pane mai la:

"E mama, ua hoopiha loa mai oe ia'u me kahaha i keia minuke," wahi ana; "akahi no a loaa iho la keia noonoo ia'u ua hunakele loa ka oe i kekahi mau mea mai ia'u aku iloko o na la a pau o ko'u ola ana.  Ua pinepine no na manawa a'u o ka hoohuoi ana, a mamuli o kou piha loa i na manao pihoihoi ua hoopiaio ia mai ka'u mau mea i hoohuoi ai nou i keia la.

"Ina ua ike oe i kekahi mau haawina kaumaha iloko i ka wa i hala, in a ua halawi mai me oe kekahi mau hana hoopilikia o ka wa i hala, in a, no ka mea e pili ana i kuu makuakane, elike me ia a'u i hoohuoi ai, ke manao nei au a no ka manawa e hoike mai ana ia'u me ka huai oleia ae, a e komo pu aku no au e auamo pu i na ehaeha apau me oe, a i ole, e hooikaika no au me ka pauaho ole e hoomamaia ae kou naau kaumaha, in a e hiki ana ia mea ke hanaia."

Ua lilo keia mau olelo a Veki i ka makuahine i mea no ka makuahine e noonoo nui ai, no kekahi mau minuke kona ku ana me ka puai leo ole, a i ka hala ana o kekahi manawa, a me ka hiona hoi e hoike ana ua loaa kana olelo hooholo, i mai la:

"Ua noho like aku ilalo, e a'u mau keiki, a e hoolohe mai ia'u a mai kahamaha mai olua ahiki i ka pau ana o ka'u kamailio ana.  Ke manao nei au ua hiki mai ka manawa a o ia no keia, e huai ae ai au i na meahuna a pau iloko o kuu puuwai a hoike aku ia olua i na mea oiaio apau iloko o ko'u mau la o ke ola: imua ou. e Veki, ka pololei loa a'u e ho'ike aku ai, aka nae, oiai hoi o Rupata oia pu kekahi me kaua i keia manawa, a e lilo ana hoi oia kekahi lala o ka ohana ma nei mua aku, he mea pono no ia'u ke hoike aku imua o olua a elua, he hoomama ana mai no hoi ia i ka hana ma ko'u aoao, aole hoi e palua aku ke kamailio ana, a o kekahi no hoi, aohe i lawa ka ikaika iloko o'u e kuekaa hou aku ai i na mea i hala no kekahi mau manawa lehulehu, nolaila e hoolohe mai.

"A eia hou; malia e hiki pu ana no paha ia oe, e Rupata, ke haawi mai ia'u i kekahi oleloa'o e pili ana i kekahi hana nui a'u e noonoo nei a e hooko koke aku ana ma nei mua koke iho."

I ka lede i hooki iho ai i kana kamailio ana, noho iho la oia ma kahi kokohe mai i na opio, he helehelena hoi kona i like me ke kii mabala a ka poe hana mamua o ke kino ola, a he hiona hoi me he mea la e aneane ana e haalele mai i keia ola ana, mahope iho o kona hoike ana i kona hewa, a i ole i ka hewa a kana kane a i ole a kona mau enemi paha i hana mai ai maluna on a, a i lilo ai hoi ia mau hewa i hanaia i kumu no ka hooluuluuia ana o kona naau no na makahiki he nui i kaahope aku.

(Aole i pau)

 

HE MOOLELO NO

ALIKA

A I OLE

Ke Ao Omamalu o Kekahi Karaima Pohihihi

Mamuli o ka Manao Lili

 

O ka wahine nona ka hale hoolimalima a Lola i noho ai, kekahi i komo pu mai iloko o na auamo ana, i na haawina ehaeha, i kau aku maluna o ke kaikamahine opio, oiai, ua pili aloha kona manao me Lola, iloko o kela mau mahina o ko Lola noho ana maloko o kona hale, a ua lilo hoi ko Lola hookani mau i kana piano, i mea e hoohauoli loa ia aku ai ua wahine nei.

Malolo o na hooponopono maikai ana, ua waihoia no ko Lola mau ukana apau maloko o kela hale, me ko Lola uku nae, i ka hoolimalima, o na mahina ekolu, me ka manao nae, in a no ka lanakila o Lola mai na hana imihala mai a kona enemi, alaila e huli hoi hou mai no oia, a noho maloko o kela home, a in a no kona hoahewaia, alaila o Mrs. Vana Dona, ka mea nana e hooponopono aku i kona mau ukana, elike me kana mea i ike ai he pono.

Me ka malu wale no kela mau hooponopono ana, no ko Lola hopuia ana me ka lohe ole o ka lehulehu, ahiki wale no i ka hoea ana o ke kaikamahine opio ma Nu Iola aka nae, i ka wa i oili ae ai na meahou maloko o na nupepa, ua momoku mai la na wahine lalawai imua o Mrs. Vana Dona, me na olelo o ka ano hoohenehene, a hoahewa i kela wahine, no ka lawwe ana mai ia Lolla, i kaikamahine nana e himeni i na anaina hoohauoli.

Ua maopopo mua no nae ia Mrs. Vana Dona na mea e hoea mai ana, nolaila ua hoomakaukau e oia i kana mau pane e waiho aku ai imua o kela poe.

Ma kekahi la hoea okoa aku la he wahine o Mrs. Gavila ka inoa imua o Mrs. Vana Dona, a i aku la ma ke ano hoopaani:

"Pehea la oe i lawe mai ai i kekahi hana apuhi, imua o makou?" wahi ana me he mau olelo lealea loa la kela ana o ke kamailio ana aku.

Nana pono mai la o Mrs. Vana Dona i kona hoa kamailio, a pane mai la ma ke ano ninau?

"Heaha ka manao o kau mea i kamailio mai nei no ko'u apuhi?"

"Heaha auanei, ua maopopo no ia oe e Mrs. Vana Dona, ka manao o ka'u mea i kamailio aku la, e pili ana no ia no kela wahine opio i huna i kona ano oiaio," i huna i kona ano oiaio," i pane hou aku ai o Mr. Gavila, me ka pahola ana ae o ka ula ma kona mau papalina.

"Alaila, in a he mau hoahewa ana kekahi maluna o'u, e holo like aku ia mau ahewa ana maluna o ka poe apau, na lakou i hookipa mai iaia, iloko o ka lakou mau anaina hoohauoli.'            

Ua kamailioia mai kela mau olelo me ke kuoo e Mrs. Vana Dona, eia nae, ua loaa pono aku la o Mrs. Gavila, ka mea ana i noonoo mua ole ai, e hoi hou aku ana no maluna on a, ka pohaku ana i nou mai ai maluna o Mrs. Vana Dona.

"E hoomanao hoi paha oe, he hewa nui a ko'iko'i loa, ka hookamaaina ana mai i kekahi wahine pepehikanaka, iwaena o kou pohai, a o ka mea oi loa aku o ka pilikia, o ia no ka hapala wale ia mai o kou ohana, no ka launa mau me kela wahine hana karaima," me ka hoopinana ana ae o na poohiwi o ua wahine nei.

"Ke kaumaha loa nei au no ka hoopilikiaia ana o kou noonoo e Mrs. Gavila, ame ko ka pohai o ka poe kiekie, no ka hoohaahaaia ana o ko oukou mau kulana, mamuli o na hana hookipa a oukou i paholo aku ai imua o Miss Perekona, kela wahine opio au e hoahewa mai nei imua o'u, aka no'u iho, aole loa i hoopilikiaia mai ko'u noonoo ma kekahi ano."

Ua loaa pono aku la o Mrs. Gavila no keia no keia mau olelo a Mrs. Vana Dona, me ka haikea ana ae o kona helehelena, e hoike okoa aku ana no kona ku i ka hoka, aka pane mai la nae, i ka i ana mai:

"O ka hele ana o kela wahine opio, ma kekahi inoa kapakapa, aole ma kona onoa ponoi, ua lawa ia no ke kau ana aku o na ahewa ana maluna on a, e loaa ole ai na huikala ana aku iaia ma kekahi ano," wahi ana me ka leo pikanana.

"He hookahi wale no huapalapala ana i kapae ae ai mai kona inoa mai, a hookomo mai la i hookahi huapalapala okoa ma ia wahi, o keia anei ka hana e ahewaia aku ai oia?"

Aole o Mrs. Vana Dona i makemake e hoehaeha aku i ka manao o kona hoa olelo, aka nae iloko o ia manawa hookahi, aole oia e haawipio aku ana malalo o kela wahine aka e ku ana oia a paio no ko Lola pono, ma ka nana ole, in a no ia he kumu, e haalele mai ai kona mau hoaloha iaia, a o ia ka ua wahine nei i hoomau hou aku ai i ke kamailio ana, me ka leo oluolu nae:

Aole o Mrs. Vana Dona i makemake e hoehaeha aku i ka manao o kona hoa olelo, aka nae iloko o ia manawa hookahi, aole oia e haawipio aku ana malolo o kela wahine aka e ku ana oia a paio no ko Lola pono, me ka nana ole, ina no ia he kumu, e haalele mai ai kona mau hoaloha iaia, a o ia ka ua wahine nei i hoomau hou aku ai i ke kamailio ana, me ka leo oluolu nae:

"Auhea oe e kuu hoaloha, e noi aku ana au ia oe, e lawelawe kakou i kekahi mau hana ku i ke aloha, iloko o ko kakou ola ana.  Malia paha aia he mau popilikia e halawai mai ana me kakou i kekahi la, nolaila mai lilo ka pilikia i kau aku maluna o kela wahine opio, i kumu no kakou e hoinoino aku ai, a e kamailio ai paha i na olelo kupono ole.

"Ma ko'u manaoio maoli, o kela wahine opio, a ka pohaio ka poe lalawai o kakou e noke nei i ke kamailio me na olelo hoinoino nona, oia kekahi o na wahine maemae a pili ole i kekahi hewa, elike me ia aku maluna on a.  He wahine opio oia i loaa na hoonauauao kiekieia, a he kulana lede oiaio kona ma na ano apau i oi ku no imua o kekahi poe wahine o kakou.  Ma waho ae o keia mau ano kilakila i loaa iaia, oia kekahi o na wahine waiwai loa, a mamuli wale no o na ulia pakalaki o ka manawa, i haalele aku ai oia i kona mau waiwai, ka hanohano ame kona kulana iwaena o ka poe ko'iko'i o Nu Ioka, a imi mai la oia i ke ola o kona noho ana, ma ka hana himeni."

"Ua ike au i kena mau mea apau au e kamailio mai nei e Mrs. Vana Dona maloko o na nupepa; aka o ka mea i oi loa aku ai na ahewa ana e pono ai e hookauia aku maluna on a, o ia no kona pepehi maoli ana i kona hoahanau a make, mamuli o ka makee i ka waiwai," i pane mai ai o Mrs. Gavila.

Pii mai la ka ena ia Mrs. Vana Dona, no kela mau olelo a kona hoa kamailio, a o ia kana o ka pane ana aku:

"O ka põe apau e nana aku ana ma na maka o kela wahine opio, a hoomaopopo aku i ke ano o kana mau olelo, ame ke ano o kona ola ana, aole ana e nele ka loaa o ka ike ia lakou, no ka piha o kona puuwai i ka maemae, ka pololei ame ka pono. 

"He oiaio, elike me na moolelo a na nupepa i hoakaka ae ai, aia kekahi mau ike no kona pili i ha hewa, ma ke karaima pepehikanaka me ia mau moolelo no nae, ke paa nei kuu manao, ua like no kona hewa ole, me oe ame a'u e noho nei maloko o keia keena.  E hoomanao e kuu Mrs. Gavila maikai, he mau kino ko kakou i hanaia, ma ka hoohalike ana me ke ano o ke Akua, a he mau luakini kakou apau no ka Uhane o ka Mea nana i olelo mai: 'Pomaikai ka poe e aloha aku, no ka mea e alohaia mai lakou!"

"Ina e hoomaamaa ana kakou i na haawina ku i ke aloha, Ana i a'o mai ai ia kakou, aole loa kakou e hoopilikia ana ia kakou iho; a e hoopakeleia ae ana kakou, mai ka lawelawe ana aku i kekahi mau hana hewa lehulehu; a aole hoi kakou e kunana wale aku ana, ma ka hooko ana i na hana, e pomaikai ai o ha'i."

Me keel mau olelo hope mai ia Mrs. Vana Dona aku ku ae la oia iluna, a haawi mai la i kona lima akau no ke aloha ana. alaila huli hoi mai la o Mrs. Gavila no kona home, me ka noonoo nui ana, i na olelo i kamailioia mai iaia, e pili ana i ka rula kula, ka mea ana i noonoo mua ole ai iloko o na la apau o kona ola ana mamua aku.

Aole nae i lilo na olelo ikaika a Mrs. Vana Dona i waiho aku ai imua o Mrs. Gavila, i mea nona e haaheo ai no ka hiki ana iaia ke hoohoka aku i kela wahine i piha me na manao haaheo no ka mea ua ike no ia, ua hoehaeha aku oia i kona mana@ aole, no ka manao maikai ole iloko ana, aka no kona haawi ana aku i kekahi haawina a'o kupono loa, e hoololi ai kela wahine i kona mau mahope aku.

He nui hou ae no kekahi poe wahine o ke kulana hanohano i hoea mai imua ona, me ka lakou mau olelo hoinoino no Lola.  e hooili  ana i na ahewa ana maluna oia nei no ka lawe ana mai i keia wahine opio, a hoolauna ae iwaena o ka pohai o ka poe hanohano, he hookahi no ana ano pane imua o lakou apa@ o ia no ke kupale ana no Lola, me ka hoike ana aku imua o lakou me ka hookamani ole, i ka maemae a pili ole o kekahi hewa i ka wahine opio.

Ua hoopiha maolie ia no o Mrs. Vana Dona me na manao hoowahawaha no na wahine i like mai ko lakou mau kulana hanohano me kona, i ka nui o ko lakou nema me ka hoahewa wale aku maluna o Lola.  oiai nae, iloko o na la i hala aku o kela no ka poe, na lakou na olelo pai me ka mahalo iaia, he mau mahalo wale no nae ma ka lehelehe ua piha ko lakou mau naau me ka hewa ame ka hookamani.

 

MOKUNA XXI.

 

Ma kela hoea ana aku o ke kaahi no Nu loa, ua hoihoi pololei ia aku la o Lola a hoopaa maloko o ka halepaahao, elike me na kanaka hana karaima apau.  Ua hoonohoia oia maloko o kekahi keena uuku, i hanaia me ka paa loa.

Ua hoea ae no o Kauka Vana Dona ma ka hale hoolulu kaahi, elike me ke kauoha a kona makuahine iaia, ma ke kelekalapa, a oia pu me Akeneki ka i ukali mai ia Lola, ahiki i ka halepaahao, ilaila i haalele aku ai o Akeneki, i kona hoaloha e noho hookahi, me ka hoomanawanui ana i na hana hoehaeha a hoomaewaewa i kau aku maluna ona.

Aole i lilo kela hoopaaia ana aku o Lola maloko o ka halepaahao, i kumu no ua kaikamahine nei, e maule ai, a e hookaumahaia ai paha, ua hoao oia e hoomanawanui i na haawina hookaumaha me ka manao koa.  ka mea hoi nana i kono aku i ka makaikiu, e haawi mai i kana mahalo ana ia Lola, no ka like ole o kela wahine opio, me ka hapanui o na wahine e ae i halawai me na pilikia o kela ano.

He hookahi nae kumu nui o ke kiola ana aku o Lola i kona mau noonoo kaumaha apau, a pulama mai la i na manaolana.  no kona makemake nui no ia, e ike hou ia Elioka, a o ia kanao ka puana ana ae i keia mau olelo, iaia i noho hookahi aku ai maloko o kona keena.

"Ina nei no ka loaa aku o ka lohe ia Elioka, eia au maloko nei o ka halepaahao aole ana e nele kona hele mai e ike ia'u i ka la apopo; a nana auanei e a'o mai ia'u, i ke mea pono e hana ai ma ko'u hihia, a he mea hoolana mai no hoi i ka mana@ ka noonoo ana ae, oia wale no ko'u hoaloha o keia wahi.  Pehea la, e hele mai ana no paha o Ante Roka e ike ia'u?"

Aole loa he wahi manao iki iloko o Mrs. Wadona e hele mai e ike i ke kaikamahine ana i hoohiki ai, e hookau i na hoopilikia he nui maluna on a, ua lohe no oia aia o Lola maloko o ka halepaahao, eia nae e hoomamao ana oia iaia iho ma na wahi e hiki ole ai iaia ke lihi kokoke aku i ka halepaahao, oiai aia mau iloko on a na manao hoowahawaha no ke kaikamahine. nana i wawahi aku i kona mau manaolana a weluwelu liilii.

Ua poho wale nae kela manaolana iloko o Lola, no ka hoea koke aku o Elioka e ike iaia ma kekahi la ae, no ka mea ke waiho mai la ua kanaka opio nei iloko o kekahi ma'i kupilikii, malalo o ka lapaau ana a kona hoaloha, ke Kauka Vana Dona.

Ma kela hoi ana aku a Kauka Vana Dona, a hoike aku la imua o Elioka no ka hopuia ana o Lola, no ke karaima pepehikanaka, ua hele oia a piha loa me na manao kuaki, me ke ake nui e ike i ke kaikamahine ana i aloha ai, eia nae he hana hiki ole loa ia, oiai oia iloko o ka ma'i pilikia loa.

Aole no nae he mau kumu nui o ka loohia ana o Elioka i ka ma'i, mamuli mai no ia o kona noonoo loa no kela nalowale ana o Lola, a hui pu iho no hoi, me kona hooikaika loa, ma ke pena ana i kekahi mau kii, no ka hoikeikeia aku, ua lilo ia i mea e hoonawaliwaliia mai ai kona ola kino, ahiki i ka ma'i okoa ana.

Ma keia wahi, he mea pono i ka mea kakau moolelo, ke hoakaka iki aku i kekahi mau mea kupainaha i oili ae, iloko o keia mau la, e kakaliia ana o ka hoea mai i ka wa e hooloheia ai ka hihia pepehikanaka o Lola.

Ma kekahi la, ia Mrs. Wadona o ka hele ana aku no ke ke@na o kona loio, a iaia i huli hoi mai ai no kona home, e waiho ana kekahi kelekalapa i hoounaia mai iaia, mai kahi mama@ mai, maloko o kela kelekalapa, e hoakaka ana ia. aia ka hoahanau o kona makuakane iloko o ka ma'i pilikia loa he waiho la ma ka'e o kona moe make, a e kauoha mai ana i ua o Mrs. Wakona e holo aku e 'ike iaia, me ka hoohakalia ole.

O Keoni Hikona ka inoa o keia kanaka ua lohe wale no oia i kela inoa, aole nae i kamaaina iaia.  O keia ke kaikuaana o kona makuakane a o ka mua loa no hoi o na keikikane iloko o kela ohana, aia paha kona mau makahiki mawaena o ke kanahiku ame ke kanawalu.

Iloko o na la opio o Keoni Naika Hikona, ua holo aku oia no ke Komohana, a iloko o na makahiki loihi o kona kaawale ana mai kona aina hanau aku he elua wale no ana manawa i huli hoi mai ai e ike i kona ohana, o ka manawa mua loa. mamua o ka mare ana a Mrs. Wadona i kana kane, he umikumamalima no on a makahiki ia wa, a o ka lua o ka manawa o ka hoi hou ana mai, i ka manawa e waiho ana ka makuakane o ua a Keoni Hikona i ka ma'i, me ka ike ole nae o Mrs. Wadone iaia. 

Ua maopopo i ua o Mrs. Wadona, he wahine ka kela kanaha, ua make he mau makahiki i hala, a he elua a laua mau keiki, he hookahi keikikane me hookahi kaikamahine, aole nae oia i lohe, ina paha ke ola nei kela mau keiki, ua make paha, nolaila ma ke ano nui ke olelo ae, he uuku loa na mea a Mrs. Wadona, i hoomaopopo no keia kaikuaana o kona makuakane.

I kinohi, aole he maopopo iaia kana mea e hana aku ai no kela kelekalapa, aka mahope o ka noonoo ana me ke akahele loa, a no kona manao paha aia kekahi mea nona e pomaikai ai.  ma ka hooko ana mai i ke kauoha e hoea aku oia, nolaila hooholo iho la oia, he oi ae ka pono, e hele oia e hooko elike me ke kauoha ma kela kelekalapa.

Iloko o na la helu wale no mahope mai, ua hoea i'o aku @@ ua o Mrs. Wadona, imua o Keoni Hikona, a i wa i lohe ai kela kanaka, ua hoea aku ka mea ana i makemake ai e ike, kauoha mai la oia, e hele koke aku o Mrs. Wadone imua on a, no ko laua kamailio ana maluna o kekahi mau mea.

(Aole i pau)