Ka Nupepa Kuokoa, Volume XLIII, Number 20, 19 May 1905 — Page 7

Ka Nupepa Kuokoa

KE KILOHANA POOKELA NO KA LAHUI HAWAII.

 

                                                            NUPEPA  KUOKOA,  POALIMA,  MEI  19,  1905.                                         @1

 

Kanawai  Kalana  o  1905  a  me  na  Kanawai  Pakui  a  Hoololi.

---

Mai  ka  aoao  eono  mai.

MOKUNA  12.

 

KOHO  BALOTA  MUA.

           

            PAUKU  51.  E malamia ke koho balota mua no na Luna Oihana Kalana ma ka la iwakalua o Iune, M. H. Umikumamaiwa Haneri ame Elima, a o na Luna Oihana i kohoia pela e noho lakou ma ka Oihana ma ka la mua o Iulai, M. H. Umikumamaiwa Haneri ame Elima, a e noho hoi ma ka oihana a hiki i ka hora umikumamalua o ke awakea o ka Poakahi mua iloko o Ianuari, Umikumamaiwa Haneri ame Ehiku.  O na kanawai laula ame na rula e hooponopono ana i ke koho ana i na Senatoa ame na Lunamakaainana o ka Teritori e mana no ia ma wahi i hiki ke hoohanaia.

            PAUKU  52. O ka olelo kuahaua no ke koho balota mua ana o na Luna OIhana Kalana e hanaia no ia e ke Kiaaina mahope koke iho o ka hooholoia ana o keia Kanawai.  O ua kuahaua nei i oleloia e kahea no ia no ke koho balota maloko o kela ame keia Kalana, a ma na ano e ae no hoi e like no ia me ka olelo kuahaua i kauohaia i keia wa ma ke kanawai e hoopukaia no na koho balota nui.  E hoolahaia ua olelo kuahaua nei i oleloia ma ke ano i kauohaia i keia wa e ke kanawai no ka hoolaha ana i na olelo kuahaua no na koho balota nui.

            PAUKU  53.  O na palapala noi no a Luna Oihana Kalana e kohoia ana ma ia koho balota ana, e hanaia no ma ke ano like a iloko no hoi o ia manawa a waiho aku i ke Kakauolelo o ka Teritori, e like me ka mea i kauohaia i keia wa ma ke kanawai e pili ana i na palapala noi o na Senatoa ame na Lunamakaainana.

            PAUKU  54.  Na ke Kakauolelo o ka Teritori e hoomakaukau i na balota no kela ame keia Kalana a hoouna aku ia mau mea i na Lunanana Koho Balota o kela ame keia Mahele Koho.  O na mau balota la i keokeo kona waihooluu a kulike hoi kona kino, ano ame ka manoanoa.  Na ke Kakauolelo o ka Teritori e hoolako aku no ua koho balota la, i mau pahu balota kupono a e hoailonaia " Na Luna Oihana Kalana. "

            PAUKU  55.  O na mahele ame na wahi koho i hoonohoia ma na kanawai o ka Teritori no ke koho ana i na Senatoa ame na Lunamakaainana oia no na mahele ame na wahi koho balota no keia koho balota ana.

            PAUKU  56.  O na apau i hoopaa maoli ia ko lakou mau inoa malalo o na kanawai o ka Teritori e koho i na Senatoa ame na Lunamakaainana ma ke kau koho balota nui i hala, ua kupono lakou e koho i na luna oihana Kalana ma keia koho balota ana.

            PAUKU  57.  E lawelawe no na Lunanana Koho Balota i na hana apau i pili i keia koho balota i kauohaia ma ke kanawai e pili ana i ke koho balota, no na Senatoa ame na Lunamakaainana koe nae ka hoouna ana i na hoike i kauohaia e hoounaia aku i na Lunamakai e hoounaia aku i ke Kakauolelo o ka Teritori.

            PAUKU  58.  Ma ka wa koke e loaa mai ai na hoike koho balota mai na Papa Lunanana Koho Balota lehulehu mai oloko o kekahi Kalana, e hoonohonoho papa ke Kakauolelo o ke Teritori i ua mau hoike la a e hoomaopopo hoi i ka hopena o ke koho balota maloko o ua Kalana nei.  O na poe i loaa ka heluna kiekie o na balota maloko o ua Kalana la e kukalaia aku no ua kohoia lakou, a e haawi koke aku ke Kakauolelo o ke Teritori i na palapala hoike koho balota i na poe i kohoia.  Ina hoi e ikeia mamuli o na hoike koho balota, aohe luna oihana Kalana i kohoia mamuli o ka pa ʻ i a pa ʻ i ana o na balota mawaena o elua a oi aku mau moho holo balota, e kauoha no ke Kiaaina e malamaia ona koho balota kuikawa no ka hoopiha ana ia hakahaka, a e malamaia hoi ia koho balota ma ke ano i kauohaia no keia koho balota.

            PAUKU  59.  E lawelaweia no na kue koho balota e like me na mea i hoakakaia maloko o ka Mokuna 11 o keia Kanawai.

 

MOKUNA  13.

 

HOOPAU  ANA  I  NA  LUNA  OIHANA.

 

            PAUKU  60.  E hiki no kekahi Luna Oihana Kalana ke hoopauia no kona hana hewa, a i ole ia, no ka lawelawe hewa ana iloko o ka oihana.  E lilo ka Papa Lunakiai o kela ame keia Kalana i Papa Hoopii no ka hookolokolo ana i kekahi Luna oihana i kohoia o ke Kalana i hoopiiia ae no ka hana hewa a i ole ia no ka lawelawe hewa ana iloko o ka oihana, e na poe koho balota ku i ke kanawai i emi ole iho malalo o iwakalua-kumamalima ( 25 ) oloko o ke Kalana.  E hoikeia aku ua luna oihana la i ka hoopii i hanaia e ku-e ana iaia, a e haawiia i manawa nona e pale ai iaia iho mai ia hoopii mai.  He mana ko ua Papa Hoopii la e hoolohe a e hooholo i ua hoopii nei i oleloia, a ina e kakooia ua hoopii la, e hoopau aku i ua Luna Oihana la i hoopiiia mai mailoko aku o ka oihana, a e hoopiha i ka hakahaka i loaa ma ia ano mamuli o ka hookohu ana aku i kekahi kanaka i kupono e hoopiha i ua oihana la i oleloia no ka manawa aku i koe.  Aka nae hoi, ma ka mea e pili ana i ka hoopauia ana o kekahi hoa o ka Papa Lunakiai, o ka hakahaka i loaa ma ia ano e hoopihaia no ia mamuli o ka hookohu ana a ke Kiaaina no ke koena aku o ka manawa pau ole o ua hoa nei.

            PAUKU  61.  O na hakahaka i loaa mamuli o ka make, haalele ana a i ole hoopauia ana o kekahi Luna Oihana Kalana e hoopihaia ma ka hookohu ana a ka Papa Lunakiai, ke ole nae ia hakahaka iloko ponoi o ka Papa Lunakiai, a ma ia ano, oia hakahaka e hoopihaia no ia ma ka hookohu ana a ke Kiaaina no ke koena aku o ka manawa pau ole o ua hoa nei.

 

MOKUNA  14.

 

NA  MANA  AME  NA  HANA  A  KA  PAPA  LUNAKIAI.

 

            PAUKU  62.  He mana laula ko ka Papa Lunakiai no ka hooponopono ana ame ka hoomalu ana i na hana apau o ka lehulehu iloko o ko lakou mau Kalana pakahi ame ka hooponopono ana i na Luna Oihana apau malalo mai a ma ke ano ole hoi ku-e ana i na mana laula mamua ae nei, e loaa no ia lakou keia mau mana maopopo :

            1.  E kau i na uku o na luna oihana Kalana apau i hoakaka ole ia hoi ma kekahi ano e ae maloko nei ;

            2.  E hookohu aku i na luna oihana apau malalo mai e like me ka lakou i manao ai he pono no na hana o ka lehulehu ;

            3.  E hoomana aku a e hooponopono i na hoolilo ana o na loaa apau o ke Kalana.

            4.  E hooko aku i na koi apau ma ka aoao o ke Kalana a e apono i na koi kupono apau ma ke kanawai e ku-e ana i ke Kalana ;

            5.  E hooponopono mamuli o ka olelo kauoha maloko o na palena o ke Kalana i na kuhikuhi apau o ka Oihana Makai, Oihana Ola ame na kuhikuhi a ka Papa Ola o ke Teritori, a e kau hoi i hoopa ʻ i no ka uhakiia ana o ia mau olelo kauoha ;

            6.  E hooponopono ma o ka olelo kauoha la i ka lawe ana, hoahu ana ame ka lawelaweia ana o na mea pa-hu ame aila aa, a e kau i hoopa ʻ i no ka uhakiia ana o ia mau olelo kauoha ;

            7.  I kulike ai hoi me na kaupale i hoakakaia maloko o keia Kanawai, e hooko aku i na olelo aelike apau a e hana i na hana apau i kupono a i pololei hoi no ka hooko ana aku i na mana akea o na Kalana.

            PAUKU  63.  Na ka Papa Lunakiai e hoomakaukau ma ka la umi-kumamalima o Dekemaba i kekahi bila haawina, a i ole, i papa hoakaka no na lilo i manaoia no na uku luna oihana ame na ukuhana a no na hana hou iloko o ko lakou mau Kalana iho no ka makahiki e nee mai ana.  O na hoolilo apau i huiia, aole no ia e oi aku mamua o ka loaa o ke Kalana no ia manawa like.

            PAUKU  64.  Aole loa ka Papa, no kekahi hana, e hana i mau aie iloko o ka makahiki hookahi a oi aku i ka loaa makahiki i hoakakaia no ia makahiki.

            PAUKU  65.  O ka hananui o na hoa o ka Papa Lunakiai, oia ke koramu no ka lawelawe ana i na hana, aka nae, i mea e hiki ai ke hooholo i kekahi rula hooponopono, a i ole, e kauoha e hooliloia aku kekahi waiwai o ke Kalana, e kakau hooko hoi i kekahi olelo aelike, a i ole, e apono i kekahi bila haawina, a papa hoakaka paha no na lilo, a i ole ia, hoopau aku i kekahi luna oihana, a i ole, hoopiha i na oihana i hakahaka, he mea pono ke loaa ua rula hooponopono la a kauoha paha e apono ia e ka hapanui o na hoa o ka Papa.

            PAUKU  66.  E malama ka Papa i na halawai mau no ka lawelawe ana i na hana o ka lehulehu e hoomaka ana ma ka Poalua mua iloko o kela ame keia mahina a e mau ka noho ana no na la i like ka nui me ka mea e koi ia ana no ia hana, a e kahea aku no hoi ia i mau halawai kuikawa e like me ka mea e ikeia ana he mea ia e pono ai ka lehulehu.

 

MOKUNA  15.

 

LUNAMAKAI.

 

            PAUKU  67.  Me ka paa ana malalo o na olelo hoakaka no ia mea ma keia Kanawai, ua loaa i ka Lunamakai Kalana o kela ame keia Kalana ka hiki e hooko i na mana apau, na pono ame na kuleana hooko, a e koiia hoi ia e lawelawe aku i na hana apau iloko o kona mana oihana iho, oia hoi ke Kalana i kohoia ai oia, a oia hoi na mana i haawiia i keia wa ma ke kanawai, na ka Lunamakai Kiekie o ke Teritori, a i ole ia, na na Lunamakai o kela ame keia Mokupuni pakahi e lawelawe a e hooko aku ; a e loaa pu no hoi iaia na mana ame na hana e ae i haawiia ma keia Kanawai a e haawiia aku ana paha ma keia hope aku e kekahi kanawai e hooholoia ana e ka mana Ahaolelo ; aka nae, aole e manao ia ma keia Kanawai ua loaa i na Lunamakai o kela ame keia Kalana pakahi ka mana e malama, e paa, a e hoohana i kekahi halepaahao o ke Teritori, a halehoopololei, a i ole hale hoopaa, a i ole ia, o ka malama ana ame ka paa ana i kekahi poe paahao i hoopaaia maloko o ia mau wahi.

            PAUKU  68.  Na ka Lunamakai e :

            1.  Malama i ka maluhia o ka lehulehu.

            2.  E hopu a lawe imua o ka Lunakanawai Apana i hookuponoia e kokoke ana no ka ninaninau ana i na poe apau e hoao ana e hana, a i ole ua hana paha i kekahi ofeni kue i ka lehulehu, a e hoopii aku ma ia hihia malalo o na alakai ana a ka Loio Kalana.

            3.  E keakea a hooki i na hakakalua, kue i ka maluhuia, na haunaele ame na haunaele kipi.

            4.  E lawelawe i na hana o na Aha Hookolokolo Kaapuni apau e malamaia ana maloko o ke Kalana a e hoolohe hoi i na kauoha ame na kuhikuhi apau i ku i ke kanawai o na Aha Hookolokolo apau maloko o ke Kalana.

            5.  Ma kekahi hana i kupono e loaa na kokua a ka lehulehu i pili ia oihana e kahea aku i ke kokua ana o na makaainana kane o ke Kalana e like me ka nui kupono ana e manao ai no ka hooko pono i kana mau hana.           

            6.  E malama a e hoomalu i ka halepaahao Kalana, me na paahao maloko olaila.

            7.  E kakau apono maluna o na palapala aha apau ame na hoike i ka makahiki, ka mahina, la, hora me ka minute o ka loaa ana aku, ame ka hoopukaia ana o ia mea nana e hooko, i ka ukuia ana o na uku kaulele, a e hooia i ka inoa o na poe ma ia hana, ka inoa o ka hihia o ia palapala ame ka manawa i loaa ai.

            8.  E hooko i na palapala hoopii ame na kauoha e like me ke kuhikuhi a e kanawai.

            9.  E hooiaio, me kona lima ponoi, maluna o na palapla hoopii ame na palapala kena, ke ano me ka manawa i hookoia ai, a ina ua hooko ole ia, ke kumu o ka hiki ole ana, a e hoihoi aku me kahakalia ole ia palapala.

            PAUKU  69.  O ka Lunamakai ame kona mau Hope Lunamakai e lilo lakou ma ka lakou mau oihana iho i mau Luna Koronero o ke Kalana, a ma ia ano, maloko iho o ko lakou mau Kalana ame na Apana pakahi e loaa no na mana a hana aku i na hana apau a na Koronero e like me ia i hoikeia ma ke kanawai.

            PAUKU  70.  Ina he palapala hoopii a kena paha no ka hoihoi i kekahi Kalana okoa aku, e hookomo no oia ia palapala hoopii a palapala kena paha maloko o kekahi wa-hi-leta, a e kakau i ka inoa o ke keena i oili mai ai ia, a e hookomo ma ka hale leta me ka uku mua ana no ke poo leta.

            PAUKU  71.  Aole kekahi kuhikuhi a kauoha paha a kekahi mea, ao kona loio paha i kekahi Lunamakai, e pili ana i ka hooko ana i kekahi palapala a hoike ana paha no ka hooko ana i kekahi palapala a hoike ana paha no ka hooko ana a e pili ana paha i kekahi hana a hoohemahema ana paha e pili ana ilaila ; e hookuu a huikala aku paha i ka lunamakai no kona hoohemahema a hana ewaewa ana paha, ke ole e hanaia ma ke kakau ana i kakauinoaia e ka loio ʻ o ia mea a i ole e ia mea no, ina aole ona loio.

            PAUKU  72.  I ka wa e lilo ai ka Lunamakai kekahi mea komo pu ma kekahi hoopii a hookolokolo paha, o na palapala me na kauoha e pili ana ia hana, i hoakakaia ma ke kanawai na ka Lunamakai e hooko, e hookoia no e kekahi Hope Lunamakai ; aka hoi, ina e hoomakaia kekahi hoopii kue i ka Lunamakai o na palapala me na kauoha apau, e hiki no ke hookoia e kekahi mea, he makaainana hoi no na Mokuaina Huiia o Amerika, o iwakalua kumamakahi makahiki, i hookohuia e ka Aha a Lunakanawai paha no ia hana.

 

MOKUNA  16.

 

NA  HOPE  LUNAMAKAI.

 

            PAUKU  73.  E loaa no i kela ame keia Hope Lunamakai maloko o kona Apana pakahi na mana apau a e hana i na hana i hookauia ma ke kanawai maluna o na Hope Lunamakai.

 

MOKUNA  17.

 

KAKAUOLELO  KALANA.

 

            PAUKU  74.  Na ke Kakauolelo o ke Kalana e :

            1.  Hoomalu, e malama maluhia a i ole hoolilo aku paha e like me ke kuhikuhi a ke kanawai, i na buke apau na palapala ame na moolelo apau e waiho pono ia ana iloko o kona Keena Oihana.

            2.  E lilo oia ma kana oihana iho i Kakauolelo no ka Papa Lunakiai, a ma ia ano e hoohana aku i na hana e like me ia malalo iho nei :

            ( a )  Hoopaa i na moolelo apau o ka Papa ;

            ( e )  E hookomo piha i na olelo hooholo apau a lakou me ka lakou mau olelo hooholo maluna o na ninau apau e pili ana i ka imi ana i dala no, ame na koi kue i ke Kalana ;

            ( i )  Hoopaa i ka balota ana a kela ame keia lala maluna o kekahi ninau e loaa ai he kulike ole, a i ole ia, mamuli o ke noi a kekahi lala i hiki kino mai :

            ( o )  Mahope koke iho o ka hookuu ana o kela ame keia halawai a ka Papa, e hooiaio i na koi apau i aeia a i kauohaia no ka uku ana i ke dala ; me ka hoike ana i ka huina me ka la o kela ame keia koi a kauoha paha, ame ka la o ka aeia ana, a o ia mau koi a kauoha paha, e kakau hooiaia e ka Lunahoomalu o ka Papa, a mahope o ia e waiho aku ke Kakauolelo ia mea me ka Lunahooia ;

            ( u )  E lawe mai a e malama i na hoike a ka Puuku o ke Kalana o nal oaa ame na hoolilo o ke Kalana ;

            ( h )  E hoopaa a e malama i na hoomanao apau o na hana apau a ka Papa e lawelwe ai :

            ( k )  E hooia hooiaio me kona inoa ame ka sila o ke Kalana i na moolelo apau o ka Papa i na wa apau e kauohaia ai e hoolaha ;

            ( l )  E lawelawe hoi i na hana apau i kauohaia e ke kanawai, a e kekahi rula a kauoha paha a ka Papa :

            3.  E lawe ae, me ke aponoia nae e ka Papa Lunakiai i sila no ka oihana, a maluna iho ona e ikeia ai ka inoa o ke Kalana e like me ia e aponoia aku ana a e hoohanaia aku ana, a oia no hoi ke sila o ke Kalana a e hoohanaia no ka hooia ana i na pepa oihana apau ame na palapala i manaoia e hooko a e hooia e ke Kakauolelo Kalana, ma ka lawelawe ana i kana oihana.  O ke kope i kuniia oia mea, e hoike ana ia ua maikai ia, a pela no hoi ke kope o ke sila o ke Kalana i ka wa e hoololi a hooponopono hou ia e ka Papa, e waihoia aku no ia maloko o ke Keena Oihana o ke Kakauolelo o ka Teritori.

 

MOKUNA  18.

 

LUNAHOOIA  KALANA.

 

            PAUKU  75.  E hoopuka ka Lunahooia i na palapala kikoo dala i ka Puuku o ke Kalana no ka pomaikai o na mea apau i kuleana ma ia mea no ka hookaa ana i na hoopii ame na koi apau e koiia ana i ke Kalana i huli pono mua ia, e hookaawale a e kauohaia e uku e ka Papa Lunakiai.  E hoopuka pu no hoi ka Lunahooia i mau palapala kikoo dala i ka Puuku o ke Kalana no na aie ame na koi apau e kue ana i ke Kalana, i hoomaopopoia na huina e ke kanawai, a i hoomanaia ai paha e ke kanawai e hookaawaleia e kekahi mea a aha mana paha mawaho ae o ka Papa Lunakiai.

            PAUKU  76.  E hoike moakaka na kikoo dala apau i na aie i hoopukaia ae e lakou, ame ka manawa i aeia ai.

            PAUKU  77.  E huli a e hoomaopopo a e hooponopono ka Lunahooia i na buke helu waiwai a na mea apau a mau Luna Aupuni paha i aie i ke Kalana a e paa ana paha i kekahi mau dala i kupono e ukuia i ka waihona o ke Kalana, a e hooiaio aku i ka Puuku i ka huina ma kekahi palapala kope, a i ka hoihoiia ana mai iaia o kekahi palapala hooia, me ko ka Puuku kuni hooia e kau pono ana maluna, e haawi aku ia poe i likiki a hookuu ana a e kau aku i ka auhau ana maluna o ka Puuku no ka huina i loaa iaia.

            PAUKU  78.             E malama ka Lunahooia i hoomanao helu waiwai no na lawwelawe oihana dala ana me ka Puuku, a i ka wa o kekahi mea e waiho ai i ka Lunahooia i kekahi palapala hooia i kuni pono ia, e like me ia i hoakakaia maloko nei, no kekahi dala i ukuia ma ka waihona, e malama no ka Lunahooia ia palapala hooia a e kau i ka malama maluhia ana ia mau dala maluna o ka Puuku.

            PAUKU  79.  O na palapala kikoo dala apau i hoopukaia e ka Lunahooia i kela ame keia makahiki pakahi, e hoomaka ana ma ka la 1 o Iulai no ka makahiki 1905, a mahope aku e hoomaka ana i ka Poakahi mua mahope o ka la ekahi o Ianuari, e kau helu papa ia ka helu, ka la me ka huina pakahi, ame ka inoa o ka mea e hookaaia aku ai, ame ke kumu o ia hookaa ana e hoikeia no maluna o ia ; a e hoopaaia hoi lakou, ma ka wa e hoopukaia ai ia mau mea e kopeia e ia ia mau kikoo dala, a ina kii ole ia mai no elua makahiki, e hoopauia no ko lakou waiwai.

            PAUKU  80.  Mawaena o ka la mua ame ka la umi o kela ame keia mahina e nana ka Lunahooia i na buke a ka Puuku a e hoomaopopo ina ua malama pololei ia ia mau mea.

            PAUKU  81.  I kela ame keia ekolu mahina hookahi manawa ka haahaa loa, a i kekahi manawa e ae paha a lakou e manao ai he kupono, e helu ka Luna Hoomalu o ka Papa Lunakiai, Loio o ke Kalana ame ka Lunahooia i ke dala iloko o ka waihona o ke Kalana, a e hana, a e hoohalikelike ma ka palapala palua i mau hoakaka e hoike ana :

            1.  I ka huina dala i kupono e loaa ma ka Waihona ;

            2.  I ka huina ame ke ano o na dala io iloko olaila.

            PAUKU  82.  E  waiho lakou i hookahi kope o na hoike ma ke Keena Oihana o ke Kakauolelo o ke Kalana, a o ka Lunahooia e kau hoolaha a e malama oia i kekahi maloko o kona Keena Oihana no hookahi mahina ka haahaa loa mahope iho.

            PAUKU  83.  O ka Lunahooia ame ka Puuku o ke Kalana ma ka Poakahi mua o Feberuari, Mei, Augate ame Novemaba a ma na wa okoa ae hoi a ka Papa Lunakiai e hoakaka ana i ka huina holookoa o na dala i ohiia, ( e hoike moakaka ana i na mahele pakahi i loaa mai ai oia mau loaa )  mai na kumu mai apau i ukuia ai ma ka waihona o ke Kalana ; naa kumu i pili aku ai ia mea ame na haawinai hookaawleia no lakou pakahi ; ka huina nui o na kikoo dala i hoopukaia a i ukuia ; a mai na haawina hea mai; ka huina o na kikoo dala i hoopukaia a i uku ole ia, na aie me na koi i aponoia, a i ole ia, aeia a i uku ole ia, ame ka haawina e uku ia aku ai lakou ; a ma ke ano nui e hana hoike piha me ka moakaka no ke kulana dala o ke Kalana.

            PAUKU  84.  E hoomakaukau no ka Lunahooia a waiho aku imua o ka Papa Lunakiai i kela ame keia makahiki i hoike papa huahelu, e hoakaka ana me ka maopopo loa i na hana apau i pili i ke dala o ke Kalana, e hoike kaawale ana i na loaa ame na hoolilo mai a no kela ame keia Keena Oihana, Papa, Komisina, Hale Aupuni, a e hookaawale ana i na itamu ano nui o na loaa ame na hoolilo i kulike me ka papa kuhikuhi e aponoia ae e ka Papa Lunakiai, a e hoolaha hoi ka Papa Lunakiai ia mea.

            PAUKU  85.  E lilo no i hana na ka Lunahooia o ke Teritori ka hui ana me na Lunahooia o kela ame keia Kalana i kela ame keia manawa, nona mea pili i na buke e malamaia ana e na Luna Aupuni o na Kalana ame ko lakou ano, ame na kino e hanaia ai na hoike, a e kukulu hoi i hana kaulike ma kela ame keia Kalana.  A e lilo no i hana na kela ame keia Lunahooia Kalana ka hoomaopopo ana i ka hookoia o na kuhikuhi ana a ia Lunahooia i oleloia o ke Teritori ma keia mea, ame ka kela ame keia Luna Aupuni o ke Kalana no ka malama ana i kana mau buke me na hoomanao helu a hana i kana hoike ma ke ano i kuhikuhiia e ua Lunahooia nei i oleloia o ke Teritori.

            PAUKU  86.  E lawelawe no ka Lunahooia i na hana e ae e like me na hoakka a ke kanawai.

 

MOKUNA  19.

 

LUNAHELU  AME  LUNAOHI  AUHAU.

 

            PAUKU  87.  E lawelawe ka Lunahelu ame Lunaohi Auhau maloko o ke Kalana ona i kohoia ai, i ka auhau ana aku ame ka ohi ana i na auhau apau malalo o na kanawai apau e pili ana i ka auhau ana e hooholoia aku ai ma keia hope aku e ka Ahaolelo o ka Teritori o Hawaii.

            PAUKU  88.  E uku hoi ka Lunahelu ame Lunaohi Auhau no hookahi manawa i ka mahina, a oi aku paha i na dala apau iloko o kona lima e like me ia e hoomaopopoia ai ma ke kanawai.

 

[  Aole  i  pau.  ]