Ka Nupepa Kuokoa, Volume XXXV, Number 2, 10 January 1896 — Page 2
| This text was transcribed by: | Vivian |
| This work is dedicated to: | My Mom (Evelyn) & Dad (Benjamin) with Much Love, Vivian |
Ka Nupepa Kuokoa
KE KILOHANA POOKELA NO KA LAHUI HAWAII.
MA KE KAUOHA
Poalima, Ianuari 17, e malamaia ia la he La Kulaia Aupuni a e paniia ua Hale Oihana Aupuni a pau ma ia la.
J.A. KING, Kuhina Kalaiaina, Keena Kalaiaina, Ian. 6, 1896. 2580-td
- - - - -
Ke haawiia aku nei ka lohe ma keia ua hookohuia o E.P. Baldwin i Hope Agena no na aina Aupuni I Ekahi (Hilo ma Puna) e hoomaka ana keia hookohu mai Ianuari 1, 1896.
J.F. BROWN, Agena no na Aina Aupuni, Keena Aina Aupuni, Honolulu,
Ianuari 2, 1896. 2579-3w
- - - - -
Keena o ka Papa Ola , Honolulu, Dekemaba 18, 1895
Ma kekahi halawai ana a ka Papa Ola, i keia la, ua kohoia o Wm O Smith Esq. i Peresidena o ka Papa Ola, ma kahi o Mr. J.T. Waterhouse I waiho mai.
CHARLES WILCOX, Kakauolelo o ka Papa Ola. 2577-3t
- - - - -
Hoolaha Aupuni Hooponopono Manawa.
- - - - -
Oihana Kalaiaina, Honolulu, Ianuari 8, 1896
Ma ko awakea Poakahi, Ianuari 13, 1896, e hooheleia ana na wati aupuni a pau malalo o ka hoopono ana i keia oihana, mamuli o ka Manawa Kumau (Hawaiiana Standard Time) a o ua manawa kumau la oia ka Meridiana 157° 30’ Koomohana o Greenwich, oia hoi he umi hora a me kanakolu minute ka lohi o ka manawa mai ko Greenwich Manawa Pololei mai, a o ka manao o keia hoololi ana i mea e loaa pono ai he kulana manawa like a maikai no ka Pae Aina holookoa.
J.A. KING, Kuhina Kalaiaina. 2580-3t
- - - - -
Kuai o ka Hoolimalima o na Apana Aina ma Aina Hou, Honolulu, Oahu.
- - - - -
Ma ka Poalua, Feb. 11, 1896, ma ke alo iho o ka Hale Oihana Hooko, e kuai kudala akea ia aku ai ka hoolimalima o keia mau Apana Aina Aupuni, e waiho la ma Aina Hou, Honolulu, Oahu.
Apana helu 46, Kumukuai oi, $360, no ka makahiki.
Apana helu 47, Kumukuai oi, $360, no ka makahiki.
Apana helu 48, Kumukuai oi, $360, no ka makahiki.
Apana helu 49, Kumukuai oi, $360, no ka makahiki.
Kumu Aelike – hoolimalima no 10 makahiki, e hookaa mua ia ka uku hoolimalima o ka hapaha makahiki.
J.A. KING, Kuhina Kalaiaina, Keena Kalaiaina, Ianuari 8, 1896. 2580-3
- - - - -
Kuai o ka Hoolimalima ma ka Makemake o ka apana Aina ame ka Hale Lua o “Honolulu Hale” pahale, ma alanui Kalepa, Honolulu, Oahu.
- - - - -
Ma ka I’oaha, Ianuari 30, 1896, ma ka hora 12 o ke awakea, ma ke alo iho o ka hale Oihana Hooko, e kuai kudala akea ia aku ai, ka hoolimalima ma ka makemake o kela apana pahale waiho wale a me ka hale lua, o ka pahale i ikeia o Honolulu Hale, ma Alanui Kalepa, Honolulu, Oahu.
O ka noho ana, mai kahi mahina no ia a kahi mahina, a hiki i ka wa a ke Kuhina Kalaiaina, a i ole o ka mea hoolimalima paha e makemake ai e hoopau i ua noho hoolimalima ana ‘la, ma ka haawi olelo hoolaha i 60 la.
Uku oki maluna o $200 no ka makahiki e hookaa mua ia ana I kela ame keia mahina.
J.A. KING, Kuhina Kalaiaina, Keena Kalaiaina, December 28, 1895. 2579-3
- - - - -
Kuai o na Rumi Pakaukau o ka Makeke Hou o Honolulu.
- - - - -
Ma ka Poalua ae nei, Ianuari 14, 1896, ma ka hora 12 awakea, ma kea lo iho o ka Hale Oihana Hooko, e kuai ia aku ai ma ke kuai kudala akea na Rumi Pakaukau ma “Aina Hou,” no ka manawa o hookahi makahiki, mai ka Poakolu aku nei Ianuari 15, 1896.
Ua hookaawaleia keia mau Rumi Pakaukau (Stalls) iloko o Eha mau mahele A. B. C. ame D.
Mahele A – Maloko o laila he 20 mau rumi, i helu ia mai ka 1 aka 20, me na Papa Pohaku Mabala, a no ke kuai ia ana o ka I’o Pipi Hou a Paakai wale no.
Mahele B – Maloko o laila he 20 mau rumi, i heluia mai ka 21 a ke 40 me na pohaku mabala hooihoia ame a auwaha wai hao, a no ke kuai ia ana ia o na i’a hou a paakai, ame kekahi mau mea e ae mai ke kai mai.
Mahele C – Maloko o laila, he 20 rumi, i heluia mai ke 41 a ke 60 me na pale kepau keokeo maluna iho, a no ke kua ia ana aku ia o na manu, na hua na mea ulu ame a huaai.
Mahele D – Maloko o laila he 20 rumi. O ka hapa makai i heluia mai ke 61 a ke 65 me 71 a i ka 75 me na pale kepau keokeo (Zinc) maluna iho, ua makemakeia no ke kuai ia ana aku o na i’a maloo. O ka hapa mauka i heluia mai ke 66 a ke 70, a mai ke 76 a ke 80, me na pale kepau keokeo (Zinc) no ke kuai ia ana aku o na manu, hua, mea ulu a huaai.
O ka uku hoolimalima o na Rumi, o@ ke no ia me ka mea i hoikeia ma ke @ kahua o ua wahi la, maloko o ka hale (Hall) o ka Hale Oihaua Hooloo a @ Keana o ka Oihana Wai o Honolulu.
O ke kuleana wae no ka rumi e lilo no ia i ka mea koho kiekie loa. Aole e ae ia kekahi mea e kuai aku i rumi a oi aku mamua o elua, a o ka mea paha i loaa he wahi kuleana e kuai ai.
O ka uku haawi kuleana (premium) no kela a me keia Keena, e uku ia no ma ka wa e haule ai ka hamare.
O ka uku hoolimalima hoi, e hookaa mua ia no i kela a me keia mahina.
O ke kuleana noho a paa ana o ka rumi, aole hiki ke kuai a hoolilo aku ia hai aia wale no mamuli o ka ae ana oke Kakauolelo o ka Makeke i haawiia ma ke kakau, a e paa no hoi ua kuleana la i hooliloia ma ia ano malolo o na rula apau o ka Makeke.
J.A. KING, Kuhina Lalaiaina, Keena Kalaiaina, Ian. 4, 1896. 2580-1
- - - - -
HOOLAHA PA AUPUNI.
- - - - -
I huliki ai me ka Pauku 1 o ka Mokuna XXXV o na Kanawai o 1888, ua hookaawale ae au, i keia la, he pa no ka hoopaa ana i na holoholona hele hewa ma Olaa, ma ka aoao mauka oke Alanui Lua-o-Pele, aneane 22 mile mai Hilo mai, maloko o ka Apana o Puna, Mokupuni o Hawaii.
I kulike ai me ka Pauku 2 o na Kanawai o 1888, i keia la ua hoonoho aku auia George Benson, i Luna Pa Aupuni, no ka Pa Aupuni maluna ae.
J.A. KING, Kuhina Lalaiaina, Keena Kalaiaina, Dec. 28, 1895. 2579-3
- - - - -
Kuai o ka Aina Aupuni ma Makiki, Honolulu, Oahu.
- - - - -
Ma K POALUA, IANUARI 28, 1896, ma ka hora 12 awakea, ma kea lo iho o ka Hale o ka Oihana Hooko, e kuai kudala akeaia aku ai kekahi Apana aina Aupuni ma ke poo a ma ka aoao komohana hoi o ke Alanui Keeaumoku, ma Makiki, Honolulu, Oahu, maloko o laila hhe 88-100 o ka Eka, oi aku a emi mai paha.
Kumukuai maluna o ka $250.00.
J.A. KING, Kuhina Lalaiaina, Keena Kalaiaina, Dec. 23, 1895. 2578-3
- - - - -
Kuai o ka Aina Aupuni ma Alanui Betela, Honolulu, Oahu.
- - - - -
Ma ka POAKAHI, IANUARI 20, 1896, ma ka hora 12 o ke awakea, ma kea lo iho o ka Hale o ka Oihana Hocko, e kuai kudala akea ia aku ai, he Apana Aina Aupuni, ma Alanui Betela, Honolulu, Oahu, maloko o laila he 1200 kapuaikue ka area, oi aku a emi mai paha.
Kumukuai oi maluna o $800.00
Kuike ke Dala.
E haawiia no ke kuleana ma ka Aina ma Ianuari 27, 1886.
J.A. KING, Kuhina Lalaiaina, Keena Kalaiaina, Dek. 16, 1895.
- - - - -
Ua hoihoi hou ia keia kuai maluna ae nei.
JAS. A. KING, Kuhina Lalaiaina, Keena Kalaiaina, Dekemaba 20, 1895. 2578-3
- - - - -
HOOLAHA HUI.
- - - - -
Maka Hana no ka Hoopau ana i ka hui Hoolako Paahana ana Poe Mahiai, he Ahahui Hawaii i
Hoohuiia.
- - - - -
Oiai, ua waiho mai nei ka Hui Hoolako Paahana a na Poe Mahiai, he hui i hoohuiia malalo o na Kanawai o ko Hawaii Pae Aina, i kulike ai me ke Kanawai ma ia mau mea, iloko o ke Keena o ke Kuhina Kalaiaina, he noi no ka hoopau ana i ua hui la, me kekahi palapala hoike i hoopili pu ia aku me ia, elike me ke kauoha a ke Kanawai.
Nolaila, ma keia ke haawiia aku nei ka lohe in a kauaka a pau i loaa na kuleana ma kekahi ano iloko o ua Hui la, e waiho ia mai na kue ana no ka ae ia ana aku o ua noi la, ma ke Keena o ka mea nona ka moa malalo iho nei, ma ka Poalua a mamua ae paha o ia la, oia ka la 18 o Feberuari, 1895, a o kela a me keia mea makemake e loheia kona manao no keia hana, e hele kino mai ma ke Keena o ka mea nona ka inoa malalo iho nei, maloko o ka Hale Oihana Hooko, ma Honolulu, ma ka hora 10 a.m. (kakahiaka) o ua la, e hoike mai i ke kumu e ae ole ia ai ke noi.
J.A. KING, Kuhina Lalaiaina, Keena Kalaiaina, December 18, 1895. 2576-10
- - - - -
Aha HOOKOLOKOLO KAAPUNI APANA Elua. Ma ka hooponopono waiwai. Ma ka waiwai o KEKUANUI (k) o Honouliwai, Molokai, i make kauoha ole. Imua o ka Mea Hanohano J.W. Kalua.
Ma ka heluhelu a me ka wa hoia ana mai o ka Palapala Noi a Keualani o Honouliwai. Molokai e olelo ana ua make kauoha ole o Kekuanui (k) o Honouliwai, ma ka la 7 o Augate, M.H. 1895, a e nonoi ana e hoopukaia na palapala lunahooponopono waiwai ia Keualani (k).
Ke kauohaia nei, o ka POALIMA, la 14 o F eberuari, m.h. 1896 , oia ka la i hookaawaleia no ka hoolohe ana i ua Noi la imua o ua Luna kanawai la, ma ke Keena Hookolokelo o keia Aha, ma Wailuku, a ma ia M\manawa a ma ia wahi e hele ae ai na poe a pau i pili i ua hana la, a hoike ae i ke kumu, ina he kumu kekahi a lakou, no keaha la e ae ole ia ai ke noi.
Hanaia ma Wailuku, H.I. Dekemaba 30, 1895.
Na ka Aha: G. ARMSTRONG, Kakauolelo. 2580-3
- - - - -
Aha HOOKOLOKOLO KAAPUNI APANA Ekahi o ko Hawaii Pae Aina. Ma ka hooponopono waiwai. Ma ka hana o ka waiwai o GEORGE AHUAI o Honolulu mamua, a i make.
Ua waihoia mai he palapala i oleloia oia no ka Palapala Kauoha hope loa a George Ahuai o Honolulu i make ma ka ia 20 Ianuari 1896, imua o ua Aha Hooponooono Waiwai la, a me ka palapala e noi ana e hooiaio ia ua palapala kauoha la, a e hoopukaia na palapala lunahooponopono waiwai ia PC Jones, i waihoia mai e ua PC Jones la.
Ke kauohai nei, o ka POALIMA, la 31 o IANUARI, m.h. 1896 , hora 10 kakahiaka o ua la ia ma ke Keena Hookolokolo o ka Aha ma Ali ʻ iolani Hale, Honolulu, oia kahi a me ka manawai kohoia hoia no ka hoolohe ana i ua nonoi la a ma ka hooiaio ana i ua palapala la, a malaial o hele mai ai ua poe a pau i kuleana no ke kueana i ua palapala ia ame ke hoopoka ana i na palapala lunahooponopono waiwai .
Hanoia ma Honolulu, Ianuari 2, 1896
Maka Aha: GEORGE LUCAS, Kekauolelo. 2579-3
- - - - -
NUPEPA KUOKOA
- - - - -
Ko Hawaii Paeaina i Huiia
- - - - -
No ka Makahiki - - - $2.00
No I one Mahina - - - 1.00
Kuike ka Kula
- - - - -
| PUKA ANA. | 1 Pule | 2 Pule | 3 Pule | 4 Pule | 5 Pule | 6 Pule |
|
| ||||||
| Iniha | $ 1.50 | $ 2.00 | $ 2.50 | $ 3.00 | $ 3.50 | $ 4.00 |
| 2 Iniha | 2.00 | 2.75 | 3.50 | 4.00 | 4.50 | 5.00 |
| 3 Iniha | 2.50 | 3.50 | 4.50 | 5.00 | 5.50 | 5.00 |
| 4 Iniha | 3.00 | 4.00 | 5.00 | 6.00 | 6.75 | 7.50 |
| 5 Iniha | 3.50 | 4.75 | 6.00 | 7.00 | 3.00 | 9.00 |
| Iniha | 4.00 | 5.50 | 7.00 | 8.00 | 9.00 | 10.00 |
O na Olelo Hoolaha a pau o hoouna ia nai ana no ka Hoolaha maloko o keia Nupepa, e hoouna pu mai me ka auhau, a ina sole, aohe hokomo ia.
- - - - -
HOOPUKAIA E KA
HAWAIIAN GAZETTE CO
C.G. BALLNTYNE, Luna Nui.
Joseph M. Poepoe , Lunahooponopono.
Honolulu, Oahu.
- - - - -
Poaono - - - - - Ianuari 10, 1896
- - - - -
E NANA MAI I KEIA.
- - - - -
E hoouna pololei mai i na Dala uku Nupepa a Olelo Hoolaha paha, a ano e ae paha, e pili ana i ke Kuoka ma ka inoa Hawaiian Gazette Company , aole ma ka inoa o kahi mea e ae. Aole ma ka inoa o ka Luna Nui a Lunahooponopono hoi.
- - - - -
Ua loaa mai na lono mai Wasinetona mai, e hooia ana, aia ke Kuhina Hawaii ke kamoe la ma kona alahele pili oihana aupuni me ka holomua. Aole loa ke Kuokoa e kanalua no na hana a ke aupuni o Hawaii i haawi aku ai ma kona lima, nana e lawelawe aku ma Wasinetona, e holo pono ana no ia mau hana, oiai, ua loaa ia Mr. Haki ka ike ame ka makaukau ma ke kanawai, ame ka moolelo o Hawaii nei, e pili ana i na kumuhana pili aupuni, o ka wa i hala lilo ame ko keia au hou e nee nei.
- - - - -
Na Home Hookuonoono.
- - - - -
O ko ke aupuni mahelehele ana i na aina aupuni no ke kuai ana aku i na kanaka Hawaii, e like me na hoakaka o ke kanawai no na. Home Hookuonoono, he hana waiwai nui no ia. Ma na apana i loaa na alanui maikai i kupono no ka hele ana o na lio ame na kaa, ua lilo na aina a ke Aupuni i hookaawale ai i mea kokua nui i ka hoooholomua ana o ka pomaikai imi hookuonoono mawaena o ka poe i lawe ia mau apana aina, aka, o na apana aina i nele in a alanui o keia ano, ua lilo ia mau apana aina i mau mea hookuia nu i ka hooholomua ana i na hana kalai waiwai a ka pee i law ae ia mau apana aina la. Aole hewa no ke aupuni ka hoopaa ana i aelike me ka poe e lawe ana i na apana aina aupuni o leia ano, ma na wahi i loaa ole ai na alanui maikai, e hana no ke Aupuni i na alanui no ia mau wahi ke hookaaia mai ka ekoluhapaha o ke kumukuai i kinohi, a i ole ia, o kekahi kumu aelike maikai e ae paha a ke Aupuni e ike ana he maikai a e palekana ai hoi ke Aupuni ma ia hana ana. O ko ke Aupuni ae ana ma kona aoao e hana i keia hana wehe aianui ma na wahi i nele ia mea, he kumu ia e hoomahuahua ia ae ai ke kumu kuai o ka aina, e kanaiaua ole ai ka mea dala i ka lawe ana.
- - - - -
Ua ike makou, he mau auwaha keia e hoomahuahua mai ai ina loaa Aupuni, a e pomaikai ai hoi na poe Hawaii ake hookuonoono e noho nei ma keia ame keia pea a kaiaulu o Hawaii nei.
- - - - -
O ka mea nui a makou e paipai nei i ka lahui oiwi e ku maluna o ka hoopono, ka hoomanawanui i ka ilihune a e malama i kahi loaa uuku me ka makemake e loaa ona aina ponoi a nohona leo ole no ka oiwi iho. Aole keia i pili in a Hawaii i loaa ka nohona he “lani iluna a he honua ilalo nei;” aka, no ka poe nele no.
- - - - -
Kekahi Hoike no na kulana
Kumu Waiwai iloko o na
Hui Mahiko a Kalepa o
Hawaii nei.
- - - - -
He kanaha (40) ka nui o na Hui Mahiko ma na Pae Aina o Hawaii nei, i hoohuiia malalo o na Kanawai no na Hui, a o ke kumuwaiwai iloko oia mau Hui, he $27,964,290.
Poe America..................................................................................... $18,594,695
America hanau i Hawaii.......................................................................... 2,960,280
Poe “Pelekane”....................................................................................... 4,303,218
“Pelekane” hanau i Hawaii........................................................................ 196,200
Geremania............................................................................................... 1,233,935
Geremania hanau i Hawaii........................................................................... 39,165
Kanaka Hawaii Maoli ............................................................................. 38,991
Hapa Hawaii ”.......................................................................................... 285,056
Pake........................................................................................................... 259,700
Pukiki........................................................................................................... 49,500
Na Lahui e ae................................................................................................. 3,550..
He 22 ka nui o no Hui mahiko i hoehoi ole ia ma na Kanawai o Hawaii nei, a o ke kumuwaiwai, he $3,000,000.
Maloko o keia ano hai aohe poe Hawaii, a o ka poe “Pelekane” ka mea nui o ke kumuwaiwai, he $1,195,000, alaila, o ka poe Geremania aku, $515,000 alaila, na keiki Hawaii ili keekee aku, $500,000; o ka poe Ameriak mai, $415,000.
He 43 ka nui o na hui mawaho ae o na Hui Mahiko, a he kumuwaiwai o $5,877,400.
- - - - -
Poe America.......................................................................................... $2,690,994
America hanau i Hawaii............................................................................. 948,197
“Pelekane”.............................................................................................. 1,289,520
“Pelekane” hanau i Hawaii........................................................................ 233,006
Geremania.................................................................................................. 299,523
Geremania hanau i Hawaii........................................................................... 28,839
Kanaka Hawaii Maoli.................................................................................. 51,620
Hapa Hawaii ............................................................................................ 277,076
Pake............................................................................................................. 44,640
Pukiki................................................................................................................ 420
Kela ame keia lahui...................................................................................... 13,565
- - - - -
O ka huina nui o ke kumuwaiwai a pau, he $36,841,690. He $21,700,689 mai loko ae o keia huina no ka poe America, a ke hui pu aku me ko na Amerika i hanau i Hawaii nei, ua hiki ka huina i ka $26,109,166, ua aneane ia i ka ekolu hapaha okoa o ka huina waiwai a pau i hoikeia ae la. Nolaila, maloko o na mahiko a me na hui kalepa e ae o Hawaii nei, me ka helu ole ia o kahi mau hana e ae, ua lilo ī na America ka hapanui o ka noho ona ana o ke kumuwaiwai iloko nei o Hawaii.
- - - - -
Ka Hoakaka a Luna Senate
Morgan no ke Keehina Hana
a Peresidena Kalivalana
no ka Ninau o Venezuela.
- - - - -
Ma ka wa i noonoola ai o ka Bila Kanawai no na lilo o ke Komisina i Venezuela, ma ka la 19 o Dekemaba aku nei, imua o na Hale o na Senate, ua hai olelo loihi ae o Luna Senate Morgan o ka Mokuaina o Alabama, ka Luna Hoomalu o ke Komite o ko na Aina E, a ma kana haiolelo ana, ua hoike ae oia i kahi mau olelo e pili ana i ka hana hookohu Komisiina mua a Peresidena Kalivalana i hana ai ma ka ninau o Hawaii, ame ke Komisina e makemake ia ana no ka ninau o Venezuela. A eia kea no nui o kana mea i hoike ae ai:
Ma ka mea e pili ana ia Hawaii, ua hoouna aku la o Mr. Kalivalana, mamuli o kona hoohana ponoi ana iho i ka mana i loaa iaia, he Komisina no ka noii ana i kahi mau olelo hoike. Ua lawe oia la hana, me ke ao ole ia a ae ole ia hoi e ka Aha Senate, a ma ka wa i lilo ai ka hoike a Mr. Blount i kumuhana e paio ia ai, ua lilo nui ia paio ana ma na hoakaka ana ma ka ninau e pili ana in a mana o ka Peresidena, na manao, a pela aku. A ma kekahi olelo ana ae hoi, ina i hookohuia o Mr. Blount e ka mana o kekahi kanawai Ahaolelo, alaila, o ka Ahaolelo Nui (Congress) auanei ke paa malalo oia hoike, aole hoi o ka Mana Hooko, a ina la, aole e loaa he ninau moakaka o ke kuee ana mawaena o ka Mana Ahaolelo mae ka Mana Hooko. Nolaila, ma keia ninau e noonooia nei (oia hoi, ka ninau o Venezuela, L.H.) ina paha e kakoo ana i keia wa e ka Ahaolelo Nui i ka Rula Alakai Aupuni o na mokuaina Huiia o Amerika, a i ole, e waiho aku no paha ia mea iloko o o na lima o ka Peresidena, a ma ia ano ua ku no ua ninau la ma ka poai o na kuka pili aupuni Kuwaho ana.
O keia maoli ae la no ka hoike maopopo no ka mea e pili ana i ke kuhihewa loa o ke keehina a Peresidena Kalivalana i lawelawe ai ma ka ninau o Hawaii nei, oia hoi, aole oia i kakoo iki ia e ka Aha Senate ma ia kumuhana i lawelaweia ai e ia ponoi iho, mamuli o kona manao ponoi iho; a ua ike oia i keia hana kuhihewa ana, nolaila oia ia hoihoi ae ai, i keia wa, na ka Ahaolelo e apono i ke Komisina, e hoounaia ai i ke aupuni o Venezuela, i paa ai ka Ahaolelo mamuli oia hooholo ana i ke kanawai e hoomana ana i ua Komisina la, a ili hoi ke koikoi o na hana a kela Komisina ame na hana e ea e ulu mai ana, ma o keia ninau la, maluna o ka mana kaukana wai o Amerika, ka Mana hookahi e hiki ai ke kukala i ka olelo kuahaua no ke kaua, ina oia iho la ka mea e kakoo ia ai ka ihiihi o ka olelo hooholo i hoopuka ia e ia mana, a o ka Mana hoi e hiki ole ai i ka Mana Hooko ke hana, e like me ia i ikeia ai ma ka ninau o Hawaii nei.
- - - - -
Ka Manao o Komisina Blount
No na Palapal e hoike ana
I ke Kumuhana Hohui
Aina a Kauikeaouli.
- - - - -
O na palapala a makou i hoolaha aku ai, a e hoolahaia aku ana no hoi, e pili ana i ke Kumuhana Hoohui Aina a Kauikeaouli i hana ai ma na makahiki 1851 a hoea i ka makahiki 1854, ua unuhi ia mai ia mau palapala noloko mai o ka hoike a Komisina Blount i waiho aku ai imua o Peresidena Kalivalana, a o ka hoike a ua Peresidena la iwaiho aku ai iloko o ka Ahaolelo Nui o na Mokuaina Huiia o America, ma ka la 18 o Dekemaba, M.H. 1893.
Ma ko makou hoolaha ana aku i ua mau palapala la, aole makou i manaoio iki, he mea ia e ko ai a e holo ai hoi ke Kumuhana Hoohui Aina a Nohona Launa pili kokoke loa ana paha mawaena o Hawaii nei a me na Mokuaina Huiia o Amerika, e like me ka ke Aupuni Hawaii e hoonee nei i keia wa; aka, ua hana makou i keia hana, i mau hoike aku imua o ka lahui Hawaii o keia hanauna hou e nee nei, a me ko ka hanauna kahiko no paha kekahi, oia mea he Hoohui Aina, aole ia he hana no keia wa wale ae nei no, aka, he hana kahiko loa ia i hookawowo mua ia e Kamehameha III.
No keia mau palapala, penei ka Komisina Blount hoike ma kana palapala i kakaa aku ai ia Kuhina Gresham, mai Honolulu aku nei, ma ka la 26 o Iulai, 1893, a e ikeia no keia palapala ma ka aoaao 140 o kana Hoike i pai huke maoli ia:
“--------------Ke hookomo nei au maloko o keia, he palapala (Hoailona 2), maloko o laila he hoike mai loko mai o na waihona palapala o Ko Hawii Pai Aina, i hoopaa ia mai ia’u e Mr. W.D. Alexander, mamuli o ka’u noi, me ko’u manao ana he wahi pomaika iki paha ko ia palapala ma ke ano pili moolelo.
“Ua alakai ia na kanaka ma na Mokuahi Huiia o Amerika ma ka manaoio ana, ua hoike ae o Mr. Marcy i ka nui o kona ikaika iho a me ka naauao ma ke ano he Kuhina Nui oia no ke Aupuni, ma kana Kuikahi Hoohui Aina i aneane ai e ko, no ka hoohui ana i keia mau mokupuni.
“Ke hoike nei keia mau palapala Hawaii o ua Kumuhana la, ua hoea maoli mai no ia mai ka Moi mai o Ko Hawaii Pae Aina, mamuli o ka hopohopo o lilo ke kuokoa mamuli o na kumu he lehulehu.”
- - - - -
Ka La Hanau o ka Lunakanawai
Kiekie o ka Aha Kiekie o
ka Repubalika o Hawaii.
- - - - -
Ma ka Poalua aku nei, la 7 o keia mahina, oia ka la hanau o ka Mea Hanohano Alapaki F. Kauka, a o ka piha ana ia o kona mau makahiki he 58. Ua hanauia oia ma Honolulu nei ma ka la 7 o Ianuari o ka makahiki 1838.
- - - - -
Lunakanawai Kiekie Alapaki F. Kauka.
- - - - -
Ua hoonaauao ia oia ma ke Kula o Kahehuna, oia hoi, ke Kula Alii, a mahope komo i ke Kulanui o Punahou. Ua hoomaheleia no kona kulana o ka hoonaauaoia ana no ka Oihana Kanawai, a i ka 22 o kona mau makahiki ua komo oia ma ka papa opio ma ke Kulanui o Iale, a puka pono oia ma ka 1862. Alaila, komo oia i ke Kula Kanawai o Havada, a iloko o elua makahiki puka oia mai loke mai o ia kula, a loaa iaia ka inoa hoohanohano He Loea ma ke Kanawai (L.L.B.) Mahope iho o kona puka ana mai, ua huli hoi mai oia no Hawaii nei, a ae ia oia e lawelawe i ka Oihana loio ma ko onei mau Aha hookolokolo. Ua lawelawe oia ia oihana me ka holomua, mai ka 1864 a 1874. Oiai ia e lawelawe ana ia oihana, ua nui na hihia o na kanaka Hawaii i lawelaweia e ia me ka uku ole a no ka uku haahaa loa no hoi. He hoa oia no ka Ahaolelo no elua kau; a i ka hiki ana o kona mau makahiki i ke 34, ma ka wa i pii ae ai o Lunalilo ma ka nohoalii, ua kohoia oia i Loio Kuhina. Ma ka makahiki 1874, ma ka malama o Feberuari, ua hookohuia oia e ka Moi Kalakaua i Kokua Lunakanawai Elua. Ma ka M.H. 1877 i ka waiho ana o Lunakanawai Kiekie Alani i ka noho Lunakanawai Kiekie, ua hoopihaia ia wahi e Lunakanawai Harris, a lilo o Mr. Alapaki F. Kauka i Kokua mua no ka Aha; a ma ka make ana o Mr. Harris, ua lilo oia i Lunakanawai Kiekie i Nov. 5, 1882, a oia kulana kana e paa nei i keia wa. Ua paa oia i ka oihana lunakanawai iloko o keia Aupuni, ke hoea ae iloko o Feberuari ae nei, he 22 makakahiki.
Ma ka M.H. 1872 iloko o ka mahina o Aperila, mare oia ia Miss Akaneki Boyd (Agnes) kaikamahine a Rev. Dr. Jas. R, Boyd o Geneva, Nu Ioka. He 9 a laua mau keiki i keia wa–7 keikikane a 2 kaikamahine. O ke keiki hiapo, oia o Alapaki Francis Opio, aia ima ke Kulanui o Iale i keia wa.
A ke haawi nei ke Kuokoa i kana kalokalo ana e loaa hou i ka mea nona ka la hanau, he makahiki hiki lehulehu o ke ola ana iloko o ka pomaikai ame ka oluolu, a maluna ae o na mea a pau, mai poina i na kanaka oiwi o kou one hanau. Ke o nei ke Kuokoa i ka inoa a Kauka Makua i hea ai nona , Ke Kilohana Pookela o ka Lahui Hawaii , nolaila, o ka ne a ke Kuokoa , e paa i ke Aloha no ka lahui i ku ai oia (Kuokoa) he Kilohana.
- - - - -
Ka Hanu Ola Hope loa o Peresidena Kalivalana
no ka Ninau o Hawaii a moe iloko
o ka Ahaolelo Nui.
- - - - -
Mai loko mai o ka hoike a Komisina Blount i lawe mai ai makou i na huaolelo hope a Peresidena Kalivalana i hoike aku ai imua o ka Ahaolelo Nui o Amerika no ka mea e pili ana i ka ninau a kumuhana hoihoi aupuni moi a kekahi hapa o ka lahui Hawaii e kali nei me ke kuhihewa nui, ma ka manao ana na Peresidena Kalivalana e hooko mai ana ia hana. I mea e ku ai ke Kuokoa ma keia mua aku, ma ke kulana e huliamahi ole mai ai kela hapa o ka lahui e noho nei malalo oia mau manao kuhihewa, a hoahewa mai iaia– Kuokoa –no kona haawi ole ana i na hoakaka e hoike ana i ke kuhihewa io maoli oia manao; nolaila, ke hoikaika mau nei oia–ke Kuokoa –e hoakaka mau aku i na mea hoike moakaka lea, e hiki ai i ka mea noonoo ewaewa ole ke ike aole loa e hoihoi mai ana e Peresidena Kalivalana, mamuli o ka Mana Hooko i loaa iaia, ma o ke Kumukanawai la o Amerika, i ke aupuni Moi o Hawaii nei, oiai ua hoike maopopo maoli ae no ia i ka hiki ole o ia hana iaia ponoi iho ke hooko mai. A heaha ka mea e maopopo ai ka hiki ole ana iaia–Mr. Kalivalana–ke hana a hooko ma i ka hoihoi ana mai i ke aupunie “Moi,” elike me ka mea e manaoio ia nei e kekahi hapa o ka lahui Hawaii? Aole na ke Kuokoa e pane i ka haina o keia ninau, aka, na Peresidena Kalivalana no ia e pane, ka mea e hilinai nui ia nei e poai Roialiti , nana e hoihoi mai ana i ke aupuni “Moi.” A eia ka pane a Mr. Kalivalana no keia ninau:
“Mamuli o ka hoala ia ana mai e keia mau iini ana ame keia mau manao, a me ka hoomaopopo nohoi i na olokea e pili ana i ke kulana o ka hana, a me ke kau pale ia ana no hoi o ko‘u manao, ua a‘o aku la au ia Kuhina Willis e hoike aku i ka Moiwahine a me ka poe kakoo iala i ko‘u makemake e kokua ma ka hoihoi hou ana aku i ke kulana o ke aupuni e ku ana, mamua aku o ka lele kue kanawai ana ‘ku i uka o ka aina, o na pualikoa o na Mokuaina Huila o Amerika ma Honolulu ma ka la 16 o Ianuari i hala, ina nae e hiki ana ia hoihoi aupuni ana, mamuli o ka aeia ana o ka hana lokomaikai (clemency) ame ka loaa ana nohoi o ka pono maoli i na mea a pau i komo iloko o keia kumuhana. O na kumu i waiho ia aku (imua o ka Moiwahine. L.H.) elike me ka hoike ana o na oleloao, oia ka loaa ana o ka huikala akea i ka poe a pau i komo iloko o ka hana kukulu Aupuni Kuikawa a me ke apono ia ana o kana mau hana ame na aelike bona fide (me ka manao maikai). Ma ke ano pokele, ua koi aku keia mau oleloao e kanu ia na hana o ka wa i hala, a e lawelawe aku hoi ke aupuni i hoihoi hou ia aku i knoa mana, me he mea la aole loa i maua‘e ia kona kulana nee mua ana. Aole i aeia keia mau kumu e ka moiwahine , a oiai nae ua hoakaka ia aku no imua ona, e koi ia aku ana no oia e ae i keia mau kumu, A aia wale no a aeia ia mua kumu, alaila o na hoo ikaika ana a ka peresidena ( oia hoi, o Kalivalana L.H.) NO KE KOKUA ANA I KA HOIHOI HOU ANA AKU I KONA (ko ka “Moiwahine.”) AUPUNI E PAU NO IA, a hoea ma i keia wa, aole loa au i ike iki (learned) ua makemakeia e ae aku i keia mau kumu. Mamuli o keia hookuia ia ana mai o ka‘u mau kumuhana i hoolala ai, ua lilo ia i mea e akeakea ai no ko lakou waihoia ana aku i na hoa o ke Aupuni Kuikawa, oiaia hoi na manao hoakaka akea e hoike kuhihewa ana no ke kulana ame na manao haanui wale o ko kakou poe kanaka, ua liko ia mau mea i mau kumu moakaka e hoopoinoia ai ka hololea ana o ka hana hooponopono ma ka aoao o ka Mana Hooko.”
A no keia kumu i waiho aku ai ka Peresidena iloko o ka Ahaolelo Nui no kana hoike no keia kumuhana. Ua ike oia, aole hiki iaia iho, ka mea e noho Poo ana no ka Mana Hooko o America, ke hoihoi mai i ke Aupuni “Moi” o Hawaii nei; e like me ke keehina manao kuhihewa e pulama ia nei e kahi hapa o ka lahui.
- - - - -
He Buke Mele Lahui.
- - - - -
Ua haawi makana mai ka Mea Hooponopono o ka Buke Mele Lahui Helu 1, i hookahi kope oia buke i ko makou nei Keena, a ua kilohi iho makou i kona mau aoao. He wahi buke keia o 112 aoao, mawaho ae o na aoao olelo hoolaha, ka papa kuhikuhi ame ka olelo hoakaka a Mr. F(riend) Joseph Testa (Hoke). Ma ke koho iho he 240 a oi na mele o loko. O Ai Pohaku ka mua a o Ai-manu Koolau ka hope. He buke kupono no keia no ka waihona Buke Hawaii o ka poe puni malama buke. He 25 keneta ke kumukuai.
- - - - -
Na poe Bapetizo ma Kawiahao.
- - - - -
Ma ka la o ka Haku [Sabati] Ianuari 5, ua malamaia ka Ahaaina a ka Haku maloko o ka luakini o Kawaiahao, no ka wa mua loa mai ka wa i wehe hou ia ai na puka o ia Betela. He 17 poe keiki liilii ame 5 poe makua i bapetizoia e Rev. H.H. Pareka ma ia la; he 20 poe i komo i ka hoahanau. He 2 o keia poe i hoi hou iloko o ka Ekalasia mahope iho o ke kapae ia ana no 10 makahiki.
O ka ke Akua olelo no ka mea nana, aole o ka ke kanaka. Mai ke Akua mai ke ola ame ka hoopomaikai ana, he mea ole ke kanaka.
- - - - -
Lilo i Hoahanau no ka Ekalesia o “Kuakeano.”
- - - - -
Ma ke anaina haipule kakahiaka o ka la aku nei o ka Haku [Sabati], Ian. 5, ua hookomoia na poe no lakou na inoa mahope ae nei i poe hoahanau no ka Ekalesia o “Kaukeano”:
Ma ka palapala.–R.F. Woodward, G.E. Rugg, S.P.French, Flroence Kelsey, Kate Makins, C.T. Rodgers, C.V. Wharton, Mary F. Wharton, Mary E. Green.
Ma ka hoike manaoio.–W.F. Damon, E.O. Hall, Florence Hall, H.A. Kluegel, Jane Wilson, E.N. Hitchcock, Chas. Hawkins, W.W. James, J.D. Tracy, M.S. Damon, R.E. Bond, T.G. Dillingham, Martha S. Colburn, Marian E. Dillingham, Amy L. King, Amy J. King, Annie K. King, G.L. Crabb, Emma L. Crabb, Joanna Marshall, E.C.S. Crabb, O.H. Harlan, Florence Harlan, H.S. Ewing, Alice C. Pferdner.
- - - - -
Ka Bana Lahui Hawaii ma na Aina E.
- - - - -
Ua loaa mai he lono i o kakou nei mai ka Mokuaina mai o Ohio, no ka mea e pili ana i ka Bana Lahui Hawaii. A penei ua lono la:
“Massillon, Ohlo, Dek. 20.–Ua haawiia ma ka po nei he aha hulahula, a no ia aha hula, i hoolimalima la ai na hoa o ka Bana Alii o Hawaii, he poe paahana mua lakou no ka moiwahine i hoopauia; a ua auhulihia keia poe a pau maanei.
“Oiai lakou e paani ana, ua loohia ia kekahi hoa o lakou i ka ma‘i ikaika ku i ka make, a olelo ae ia he ma‘i kau kona aia ma ke ake. Laweia oia i waho a ikeia ae la, he pololi maoli kona ma‘i. Pela no ko lakou ano a pau, eia nae ua hoowahawaha loa lakou ia mea he makilo. Ua lulu ae ka poe waiwai o ke kulanakauhale nei i dala na na malihini.”
Ua nonoi ae lakou ike ‘Kuhina Haki ma Wasinetona i mau kekua no ko lakou huli hoi ana mai i Hawaii nei.’ Ua waiho mai nei hoi o Kanikela Waila i keia kumuhana ia Kuhina Kupa. A ua lohe ia mai, ma ka huli hoi ana aku nei a ka mokuahi “Auseteralia” no Kaleponi, ua haawiia aku la na kauohe a me na kuhikuhi, e ke Aupuni Hawaii ia Kanikela Waila, no ka hoolako ana aku in a hemahema apau o na keiki puhi ohe, a me ko lakou hoolako pu ia ana aku me na lilo no ko lakou hoi ana mai.
- - - - -
Ka Heihei Mawaena o ke Kinau ame ke Claudine.
- - - - -
Ma ka huakai a na mokuahi Kunau a me Claudine i holo aku ai mai Honolulu aku nei no Lahaina, ma ka Poakahi, Dek. 30, ua holo heihei aku la laua mai Honolulu aku nei a hoea i Lahaina. Penei ka hoike a Kapena E.F. Cameron o ka mokuahi Claudine:
Haalele o Kinau i ka uwapo, hora 5:04 ahiahi. Hora 5 me 11 minute, haalele ke Claudine i ka uwapo. Ku o Kinau i Lahaina i ka hora 12:06 o ka po. Hora 12:0 oia po, ku aku ke Claudine no Lahaina.
Penei hoi ka hoike a E.F. Bishop ka mea malama manawa holo maluua o Kinau, i keia heihei ana:
“Ina helu ia ka manawa holo o ua moku elua, mai ka wa i naalele aku ai na moku i ka pili uwapo, alaila, ua eo io ia Kalaudina. I ko ke Kinau puka ana, ua hookaulua ia oia mamuli o ko Mikahala ame Lehua puka ana ina ia wa hookahi no, nolaila, ua aneane e lilo 2 a 3 paha minute ma ia kali ana. I ke kaalo ana mai o ke Kalaudina ma ka hale ipukukui, 2 minute ia ame ka hapa mahope iho o ko ke Kinau haalele ana aku, a nolaiia, mai ia wahi mai i helu ai ke Kinau no ke alahele heihei o na moku elua. I ka hoea ana i Lahaina, ua ku mai ke Kalaudina iloko o 2 me ka hapa minute mahope i ho o ke ku ana o ke Kinau, a no ia mea ua pai-a-pai ka heihei, aohe mea i eo ai. Ua holo ia e na moku elua, ma keia heihei ana, mai ka hale ipukukui mai Honolulu aku nei a hoea i Lahaina, ka Manawa o 6 hora me 53 minute.”
Ua keha ae o Adimarala Bekele o ke Kinau, he aa loa oia e heihei ke Kinau me ke Kalaudina i kahi wa e aelike ia ana, no na opihi makaiauli he [$] 1000.
- - - - -
Peresidena Dole no Hawaii.
- - - - -
Ma ka mokuahi Malulani o ka Poalua nei i hala aku ai o Mr. S.B. Dole, ka Pereridena o ke Aupuni o Hawaii, a me Mrs. Dole no ka mokupuni o Hawaii. He nui na kaanaka Hawaii a me ua hawole i akoakoa ae ma kai o ka uwapo. Malaila pu aku ka Bana Puhi Ohe.
- - - - -
E ukaliia an aka Peresidena ame Mrs. Dole e Konela Sopa ame Mekia Pota, a aia maluna o ka moku ia wa ka Loio Kuhina ame ka Lunakanawai Kiekie ame kekahi poe e ae he nui. E hala ana paha i ka Peresidewna he ekolu pule ma Hawaii a huli hoi mai ia. Ua manao wale ia, ua hele aku ka Peresidena ma keia huakai i mea e loaa ai iaia kekahi mau olelo hoakaka no na Aina Aupuni, na Alanui ame kahi mau mea e ae, no ka waiho ana aku i mau manao hoakaka imua o ka Ahaolelo e noho koke mai ana i keia mahina ae, oia ka Poakolu ekolu o Feberuaari.
- - - - -
Mokukaua Italia Cristoforo Colombo.
- - - - -
Ma ke kakahiaka Poalua nei, Ianuari 7, ua hoea mai la i ke awa o Honolulu nei ka mokukaua Italia Cristoforo Colombo mai na Pae Moku mai o Tahiti iloko o na la holo he 11, a malalo hoi o ka noho Kapena ana a Bertolini. He moku keia e hele kaapuni honua nei. Ua paa oia ma ka makahiki 1892. I kona ku ana mai, ua haawi mai oia i na kipu aloha ana no ka hae o ke Aupuni Hawaii.
O kekahi o kona mau aliimoku kiekie oia ke Keikialii Luigi, Duke o Abbeuzi, ke keiki a ke Keikialii Amedio, Duke o Costa, a he keiki hoahanau oia na ka Moi o Italia i keia wa. He 23 ona mau makahiki i keia wa. He haumana kula oia no Mr. R.N. Boyd o keia kulanakauhale ma ke Kula Alii Holomoku (Royal Naval Academy) ma Leghorn, Tuscany, Italia. O keia Keikialii ka mea ma ka lalani ekolu o ka hooilina kalaunu o Italia.
Ma Venice, Italia ia kapiliia ai keia moku, ma ka A.D. 1892. He 246.5 kapuai ka loa; ka laula, 37.1 kapuai; hohonu, 16.8 kapuai; kona kaumaha, he 3400 tona. He 19 ona mau Aliimoku, a he 225 poe kanaka. E hali ana oi 6 mau pu nunui o 41 iniha, anawaena, a he 4 pu ki wikiwiki, a me na lako kaua e ae.
O ka lilo a pau no kona kapilina ana he 786,000 paona daia Beritania, a ua like ia me $3,930,000.
Ma ka makahiki i hala aku la, ua kipaia e ia keia mau awa: Port Said, Aden, Bombay, Colombo, Calcuta, Rangoon, Singapore, Bangor, Hongkong, Shanghai, Nagasaki, Kope, Iokohama, Vladivostock, Siberia, a hoi hou in a kapakai o Kina, a malaila no oia i ka wa i hooukaia ai ke kaua mawaena o na Iapana ame @@@ mai holo oia i Manila, Bolivia, Australaide, Melebone, Sidane, Tasmania, Walinetona, ame Nu Kiiani, FIN, Tonya, Samoa a i Tahiti.
A ina e ioaa ole ana he mau kula, alaila, ma keia Poakahi ae o holo aku ai oia no Vanekouwa a hoea Esekimo.