Ka Nupepa Kuokoa, Volume XXXVIII, Number 9, 3 March 1899 — Page 2
| This text was transcribed by: | Lawrence Gersaba |
| This work is dedicated to: | Judith Nalani Kahoano Gersaba |
Ka Nupepa Kuokoa
KE KILOHANA POOKELA NO KA LAHUI HAWAII.
Hoolaha Mana Hooko
NA AINA AUPUNI.
Ke hoolahaia aku nei ma keia, ua hoemiia na kumukuai koho kiekie no na apana aina ma Kaauhuhu, Kohala Akau, e kuaiia aku ana ma Maraki 25, 1899, a hoea i ka $3.00 no ka eka
hookahi no ua poe apana aina la.
J. F. BROWN.
Agena o na Aina Aupuni.
Feberuari 25, 1899 2744-3t
HOOLAHA AINA AUPUNI.
Ma ka Poalua, Aperila 4, ma ka hora12 o ke awakea, ma ke alo iho o ka Hale Hookolokolo, e kuai kudala akea ia aku ai, mamuli o na kumu aelike kuikawa no ka uku ana ame na hana hou.
PUUANAHULU, N. KONA.
Apana 30, 30.04 Eka, Kumukuai oi $75.00.
Apana 31, 18.07 Eka, Kumukuai oi $45.00.
Apana 32, 20.02 Eka, Kumukuai oi $50.00.
No ke @Kii ame na olelo hoakaka e ae, e ninau ma ke Keena Aina Aupuni, Honolulu, a i ole, ma ke Keena oihana o J. Kaelemakule, Kailua, Kona Akau.
J. F. BROWN.
Agena o na Aina Aupuni.
Maraki 1, 1899. 2744-4t
HOOLAHA AINA O KA LEHUHELU.
Ma ka Poaono, la 25 o Maraki, 1899, ma ka hora 12 awakea, ma ka hale Hookolokolo o Kohala Akau, Hawaii, e kuai kudala ia aku ai, ma ka Aelike Kuikawa ka hoakaka ana i ka aku, ka noho ana. ame ka hanaia ana o na hana hou.
He 37 Apana Aina i loaa ka 8 a hiki i ke 40 eka pakahi, ma Kaauhuhu, Kohala Akau, a e pili pu ana, a i ole ia, he Alanui e hui pu ana me ke Alanui e holo ana mai Kohala a hiki i Waimea.
Kumukuai oi aku maluna o $5.00 o ka eka.
No na hoakaka e pili ana i na Aelike, Kii Aina, a pela aku, e loaa no ma ka ninau ana aku ma na Keena o ka Aina o ka Lehulehu, Honolulu, a ma ke Keena o Charles Williams o Hamakua, a i ole ia, ia H.L. Holstein ame E. De Harne o Niulii ame Honomakau, Kohala Akau.
J. F. BROWN.
Agena o na Aina o ka Lehulehu.
Feberuari 21, 1899. 2743-4t
HOOLAHA AINA AUPUNI.
Ma ka Poaono, Feb. 25, ma ka hora 10 a.m., ma ke keena o W.O. Aiken, Paia, Maui, e weheia ai no na poe noi aina aupuni, malalo o na olelo o ke Kanawai Aina o 1895, no na Home Hookuonoono ma ka Hoolimalima.
He 26 mau apana ma ka Mahele Aina o Nahiku, Maui, a he 6 a 8 Eka ka Ili o ka mea hookahi.
No ke Kii o ka aina ame na mea aku i koe e ninau ia W.O. Aiken, Paia, a i ole, ma ke Keena Aina Aupuni, Honolulu.
J. F. BROWN.
Agena o na Aina Aupuni.
Feberuari 6, 1899. 2741-4t
NA KANAKILA O KELA AME KEIA LA.
Kela wa, keia wa, kela wahi, keia wahi, e lanakila ana no lakou - He hooiaio ko keia.
Kela keehina keia keehina, no mua no ia.
Kela ame keia la, mahuahua ka manao paulele.
E pono e loaa he uku no ka hana i holo lea.
Ua ike o Honolulu i ka mea maikai.
Mahalo lakou ia mea, ke loaa ia mea ia lakou.
Aohe paha he palena o ka mahalo no kahi uuku lii a ke koa.
Kahi ukulii hana kupaianaha ma ko kikala.
O ke kikala eha keia, ua pau ae la kona hananee ana.
Loaa ka ikaika i ke kua nawaliwali.
Ina no ua oolu ke kua. e ola ana no.
E pau ana ka oolu o ke kua, oiai aole hiki ia mea ke kupaa iho i ka hana a ka ukulii oolea nui wale.
Eha mai ke kua, ua iino na puupaa.
O ka hana ia a na Huaale a Doan no ke Kikala Hanene me na Puupaa, o ka hoola ia mau mea.
Loaa pono kahi o ka pilikia.
Kuanua ole ka hooiaio ana i keia mea:
Penei ka olelo a Mrs. J. Bertrand o 426 S. Washington Avenue, Scranton, Pa., U.S.A.: "Ua loohia ko'u mau puupaa i ka pilikia i na wa apau no elua a ekolu makahiki i hala ae nei, a i kekahi wa, aole i kana mai ka pilikia. Ina au e kulou aku ana imua, alaila, he mea pono ia'u ke kakoo ae i kahi lima o'u ma ke kikala, alaila, ala ae iluna oiai hoi au e hana ana i ka'u hana o loko o ka hale. Ua eha nohoi au i ka po, a hiki ole ke hiamoe maikai. E oni ana au i o a ia nei, a ala ae ana nohoi iluna, me ka imi ana i wahi e loaa ai ka oluolu. Aia nohoi he eha ma ko'u aoao; aole hiki ia'u ke moe ilalo ma ia aoao, a ua pau kuu kino ame na lima ame na wawai i ka papalahu. Hele aku la au a kuai iho la i na Huaale a Doan no ke Kikala Hanene me na Puupaa, a ai iho la. Ua loaa ia'u ka pomaikai nui mai keia mau huaale mai. Ua ola loa au i keia laau, a na pu na ouli o ka ma'i ame ka pilikia o na puupaa. Ua hiki ia'u ke hiamoe maikai, a ua pau hoi ka papalahu mai o ko'u kino. Ua hiki loa ia'u ke haawi aku i na olelo hoomaikai no keia laau i na poe e ae."
E kuaiia ana na Huaale a Doan no ke Kikala Hanene ame na Puupaa e na poe luai laau apau, no ke kumukuai, 50 keneta. E hoounaia aku no ma eke leta e Hollister Drug Co., na Agena ma Honolulu nei, ke loaa mai ke kumukuai. E nana hoi ina o na huaale au e kuai ana oia keia: Doan's Backache Kidney Pills.
KA
Nupepa Kuokoa
No ka Makahiki - - $2.00
No Eono Mahina - - 1.00
Kuike ka Rula.
PUKA 1 2 3 1 2 3 1
ANA Pule Pule Pule Mal. Mal. Mal. Mak.
Iniha.. $1.50 $2.00 $2.50 $3.00 $5.00 $6.75 $12.00
2 Iniha.. 2.00 2.75 3.50 4.00 7.00 9.00 15.00
3 Iniha.. 2.50 3.50 4.50 5.00 9.00 12.00 18.00
4 Iniha.. 3.00 4.00 5.00 6.00 11.00 13.50 21.00
5 Iniha.. 3.50 4.75 6.00 7.00 12.00 15.00 24.00
6 Iniha.. 4.00 5.50 7.00 8.00 13.00 16.50 27.00
O na Olelo Hoolaha a pau e hoouna ia mai ana no ka Hoolaha maloko o keia Nupepa, e hoouna pu mai me ka auhau, a ina aole, aohe hookomo ia.
HOOPUKAIA E KA
HAWAIIAN GAZETTE CO.
A. W. PEARSON, Luna Nui.
JOSEPH M. POEPOE, Lunahooponopono,
Honolulu , Oahu.
POALIMA, MARAKI 3, 1899
NA HANA HOLOMUA.
He nui na hana i ikeia aku e na maka o na kanaka Hawaii e lawelaweia mai ana e na kanaka o na aina e, a hooholo iho la na noonoo ana o ua poe kanaka oiwi nei o ka aina, he mau hana holomua kela mau hana a kela poe o ko na aina e, e lawelawe mai ana. Oiai, na kini lehulehu o ke one oiwi e hookani ana me ka mahalo nui i ka holomua o ka hana a kela poe e hana ana, eia no na Hawaii, ke ope a kua nei i ko lakou mau lima, ke ha hao nei i ko lakou mau lima iloko o na ekeeke lole wawae, e hoopi nana ana i na ai-kala a kuku kokala, me he kokala la no ke kalaihi. Aole ae keia poe Hawaii e kokolo aku iloko o ka lepo no ka huli wahi ola ana, i na ua hiki ole ia lakou ke lawelawe i kekahi hana i oi ae ka mama mamua o ka hana poola maoli ana. Nuha loa keia poe Hawaii, maka'u loa lakou i ka hana, a hoowahawaha maoli no i ka hana. A no ia kumu, ua halai mau ka nele i na Hawaii hana ole, a pipili mau no ia mea he nohona loaa a ulakolako ma ka ipuka na kuono ame na paia o ke kanaka maka'u ole i ka hana.
Holomua na kanaka o ko na aina e, no ko lakou maka'u ole ia mea he hana. E nana aku i na Pake, e hana ana mai ke kakahiaka a hoea i ka po. Aia no lakou ke ohi la i na hapaumi liilii he lehulehu loa. Aole kaukai nei mea he holomua ma ka nunui koke mai o ke dala i ka loaa ana i ke kanaka. aole; aka, ina no he liilii kahi mea loaa mai, aia no ka holomua ke ku kiai la ma ia mau wahi mea liilii i loaa i ke kanaka. A loaa hou mai la he mau wahi mea liilii, nee hou ae la ka holomua a ku ilaila. A ina e mahuahua hou mai na mea liilii loaa mai, pela ka mahuahua ana ae o ke kuonoono ame ka manoanoa oia mea he holomua. E malama i na mea liilii, a na ia mau mea e malama i na mea nunui, aole auanei e liuliu e ku no ka hale kekela o ka nohona holomua ame ka lako.
Mai hoonalo i na mea liilii mua, ke ole e loaa he kumu pono no ia hoonalo ana, i loaa ai he huina houluulu mahuahua ma ka wa e hoiliiliia ai na mea liilii i loaa mai mua mai. Ina loaa i ke kanaka he iwakalua elima keneta i ka la mua, oia hoi, he hookahi dala ai, alaila, e malama loa oia i kela mau hapaumi (elima keneta) i loaa iaia me ka manaolana ana e loaa hou mai ana no iaia he mau elima keneta hou i kahi wa ae. A ina no e loaa ole i kahi la ae, he mau "hapaumi" hou, alaila, e paa no i na mea i loaa mua, oiai o ka punana ia i hoekepue ai ke kino omaka mua o ka nohona holomua. E kiola aku oe i na hapaumi mua i loaa ia oe iloko o ka rama ame na mea e na ai kou mau kuko ahiu, alaila, ua omilo oe i ka holomua, a ua lilo oe i mea pepehi i kou holomua iho.
O ke komo ana iloko o na ahahui kalai waiwai i ikeia ko lakou kulana holomua iloko o kekahi mau makahiki i kaa hope ae, he alahele imi holomua no ia.
O ka malama i kahi mea uuku e loaa ana, oia ke kahua nui e loaa ai ka Holomua.
KA AHAAINA O KA LA APOPO.
Ke manao lana nei makou e ku ae ana na Hawaii me ka maloeloe a hele aku i ka ahaaina luau nui e malamaia ana no ka pomaikai o ka Hui Kokua a na Wahine Hawaii ma ka la apopo ma ka Home Hoohanau Keiki Kapiolani. O ka pomaikai o keia hui, no na kanaka Hawaii no ia. O ka lakou mau pua ke kaana ana i na maha, na palekana ame na oluolu i houluuluia ma keia ahahui. He hana hoolaupai kanaka ia no Hawaii aina. Ka punana ia e lahue ai a kini a mano kanaka ia Hawaii, a nolaila, o ke kokua ana o na Hawaii i keia hana, oia ko lakou hoaho ana, pa'i ana i ke pili, hauhoa ana i ke kaula, hi'a ana i na pou o ka hana hoola lahui o Hawaii.
E Hawaii i ke one o Haho, e Hawaii i ka nuu o ke aloha lahui, mai ku a nanamaka i ka hana hoolaupai kanaka o ka aina. Humea mai ka malo, kalikiia mai ka pola a paa pono, lalau ka laau palau o ke aloha lahui, paaia mai ka ihe laumeki o ke aloha hoa kanaka, nee imua o ke aloha i ka lahui. Ae - i wawaia no o Hawaii. i nei mea he kanaka.
KA HANOHANO O KA AHA.
Aole no i liuliu loa aku nei i hoea mai ai imua o ka Aha Kaapuni o Oahu nei, he hana hoohaahaa i ka hie, ke kapu ame ka hanohano o ka Aha, mamuli o na huaolelo kikoola a kekahi hoa ili-keokeo o ka Papa Loio. A i keia mau la onukunuku iho la nohoi i hoea ae la he hana hoohaahaa hou no i ka hanohano ame ka nene ilikapu o ka Aha, mai kekahi hoa ilikeokeo mai no o ka Papa Loio Hawaii. O keia nae hoi, he hoolei puupuu maoli ana a ku kekahi hoike, ma ke kahua pili kokoke loa no i ke keena e noho ana ka Aha. Aole i nanaia ae ke kapu laahia o ka Aha, a ua loheaia ka uina ana o ka puupuu, a uwe wawalo ana i Waialohia.
I ko makou hoomaopopo ana ae i keia mau hana aiwaiwa, ua hiki ia makou ke olelo ae, aole i ikeia kekahi hana o keia ano mai waena mai o na loio kanaka Hawaii maoli. Manaoio no makou, mai ka wa i hoopuka mua ia ai nei mea he laikini loio e ka Lunakanawai Kiekie e noho nei i keia wa, i na kanaka Hawaii a hoea mai nei i keia wa. aole loa i ikeia kekahi loio kanaka Hawaii maoli e hoolei kualapoo ana i kekahi hoike maloko o kahi e malu mai ana ke anoano ame ka hanohano o ka Aha.
Aka, ke manao nei nae makou, he ulia wale no keia no ka manawa, aole paha e hoea mai ana ma keia mua aku he hana elike me keia iho la.
MAKE O PERESIDENA FAURE.
PARISA, Feberuari 16. - Ma ka hora 10 o ka po nei i make ai o Peresidena Faure, mahope iho o kona kaa mai wale ana no iloko o kekahi mau hora. Ua make oia imua ponoi nohoi o kona ohana.
Oiai no e mau ana ke aho iloko o M. Faure, ua hoomaopopo iho la na kauka aohe manaolana i koe. a o ka hora 8 ia.
PRESIDENT FRANCOIS FELIX FAURE.
Ua hoikeia aku keia mea i kona ohana. a ua hele aku lakou apau ma ka punee e waiho ana ia. Mahope koke iho no, ua pau mai la kona noonoo, a i ka hoea ana i ka hora 10 ponoi, ua lele loa ae la kona aho. E noho pu ana ma ia wa o M. Dupuy.
Ua hoike aku la hoi o M. Dupuy i ka lono kaumaha ia M. Loubet, ka Peresidena o ka Aha Senate, ia M. Paul Deschanel, ka Peresidena o ka Hale o na Lunamakaainana, na hoa o ka Aha Kuhina ame na luna Aupuni kiekie e ae.
Mahope koke iho no o ka loaa ana mai o ka lono o ka make ana o ka Peresidena, ua hele koke aku la o Kenerala Zurlinden, ke Kiaaina o Parisa; ka lunakanawai kaulike o ka Ligiona Hanohano, ka Luna Kiekie o Seine, ka Luna Kiekie o ka Oihana Makai o Parisa, ame na Peresidena elua o loko o ka Hale Ahaolelo.
I ka hoea ana i ka hora 11, akahi no a laulaha pono ae la ka lono o ka make ana o ka Peresidena. A ia wa i mokuhia mai ai na kanaka koikoi o loko o ke kulanakauhale no kahi i make ai ka Peresidena.
KA PERESIDENA HOU O FARANI.
NU IOKA, Feberuari 18. - E hoike ana ka nupepa World i kekahi lono telegarama mai Parisa mai, e hoike ana penei: I keia la iho la i kohoia ai o Emil Loubet i Peresidena no Farani ma kahi Felix Faure i make. Ua hoopuhiliia na hana i hoolala mua ia e ka poe kue, a ke ku lomaloma wale nei no lakou me ka nau ana o na ku'i.
KAMALIIWAHINE KAIULANI.
Ua oluolu maikai ka hiamoe ana o ke Kamaliiwahine Kaiulani ma ka la inehinei. He ano kaumaha no ka pilikia, aole nae i hopohopo kona mau kauka no kona palekana.
NUHOU ONA AINA E
LILO PIP MAI O ILOILO I NA AME RIKA.
NU IOKA, Feberuari 18. - Ua loaa mai he lono telegarapa i ka nupepa La mai Manila mai. ma ka la 14 o Feberuari, hora 8:50 kakahiaka, a e hoike ana ua lono la penei: Ua lilo pio mai la i na koa malalo o Kenerala Mila o Iloilo ma ka la Sabati nei. Aohe Amerika i poino. He lahilahi a puainawele wale no kahi kue ana mai a na enemi, a kuemi hope nui aku la. mahope iho nae o ko lakou puhi ana ae i kekahi wahi o ke kulanakauhale i ke ahi. He kakaikahi o na poe kipi o ke kulanakauhale i pau i ka hoehaia e na pu Amerika.
MANILA, Feberuari 14, - 9:35 a.m.- Ua lilo pio mai la i na koa Amerika malalo o Birigadia Kenerala Mila, ke kulanakauhale o Iloilo, ke kapitala o ka mokupuni o Panay, a oia hoi ke kulanakauhale poo aupuni o ke Aupuni Huila Visayas, mahope iho o kekahi wa i kipoka pahu ia aku ai. Ua puhi ae na kipi i ke kulanakauhale mamua o ko lakou haalele ana iho, a ua kinaiia aku la ke ahi e na koa Amerika. Aohe make ma ka aoao o na Amerika.
MANILA, Feberuari 14 - 9:45 a.m. - Ma ke ahiahi nei i ku mai ai ka mokukaua Petrel me na palapala mai a i Brigadia Kenerala M.P. Mila mai ia Mekia Kenerala Otis, e hoike ana i ka lawe pio ia ana o Iloilo e na hoouka kaua ma ke kakahiaka Sabati nei.
Ma ka wa i loaa mai ai ia Kenerala Mila kana mau kauoha mai Manila mai, ua hoouna aku la ia i uka o ka aina i na Komisina kanaka maoli o ka aina, mai luna aku o ka moku lawe koa, Sana Paulo, me kekahi palapala na ke Kiaaina kipi o Iloilo, e kauoha aku ana iaia e haawi pio mai i ke kulanakauhale. me ke kue ole mai hoi.
Emoole ikeia aku la ka hookuene pono ana mai a na poe kipi i na pu a lakou maluna o na wahi i kupono i ko lakou manao, a hoomakaukau mai la lakou e pale mai i ke kulanakauhale. Ia wa i ki aku ai ka mokukaua Petrel he elua mau pu hoailona a o ka wa no ia a na kipi i kipu mai ai maluna ona. O ka wa iho la nohoi ia i kipoka pahu aku ai ka Balatimoa ame ka Petrel maluna o ke kulanakauhale. Mahope koke iho no oia wa, na haalele iho la na kipi i ke kulanakauhale, me ke puhi ana ae i ke ahi.
Ua hoolele koke ia aku la na koa Amerika no uka o ka aina a kinai koke aku la i ke ahi e a ana ma na wahi a ma na hale o na kanaka o na aina e. Ua nui no nae ka poino ma keia hana ana a na kipi. Ua manaoia, ua nui no ka poino o na poe kipi ma keia kipoka pahu ana, aka, aole nae maopopo. Ma ko na Amerika aoao, aole i hoikeia mai.
WASINETONA, Feberuari 13. - Mamua ae o ke kani ana o ka hora 12 o ka po nei, ua hoolaha akea ae la o Akukana Kenerala Corbin i ka lono i loaa mai ai mai a Mekia Kenerala Otis mai. e pili ana no ke pioo ana o ke kulanakauhale o Iloilo i na koa Amerika, malalo o Kenerala Mila, ma ka la 11 aku nei:
"MANILA, Feberuari 13. - Ua hoike mai o Kenerala Mila mai Iloilo mai. ua lawepio ia ke kulanakauhale ma ka la 11 aku nei, a ke paaia nei e na koa Amerika. Ua haawiia aku hoi he wa kupono no na kipi e haawi pio mai ai, e hele ana ia wa a hoea i ka la 13, aka, mamuli o ko lakou ake hakaka loa, ua hoea mai la ka hoouka kaua o ka la 11. Ua puhiia ae e ka poe kipi na wahi o ke kulanakauhale e nohoia ana e na kanaka maoli o ka aina. He uuku no nae ka poino i loohia maluna o na waiwai o na kanaka o na aina e. Aole hoi i hoikeia mai na make ma ka aoao o na Amerika."
Ua loaa mai he lono mai a Adimarala Dewey mai, e hoike mai ana nohoi i ka lawepio ia ana o ke kulanakauhale. He uuku loa no kana wahi mea i hoike mai ai, a ua like loa no nae kana hoike me ka Kenerala Otis. Ua hoounaia aku i ke Keena Kaua Moana, a e laulaha. akea ae ana paha ia i ke kakahiaka o ka la apopo.
MANILA, Feberuari 16. - 11:45 a.m. - Ua uhaiia mai e na enemi he eha mau mahele koa pualu o na koa Kaleponi, mahope iho o ko lakou kaiehu ana i na poe kipi mailoko aku o kekahi aina e kokoke ana i Poteros, he 10 paha mile ma ka hikina hema aku o Manila. ma ka wa a lakou e huli hoi mai ana elike me ke kauoha.
Ma ka wa i hoea mai ai lakou i San Pedro Macati, ua oni paa iho la na Amerika ma kahi kokoke i kekahi halepule. a huli aku la lakou a kaua aku la i na kipi, a hoauhee aku la hoi ia lakou. Alaila, huli hou ae la ua poe Kaleponi nei a nee hou aku la no mua, a hoea aku la lakou iluna o kekahi mau puu e nana ana i ka muliwai, a oia nohoi kahi a lakou i noho mua ai i nehinei.
Aia kekahi mokukaua Amerika maloko o ka muliwai Pasig kahi i kipoka ai ia uka o ka aina.
MANILA, Feberuari 15. - He lehulehu loa na poe kipi i kipu mai, ma ka auina la onehinei, mai luna mai o na hale e kau ana na hae keokeo, maluna o na mahele koa kiai kuwaho. Ua hoomaka koke aku o Konela Kamika me na mahele koa L, D ame K o ka poe koa Kaleponi e waele maikai i keia wahi. Ua noke mai la ka poe kipi i ke kipu maluna o lakou mailoko mai o ka nahelehele ane ka ululaau, aka, ua hoauheeia aku no nae lakou. He 9 poe Kaleponi i hoehaia.
I keia la i lawelaweia ai na hana hoomaemae ne ka maikai loa. Ua hoohele aku la kekahi mokukaua Amerika i na poka pahu maluna o na kauhale, a lele pu aku la nohoi me na poka mai loko aku o na pu wili. Ma keia hoala hou ana o ka oihana hoomaemae aina, ua komo ka Regimena holookoa mai Kaleponi mai, koe nae paha he elua mahele, me eha mahele koa o ka Regimena Wasinetona, elua mahele koa o ka Regimena o Idaho ame hookahi pualipukaa o ka mahele Pukaa Eono. Ua kaiehuia aku la ka poe kipi a hoea i Loko Loguna de Bayol. Ua paio mai nohoi ka poe kipi me ka maka'u ame ka wiwo ole.
O ke akea o ka aina i nee aku ai na koa Amerika a loaa ia lakou ka noho mana ana, ua like me 12 mile. Ua ano maluhia loa ma keia mau wahi, a he kakaikahi wale no na wa e puiwaia ae ai, oia na wa e kani poha ae ai na pu a ka poe kipu pololei.
NU IOKA, Feberuari 17, - Ua loaa mai he lono i ka nupepa La mai Manila mai, e hoike ana: Ua lele kaua ia mai la na koa kiai o loko mai o ka Regimena Nebraska, oiai lakou e ku kiai ana ma na wahi pauma wai, ma ka auinala o nehinei e ka poe kipi i ahuia me na lole maoli o ke ano makaainana, a e pee nui ana hoi iloko o kekahi ulu ohe. Ua lele kaua aku la maluna o keia poe, he eha mau mahele koa Amerika. Ua ku iki mai la ua poe kipi nei a holo aku la. Ua hoemuia aku la ua poe kipi nei e na koa Amerika a hoea i Caloocan. Ewalu poe o lakou i make, a elua poe i lilo pio mai. Ua hoehaia hoi o Kapena A.H. Hollingsworth, Lutanela Bert D. Wheedon ame 6 poe koa.
KE KAUA MA MANILA.
NUHOU HOPE LOA.
MANILA, Feberuari 23 (9 p.m.) - He puulu nui maoli o kapoe kipi kai komo mai iloko nei o ke kulanakauhale, mahope iho o ko lakou haalele ana aku i ko lakou mau auwaha eli ma Malabon. a au mai la iloko o ke poho ma ka aoao hema o Kenerala MacArthur. Uo hooukaia kekahi mau hoouka kaua oolea mawaena o keia poe hou ame na koa Amerika mai Montana mai, Oregon mai ame Minesota mai. He nui o na poe Pilipino i pau i ka lukuia e na Amerika. a ua hoopuehuia aku hoi ke koena aku o lakou.
Mawaho aku hoi o ke kulanakauhale, ua houluulu ae la ka poe Pilipino, a lele kaua hui mai la ma ke alo ponoi mai o Kenerala Mac Arthur, e kokoke ana ma Caloocan. Mamua keia o ke awakea. Ma ka wa i ikeia aku ai keia kulana lele kaua mai a na Pilipino, oia ka wa i hoohanaia aku ai na pukuniahi maluna o lakou, a pela pu hoi me na pu raifela, a na keia mau kipu ana i hookaulua aku i ka nee ana mai o na Pilipino.
Ua hoikeia ae la hoi i ka mokukaua Monita "Monadnock" e ka puali eneginia, ke kulana i ku ia ai e ka poe Pilipino, a oia ka wa a ua mokukaua la i hoolele mai ai i na poka pahu o 10 iniha anawaena mawaena o ka poe Pilipino.
Lehulehu loa na poka pahu o ka Monita i hoolalapa aku i ke ahi i na kauhale o na kanaka ame na nahelehele, a ua lilo ia wahi i oloio ia aku ai e na poka pahu i kula neoneo kanaka ole. He mau mile keia neoneo a puni e noke ana ko ka poe Pilipino i ke puhi hele i ke ahi, ma ia wahi aku ana ma ia wahi aku, elike me ko lakou makemake ulaia wale.
Mahope iho o ka hala ana o na hora elua o ka hoolele poka pahu ana mai a ka Monadnock, ua auhee aku la na enemi mai ke kulana a lakou i hoaano mai ai e lele kaua mai, a muu mokaki iho la kekahi mau kino make.
Ma na wahi e kokoke ana i Santa Cruz ame San Nicolas, ua lele kaua mai no na kanaka, aka, ua hoauheeia aku no lakou.
HE POE AMERIKA NO KA POE NA LAKOU E KOKUA
NEI I NA PILIPINO.
HONGKONG, Feberuari 21. - He poe Amerika no ka poe na lakou e kokua nei i ka poe Pilipino kipi, ma ka hookomo malu ana aku i na mea kaua, mai na kapakai aku o Asia, a e kokua ana nohoi ia lakou ma na ano apau.
O na olelo waha mai a Senatoa Hoa aku i ka poe Pilipino, i hoounaia aku e na agena o ua poe la mai Wasinetona mai, oia na mea i hoouluku loa ae i na kanaka, a aa loa lakou e kaua kue aku i ka mana o Amerika Huipuia.
O ka palapala kuahaua a Agoncillo, ua lilo ia i mea na ka poe Pilipino e manaoio kuhehewa ai, e hana mai ana o Peresidena MaKinile i kekahi kuikahi me lakou ponoi.
Mamuli o na kiai makaala ana a Kanikela-Kenerala Wildman, i loaa ai he 20,000 pu raifela, me 2,000,000 owili poka, i hoahuia maluna o kekahi mau waapa lana ma Nankin. a e makaukau ana hoi e hoounaia aku i ka poe Pilipino, ua hooneleia ua poe kipi la me keia mau mea paahana waiwai nui no ke kaua. O ka loaa ole ana aku o keia mau lako kaua ia Aguinaldo, he puupuu ikaika loa ia i kuiia aku iaia.
O kahi i loaa ai o keia mau mea kaua, ma Iapana no ia. Na ke Aupuni ponoi o Iapana i kuai mai i kela mau mea kaua i ka agena o ka poe Pilipino ma Iokohama, eia nae, ma ke ano kudala la hanai ana. Ua kukala akea ia ae na luna Aupuni Iapana, e kuai ana lakou ma ka malama o Sepetemaba aku nei he 100,000 poe pu raifela, me na lako apau e pono ai ka hoopiha ana ia mau pu, a ua apo kokeia keia olelo hoolaha e ka poe Pilipino.
Ua loaa kekahi lono telegarama. i oleloia he palapala ia mai a Agoncillo aku, ke Komisina Kiekie a Elele Kuhina Mana Nui. ma ka aoao o ke Aupuni Kuikawa o na Mokupuni Pilipino, a penei ke ano ua palapala la:
"Ma ka inoa o Peresidena Aguinaldo, ke mahalo aku nei au ia oukou no ka pau holo lea ana o ke kaua, a mahalo nohoi no ko oukou paa ana la Manila. Ke hooia aku nei au imua o Amerika Huipuia no ke kupaa ana ame ke kokua ana o ko makou poe kanaka iaia, a ke noi aku nei e aeia mai makou i hookahi a oi aku paha poe hoa makou i hookahi a oi aku paha poe hoa ma ko makou aoao e komo aku iloko o ke Komisina na lakou e noonoo ko keia mua aku o ko makou Pae Aina nei.
"AGONCILLO."
HOAUHEIA NA AMERIKA.
LADANA, Feberuari 21. - Ua hoolaha ae ka nupepa "Echo" (kupinai) he lono no ka hookuemi hope ia ana o na koa Amerika e na Pilipino ma kahi kokoke i Manila. Aole nae i manaoio ia keia lono, oiai, mai ka poe Pilipino ponoi aku ia mea.
LOAA HOU IA LONO NO ANDREE.
BERELINA, Feberuari 23. - Ua loaa mai nei kekahi nupepa Siberia, a maloko o laila, he palapala mai kekahi kanaka uhai-holoholona i ike nui ia kona inoa, a wahi ana, ua loaa kekahi baluna iaia me ekolu kino kanaka, ma kahi he 340 vereta ka mamao mai Karasneyark aku me 100 vereta mai kahi holoi gula aku o Sanvinich. Ua manao wale ia e kekahi poe o ka baluna keia o Andree.
NA LONO AHAOLELO NUI NO HAWAII NEI.
WASINETONA. Feb. 11. - I keia i hoike aku ai o Senatoa Perkins imua o ka Aha Senate mai ke Komite Hoonaauao mai ame Limahana i ka b@ kanawai i hooholoia ai e ka Hale @ na Lunamakaainana no ka pahoia @ aku i na kanawai limahana o Amerika nei ma Hawaii. Ua hana oiai keia hana i hoounaia ai ka Bila Kanawai i ke Komite Eemoku, ke komo hoi i makaukau i keia wa e waiho ma i ka lakou hoike no ka Bila Kanawai kaupale eemoku a Perkins, a ma keia hana ana e miloia ai na bila kanawai elua a lilo i hookahi. a waihoia mai imua o ke Senate ma ka Puukahi, me kekahi olelo hoakaka ma ke Komite mai e apono ana i ua mau Bila Kanawai ia.
I keia la i kahea aku ai o Senatoa Nelson e noonooia ka Bila Kanawai Hooholo Moku Hawaii, aka, ua kueia aku keia noi e Pettigrew. oiai ua makemake ia e huipu ia ka uila paahana. me na bila kanawai e ae i kupono e hooholoia. Malia nae paha e loaa ana he wahi mea e anuu iki ai keia hana oiai ua manao kekahi poe e kapae @ ka noonooia ana o na bila kanawai oihana dute ame na loaa aupuni o a hoea i ka noho hou ana mai o @a Ahaolelo i keia makahiki ae. I mea kapaeia ae ai keia pilikia. e hoaoia ana e hoihoi i na bila kanawai apau a ka hookahi, a i hookahi noi manawa e hanaia ai.
WASINETONA. Feberuari 13. - @ keia la i waiho aku ai o Senatoa Perkins i kana hoike no ka mea e pili ana i na kanawai limahana o Amerika nei no Hawaii. O kahi hoololi wale no iloko o keia bila kanawai. oia ka mea e pili ana i na Pake.
KU I KA PEKU.
Ma ka Poalima nei. ia "Kale Kauka" liilii i haalele iho ai i kekahi o na hale malama lio o loko nei o ke k@ lanakauhale nei, maluna o kekahi wao kaa a'o lio, e hukiia ana e kekahi ho hou, ua loohiaia iho la oia i kekahi poino, mamuli o kona loaa ana mai e kekahi peku mahanahana loa mai kahi lio keiki mai. Ma kahi kokoke i kona kuli i ku mai ai oia i ka peku. Ke hopohopo nei kona mau hoaloha, aole paha e loaa hou ana iaia ka ikaika maikai o kona wawae i poino iho la.
E nana ae i ka makou mau hoolaha e puka aku nei ma ka pepa o keia la
Oia mau no ke kumukuai o ke kopaa ma Kaleponi. He 4 3/8 keneta no ka paona.
Ke kaulana mai nei ka holomua o ka Hui Hawaii Kuai Aina o Honolulu nei.
He maikai na himeni ame na hana o ka hale keaka Orpheum ma ka po Poakolu iho nei.
I hoomanao i ka Ahaaina Luau a ka Hui Kokua Hawaii i ka la apopo. Mai poina oe ia'u.
Owelawela no na keiki o Pilepine e kuai-kaanai mai la i na iho o lakou @ na owili giana pauda a na keiki Amerika.
Ua hoopaneeia kekahi moolelo a makou a keia pule ae. Ua pilikia ia ka@n kumu kila a ka mea kakau moolelo keia pule.
Ua powa ia kekahi Pake, mauka @ nei o Nuuanu e kekahi poe kanaka ekolu i paa me na uhi maka, a na lilo aku mai na Pake la he $6.00.
Ua lilo ae nei ia H.F. Bakalamana ke kukulu ana ame ka hana ana i ka hale kaawai hou ma Kulaokahu'a no ka huina o $3,969.
Ua hoea hou mai nei he puali keaka mai Kaleponi mai. no ka hale keaka Opiuma (Orpheum). He mau ilio kekahi mau mea hoikeke a keia poe.
Aneane paha auanei e papa leo mawaena o lapana ame Amerika, no keia mau pu raifela he 20,000 me na owili poka he 1,000,000.
Ke oia mau nei no ke kuana ana o na mahele mahiko o loko nei o ka aina. Aole nae hoi ma na kumukuai makamaka hou. He ano kupihipihi no ia e komo nei.
Ua aa ae o Peresidena Zelaya o Nikaragua e kaua me Amerika. oia hoi ua kauoha ae oia i na kanaka o Nikaragua e kaua kue aku i @ Amerika ame na Negero.
Ma keia pule ae e ku mai ai ke Kulanakauhale o Pekina mai Kapalakiko mai, a maluna mai ona e huli hoi mai ai o Hon. A.G.M. Robikana. hoa hui ma ka oihana loio. a Mr. Waila O Paulo Numana kekahi e hoea mai ama ma ia wa.
Ua hooholo iho nei ka Aha Kunana ma ka halawai ana ma ka Poakahi nei, e hoolilo ia la huina o 419,000 no na lilo no na alanui o Hilo. a he puu dala manuwahi wale keia mawaho ae o na dala auhau alanui i loaa pono mai loko ae oia apana.
Aoha laau lapaau maikai e ae no na bebe elike la me ka Laau Kunu a Kamalena. O ka ono o keia laau ma ka wa e inu aku ai, oia kona mea i lilo ai i laau makemake loa ia e na makuahine ame na kamalii. a pela pu nohoi me ka hikiwawe o ke oia. E ola koke ana ko lakou mau kunu ame ke anu. a hoopauia hoi ka loohia ana i ka ma@ numonia, a mau mai e ukali ana i nei mea he anu ame ke kunu. E oia ana ka ma'i kunu ho, a ua inu ia keia laau o na poe ma'i he umi tausani ka nui o keia ano ma'i. aole he ma'i i nele i ke ola, wahi a ko makou hoomaopopo Aole nohoi e hiki wale ana no i keia laau ke hoola i ka ma'i kunu ho, aka ma ka wa e haawi mua loa ia ai kela laau i ka wa o ka hoomaka ana mai o ua ano kunu la, e kaohi koke ia mea kona kuene ono ana mai. Ma na ma'i kunu-kaleo hoi, e hoopalupalu ana keia laau i ka male uaua, a oluolu ke kunu ina aku, a hoemi mai hoi i ka ame paupauaho ana a ke kunu ame kona pinapinai ana, a pela auanei e paleta ae ai na hopena poino oia ano ma'i. @ kualia ana e Benson Smith & Co., Kaupalenaia. na Agena Kuai Kukaa.