Ka Nupepa Kuokoa, Volume XXXVIII, Number 40, 6 October 1899 — Page 3

Ka Nupepa Kuokoa

KE KILOHANA POOKELA NO KA LAHUI HAWAII.

 

NUPEPA KUOKOA.          OKATOBA 6, 1899.

 

HE MOOLELO WALOHIA

NO NA

MEA HUNA POHIHIHI EKOLU

Ke kanaka uhai holoholona opio, owai ia?

Ka wahine opulepule, i aha ina?

O Hurama ko'u inoa, Owai ia?

 

He Nanea keia i Kakauiiu e Sylvanaa Cobb, Jr. kekahi o na Kanaka Kakau Moolelo Kaulana loa

a ke ao nei:  a i unuhiia mai hoi e HOOLUMAHIEHIE, mai ka olelo Beritania mai a i ka Olelo Hawaii,

no ke Kilohana Pookela no ka Lahui Hawaii.

 

MOKUNA III.

 

     Ke Aloha no ka'u mea nui - Ka Hoaloha Pahaohao - Ka Hiapaiole o ka pu raifela - Owai Kela?

     Oiai na waimaka e kilihehe ana ma na papalina o Huruma, ua hookuu ae ia o Morigiana i ka puliki ana o kona mau lima i kona mau maka, ame na hiohiona i keehi paa ia iho e ke aloha kukonukonu, huli mai la ia a nana mai ia ia hurama, a pane mai la:

     "Na! o oe no ka kekahi e uwe pu mai me a'u?  O kuu ehaeha anei, a o kou ehaeha no anei hoi ia?  Heaha kou pilikie ia'u e uwe wale mai ai no oe ieu?  E uwe ana au o kuu kane kuu makua.  Aka, ua haalele mai oia ia'u.  Ua hele oia mai a'u aku, me ka oluolu pono o kona kino i na owili lei o kau aloha.  O na pua nani makanee apau o ke kihapai o kuu puuwai nei la, na ako ae la no au ia lakou, a hoolei aka la maluna o kona kino.  Ae na lei no ia kuu aloha - ua ohu ola i kuu aloha - ua haawe no ia i kuu aloha.  O ke aloha ka'u alana iaia, a o ko'u mehai no hoi ia, eia nae, aole oia i hoi iki mai ne a'u.  Ia la, hele oia, hele ou no oia me kuu aloha, e laiia @ ma kona a-i, a i hoohiia hoi a puni kona kino holookoa, e ohu ana mai hono poo a hala ilalo o kona kino.  Aka, na lokoino oia ia'u, lokoino oia!  Lokoino!  Lokoino!  Nani ka lokoino o ka poe lokoino aloha ole!  Aihue lakou i kau kane, a , aihue lakou i kahi waiwai moku hookahi a ua kane aloha nei a'u i haawi mai ai.  A -"   

     I ka puka aba ae no o keia hua 'A' mai iaia ae, aia hoi hoomaha pu iho la ia me ka pane hou ole ana aku imua o Hurama oiai ma ia wa i komo mai ai kana keiki, me kekahi pa ma kona lima, a haawi mai la ia Hurama.

     He io oia momona maikai i pulehuia me ka maiau loa ka ukana o luna iho o ua wahi pa nei.  Ua kilihune maikai ia kona mau aoao apau me na huna paakai aeae maikai.  E mapu mai ana ka aala o ka i'o haleholona i pulehuia.

     Lalau aku la o Hurama i ke pa, a paa iho la ma kona lima, oiai hoi ia i huli ae ai no, me na maka i ulupuniia e na hoike ana a ka ehaeha.  Ma ia wa, hoomau hou mai la o Morigiana i ke kamailio ana.

     "E. E ai - e ai oe, na maona au, maona no au i ke aloha o kuu kane.  He nui ka'u mea ai.  Aia no hoi la - ke ike aku la oe i kela mau pua maloko o kela kiaha.  O ko lakou aala huihui, onaona, kupaoa oia iho la no ka'u ai.  E ai oe i ka ai a ke keiki!  Aole i ai kona makuakane i kana loaa a nau hoi ia e ai iho nona.   E ai paha.  Aka, i uwe anei oe, no kou ike ole ana i kahi i nboho ai o kuu kane, a no kou aloha ia'u, uwa mai la oe?  Ae, uwe oe, uwe pu no me keia mau pua.  Ia'u i hele aku ai maloko o kuu wahi kihapai pua, ike aku la au ia lakou nei e uwe mai ana ia'u.  Kakau mai la ma ko lakou mau lihilihi na kulu wainaka o na kulu kehau kakahiaka.  O ka uwe wale mai no ka lakou ia'u, eia nae, aole o'u ike aku i ka uhane o ke aloha e nana mai ana ma ko lakou mau lihilihi, elike la me ka'u e ike aku nei i kou uhane.  O keia poe pua, ike aku la au i ko lakou, mau waimaka e alohi mai ana me he mau kulu momi la.  Ike aku la au i ka luliluli ana ae o ko lakou mau poo me he mea la e pahenehene mai ana ia'u, a pa mai la na kukuna o ka la maluna o lakou, pau ae la ko lakou mau waimaka i ka holoiia. A ike iho la au, aole ka no'u nei ka lakou uwe ana mai.  O ko lakou aala nae, o ka'u ai no ia e ai nei.  Aka, ea, maopopo no ia'u, ua ike oe i kuu kane Lokoino!  Lokoino oe!  I kou ha'i ole mai ia'u.  Ea, e hai mai oe, ina paha ua ike oe iaia?  Mai lokoino mai oe ia'u. E aloha mai oe ia'u?  Nana mai oe!  Pale ka pono!  Aohe o'u wahi pono i koe!"

     I keia wa, me ka leo haalulu, pane mai la o Hurama:

     "E Morigiana, ka uhane ehaeha a poha i ka luuluu, aole au i ike iaia.  Aka, e hoolana no nae oe i kou manao, e ike hou ana no oe iaia."

     Alaila, me ka pane leo ole ana mai a Morigiana aku, huli ae la ia, a hoi aku la ma ka puka aniani ana i noho au mamua iho, a nana aku la iwaho me ka mumule ame ka hakanu.  A liuliu loa kana ku ana malaila, huli hou mai la ia a nana mai la ia Hurama, a liuliu, ia wa hanu ae la ia, me he mea la e hoomaha ae ana ia no ka ikaiki o kona uhane.  A ia wa nohoi, hiolo mai la no kona mau waimaka ma kona mau papalina, a hooho ae la:

     "Kuu kane!  Kuu kane aloha ole ia'u, ame kuu lei a'u i lei hookahi ai.  E ka malihini, i ike aku oe iaia, hai aku oe iaia i kuu aloha, a e olelo aku oe iaia e hoi mai.  E hoi mai no oia me a'u.  E hoi mai me ka lei alii a maua.  Ae, he alii kuu keiki nei.  He alii nohoi oia, kuu kane.  He ohana alii no ko makou!  Aloha aku oe iaia, ke ike aku oe!"

     Papalu hou ae la oia i kona mau maka me kona mau lima, a uwe iho la.  Nana aku la hoi o Hurama maluna ona, a hiki i kona ike ana aku i ka pau ana o kona uwe ana, a hoi ae la hoi kona ano, a ke ano mau no i loaa iaia.  A ma ka wa i alawa hou aka ai kona maka mawaho, ia wa i ku ae ai ia mai kona noho ae, ame ka malie loa haalele iho la ia ia loko o ka rumi, a puka aku la iwaho.  Mamua nae o kona puka ana aku iwaho, aia hoi, ua peahi mua aku la ia i ke kanaka opio e hahai aku iaia.

     Uhaele aku la laua a hoea i ke kihapai pua, malaila huli mai la o Hurama a kamailio mai la i ke kanaka opio.

     "Auhea oe, e ka opio, o keia ka wa mua loa i auau ai ko'u mau papalina nei i nei mea he waimaka.  Aka, owai la ka mea ola uhane i hiki ke uumi iho i kona mau waimaka o ke aloha, no ka ike ana aku i na haawe o ke kaumaha ame ka luuluu e kau ana maluna o kona kino ui a maikai.  O ka hauoli o ke uhane, o ka mea ia nana e hoomaameama loa ae i ka lamalama maikai e ka ui o kekahi mea kino uhane.

     E hai aku au ia oe, aole i kana mai ka nahaha liilii ana o ka popo manao maikai i hoopunana iloko o kela kino mamua.  I ka wa mamua hookahi popo daimana maikai okoa iloko o kona uhane, aka, i keia wa, ua wawahi ia kela popo daimana e uahaha ae la iloko o na apana lehulehu, pela i oaoaka lehulehu mai ai na olino ana o ko lakou mau kukunakauliilii iloko ona, elike me na manao mokumoku a kaua i lohe aku nei iaia e kamailio mai ana.  Ua mau no ka maemae o kona uhane - ua mau no ka ikaika o kona noonoo, aka, ua kauliilii nae, a ua apanapana.  O ke Akua wale no ka mea hiki e hookuikui pono hou i keia mau apanapana o ka noonoo i wawahiia, e pae hoi ma ke kulana elike me ko ka wa i kinohi.  O ko'u wa keia e haalele iho ai ia oe, aka, e hui hou ana no nae kaua.  E hoomau aku no oe, ma na hana i maa mau ia oe, a ma ka wa e hoea mai ai ka pilikia i ou la, alaila, o ko'u wa ia e moea mai ai no ke kokua ana ia oe."

     "E, alia hoi oe e hele koke aku," wahi a ke kanaka opio i pane aku ai imua o Hurama, a hoomau aku la no i ua olelo ana, "Ma ke alanui hea la oe@ hoi aku mai amei aku?"

     "Me ke alahele no a'u i hele mai nei."

     "I hea oe e hoi aku ai, a pehea oe e hoi aku ai ilaila?"

     "E hoi ana au i Jamestown, a mauka, aku nei no au o ka aina maloko aku o ka laau."

     "Owau hoi kekahi e hele aku ana i Jamestown.  He wahi ukana ka'u e lawe aku ana ilaila.  He mau wahi ili, a he mau wahi hulu.  Nolaila, e nonoi aku au ia oe, ma ka waa kaina e hele aku ai a hoea i Jamestown."

     "Ua ae mai la o Hurama no keia nonoi aku a ke kanaka opio.  I kela wa puka loa aku la ua kanaka nei iwaho mailoko aku o ka lanai, no ka hoopiha hou ana i kana pu.  A mahope ino, hele holoholo hou aku la ia maloko o ka pahale a puni ka hale.

     Aole nohoi i liuliu mahope iho, makaukau ae la ke kanaka opio me kana mau ukana.  Hele mai la ia a hui me Huarma, ia wa i pane aku ai oia i ua kanaka opio nei i kona ike ana aku e paa mai ana ma ke kaei ili i kakooia ae ma kona puhaka, he pu panapana:

     "Ea, aole kena he mea hoohei holoholona ahiu.  Ke ike nei au, aia oe i keia wa, malalo o ke alakai ana a ka rula malama oia kino."

     "Ae.  Aohe hiki ia'u ke lawe i kuu pu raifela, oiai hookahi no ona poka e lele ai ma kona wa e hoohanaia ai.  He maikai keia, hge lehulehu iki koia nei mau manawa e hana aku ai ma ke kau hookahi ana, oiai i kekahi wa e konoia ana au e hoolehulehu aku i ka'u mau hoolele poka ana."

     I keia wa, u-haele aku la laua nei a hoea i kahi i waiho ai o ka waa o ke kanaka opio, a he wahi nohoi ia e kokoke ana i ka muliwai.  Aole i liuliu lana ana ka waa iluna o ka iliwai, kau aku la laua nei no Jamestown ka iho o ka waa.

     He aneane umikumamalina minute mahope iho o ko laua nei haalele ana i kahi a laua i hoomaka mai ai e holo, aole i hoopukaia he waihi olelo mawaena o laua.  Me he mea la, iloko o ia mau minute he umikumamalua a laua e noho ana, me ka ekemu ole aku o kahi i kekahi, ua lilo laua a i elua iloko o na noonoo ana, a kela ame keia o laua i makemake ai e haawi ana i na hoomaopopo ana.  Aka, aia ma ko ke kanaka opio aoao ka manao kuko e ninau aku i kekahi mau ninau ia Hurama, aka, mamuli o kona hoomaopopo ana, he mea ano nui ka ua hoaloha nei ona e boonboo ana, ua emi pu wale iho la no kona manao ninau aku.  A hala nae ka umukumamalima minute o keia noho hakanu ana o laua, ia wa i kamailio aku ai o Hurama i ke kanaka opio:

     "E kuu hoaloha, e hiki ana anei ia oe ke hai mai ia'u i na mea ano nui loa e pili ana i ke olalau o kou makuahine?"

     "He elua wale no mau mea ano nui loa i ikeia e a'u ma ka pilikia nana e hoomailo nei i kona noonoo ame kona ola ana.  O kekahi, ua ike mai nei no oe, oia hoi, ka mea e pili ana i kana kane, ka mea ana i olelo ai, o ko'u luaui maukuakane no ia.  O kana mea nui wale iho la no keia e noke ai i ke kamailio, oia wale iho no i kekahi wa; a ma ka wa nohoi e hoea mai ai ka malihini, elike me kou hoea ana ae nei.  Aka, o ka mea nuhou loa nae a'u ike ai i kana hana o keia la imua ou, oia kona hele ana mai a kau i kona lima maluna o kou poo, a nana pono loa hoi ia oe.  Aole au i ike i kona hana ana penei i kela ame keia mea e kipa ana ma ko maua hale.  O ka wa mua loa iho la keia o ko'u ike ana e hana ana oia pela.  O ka lua o na mea ano nui loa ana e hana ai, a me he mea la, he mea ia i hele a paa loa iloko o kona noonoo, oia keia:  He wahi pahu laau kona, a e noke mau ana ia i ka hue i na lole apau o loko o ua wahi pahu la a waiho i waho, me ka mawehewehe akahela ana i kela ame keia lole, a nana pono loa iho la ia ma kela ame keia lole, me he mea la, e huli ana oia i kekahi mea.  Ke pau kona nana ana i ka lole, alaila, e huli hele ana ia ia loko o ka pahu, me he mea la he waiwai ano nui loa kekahi ua hunaia iloko o ua pahu ia.  I kekahi wa e olelo mai ana ia, he dala ua mea la ana e hui ana; i kekahi wa hoi e olelo mai ana ia, he pepa wale no ka waiwai ana e huli ana."

     "A pehea ka pahu - he paa no nae paha?"

     "Ae, aohe wahi pilikia o ka pahu.  Eia nae, e olelo mau mai ana ia, ua aihueia ka waiwai ana i waiho ai iloko o ua pahu la."

     Ua pane mai la ke kanaka opio i keia mau olelo me ke ano e ana o kona mau helehelena.

     "Pehea, ua noke no nae paha ia i ka nana ma na wahi apau o loko o ka pahu?  Ua loaa anei iaia he wahi maoli ma kekahi wahi o loko o ua pahu la e hiki ai ke alakaiia kona noonoo hoohuoi, o kahi ia ana i waiho ai i ua dala nei ana, a pepa paha?"

     "Aole.  Ua mania pu no na wahi apau o loko o ka pahu.  Aohe nakaka, aohe maoli ano naha o ka papa, oia mau paa no.  Aole naha o ka papa, oia mau paa no.  Aole no hoi he mau moali e hoike mai ana, he wahi keena huna kekahi o loko o ua pahu la."

     "Alaila, na laki loa o Morigiana, ua nalowale aku kahi i waiho ai o kela mea huna ana e huli mau la," wahi a ua Hurama nei i kamailio ae ai iaia iho, me ka lohe mai no nae o ke kanaka opio, a hoomau aku la nohoi ia i ke kamailio ana, "Mai poino loa ia, ina i loaa iaia kela mea huna ana e noke mau nei i ka huli.  Ae - mai poino loa ia ina i loaa iaia ua mea huna la."

     "E Hurama." wahi a ke kanaka opio opio i pane mai ai imua o kona hoa, "heaha ia mea huna au i olelo mai la?  E ha'i mai oe ia'u ia mea.  I nonoi aku au ia oe, e hoike mai oe ia'u ia mea huna.  Ke ike nei au, ua ike oe i kahi mea e pili ana i ka hana nana i hookwuwa i kuu makuahine iloko o keia mau makahiki ana e noho nei me ka popilikia."

     "Pehea la, ina au e hai aku ana ia oe e ua mea huna la, a'u i olelo aku nei he mea huna ia, e ae mai anei oe, aole oe e ninau hou mai ia'u no ia mea?"

     "Ae." i pane mai ai ke kanaka opio.

     "O ua mea huna la, he pepa no ia.  A no keia wa, aia ia ma kona wahi palekana loa i hunaia ai ia."

     Alaila, hoomau aku la  ka pahee ana o ka waa o ke kanaka opio a hoea i keia pule ae.

     (Aole i pau)

 

Halawai o ka Aha Ekalesia o ka Mokupuni o Kauai.

     E noho ana ka halawai o ka Aha Ekalesia o ka Mokupuni o Kauai, ma ka Luakini o Ponimoi, Ekalesia o Koolau, ke hiki aku i ka Poalima elua o Okatoba, la 12, hora 10 a.m.  Mamuli o ka hookiliia ana mai o ka Poakolu ekolu, a ka Poalima elua, no kekahi mau hana nui a ia Aha.

     Me ka mahalo.

                                                                                    Kou oiaio,

                                                                                    SAM. HAILI,

                                                                                    Lunahoomalu o ka Aha.

 

Ka Ulumahiehie.

     Lunahooponopono.

     Honolulu.

     Aloha oe: - Nui ka hauoli i ke Kilohana Pookela o ka Lahui Hawaii, ka Nupepa Kuokoa lawa ka makapehu puni heluhelu, i na nuhou kuwaho a kuloko.  Momona na mea apau.  Ua hoonuu a lawa ka puni a ka maka, a o ka oi loa aku hoi, o ka hoonui hou ia ana ae nei o ka laulau o kona papale, a ua like me na papale nunui a kiekie o na ipu.  Na moolelo nani a ku i ka ii a ka manao, e ku maoli ai no i ka nanea o ka noho ana home, o na la hoonanea hana ole.  Huro!  Huro!!  Lawe ke Kuokoa a lilo, heaha la na nupepa e ae?

                                                                                    Me ke aloha,

                                                                                    D. KAHAULELIO.

                                                                                    Lahaina, Sept. 23, 1899.

 

     Ma ka Poalua nei i hoomaka ai ke kula olelo Hawaii ma ka Y. M. C. A. a pela mau aku ana, a pau keia hapaha kula.

 

HE MOOLELO

NO KA

IONA O KA OHANA IUDA

 

MOKUNA II.

KA PENETAKIUKA - KINOHI

     Uu mai la nohoi na hoomanao ana iloko ona no ka Pahu Berita, na Papa Pohaku Hoano, ke kookoo o Aarona, ka Nahesa Keleawe i lilo ai i kumu alakai no ka manaoio o ka Isaraela ma ka waonahele, ma ka wa i uhauia ai lakou e ke Akua me kekahi ma'i ahulau.

     Lulumi mai la keia mau mea iloko o kona noonoo ana, a ulumahiehie ae la kona mau hoomanao ana no Iehova, kona Akua, a o ke Akua hoi o kona mau kupuna.  Nolaila, kukuli hou iho la ia ilalo, a kulou hou iho la kona poo ilal e hoano ana hoi ia i ka inoa laahia a ihiihi loa o ke Akua Nana i hoohanohano i kona mau kupuna alii, a i hoohaahaa nohoi i ka poe i malama ole i Kana mau kauoha.  I ka pau ana o kana kukuli ana, ua ku ae la ia iluna, ame ke kulana haaheo ame ka nanaina maikai hoi, nana aku la ia ma na wahi apau o ka aina nani e waiho mai ana imua ona.  He oiaio hoomaopopo iho la no ia o ka aina ia i maau hele ai na kapuai o na anela hoano o ke Akua, ka aina i pili kokoke loa i ka lani.

     O na kanaka Arabia hoi keia, kana poe kauwa hoi, ua haawi ae la no lakou i ka lakou mau hoomaikai ana no ka aina hoano, me ka hoomanao ana ia Aberhama ame na "makua'lii" (pateriaka) hemolele o ka wa kahiko, ka poe hoi a lakou i nana aku ai, o ko lakou mau kupuna no ia, elike la nohoi me ko lakou lilo ana i poe kupuna no ka hale o ka Iseraela, oiai, wahi a lakou.  he poe mamo lakou na Isamaela.  Ua manaoio nohoi lakou, aia kona kino ke waiho pu la me na kino o Isaaka ame Iakobo ma ka lua pao maluna o Mauna Ziona.

     Oiai o Adina e nana ana ma o a maanei o ka aina, aia hoi, maalo mai la kekahi mea imua ona, ma ke alahele maluna o kekahi kualapa e moe mai ana mai ke kulanakauhale mai.  I kona nana pono ana aku, ike aku la ia he kaoo lio, a hoomaopopo iho la ia, he poe koa kaua lio keia e holo mai ana.  Aia mamua o lakou he kii manu aeto hulali, i hoopaaia iho maluna o kekahi laau loihi i hanaia me ka maiau loa.  I kela wa lohe ae la ia i na leo hooho pihoihoi ana ae i ka huaolelo -

     "Ka poe Roma e!  Ka poe Roma!"

     A ike aku la keia i ka holo ana aku o ua poe kanaka la a kau aku la maluna o ko lakou mau kamelo, a haalele iho la i ke alanui.

     Ike aku la o Adina i ka holo ana mi o ua poe koa kaua lio nei o Roma, a hoea ma kahi kokoke i kekahi wahi a kekahi kanaka Isaraela e hooikaika ana e huki ae i kona wahi hoki e kaa ae ma kapa o ke alanui, aka, ma kahi o ko ua poe Roma nei kaohi ana aku i ko lakou mau lio i loaa ai hoi he wa pono no kahi kanak Isaraela e kaawale mai ai mai ke alanui mai, aia hoi, ua hoomau mai la no lakou i ka holo ana, me ka hoomaopopo ole ana hoi no ua wahi kanaka la.  Ike aku la o Adina i ka hookui ana mai o ka io o kekahi koa Roma i ua wahi kanaka la, a hina iho la ia ilalo, o kona wahi "miula" hookuli keia, ua olepeia ae la a haule ilalo.  Me ka naau ehaeha, nana aku ia o Adina i kahi kanaka Isaraela ilihune, a uwe iho la ia, me ka olelo ana:

     "NO kou ilihune e Isaraela, i hehi ia ai oe ma na wawae o ka poe o ko na aina e.  Aloha kou maiu la o noho ana i ka hanohano ame ka mana; aka, mamuli o kou haalele ana ia Iehova, kou Akua, ua lilo oe i aina hehiku ia e ka poe ike ole i kou Akua."

     Mamuli o keia mea a Adina i ike aku ai me ka ehaeha o kona naau, ua nalohia ae la na hoomanao ana iloko ona, me ka ulumahiehie, no ka ainba hoano o kona mau kupuna, a lulumi mai la ka weliweli hopohopo iloko ona.  Akahi no ia a hoomanao ae, o ka aina aloha o konba mau kupuna, kahi a Iehova i hoike ai i konba aloha hiwahiwa i kona poe kanaka, eia ia ke hehikuia nei i na kapuai wawae o ko Roma poe, a o na alii oia aina, o akou ke noho mana nei maluna o ka aina o Kanaana, ka aina i kahe ai ka waiu ame ka meli.

     Ia wa lalau ae la ia i kona uhi a uhi iho la i kona maka.  Aole hoi i liuliu iho, kaalo ae la ua poe koa kaua lio nei, me he nee ana la na ka puahiohio, a i kona nana hou ana aku maluna o ke kulanakauhale o Ierusalema, ala mai la na hoomanao ana iloko ona no na olelo o Ieremia, ke kaula:

     "Nana ka uhi pouli ana o ka Haku i ke kaikamahine o Ziona i Kona huhu!

     Ua kiola mai Oia i ka nani o ka Isaraela, mai ka lani a i ka honua.

     Aole manao i kona keehana wawae i ka la o kona inaina!"

     Hanupanupa ae la ka walohia ehaeha iloko o kona houpo, a hanini mai la hoi na waimaka ma kona mau papalina, a uwe kanikau maoli aku la ia no ka nani o ka Isaraela i kailiia aku e Iehova a paa hou ma kona lima.

     Mahope kau ae la lakou maluna o ko lakou mau holoholona, a iho aku la ma ke alanui kikeekee emoe ana ma ka aoao o kekahi puu.  Eia maluna o keia puu he lehulehu wale na hale ame na ilina kupapau e ku ana.  Oiai hoi lakou nei e iho ana, kuhikuhi mai la kekahi Rabi Iudaio iaia nei, i kekahi hale kupapau ma ke ano, oia ka hale ilina o ke kaula o Ieremia.  A hala ae la keia wahi ma ko lakou aoao hema, iho aku la lakou nei he wahi oawa uuku.  Aia maanei e uliuli mai ana na lau laau nani, e kua ana na punawai pohaku, a e haiamuia ana ia wahi e na kane, na wahine ame na keiki.

     Me he mea la ma ka Adina hooaopopo iho, ua hele mai keia poe ma ia wahi, mailoko mai o ke kulanakauhale no ka ahaaina hauoli ana.  E ku mai ana hoi na pakaukau kuai a ka poe kuai ma kekahi wahi malalo o ka malu lau laau, a malaila ka poe kalepa o na ano lahuikanaka he nui e kuai ana i ka lakou mau waiwai.  Hoomaopopoia mai la keia, he la ahaaina ia no ka poe Iudaio.

     Haalele iho la lakou nei ia wahi, a hoomau aku la no lakou nei i ka hele ana, a pii aku la ma kekahi wahi kiekiena.  I ko lakou nei kau ana aku iluna o ua wahi la, ike hou aku la no o Adina i ka nani o Ierusalema e poha olinolino hou mai ana imua o kona mau maka.  He oiaio, wahi a Adina i olelo wale iho ai no iaia iho, o "Ierusalema Nani ka Moiwahine o ke ao nei."

     "Nani maoli no ke kulanakauhale o ke Akua!" wahi a Adina i kamailio ae ai imua o ka Rabi nana oia i lawe mai mai Alekanederia mai.

     "Ae," wahi a ua Rabi nei i pane ae ai me ke ano haaheo; "Aohe loa e hiki i na kanaka ke hoohiolo i ke kulanakauhale o ke Akua.  E ku aku anba ia no ka mau loa."

     "E Rabi Ben Isaraela, e kuhikuhi mai oe ia'u i na wahi kaulana.  Heaha kela kakela nui hiehie e ku mai la ma o aku o ka Luakini, a he nanaina a hiohiona pa-kaua kona ke ikeia aku."

     "O kela hale towera au e ike aku la, oia no ke 'Kulanakauhale o Davida.' he kakela o na'lii!  O kela ka halekiai e palekana ai ka Luakini Laa ame ke kulanakauhale.  O kahi keia a Davida i kaua ai i kana mau kaua lanakila; a pela nohoi na Keikialii Makabi.  Ua kukuluia kela halekiai e Melekisedeka, ka Moi mua loa o Ierusalema nei, a o ka hoaloha hoi ia o ko  Kalepa ma ke kkakou kupuna o Aberahaa.  I keia wa nae, eia ia ke nohoia nei e na o Roma."

     Ua hanu ae la o Adina me ke kaumaha; a ma ia wa ike aku la ia i kekahi halekiai hou, a ninau aku la no ia no ua halekiai la:

     "O ka halekiai hea la kau i ninau mai nei ia'u?  O kela hale aunei e ulu mai la na loulu ma kahi kokoke i kona kumu, a i aneane nohoi e like ko lakou kiekie me ko ua halekiai la?"

     "Oia," wahi a Adina i pane aku ai.

     "O ka halekiai kela o Davida.  Maluna o kela halekiai i ku ai na kanaka a Davida i hoonoho ai no ka nana ana i ka poe na akou e lawe mai i na lono no Abesalome, kana keiki.  O kela ululaau hoi au e ike aku la ma ka hikina akau, oia no ka 'Ululaau o Epareima. kahi i make ai o Absalome."

     (Aole i pau.)

 

FAHYS

SILVER

E 102

G. DIETZ.

HE MEA HANA WATI AKAMAI A PIHA NOEAU LOA.

Alanui Nuuanu, Helu 417.

Aia ma ke Alanui Nuuanu, mauka iho o ka Halekuai Pipi "Central Meat Market."

 

KAKELA ME KUKU

(KAUPALENAIA.)

Poe Kalepa ma ke Komisina,

A HE

Poe Lawelawe Kopaa.

AGENA.

2736-TF

 

Mai pina i ka nana ae i ke Kaa Hehihehi Wawae lua ole o ka paa,

ka maikai ma ka holo ana,

i ikeia ma na wahi kuai kaa apau.

Kalivilana, Cleveland.

HONOLULU BICYCLE COMPANY.

209 Alanui Hotele.  Telepona 909.

2753-1m.

 

HOOLAHA KUMAU.

 

Ka Hu Alahao me Aina o Oahu

MAI A MAHOPE AKU O IUNE 13, 1898

 

Manawa Holo

 

     WAHI HOOLULU.                   Waianae, kaa huikau,                          Waialua, kaa ohua na                          Waianae, kaa ohua                       Wili o Ewa, kaa ohu

     Mai Honoluu aku,                                    na la apau koe ku Sabati.                    la apau.                                                na la apau                                     na la apau.

                                                                 A.M.                                                A.M.                                                  P.M.                                        P.M.

     Honoulu                                            7:10                                                  9:15                                                               3:10                                                           5:10

     Manana                                             8:07                                                  9:48                                                 3:43                                                     5:50

     Waianae                                            8:37                                              10:08                                                                4:08                                                           6:10

     Waialua                                                                                                    12:00                                                                5:38

 

     WAHI HOOLULU.                   Wili o Ewa, kaa ohua,             Waialua, kaa ohua, na             Waianae, kaa huikauna          Waialua, kaa ohua na              Wili o Ewa, kaa ohua,

     (Mai waho mai a i Honolulu.)      koe ke Sabati.                          la apau.                                    la apau, koe ko Sabati.             la apau.                                    Sabati wale no.

                                                                 A.M.                                    A.M.                                              A.M.                                P.M.                                        P.M.

     Waialua                                                                                            6:12                                                                                                          2:39

     Waianae                                                                                           7:12                                                           10:09                               3:55

     Wili o Ewa                                                    5:50                                      7:47                                                           10:59                               4:32                                12:45

     Manana                                             6:15                                        8:07                                                   11:34                               4:52                                            1:10

     Honolulu                                           6:50                                      8:40                                                 12:15                               5:25                                            1:45

 

     G. P. DENISON,

     Luna,

    F. C. SMITH,

     Luna Kuai Palapala Holo

 

Metropolitan Meat Co

(Hui Kuai Pipi Metropolitan.)

G. J. WALLER, (Wala)-Luna Nui

108 Alanui Moi.

Poe Kuai a Hoolako i na Moku

ME

Na Io Pipi, Hipa a pela'ku.

E loaa mau ana na Manu ame na Kamano i hoohu'ihu'iia iloko o ka Hau.

Makepono ke Kuai i na I'o Pipi maanei.

TELEPONA HELU  45

 

Ka Ayer Laau Kunu

     No ke Anu, Kunu, Ma'i ma ka Puu, Puu Eha, Anu ame ka Ma'i Ai Ake hoomaka hou.  Aohe lua e loaa ai ka Laau Kunu a Ayer.  O keia ka laau kunu kaulana loa i ikeia ka hololea e na lapaau ana maloko o ka Oihana Lapaau, a ua apono loa na Kauka lapaau ma kela ame keia wahi.  E hoomahani ana ia i ka aai ana i ka pale lahilahi i pili aku ai ka ma'i, wawahi i ka mele paakiki e kunukunu a e maneo ai ka puu, hoopau i ke kunu ana, a loaa hoi ka oluolu.  Ma ke ano laau pale pilikia kokoke loa noloko o ka ohana o ke AYER LAAU KUNU ka helu ekahi.  Aohe lua o keia laau no ka hoola ana i ke Kunu Ho, Kunu Kalea, Puu Eha, ame na ma'i apau o ke Ake-mama i loohia mau ai ka poe opiopio.  Aohe ohana i palekana, ke ole e loaa ia lakou  KA AYER LAAU KUNU  OIA  HOI 

KA AYER CHERRY PECTORAL,

I homakaukauia

DR. J. C. AYER & CO.,

Lowell, Mass., U. S. A.

     E makaala loa no na laau hoohalikelike kumukuai emi.  ka inoa o keia laau, oia ka AYER CHERRY PECTORAL.  E ikeia ana keia inoa mawaho o ka wa-hi, a maloko nohoi o ke kino o kela ame keia omole.

     Ke pookela o na laau no ka malama ana, ka hooulu ana me ka hoonani ana i ka lauoho, oia ka Ayer Laau Hooulu Lauoho.

     Aole e kepia ke poo, oia na ma'i puupuu, aole hoi helelei ka lauoho.  Ina maloohaha mai ka auoho, hinawenawe a ano hina mai, alaila, na keia laau e ho'iho'i hou ae a kona ano mua, a hooulu lupalupa ae la i ka lauoho.  Ma na wahi apau, o keia Laau Hooulu Lauoho a Ayer ke pookela, a ua like ia i punahele a i hoapili no na lede ame na keonimana.

     Ayer's Hair Vigor i homakaukauia o DR. J. C. AYER, Lowell, Mass. U. S. A.

     Na Medala Gula mai na Moikeike Nui o ke Ao Hollister Drug Co. Lt. Na Agena ma ka Paeaina Hawaii.