Ka Nupepa Kuokoa, Volume XVIII, Number 8, 22 February 1879 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

 

KA NUPEPA

Kuokoa me ke Au Okoa

I HUIIA.

No ka Makahiki. $2.     Eono Mahina, $1.

Dala Kuike ka Rula.

-------------

                                                                                      FEBERUARI 22, 1879.

Na Misiona.

------

          Na Iudaio. Ko lakou nui 6,600,000, a oi aku, emi mai paha. Ua puehuehu ia lakou iwaena o na lahuikanaka a pau, e like me ka wanana no lakou ke hookuli i ka ke Akua olelo. Ua hookuli no lakou mamua ma ka haalele ana ia Iehova, a lilo i ka hoomanakii. No ia hewa, ua lawe pio ia aku lakou i Babulona. Iloko oia noho pio ana he 70 makahiki, ua loaa ka mihi, a ua hoihoi ia i ko lakou aina hanau.

          Ka pau no ia o ko lakou hoomanakii ana.

          A hala na makahiki 400 a oi ae, puka mai Iesu ka Mesia. Ua ae kekahi hapa uuku ia ia, Oia no ke Lii, oia hoi ka Mesia, ka Hoola. Hoole nae ka hapa nui. Hana ino, a pepehi ia ia. Ala hou nae oia mai ka make mai. Hele na haumana, he poe Iudaio lakou, a ao a paipai i ko lakou lahui e huli, e mihi, e manaoio ia Iesu ke Lii, ka Mesia, ka Hoola. Ae no kekahi hapa nuku, huli no, mihi no, manaoio no. Ka nui nae, hoole, hoomaloka, hoomaau, pepehi i na haumana a Iesu.

          Ko lakou hewa nui elua keia, ka hoole ia Iesu, ka hana ino i na haumana ana.

          Nolaila, ua hoopau hou ia Ierusalema a me ka luakini elua, a hoopuehuehu ia lakou io, ia nei, a hoopauia ko lakou noho aupuni ana.

          Nui no ko lakou hoowahawahaia, heneheneia, hana ino ia, hehi ia, hookaumaha ia ma na wahi e noho ana lakou. He mau wanana no nae no ko lakou ala hou ana, a hoopomaikai houia ʻ na ma Rom. H.

          Ma na Keneturia he nui, aole nui ka hana a ka poe Karistiano no lakou.

          A he waiho wale ia lakou me ke aloha ole ia.

          He mau Aha misionari Iudaio no nae kai kukuluia mamua aku nei.

          Ma ka makahiki 1808, ua kukulu ia kekahi Aha e na Karistiano ma Ladana. Ma Sekotia kekahi Aha i kukulu ia ma ka mak. 1840.

          Ua huli kekahi misionari Iudaio ma Ladana i ka nui o na dala i haawi ia e na Aha Iudaio a pau a me ka nui o na paahana, oia hoi 335,000 dala. 220 paahana, ua like ia me ka paahana hookahi no na Iudaio 30,000.

          O ka Aha misionari no na Iudaio i kukulu ia ma Ladana, 140 paahana ka lakou, he mau Kahunapule, he mau Kauka, he mau kumu &c. Eha kihapai ma Enelani, 23 kihapai ma Europa.

          Ekolu kihapai ma Asia, 30 kihapai ma Aferika. Ua unuhi ia Aha i ke Kauoha Hou iloko o ka olelo Begera ka olelo nui ia o na Iudaio. Nui na tausani Kauoha Hou i hoolahaia iwaena o na Iudaio.

          Na hua hoohauoli. Ma Ladana 2,000 Iudaio i lilo i poe Karstiano, ma na wahi e ae ma Enelani, 1000. Ma Perusia 5000, ma na wahi a pau iloko o keia Keneturia. 20,000 ao Iudaio i lilo i poe haumana na Iesu.

          He põe naauao loa kekahi, he põe kahunapule, he põe kumu ma na kula nui, he poe luna aupuni, luna ekalesia.

          Ua holo iki ka hana a na Aha misionari no na Iudaio, aole holo nui, nui ke keakea, nui ka hoomaloka, nui ka hoomaau ana, nui ka paakiki o kekahi poe he nui no.

          Ua mahuahua ka launa ana, ka oluolu ana, ka ae ana e ao ia na keiki ma na kula Karistiano. Ua makaukau no na keiki e lilo i poe haumana na Iesu. Keakea no nae na makua. Aia a hemo na keiki mai lalo ae o ka mana o na makua, ke komo nui no ia o lakou iloko o ka ekalesia Karistiano.

          O kekahi hoailona hoolana manao, eia no ia; Ka makemake o na Iudaio ma Amerika, e kapaia he poe Amerika, a ma Beritania, he poe Beritania, a ma Farani, he poe Farani, a ma Hunageria, he poe Hunageria, a pela aku. Oia ka hoonoa ana i ka inoa kapu, Iudaio.

          Ka huli nui i koe i poe Karistiano ma keia hope aku.

          Madekakeka. Ua haiia ʻ ku mamua. He Aha misionari maoli ma Madekakeka. Ua hoouna ia i mau misionari maoli ma kauwahi naaupo o Madekakeka. Oluolu loa ke lii oia wahi i na misionari.

          Ua ao ia kekahi põe i ka heluhelu, a ua huli mai kekahi poe. Aka, ua ala kue mai na lii ma na wahi e kokoke ana, a hooweliweli e kaua i keia alii oluolu ke kipaku ole aku oia i na misionari. Hoole loa nae ke lii mamua, aole make e kipaku aku i na misionari. O ka hoomaka no ia o na lii kue e kaua. Nolaila, ua ae ke lii e hele i kahi e me ua mau misioanri nei me kona poe kanaka, i kahi e noho maluhia ai lakou.

          He mau misionari maoli hou elima i hoounaia e keia Aha misionari maoli, ma ka hikina akau kekahi, a ma ka hikina hema eha. Ma ka halawai aloha, noho ke Kuhina nui ma ka noho ma ke noi ana o ka Aha. Ma kana haiolelo ana, olelo oia, mamua aku o kuu makuakane, ua ao oia i kekahi kaikamahine e heluhelu i ka baibala, a ua lilo oia i haumana na Iesu. Hiki mai ka hoomaau ana. Hoopii ia ua kaikamahine nei no ka lilo ana i Karistiano. Hookolokolo ia, hooiaio ia, hoahewaia e make ma ka hoolei ia mai ka pohaku kiekie a ilalo loa.

          Ae nae ke lii wahine e hoopakele iaia, ke ae oia e haalele i ka aoao Karistiano. Hoole loa nae oia, me ka olelo, aole loa au e haalele. E hoolei ia ʻ u mai keia pohaku ae a ilalo loa. No Iesu no au.

                                                                   THE INDEPENDENT.

-------------

Haawina Kula Sabati.

 

HELU 10, SABATI MAR. 9, 1879.

-------

KUMUHANA.

-------

Ka pomaikai o ka ma i kalaia. Pauku Baibala. Hal. 32; 1--11.

 

POMAIKAI ka mea i kalaia kona hala.

1. uhiia hoi kona hewa.

2. Pomaikai ke kanaka, maluna on a ka hoili ole ia o ka hewa e Iehova.

          Iloko hoi o kona uhane aohe hookamani.

3. I ko ʻ u mumule ana ua elemakule ae la kuu mau iwi.

          I kuu auwe ana a po ka la.

4. No ka mea, i ke ao a me ka po, kaumaha mai la kou lima maluna iho o ʻ u:

          Ua hooliloia ko ʻ u ma-u ana i maloo o ka makalii. Sila.

5. Ua hai aku au i ko ʻ u hewa ia oe;

          Aole au i huna i ko ʻ u lawehala ana.

          I iho la au, E hai aku au i ko ʻ u hala ia Iehova;

          A ua kala mai oe i ka hewa o ka ʻ u lawehala ana. Sila.

6. No ia mea, pule aku ia oe na haipule i ka wa e loaa ai oe;

          Oiaio, i ke kahe ana o na wai nui, aole ia e kokoke ia ia.

7. O oe no kuu wahi e pee ai;

          E pakele no oe ia ʻ u i ka popilikia;

          E hoopuni no oe ia ʻ u me na mele no ke ola. Sila.

8. E ao aku au ia oe, a hoike ia oe i kou ala e hele ai;

          E alakai au ia oe me ko ʻ u maka.

9. Mai hoohalike oukou me ka lio a me ka hoki, na mea ike ole;

          E pono ke kaohiia kona waha me ka haowaha, a me ke kaula waha, o hele kokoke ia ia oe,

10. E nui auanei ka ehaeha o ka mea hewa;

          Aka, o ka mea hilinai ia Iehova, e hoopuniia no ia me ke aloha.

11. E olioli ia Iehova, a e hauoli, e ka poe pono:

          E hooho no ka hauoli, e ka poe a pau i kupono ka naau.

          Pauku Gula. Pauku 1, hoopaanaau.

          Mele. Him. 348, O kuu manao e mele mau. p. 1, 5, 6.

          Pule i loaa mai ka pomaikai o ka mea i kala ia.

Ka wehewehe a ninau ana.

          He mua ka Halelu 51; he hope key Halelu. Ma ka Hal. 51, ua hai aku Davida i kona hewa, me ke noi aku e kalaia mai. Ma keia Halelu, ke hai mai nei i ke kalaia ana o kona hewa me ka pomaikai i loaa ia ia no ke kalaia mai.

          E nana hou. Halelu 51, ua hai aku Davida i kona hewa, me ke noi aku e kalaia mai. Ma keia Halelu, ke hai mai nei i ke kalaia ana o kona hewa me ka pomaikai i loaa ia ia no ke kalaia mai.

          E nana hou. Halelu 51. 2Sam. 12; 13.

          P.1. Owai ka i pomaikai? Nawai i kala? Ma keahea? ma o wai la? Hiki anei ke kalaia ke miho ole, a ke manaoio ole ia Iesu? Ua like anei ka uhi me ke kala ana i ka hewa? E kala, e uhi, e hoonalo, e holoi, e hoopau, he mau hua like ia. Ko ke Akua uhi, me ko ke kanaka uhi ana i ka hewa, ua like anei? Ua like kekahi, ua like ole kekahi. He uhi io wale no ko ke Akua. He uhi hoopunipuni ko ke kanaka i kekahi manawa.

          P.2. Pomaikai ke kanaka maluna ona  keahu ole ia ka hewa e   lehova ? Ua hewa no ke kanaka Aka, no ka mihi ana, aole i helu ia kona hewa. Ua holoi ia, e like me ka aie o ke kanaka ke hookaa ia. Nana Rom. 4; 7, 8. Kor. 5; 19. AOle hoi heaha ma kona uhane? Nana Ioane 1; 49. He mihi oiaio kona.

          P. 3. Heaha ko Davida mumule ana? kona hai ole, mihi ole i kona hewa a loihi, he mau malama paha. Ua akaka ia ia, ua hewa, a hewa loa no. AOle nae i hai aku i ke Akua, aole i hai mai i ke kanaka. E hoahewa ana no kona luna ike hala ia ia. E imi ana nae oia i ka mea e uhi ia'i kona hewa, a e hoopono ia'i oia, me ka loaa ole nae. Ua aha kona mau iwi? I keaha? Ua eha, ua hui na iwi on a me ko na elemakule. Me he la he mai hui kona, a hiki ole ke moe ma ka po. He walania nui iloko on a, no ka hewa.

          P.4. Kowai lima ka i kaumaha maluna on a, i ke ao, i ka po? Hoeha nui ke Akua ia ia. Pehea hoi kona ma-u? ka wai o ke kino, o ka io, o ka ili, ua ano maloo, e like me ke kino ke kau mai ka fiva wela, a ke nui hoi ka uwe ana.

          P.5. Pela ko Davida pilikia me mua o ka mihi ana. A pehea? Ua aha oia i kona hewa mahope iho? Aole oia i huna i keaha? I iho la oia e aha? A ua aha mai ke Akua? I ka manawa hea oia i ae ai, ua hewa, a lohe oia, ua kalaia? 2 Sam. 12; 7, 13. Ua like anei oukou me Davida ke hai ia ko oukou hewa? Ae koke anei me ka mihi? Ina pela pehea mai ke Akua?

          P.6. Na haipule ia e aha lakou? I ka wa hea? Nana Isaia, 55; 6. 2 Kor. 6; 1, 2. Pehea ke kahe mai na wai nui? Na wai nui, oia na pilikia nui. Nana Hal. 91; 7

          P.7. Heaha ke AKua ia Davida? E hoopakele ia ia i ke aha? E hoopuni ia ia me keaha? No keaha?

          P.8. Owai ke ao aku, hoike aku? Davida. Ua mihi oia, ua kalaia kona hewa; nolaila, hiki iaia ke ao aku ia hai, a hoike aku i ke ala e nele ai, me kona aielo, Hal. 51; 13. E mihi oe mamua, a hoopau i kou hewa, alaila, hiki ia oe ke ao aku ia hai.

          P.9. Mai hoohalike okou me keaha? na mea aha? Naaupo ka lio me ka hoki, aole hoolohe wale i ka leo o na kahu. Holo laiau no io io. Me keaha e holo pololei ai? o hele kokoke, i hele a kokoke paha ka pololei. Mai hookuli oukou, a noho hihiu, e pono ke ao nui ia, i hoolohe, a launa mai.

          P.10. Nui auanei keaha o ka mea hewa? Pehea nae ka mea i hilinai ia Iehova?

          P.11. Owai ka i kauoha ia e olioli ia Iehova, a e hooho no ka hauoli? A pehea he naau kupono anei ko oukou no ka hauoli ana? Heaha ka naau kupono?

          Mele. Him. 72. Hoomaikai kuu naau, p 1, 4, 5.

Na Ninau Hoi Hope.

          Heaha ke kumuhana o keia Halelu? Hai mai i ka pauku gula. Halelu 32. Owai ka mua? E aha ana Davida ma ka mua? E aha ana oia ma ka lua? Ma keaha i loaa ai ia Davida ka pomaikai a me ka hauoli? Pehea la oia iloko o ka mihi ole? Pehea hoi oukou ke noho iloko o ka mihi ole? Pehea na hoahanau i hewa ma Korineto? 1 Kor. 11; 30. He mea makau anei ke hana hewa, a noho mihi ole? Ma keaha e loaa ai ka pomaikai? Heaha ka pono ke makemake kekahi e ao aku ia hai i hoolohe ia oia?

          Me na holoholona aha e hoohalike ole ai oukou? Ma keaha? Pehea nae Isaia 1; 3? Oi ka ka ike o ka pipi, a o ka hoki i kona on a! Ma keaha?

          He puuhonua Iehova nowai? Hal. 46; 1-3.

          Mele. Him. 35. Ke Akua nona e ola'i. p 1, 2, 3.

          Pule i lilo ke Akua i Puuhonua no kakou.

          Haawina no Mar. 16 Hal. 84; 1--12.

----------------------

Na Rula o na Ahahui Lunakahiko.

-------

NO KA WEHE ANA I NA HALAWAI.

          1. E noho ka lunahoomalu ma ka noho i ka hora o ka la a ka aha i ae mua ai e halawai, e hoomalu oia i ka hale, a, in a ua lawa ka nui o na hoa, e wehe i ka halawai me ka pule.

          2. Ina ua lawa ka nui o na hoa i akoakoa mai, i ka manawa e halawai ai ka aha, aole nae i hiki mai ka lunahoomalu, alaila na ka lunahoomalu o ka halawai mua ae e pani koke ae i kona hakahaka.

          3. Ina ua lawa ole ka nui o na hoa i hiki mai i ka hora i olelo ia, e hiki no i na mea elua o ua aha la ke hoopanee aku a hiki mai ka nui e lawa'i.

          4. Aia a pau ke kahea ana i na inoa a me ke kiko ana i na mea i hiki ole mai, alaila, e heluhelu ia ka moolelo o ka halawai mua ae, a hooponopono ia paha.

NA HANA A KA LUNAHOOMALU.

          5. Na ka lunahoomalu e hoomalu i ka hale, a e imi mau e holo na hana a ka aha.

          6. E malama pono ka lunahoomalu i na kope o na hana i hooholo ia e hana i kekehi mau la i olelo ia, a e hapai ia mau hana i ka wa i olelo ia.

          7. He kuleana ko ka lunahoomalu e olelo no na mea e maluhia ai mamua o na mea e ae a pau, e ku no oia iluna ma ia hana, a hana no e hooholo i na ninau no na mea e maluhia ai; ua hiki no nae i na mea elua ke hoopii aku i ka hale no kana i hooholo ai.

NA HANA A KE KAKAUOLELO.

          8. I ka halawai ana o ka aha, e hoomakaukau koke ke kakauolelo i papa inoa o na hoa i hiki mai, a waiho ma ka lima o ka lunahoomalu, a i komo hou mai na hoa, nana no e hookomo i ko lakou mau inoa iloko o ua papa inoa nei.

          9. He pono ke kakauolelo e opiopi i na pepa a pau i heluhelu ia mai ai, me ka hoailona pono ma ke kua, a e malama maikai ia mau mea.

KE ANO O KA HANA ANA I KELA A ME KEIA LA.

          11. He pono ke kokua ia mai na olelo hooholo a mahope hoike hou ia e ka lunahoomalu, a i ole ia,e heluhelu ia i lohe pono na mea a pau, mamua o ka olelo ana o ka aha ia mea; a e kakau ia na olelo hooholo a pau ke noi mai ka lunahoomalu a o kekahi hoa paha ia mea.

KE KII A LAWE HOU AKU I NA OLELO HOOHOLO.

          12. E hiki no i kekahi mea ke kii aku a lawe hou i kana palapala hooholo me ka ae mai o ke kokua, mamua o ka hoopaapaa ana ia mea, aka, aole mahope o ka hoopaapaa ana, ke ole e ae mai ka aha.

NA OLELO HOOHOLO PONO KE HOOPAAPAA IA.

          13. E ninau io me ka hoopaapaa i ole na noi e waiho ma ka papa, e hapai i ka hana, e hoopanee i ka halawai, a me ka ninau ano. Hookahi wale no olelo ana o kekahi hoa ma na olelo hooholo e malu ai ka hale, a e hoopanee paha i ka hana, a e waiho aku paha i ke komite; ma na olelo hooholo e ae, elua wale no olelo ana a kekahi hoa,ke ole ae ka hale iaia e olelo hou.

NA NOI E HAPAI MUA IA.

          1 E pau ka halawai.

          2 E waiho ia olelo ma ka papa.

          3 E hoopanee ia me ka hoomaopopo ole kona manawa.

          4 E hoopanee ia a hiki i kekahi la i hoakaka ia.

          5 E haawi i kekahi komite.

          6 E hoololi hou ae.

          O keia mau manao hooholo, e hiki no ke hoopuka mai; o ka mua no nae ka mea hana mua ia, a o ka lua, a pela no a pau; a o ka olelo e pau ka halawai, ua kupono ia i na manawa a pau, a e hooholo ia a hoole ia paha me ka hoopaapaa ole.

NA NOI E HOOLOLI HOU,

          15. E hiki no ke hoopuka mai i ke noi e hoololi hou ae i kela olelo hooholo, a a niau mua ia ke noi e hoololi hou ae,

KA HAPAI HOU ANA I NA MEA I HOOHOLO IA.

          16. Aia a hooholo ia kekahi olelo, aole e hiki ke hapai a hana hou ia mea, ke ole e ae mai elua hapakolu o na hoa ma ka hale, a ke ole hoi he hoa o ka aoao nui ka mea noi a me ka mea kokua.

KA HAPAI HOU ANA I NA HANA I HOOPANEE IA.

          17. O ka hana i hoopanee ia me ka hoomaopopo ole i kona manawa, aole e hapai hou ia ia hana iloko oia kau halawai, ke ole e ae mai ekolu hapaha o na hoa a pau i lawelawe i ka wa i hooholo ia'i oia.

NA HAIOLELO.

          18. Ina e ku like iluna elua a keu aku paha e olelo, alaila, e olelo mua ka hoa i loihi mai ka noho aku o ka lunahoomalu.

          19. I ka olelo ana o keila hoa heia hoa, e ku no oia iluna a hookupono i kana olelo i ka lunahoomalu, a e lawelaew hoomaikai aku i kona mau hoa, a i ka lunahoomalu no hoi.

NA HOOKEKE ANA.

          20. Aole e hookeke ia ka hoa e olelo pololei ana, i ka mea e waiho ana imua o ka hale, a no ka hooponopono ana paha i kekahi kuhihewa.

NA PILI KINO.

          21. Aole e ae ia kekahi ma ka hoopaapaa ana e olelo muamuamu no ko kekahi kanaka pono.

KA NINAU ANO.

          22. Penei e ninau ia'ku ai ka ninau ano. "He pono anei e ninau ano i ka mea i mua o ka hale?" E ninau ia keia me ka hoopaapaa ole; Aole hiki i kekahi ke hoopaapaa, aole hoi kekahi hoololi hou ae a hooholo ia keia ninau.

          23. Ina paha i ae ia ka ninau ano, alaila, e ninau koke ia ka mea imua o ka hale, me ka hoopaaaa ole; Ina e hoole ia ka ninau ano alaila e hoopaapaa hou no.

          KE KOHO ANA.

          24. E hai mai kela hoa keia hoa i ka wa e hooholo ai i kekahi mea, i kona manao hooholo, aole pono e ku i ka wa, o hooholo ia auanei na mea koikoi e ka hapa uuku o ka hale. E helu ia na mea koho ole me ka aoao nui, ke ole e ae mai ka hale i ko lakou koho ole ana.

KA MAHELE ANA I KEKAHI HOOHOLO.

          25. Ina paha he mau mea okoa iloko o kekahi mea hooholo i hoopaapaa ia, e hiki no i na hoa elua ke koi aku e mahele ia oia, a e ninau pakahi ia kela a me keia hapa.

NA LOINA NO KE KOHO ANA.

          26. Aia a hapai ia kekahi mea hooholo, he mau hakahaka kowa o na huahelu a o na manawa paha, e ninau mua i aka helu nui a me ka manawa loihi.

          27. A hoomaka ka Lunahoomalu e ninaui ke koho ana, a i kekahi olelo paha, ke ole kekahi kuhihewa maopopo; i na pela, e hooponopono ia ia kuhihewa, a hoomaka hou ka Lunahoomalu e ninau i ke koho ana.

KE KOHO ANA O KA LUNAHOOMALU.

          28. Aia a lawe ia ke koho ana o ka Aha ma ka balota, alaila e koho pu ka Lunahoomalu me na hoa e ae; aka, aole e koho oia ma na mea e ae, ke ole e mahele like ia ka hale; a in a aole e makemake ka Lunahoomalu e koho malaila, alaila, e haule ia mea hooholo.

NA AE A ME NA OLE.

          29. E malama ia ma ka moolelo na ae a me na ole, ke koi mai ka hapakolu o na hoa iloko o ka halawai.

NA KOMITE.

          30. Na ka Lunahoomalu e koho i na komite a pau, ke ole ka Aha holookoa.

          31. O ka hoa i olelo mua ia ma kekahi komite, oia no ka Lunahoomalu o ia komite, a nana no e hoohalawai i ke komite, a i na ua nalowale ia, na ka lua e pani i kona hakahaka a e hana i kana hana.

NA HALAWAI MALU.

          32 He pono na Aha a pau ke halawai malu ma na mea a lakou e manao ai, he pono ole ke hookaulua ia.

NA HALAWAI HOOKOLOKOLO.

          33 Aia hui ka aha e hookolokolo i kekahi mea, he pono ka lunahoomalu e hai aku e hoomaka ana ka aha i ka hookolokolo i lawe ia mai, a e ao ikaika aku oia i na hoa e hoomanao i ko lakou kulana koikoi, he mau luna o ka aha o Iesu Krsito, a he hana koikoi ma ko lakou lima.

KE KOMITE HOOKOLOKOLO.

          34. Ma na mea hookolokolo a pau i hoopii ia, he pono e koho ia he komite hookolokolo na lakou e hooponopono a alakai ma ka hana; he pono hoi i na hoa o keia komite ke koho pu me ka aha i ka mea e hooholo ia.

          35. Aka, ma na mea hookolokolo mamuali o ka lono kaulana, aole mea hoopii, he pono ke koho ia ke komite i kapaia ke Komtie Hoopii na lakou e alakai ma ka aoao hoopii, aole nae e ae ia lakou e koho pu ma ka mea e hooholo ai.

KE KULANA PONO.

          36. Aia hui na aha ekalesia, e hoike mau na hoa i ke ano kuoo, a hanohano e pono ai, e hoopili lakou i ka lakou olelo i ka mea i noonooia, a e hookaokao i na olelo loihi, pili i o ia nei, a i olelo kekahi me ka pili ole i ka mea imua o ka hale, ua hiki kekahi hoa ke hoopololei iaia, a he pono ka lunahoomalu ke kauoha iaia e hoopili pono i kana olelo

          KE KAMAILIO ANA.

          37. I ka wa e hana ana ka aha, aohe pono kekahi hoa ke kamailio pu me kekahi, ke ole i ae ia mai; aole hoi e olelo na hoa kekahi i kekahi, ma o ka lunahoomalu wale no.

KE KU ANA ILUNA.

          38. Inae ku ana iluna na hoa ekolu a oi aku paha i ka mea e kamailio mai.

KE KINAIANA I KA HAUNAELE.

          39. Ina paha e hana hokai kekahi hoa, ua pono kela hoa keia hoa ke koi aku iaia e hoopololei, a na ka lunahoomalu mai.

KA HOOPII MAI KA LUNAHOOMALU AKU.

          40. Ina i kaumaha ka naau o kekahi hoa no ka olelo hooholo a ka lunahoomalu, ua hiki ia ia ke hoopii i ka aha, a e ninauia keia hoopii me ka hoopaapaa ole.

KA PUKA ANA AKU O NA HOA IWAHO.

          41. Aole e puka aku kekahi hoa i waho, ke ae ole mai ka lunahoomalu, aole e hoi e aku i kona home, ke ole e ae mai ka aha.

KA HOOKUU ANA I KA AHA.

          42. I ka hoopau ana i na halawai o ka aha, he pono i ka lunahoomalu ke hookuu aku me kekahi himeni kupono a me ka pule, a me ka olelo hoomaikai Lunakahiko.

 

OLELO HOOLAHA.

-----------

 

A. McWAYNE,

          HALE KUAI LAAU LAPAAU, A ME NA WAIALA o na ano a pau, me na SOPA ALA  o na ano he nui wale. Ma ke kihi o Alanui Papu me Kalepa.

840 1y

-------

DR. RODGERS,

---OIA O---

K A U K A  L O K E K E.

          UA hoomau ae nei i kona keena oihana mai ka hale hou o Ailuene ma Monikahaae a iloko o ka Hale Mu. helu 34 Alanui Papu.

          Ma key hope e hoomakaukau ana ke Kauka i kona mau Laau ponoi a puunaue aku i ka poe kii mai.

          O kona hale noho, aia no ma ka pa o ka Hotele Hawaii, ma kahi i noho mai ai.

          881 tf

-------------------

E. STREHZ.

(AILUENE.)

          MALAILA E LOAA AI NA ANO LAAU A pau: a me na wai hoomaemae o kela a me keia ano. E hamama mau ana ka ipuka ma na po Poaono a pau. Ma ke kihi o alanui Papu a me Hotele, ma Monikahaae.            (845 1y)

-------------------

E.O HALL & SON.

(E.O. HOLO MA.)

-----

NA MEA KUAI I NA MEA MAHIAI.

Na Lole, Na Pena, Na Aila, a me Na ano Lako e ae a pau he lehulehu wale.

846               Kihi o Alanui Papu me Moi.        1y

----------------

LOLE MAKEPONO

Ke Kuike.

E LOAA NO IA MA KAHI O

KAKELA ME KUKE!

----E LAANA----

Ahinahina, Kalakoa, Keokeo, Leponalo, Pena, Aila, Aniani,

NA MEA PIULA!

KOPA, AILA HONUA, AILA HOOMALOO

Kui Kakia, Pakeke, Tabu, Kaula, Noho Lio, Hulu Palaki, na Pulumi.

----A HE----

AGENA NO HOI NO NA MOKUPUNI O HAWAII NEI NO NA

Lainakini-nao,

Lainakini Maoli,

Palule Kalakoa,

Alapia, Kelepa, Kilika,

 

Na lole kupono i ka wawae,

Palule Huluhulu,

Na Lole Huluhulu,

Na Lole no ka hoohehelo ana

Lipini, Lihilihi, &c.

LIPINE, LIIILIILI, &C.

----A ME NA----

Mikini Humuhumu Makepono Loa!

----a he----

MAU MEA AI KAHI

Ka Palaoa, Kopaa, Raiki, Pia, Hoohu, Paakai Huaala, Penikila, Huaale,

A ME NA LAAU HAMO, A PELAʻKU!

827 3M 839

----------------------------------

PAPA! PAPA!

----NO----

ALLEN & ROBINSON

-------

UA WEHE AE NEI MAUA I

PA KUAI PAPA

---MA---

KA UWAPO O PAKAKA

------

          Na Papa Ulaula o na ano a pau.

          Na Papa Paina o na ano a pau.

                   Na Pili Hale Ulaula.

                   Na Pili Hale Keokeo.

          Na Pepa Hoonani Hale,

          Na Pepa Molina.

Na Pena a me na Aila Pena!

NA KUI O NA ANO A PAU.

          NA PANI PUKA a me NA PANI PUKA ANIANI.

                   NA PANI PUKA a me NA OLEPELEPE.

----------------

NA LAKO KUKULU HALE

O NA ANO A PAU!

E KUAIIA MA KE

KE KUMUKUAI HAAHAA LOA

O keia Makeke.

ALLEN & ROBINSON

Honolulu, Ian. 1, 1878.              840 3m

-----------------------

PAPA, PAPA

AIA MA KAHI O

LEWERS & DICKSON!

(O LUI MA.)

----------

MA KE KAHU A KAHIKO MA

Alanui Papu a me Moi!

E LOAA AI NA

Papa Nouaiki!

o kela a me keia ano.

Na Papa Nani a Paa no ke Kukulu ana i na Hale!

          Na Pani Puka, Na Puka Aniani, Na Olepelepe, Na pou, Na o-a, Na Papa Hele, Na Papa Ku, A me na Papa Moe nui loa.

NA PILI O KA HALE

O NA ANO A PAU.

          Na Pepa Hoonani, Na Pena o na Wai a pau, Na Kui mai ke Nui a ka Makalii, Na Ami Puka, Na Ami Puka Aniani, Na Ami o na ano a pau, Na Aila Pena, o kela me keia ano, Na Aila Hoomaloo, he lehulehu wale, Na Aila e ae o na ano a pau.

NA WAI VANIKI

----A ME NA----

WAI HOOHINUHINU NANI!

o na ano a pau loa.

NA BALAKI ANO NUI WALE!

A ke hai ia aku nei ka lono i na makamaka a pau, ua makaukau keia mau makamaka o oukou e hoolawa aku ma na mea a pau e pili ana ma ka laua oihana

---NO KA--

UKU HAAHAA LOA!

E like me ka mea e holo an amawaena o LAUA a me ka MEA KUAI.

E hele mai! E na Makamaka!!

A e lawa no hoi ko oukou makemake me ka oluolu a me ka maikai!

845 tf

-------------------------

KOPA KUKAEPELE

---A---

GLENN!

[see image in original]

AOLE LUA NO KA HOOMAEMAE I KA ILI!

---------

He mea hoopau i na eha, Na Ili Puupuu, A he hoomaemae i na mea ino, A he hoopau Lumatika, A he kopa auau no ho

-------

O kela koppa ka oi aku o ka mea maikai I waihoia mai imua o kanaka.

-------

Aole wale no ka Hoopau ana i ka Huehue

Ili Poha, Wela la, Luluaina, a me na mea e ae o ka Ili;

A ma ia holoi ana, o ka hoopalupalu pu kekahi i ka Ili, a keia Laau Hoomaemae, Ina ole e hana ai.

---------

O ka hoemi ana iho i na mai o ka Ili, a o ke pale aku i ka mai mai na lole e na Mai Lele, oia kekahi. O na ohana ame na poe makaikai, in a e hoolako lakou i keia

KOPA HOOMAEMAE LUA OLE!

ALAILA, UA LANAKILA LAKOU

--------------

He hoopau i ka lehu o ke poo,

A he Kopa no hoi e kaohi mai ai

I ka lauoho mai ka hina ana.

---------

Ua hooia nui mai na Kauka no ka maikai o keia Kopa!

E loaa no ma kahi o

M. McINERNY,

Kihi o na Alanui Papu me Kalepa