Ka Nupepa Kuokoa, Volume XIII, Number 2, 10 January 1874 — Page 4
| This text was transcribed by: | Brandi |
| This work is dedicated to: | Awaiaulu |
KA NUPEPA KUOKOA, ME KE AU OKOA I HUIIA.
Onward Christian Soldier
Sparkling Rubies, p. 44.
1.
Nauwee na koa,
Kaua aku no,
Kau ko Iesu kea,
Kau a hoopaa mau.
Iesu no ka Luna,
Nana e alakai,
Nauwe i ke kaua,
Nana e kokua mai.
Cho. Nauwe e na koa,
Kaua aku no,
Kau ko Iesu kea,
Kau a hoopaa mau.
2.
Ku a hea Satana,
I ke kea nei,
Ma ko Iesu mana,
Lanakila e.
Holo na puali
O na enemi,
E hooho oli,
A hosana e.
Cho. Nauwe e na koa &c.
3.
He puali mana
Na haipule e,
Nauwe a hehehi
I na enemi.
Hui kuikahi,
Nauwe like e,
Kei ka weliweli!
Kei hoi ke auhee!
Cho. Nauwe e na koa, & c
4.
Ala na aupuni,
A hiolo nae,
Paa ka poe haipule
Paa a mau loa 'e.
Oli mililani,
Nauwe no a mau,
Nauwe i ka nani,
Ma ke ao ma-o.
Cho. Nauwe, e na koa, &c
Hawaii.
HAAWINA KULA SABATI.
KA HAPAHA MUA O 1874
HELU 4, SABATI IANUARI, 25.
Kumuhana. Ka pau ana o na kanalua.
Pauku Baibala. Pukaana 4: 1-9. 27-31
OLELO aku la o Mose, i aku la, aia hoi; aole paha auanei lakou e manaoio mai ia'u, aole hoi e hoolohe mai i ko'u leo; no ka mea, e olelo auanei lakou, Aole i ikeia 'ku o Iehova e oe.
2 I mai la o Iehova iaia, Heaha kela mea ma kou lima? I aku la ia, he kookoo.
3 I mai la kela, E hoolei ia ilalo i ka honua. Hoolei iho la ia ilalo i ka honua, a lilo ae la ia i nahesa: a holo aku la o Mose mai kona maka aku.
4 I mai la o Iehova ia Mose, E kikoo aku kou lima, a e lalau aku ma kona huelo. Kikoo aku la kona lima a lalau iho la, a hoi hou ae la ia i kookoo ma kona lima.
5 Ilaila e manaoio ai lakou, ua ikea e oe o Iehova ke Akua o ko lakou poe kupuna, ke Akua o Aberahama, ke Akua o Isaaka, ke Akua o Iakoba.
6 ¶ Olelo hou mai la o Iehova iaia, E hooholo'oe i kou lima ma kou umauma iho. Hooholo ae la ia i kona lima ma kona umauma, a i kona unuhi ana mai, aia hoi, ua lepera ia e like me ka hau.
7 I mai la oia, E hooholo hou ae oe i kou lima ma kou umauma. Hooholo hou i kona lima ma kona umauma, a unuhi hou mai, aia hoi, ua hoi hou ae la no e like me kekahi io ana.
8 A in a aole lakou e manaoio mai ia oe, aole hoi e hoolohe mai i ka leo o ka hoailona mua, e manaoio paha lakou i ka leo o ka hoailona hope.
9 A in a aole lakou e manaoio mai i keia mau hoailona elua, aole hoi e hoolohe i kou leo, alaila e lawe ae oe i kahi wai o ka muliwai, a e ninini ma kahi maloo, a e lilo auanei ka wai au e lawe ai mailoko mai o ke muliwai, i koko ma kahi maloa.
27 ¶ I mai la o Iehova ia Aarona, E he le oe e halawai me Mose ma ka waonahele. Hele
ku la ia, a halawai ihe la ma ko kuahiwi o ke Akua, a hope ae la iaia.
28 Hai ae la o Mose ia Aarona i na olelo a pau a Iehova aana ia i hooana mai, a me na ouli a pau ana i kauoha mai ai iaia.
29 ¶ Hele aku la o Mose ia ua o Aarona, hoakoakoa iho la laua @@@@@@ a pau o na mamo a @@@@@@@
30 Hai aku @@@@@@ a pau a Iehova i olelo mai @@@@@ a hana iho la ia i na ouli @@@@@@ kanaka.
31 Manaoio iho la @@@@@@ @@@@ lohe pono no lakou, @@@@@@ ka poe @@@@@ hoi oia i ka lakou @@@@ @@@ iho la ko lakou @@@@@.
Pauku hoo@@@@@ Pauku 31.
MELE. Him. @@@, Leo - @@@@@@, C. @@@, p. 196.
Pule i pau na kanaka a loaa ka mahaloia.
NA NINAU.
Na Makua. Haalele kakou ia Mose e aha ana? E hool@@@ ana i ke kauoha a ke Akua e aha? Ua ae koke anei o Mose e hele? Ua kanalua paha? Ehia kaualua ana? Heaha ka mua? Mok. 3:11. Heaha ka loa? Mok. 4:1. Heaha kekolu? p, 10. Heaha ka ha? p. 13. Ua hoopauia anei keia mau kanalua? ma ke aha? Ahonui ke Akua! Ua wela nae kona huhu ia Mose, a pane pehea ma ke kanalua eha? p. 14-17.
Na Keikikane. Ua hewa anei Mose no keia mau kanalua? Ioa hewa ole, huhu anei ke Akua? Ioa kanalua oukou i ka malama i na kauoha a ke Akua, oluolu anei ke Akua? Aole anei he nui ka poe kanalua? No ke aha ko Mose kanalua ana? No kona hoomaka e kokua i kona poe hoahanau a huhu loa lakou iaia. Mok. 2:14. A no kona hoohaahaa ana ia ia iho kekahi. Aole anei i hoemiia kona hanohano no keia mau kanalua? Pela paha. Mai lilo ka oihana kahuna nui iaia mee kaua mau keiki. Aka, no keia mau kanalua, ua lilo ia, ia Aarona kona kaikuaana me kana mau keiki, p. 14.
P.1. Na Kaikamahine Makau Mose i ke aha? I ka hoole o kona poe hoahanau, aole oia i ike i ke Akua, aole ke Akua i hoouna mai iaia. A pehea? Aole anei pela kekahi poe i keia wa, he poe hoomaloka a hoole aole ikeia ke Akua? Pela io no. Ninau kekahi, auhea ke Akua? Auhea ka lani? Auhea ka po? Kanalua ea. Malama o pili ka hoomaloka ia oukou.
Na Pokii. Makemake ke Akua e lilo oukou i poe aha? I poe maikai, i poe kaikai i ke kea a hahai mamuli o Iesu. A pehea oukou? Kanalua paha, e like me Mose. Ae, pela, makau makou i ke kea, makau i ka hoinoia ke ikeia i kaikai ana i ke kea. Makau i ka pule, i ke komo ana iloko o ka Ekalesia, o heneheneia makou. Kanalua Mose, makau i ka hoomaloka o kona poe hoahanau, oluolu anei ke Akua i kona kanalua? Oluolu anei oia i ko oukou kanalua ana? Heaha ka hope o ke kanaloa? Ka loaa oe paha.
P. 2-5. Na Makua. Ina hoomaloka na hoahanau o Mose heaha ka hana mua ana e hana'i i pau ka hoomaloka? Heahah ma kona lima? He kookoo aha ia? He mea hanohano paha; he hoailona paha no kona oihana kahu holoholona. Ua hooliloia ia i aha? A hoolilo houia ia i aha? Ma ke aha? No ke aha? Ua hana anei Mose i keia mea imua o kona poe hoahanau mahope? p. 30.
P. 6-8. Na Keikikane. Ina manao ole na hoahanau o Mose i ka hana mana mua i hanaia, heaha ka hana mana alua e hana ia e manaoio ai lakou? Ua 'haia kona lima? A ua aha hou ia mahope? Kupanaha ka hana a ke Akua, ea. Hookahi minute a puka mai ka lepera; hookahi minute a nalo aku la! Hiki anei i ke kanaka ke hana pela? Ina hiki, pehea na lepera ma Molokai?
P. 9. Na Kaikamahine. Ina e hanaia keia hana mana elua a mau ka manaoio ole o na hoahanau o Mose, alaila heaha ka hana ekolu ana e hana ai i manaoio ai lakou? Ahonui ke Akua, ea. ahonui hoi Mose. Hiki ia wai wale no ke hoolilo i ka wai i koko? Nawai hoi i hoolilo i ka wai i waina mahope? Nui na mea e ke Akua i kauoha aku ai ia Mose e hana, i manaoio kona mau hoahanau iaia, a i ke Akua, pehea hoi i keia wa? Ua nui anei na mea i hana ia i manaoio oukou i ke Akua, a ia Iesu ka mea i hoounaia mai, mai ka lani mai, e hoola ia oukou? Ae, ui wale. Hai mai i kekahi. Kona haawi ana mai i na misionari, i na kahunapule, i na kula Sabati, i ka Baibala, i na halawai, i ka Uhane Hemolele, i na pule a ka poe pono. &c.
A ke manaoio nei anei oukou?
Na Pokii. Ua ike anei oukou i ke kookoo? Ae, ua ike makou i kekahi kookoo me ko mea; he mea kokua i ka hele ana i ka elemakule, a luahine; a he mea e hanohano ai ka ke keonimana, me mea. A he mea aha kekahi? He mea pale aku i ka ilio, a i ka bipi paha. Ke kookoo o Mose, heaha ka mea kupanaha i hanaia i keia kookoo? Ua hoi hou anei ka nahesa i kookoo? He mea lealea wale anei keia? He mea aha? Ina lilo ko'u kookoo i nahesa, pehea oukou? holo paha makou. A in a lalau au i ka nahesa, a hoi hou ia i kookoo, pehea oukou? Akaaka wale paha. Pono anei ia? Akaaka anei Mose , me kona poe hoahanau i ka ike ana i keia mea kupanaha? Aole, ua manaoio, ka mana ia o ke Akua, a pono ke hoolohe i kana. A lilo ko Mose lima i aha? a ela hou anei? A lilo ka wai i aha? Mana ke Akua no. E hoolohe oukou iaia a malama pono.
P. 21. Na Makua. Ua pau anei ke kanalua ana o Mose? p. 18. Heaha ka mea i @@ ai oia a hoi hou i Aigupita? p. 19. Ua hoi mai anei? Me wai? p. 20. Heaha ka ke Akua kauoha ia la? p. 21 - 22. Heaha ka pilikia i loaa ia ia ma ke alanui? p. 24. No keaha? heaha ka mea i paa ai? p. 25, 26. Mai @@@@ oe. E makau i ke kanalua; i ka @@@@@ i kekahi hana i pono ke hana ana. Owai ka i kauoha ia e a hele, a halawai ma Mose?
P. 28. Na Keikikane. Mahea Aarona i halewai mai me Mose? Owai ka mea? Mose? Aarona? Pehea ka loihi a ke kaawale ana? A, no keaha hoi i pakele ai Aarona i ka pepehiia e na luna a Perua? He aha ka Mose i hai aku ai ia Aarona? Hea aha ia mau ouli?
P. 29, 30. Na Kaikamahine. Hele laua i hea? a hoakoakoa ia awi? Ia wai ka haiolelo ana? No keaha i lilo ai ia ia Aarona? p. 16. Heaha ka i hanaia imua o lakou? No keaha? p. 17. Me keaha hoi?
P. 31. OUKOU A PAU. I ka ike ana o na kanaka i keaha? A aha iho la? Heaha ka lakou i ike ai? Ma keaha? A hoomana ia wai? Ma keaha? No keana? Ua hoopoina anei ke Akua i ko lakou pilikia mamua aku? No keaha ka waiho ana i kana kokua a loihi? E noonoo a hai mai i kekahi mau kumu. No keaha ko ke Akua waiho ana ia Hawaii nei iloko o ka puuli a loihi? No keaha kona waiho ana i na negero ma Amerika iloo o ka hooluhiia a loihi loa?
Hai paanaau mai pauku 31.
MELE. Him. 29 Leo-Hawaii. PULE i manaoio kakou a pau.
Haawina Kula Sabati no Feb. 1 Pukaana 6:1-8.
HAWAII.
Ua akaka anei ke ala?
Elua no ala i hoike ia mai e Iesu, ke ala ololi, ke aa palahalaha. Ke ala e hiki aku ai i ke ola, he ololi ia; ke ala e hiki aku ai i ka make, he palahalaha loa ia.
Aia la mahea ke ola maanei aku? Pane koke mai paha kekahi, aia maluna, ma ka lani. Aia mahea ka make? Aia malalo, ma ka po, ma ke ahi pio ole. Ae, ua pololei keia mau haina.
Ua ike anei oukou i ke panana? Ae, ua ike no au, wahi a Ioane, he mea poepoe, he mea hulihuli, a kuhikuhi i kahi e holo ai ka moku, i kahi e hele ai ke kanaka ma ka aina.
Ina ma Waimea oe, a makemake oe e hele i Hilo, a lohe oe aia no Hilo ma ka hikina, pehea e maopopo ai ke ala e hiki ai? E nana pinepine paha i ke panana, a e hele aku e like me kana kuhiuhi ana.
A pehea hoi oe ke nana ole i ke panana, a hele ole e like me kana kuhikuhi ana? Hele lalau paha au, a nalowale, a make iloko o ka ulu-laau.
Ke panana maoli, he mea kupanaha no ia. E kuhikuhi mau ana no ia i ka akau, oia hoi ka hoku paa, hoku akau, hoku Pola. No keaha la? Owai ka haumana akamai ana e hoopuka mai ka haina? Ma me Kuokoa a paila'i kau haina, ke pololei, ke hooili mai nae ia ia'u.
Ma ka hoopili ana, he mau panana no e kuhikuhi ana i ke ala e hiki aku a i i ka lani.
O na kahuna pule kekahi mau panana. Lakou ke ku a hai aku, e ka poe auwana, e huli ana i o ia nei i loaa ke ala o ke ola, e nana mai, a na makou e kuhikuhi pololei aku.
Aka, aole like ko lakou kuhikuhi ana. Kuhikuhi lalau, Kuhikuhi lalau, e paipai ana e komo iloko o kona ekalesia. Aia ilaila ke ola, a he make ka ke noho mawaho, a komo paha iloko o a ekalesia e ae. Pela na kahuna Moremona, na kahuna Pope, na kahuna Mahometa, &c.
He mau panana kuhikuhi lalau ia. O ka ekalesia ka mea nui ma ko lakou manao. Ina ua hookomoia iloko, a pani ia ka puka a paa i ole e holo mawaho, alaila, ua like ka poe maloko me Noa ma iloko o ka halelana, ua malu hia, e pae pono ana ma ke awa o ka lani.
He wahi hale-lana no ka ekalesia, a loaa no kekahi malu hia maloko, a pakele paha i kekahi mau poino, a loaa kekahi mau pomaikai ma keia ao. Aka, e helelei ana, e ili a nahaha liilii ana na ekalesia o keia ao, e like me ka hale-lana o Noa ma.
Nolaila, mai paulele kakou ma ka ekalesia, a manao, ua maluhia, e holo aku ana ma ke ala e hiki aku ai i ka lani, a hiamoe iho la.
He mau panana na hana a na kahuna pule, na luna ekalesia, na makua, na kumu e kuhikuhi ana i ke ala o ke ola ma ka manao o ka poe e nana a hahai ana.
Aka, he mau panana kuhikuhi hoolalau keia i kekahi manawa. Aole hemolele na hana i na alakai. Ma ko'u lohe, a ma ko'u ike ana, he kekee, he pono ole na hana a kekahi poe kahunapule. Ke hele nei imua o kanaka, o kamalii me ka ipu-baku, a ciga paha ma ka waha, a he mana baka maloko. A makau ole hoi e inu i kekahi kiaha rama liilii, a waina paha; wahiana, he mea lapaau, he mea hooluolu kino. Aole paha pili nui keia i na kahunapule Hawaii. I na kahunapule haole paha ka pili nui.
Na luna ekalesia, na makua, na kumu, ka lakou mau hana ea, ua aha? Ua hemolele anei?Ua hemolele iki paha ka kekahi, aka, nui ke kekee, he puhi baka, a nau baka, a inu awa, a iau ramam a hana lealea, a lilo i na mea o keia ao.
Ea, mai nana i keia mau panana, i na hana a na alakai, me ka manao, e hele aku ana oukou ma ke ala o ke ola, ke hoohalike me ka lakou. He mau panana kuhikui hewa ia.
Hookahi no panana kuhikuhi pololei loa, oia ka Baibala. E kuhikuhi mau ana ia i ka Hoku paa, i ka Hoku Ae, ia Iesu Kristo, i ke ao, i ka po, ma ka aina, ma ke kai. Hoao paha kekahi mau mea e hooluliluli, e @ i ke kuhikuhi ana, aka, aole hiki, makahewa ka hoao ana.
E kau mau ka maka ia Iesu, a nana ao e alakai aku ia kakou ma ke ala ana e kuhikuhi nei, ke ala ololi a hiki pono aku i ke awa o ka lani, a pae iuka, a komo iloko o ke kulanakauhale alii, ka lani, a malu mau loa.
E hoopaa i ka Baibala, mai hookuu aku. E nana mau, e heluhelu mau, e hahai mau mamuli o kana kuhikuhi ana, alaila, akaka ko kakou hele ana ma ke ala o ke ola.
HAWAII.
Makahiki 1874.
Aloha oukou a pau, ka poe e heluhelu ana i ka nupepa Kuokoa. No ka lokomaikai o ke Akua, ua loaa ia kakou keia makahiki hou. Nui na haole a me na kanaka maoli ka i pau i ka make, i ka makahiki i hala ae nei. Ua make kekahi poe-me ka manaoio i ko kakou Haku, Iesu Kristo, a o kekahi poe me ka manaoo ole ia ia. Ua hala nae ko lakou manawa, nolaila, ua pili ka olelo a Ioane ia lakou; "O ka mea hewa e mau no kona hewa, a o ka mea paumaele e mau no kona paumaele, a o ka mea pono, e mau no kona pono, a o ka mea hemolele e mau no kona hemolele. Hoikeana 22:11."
Nui hoi ka poe e hele ana'ku i keia makahiki, a ua kauohaia kakou "e kiai, no ka mea, aole kakou ike i ka la, aole hoi i ka hora e hiki mai ai ke Keiki a ke kanaka." Mataio 22:13
Ka inoa, o ka malama ana i ka hebedoma haipule, e like me ka hooakaka ana ma ke Kuokoa nei, i keia mau hebedoma i hala ae nei, oia paha ka kakou hana mua i keia makahiki hou.
Penei ka paipai ana o Malaki, ke Kaula, mokuna 3:16 "O ka poe makau ia Iehova, kamailio pu iho la lakou i kekahi i kekahi; ike mai la o Iehova, a hoolohe mai la a ua kakauia ka buke hoomanao imua on a no lakou, no ka poe makau ia Iehova, a no ka poe hoomanao i kona inoa."
Iloko o ka pule hoomau, ua kukakuka pu ka poe makau ia Iehova; a ua paipai hoi lakou kekahi, e oki i ka hana hewa, e hoi nui mai hoi ka poe i auwana aku ai, me ka mihi a me ka manaoio hou aku i ko kakou Haku.
E imi kakou i ke kumu o ka makehewa o na hebedoma haipule ma Hawaii nei, i keia mau makahiki i hala ae nei. No ka mea, ke olelo mai nei o Malaki. "Ua ike mai o Iehova, a hoolohe mai no hoi, i ka poe makau ia ia."
Pehea oukou, e na kahu, a me na luna, a me na hoahaipule o na ekalesia ma Hawaii nei; Ua pau anei ko oukou makau ia Iehova?
Eia ko Davida laua ko Solomona mau manao no ka makau ia Iehova.
"O ka makau aku ia Iehova, oia ke kumu o ke akamai." Halelu 111:10.
"O ka makau ia Iehova, oia ka hoomaka ana o ka ike." Sol. 1:7
"O ka makau ia Iehova, oia ke inaina aku i ka hewa." Sol. 8:13.
"O ka mole o ka naauao, oia ka makau ia Iehova." Sol. 9:10.
"O ka makau ia Iehova, oia ka mea e nui ai na la." Sol. 10:27.
"Ma ka makau ia Iehova, malaila ka paulele nui; he puuhonua hoi ia na kana poe keiki." Sol. 14:26.
"O ka makau ia Iehova, he punawai ola ia; he mea ia e haalele ai i na pahele o ka make." Sol. 14:27.
"Ma ka makau ia Iehova, ka haalele ana i ka hewa." Sol. 16:6.
"O ka makau ia Iehova, oia ke ola." Sol. 19:23.
"E makau i ke Akua, a e malama i kona mau kanawai; no ka mea, e hookomo ana ke Akua i na hana a pau, a me na mea a pau, i hunaia iloko o ka hookolokoloia, in a paha he pono, in a paha he hewa." Kekahuna 12:13, 14.
E makehewa ka Hebedoma Haipule, ke launa ole mai ke Akua kahi kolu ia kakou. Aole mea hiki ke hookokoke ia Iehova, ke hele ole oia ma o Iesu la. Ioane 14:6. Aole mea iki e hiki ia kakou ke hana, ke kokua ole mai Iesu. Ioane 15:5. A pehea hoi ke launa ole mai ka Uhane Hemolele? Ioane 16:8.
Aloha ino ko Hawaii poe kanaka, ka poe paakiki i ka hana hewa, a makau ole ia Iehova, no ka mea, aole loaa ia lakou ka hapalua o ko lakou mau la. "Ke waiho nei ke koi lipi ma ke kumu o na laau, a o kela laau o keia laau e hua ole mai ana i ka hua maikai, e kua ia ilalo, a e kiolaia aku ia i ke ahi." Mat. 3:10.
E na makamaka Hawaii, aloha oukou.
He nui ke kamailio ana, he nui ka hoopaapaa ana iwaena o kakou, a he nui ke kakou ana me na nupepa o na mea o pono ai keia lahui. Aole au e hai loihi e like me kekahi poe e kakau loihi ana, o luhi auanei oukou i ka nui o ke ao ana. Aka e hoike aku au i kekahi mau mea o hooala ai i ka noonoo.
1. No hea mai ko kakou pilikia? Haina. No waho mai a no loko mai; no loko mai nae ka nui.
Ke ano mau no ia o na kanaka a pau mai ka wa ia Mose mai a hiki loa mai i keia wa. I ka wa a Solomona na hui pu na ohana a pau o ka Iseraela malalo o ke alii hookahi, a ua kuikahi, ua @@@@.
Aka ia lakou i wawahi ai i ko lakou aupuni, a haalele i ke Akua, hoomaka mai ko lakou nawaliwali. Alaila lele mai na kanaka e, a hoopilikia mai, a kaua mai, a hoopio.
Pela no na aupuni nui i keia wa. O na pilikia nui e alalai nei i ko lakou malu, aia noloko o ko lakou mau kanaka ponoi, aole no waho mai ka nui. E nauaia Farani. No loko mai o ko lakou ano lokahi ole, ka imi ana o ka aoao alii e hoopilikia i na kanaka, a no ka hooikaika naaupo ana o na kanaka, nolaila mai ke kulanalana ana, a me ka malu ole o ua aupuni la. E kaua ana hoi o Sepania me ke kana aku kekahi i kekahi iwaena no o lakou iho, a nui loa ka haunaele a me ka make ino o na kanaka.
Pela auanei o Hawaii nei in a aole akahele ka hoomalu ana o kakou ia kakou iho. E uumi i na manao hookiekie, a me na manao lili, a e hooikaika kakou ma na mea e maemae ai, a e ikaika ai, a e pono maoli ai. Alaila e holo imua no kakou me ka nani, in a e hilani kakou ma ke hahua o ka pono iloko o Iesu, ka malamalama o ke ao nei.
Aia no ia oe, e Hawaii e, kou ola, malalo o ke Akua. Ina e koho oe ia Iehova i Akua nou, a malama i kana mau kauoha me ka hilinai ia ia, aole mea e hoohoka mai ia kakou. Aka, in a e koho ana kakou i na Akua e, a hahai ia lakou me ka haalele ia Iehova, ua maopopo no ka hope, he poino.
Nolaila ea, e na mea e iini nei no ka pomaikai, a me ka holo imua o ko kakou pae aina maikai, e leha ae kakou i ko kakou mau maka i luna, a e hooikaika mau kakou me ka makaala, a me ka hilinai ia Iesu.
Na'u no me ke aloha. E.
He Kristiano anei oe?
He ninau nui keia. He ninau koikoi hoi. Nolaila, e heluhelu, a e noonoo, a e akahai ka pane kupono.
He Kristiano io anei oe? Aole au i ninau ia oe, he hoahanau anei oe, aka, eia ka'u ia oe, he Krstiano anei oe? Olelo mai la paha oe, aole au i ike, he Kristiano paha, aole paha. Ae. Eia kou ano, e kuu hoaaloha, ea. He kanalua oe Ina pela, eia kekahi mau mea kupono e noonoo ai.
Ma Anetioka ke kapa mua ana o na haumana he Kristiano. Oihana X1.26. Heaha la ke ano o ke Krstiano oiaio? He mea ia i hahai mamuli o Kristio, nolaila kona inoa. He iona hanohano, a he inoa nae i hoowahawaha ia e kekahi poe.
He haumana ia na Kristo, na ke kumu nui; Ua ao no ia i kana olelo; Ua lohe no ia i kona leo me ka olioli. Aole he haumana paakiki, pakike, kuli ku e, hoomaloka, aole loa.
He mea ia i manao i ka olelo a ke Akua i hoike mai ai no kana keiki; manao no ia he pololei ka Iesu olelo. Aole lauwili wale, a hahai mamuli o ko ke kanaka manao.
He mea ia i hilinai ia Iesu, i kona make ana i kalahala; Ua ike i kona hewa iho; maluna o Iesu kona manao lana.
He mea ia i aloha nui aku ia Iesu, no kana hana maikai ana, no kona lokomaikai ana, a me kona make ana.
He kauwa ia na Kristo; he ohua nona e hooikaika ana ma kona makemake, me ka manao oluolu, o Iesu kona Hohu, e pono ke malama mau i kana mau kauoha.
He mea ia i hoohalike me Kristo i ka lokomaikai, i ke ahonui, i ka hana pono, i ka naau haahaa, i ke akahi, i hoonaniia'i ka Makua.
He mea ia i hoomana ia Karisto, me ka mahalo oi iaia.
He mea ia i hoola ia mai ka make mai "O oukou hoi ka poe i make iloko o ka hewa, o kana ia i hoala pu mai nei me ia, a ua kala mai i ko oukou hewa a pau."
He mea ia i hoohanau hou ia. Ua kapa hewa ia kekahi he Kristiano, aka. "I hoohanau ole ia ke kanaka e ka Uhane, aole ia e komo i ke aupuni o ke Akua."
He mea ia i alakai ia e ka Uhane o ke Akua. Ua hele ia mamuli o ka Uhane, he keiki aloha. "O na mea i alakaiia e ka Uhane o ke Akua, he mau keiki lakou na ke Akua."
He mea ia e kini oluolu i ko Iesu hoi ana mai, e ake e halawai me ia, a e noho pu me ia i ka lani.
Pomaikai maoli ke Kristiano io. Mai noho kanalua oe, e kuu makamaka, me ka manaoio kapekepeke, aka, i keia makahiki hou, e haawi aku oe ia oe iho ia Kristo i lilo oe i haumana nana. He Kristiano io me ka hookameni ole, alaila, e @ auanei ia oe ke kuleana iloko o kona aupuni, a i ka-pa-ia oe, he hoaaloha no ke Akua.
F
O KE AKAHELE, he kaula gula ia e komo ana iloko o ke kaula momi o na mea maikai a pau. Ua loaa anei ia kaula ia oukou.
NANA kekahi poe i na ao eleele; nana kekahi poe i na ao uliuli; a, o kekahi poe, hou aku ko lakou maka i na ao a pau a kau iho maluna o ka malamalama ma o aku.
POMAIKAI io no ka poe i hoomaauia, a pepehiia a make no ka malama ana i ke Akua, a kau ma ko lakou peo ka lei lama o ka poe mata (Martyra.) Mai @ kakou i ka lei o ia poe. He lei oi aku @ ke waiho la ma ke lani no ka poe e noho mau ana no ke Akua ma na hana liilii a haahaa e @ mai ana ia lakou i kela @, i kele la. E hooikaika mau i loaa ia lei nani aku.
He paani holoholona.
Paani ka na holoholona? Aole anei oukou i ike i na holoholona e paani ana, e like me na popoki, na ilio, na keiki hipa, a keiki bipi, &c?
Aka, o keia paani holoholona okoa ia. He paani kamalii ia. He poe keiki i akoakoa, a hoopuka i ko lakou makemake e ike i ke ano o na holoholona, liona, tiga, elepani, keko, &c. ma ka nana ana i ko lakou helehelena iho maloko o ke aniani. Ma ia paani i paani ai lakou, me ka lealea wale i ka ike ana ma ke aniani, he liona kekahi, he tiga kekahi, he hipopotamu kekahi.
A koe kekahi keiki nui, he kanaka makua paha; o Komo kona inoa, he mea iau rama, a on a pinepine, E kii kakou ia ia, wahi a na keiki, e lawe maloko nei, a ninau ia ia. Ke makemake nei anei oe e ike i ke keko?
E komo, komo mai. Makemake oe e ike i ke keko? Ae, makemake au e ike i ka mea ino loa. Lawe lakou i ke aniani, a kau imua on a, me ka olelo. E nana mai oe ma keia aniani. Nana oia a akaaka mamua i ka ike ana i kona helehelena iho, a akaaka pu na kamalii. Nana no Komo a ike he ino loa kona helehelena, ino weliweli. Haalulu oia, a noho ilalo ma ka noho, a uhi i kona maka me ka hilahila loa. Ka pau no ia o na akaaka o kamalii. A hoopuka lakou i na hua olelo aloha, a hooluolu. Aka, pane mai Komo, ua oi aku ke ino o ko'u helehelena mamua o ko ka holoholona ino. Uwe nui oia no kona haule ana malalo iho o ka holoholona.
Aloha ka poe ona. e pule ao lakou i hooano hou ia a maika. A e malama oukou ia oukou iho. Mai inu rama, mai inu awa, mai puhi opiuma o ino loa ka helehelena, a haule oukou malalo iho o na holoholona, e like me Komo. HAWAII.
O KA makamaka oiaio, e lilo e oia i mea uwao no kona hoa, mamua o kona lilo ana i mea hoahewa iaia. Nui anei na makamaka oiaio?
I MEA e ulu maikai ai ka laau, a hua mai i na hua nui, ua okiia na lau mua, me na welau o na lala. Pili keia i ke aha?
MAI kuhi oe ua lawe oe i anela maloko o kou poli i kou mare ana me kekahi wahine He anela paha, he nahesa paha, I na he nahesa, a he mea nuku a hookonokono i ka hakaka, e aho nui oe, a e hoomanawa nui ia ia, a lawe hou oia i na eheu a lele aku.
NA BUKE
HOOLAHAIA E KA PAPA HAWAII
Baibala Hemolele Nui ili eula nani me na kuhikuhi ma na a ao.....$12 00
" " Nui ili eleele kaekae wai gula.....5 00
" " uuku iki ihi " ".....8 00
" " Pananaiki iho ili eleele.....4.00
Kauoha Hou ili gula nani me na kuhikuhi.....3.00
" " eleele kaekae wai gula.....1.00
" " " ......75
Kauoha Hou Hapa Haole.....75
Lira Hawaii 1848 me ke kanawai......25
" " 1855.....25
Moolelo Ekalesia.....50
Haiao ili lahiahi.....10
Hele Malihini ana.....25
No ko ke Akua ano......25
Lira Kamalii......25
Hoike Palapala Hemolele.....25
Moolelo o Heneri Opukahaia.....25
Hoike Akua.....25
Weheweheia.....25
Ninau Hoike ili manoanoa.....25
" " " lahilahi....10
Kumumua Kula Sabati.....10
Buke Lawe Lima.....10
He Buke no ka Pope.....10
Ui Kula Sabati Helu 3.....25
" " " " 4......25
" " " " 5......25
Buke Euanelio a Ioane.....10
Himeni .....1.00
Himeni Ili nani.....1.75
Na Kauoha Hou Pakeke
Ili Gula nani.....1.50
Ili eleele kaekae nani......50
Ili eleele......35
Kauoha Hou Pakeke me na Halelu
Ili Gula nani.....1.75
Ili eleele kaekae wai gula.....50
Ili eleele......50
Na Halelu Pakeke
Ili Gula nani.....50
Ili eleele kaekae wai gula......30
Ili eleele.....20
Ka Hae Hoonani (Buke Mele)......25
Buke Wehewehe Huaolelo Baibala.....2.00
" " " Ili nani.....3.00
Eia na buke haawi wale
Palapala Liilii--
Helu 4--Makemake anei oe i ke ola
Helu 6--E hele i o Kristo la.
Helu 7--Ka hoi ana mai o ke Keiki Uhauha
Helu 11--No ka hoohiki wahahee i ke Akua
Helu 16--Ka Kehia ana o ka Ahaaina a ka Haku a ma ka Bapetiso ana.
Helu 17--Mai hana ino i na holoholona
Helu 18--No ka mahi ana, kuai ana a me ka inu ana i ka Awa.
Ka Davida Malo Kumumanao.
Ka Moolelo o Batimea Puaaiki.
J. F. POKUE.
Kakauolelo o ka Papa Hoeke o ka Ahahui Euanelio o ko Hawaii Pae Aina.
KA NUPEPA "KUOKOA"
Hoopuka mau ia
I KELA POANO KEIA POAONO.
$2.00 no na mahina Umikumamalua.
$1.00 " " " Eono.
ME KA HOOKAA MUA MAI.