Ka Nupepa Kuokoa, Volume X, Number 34, 26 August 1871 — Page 4
| This text was transcribed by: | George Mukai |
| This work is dedicated to: | Bernice Pauahi Bishop |
Ka Nupepa Kuokoa
KE KILOHANA POOKELA NO KA LAHUI HAWAII.
Ka Nupepa Kuokoa
E wehe i ka puka.
1 E wehe ka puka, kuu Kahu aloha, Ke maule nei au i ke ea wela e, Ikiiki, pauaho, a mauliawa, He make ke ola e ola mai nei; -E komo ae au la i kou kula uli, He palahalaha, a ula, a mau, He la hoomehana, he hau aheahe, E wehe ka puka i komo ae au.
2 He ola i oi i keia ola'na, Loaa ole nae ia'u la e noho mai nei ; He hana i oi i keia hana'na Ma ka pa i nahele a panoa e, Kahi a'u e paa nei me he paahana pio, He luhi, he eha, he kaniuhū ; He pa ma o ae, a he hana i olu ; E wehe ka puka i komo ae au.
3 Ke ao nei no nae la kou kula, kou mala, Maanei no kou home, a mai o a o, A haliu mai la kou maka hoano, He laula a iu koʻu hale paahao, He anuenue e pio ae ana Ma kuu hale pio a paele no; -Ma ka pa ma o ae la, aole he ino, E wehe ka puka i komo ae au.
4 Komo nae na kukuna o ko luna lama Ma na uiki alaula, a kahe mai no Ma ka aina laelae, in a ke kai omalio, A hoalo mai i koonei halelu, A olo na lea ma ke ao uliuli, A pa nani ae la ma kou pepeiao ; -Ke kali nae au la ma kou mala nani, E wehe ka puka i komo ae au.
5 Ke kali nei au la no kou kokuāʻna I loaa ka ikaika, ka lana manao; Hoohamāma ka puka i pa mai kou lama Kaikai ae i kuu uhane i holo ae au Me ka oli i uka, a ma ka moana; Pomaikai, maluhia, a paa ole no Ma kahi i hele kou poe punahele, E wehe ka puka i komo ae au.
6 O oe ka puka, ka puka hoano, Ma ou la no au la e komo ae ai; Ke kikoo nei au me ke kunewanewa, E hoike mai kou aloha maikai. Hoō i kou lama, ua pouli ko loko, I malamalama, a auhee ka po; E kai aku iaʻu i kauhale oluna, E wehe ka puka i komo ae au.
7 No ke kai o ka nani olino no luna Ke pa mai nei iaʻu la na ale aiai; Me e na makani no ko luna mauna; Me ka muliwai lani i owe maikai! Me e ke aloha, laula, a hohonu, I kahe mai luna, a kahe mau no, E hoopiha ana i ka hauoli lani! E wehe ka puka i komo ae au.
8 I like no au la me oe kuu Kahu, Ka pomaikai ia e noi nei au, I palena ole mawaene o kaua, I like loa ae kuu manao la me kou ; -- Owau no kau kauwa, hoolohe, a hana, Hana mau la me kau i kauoha mai no ; Ke ola! ke ola! e loaa ma ou la, E wehe ka puka, i komo ae au.
Hawaii.
Hoike Kula Sabati lua ole.
Mahea? ma Waimea makalii, kahi o ka ua noenoe, apuupuu.
A loaa ka hoike lua ole ma ia wahi i makau nui ia, e kau ana maluna o ka pele e hiamoe ana a hiki ka manawa e poha hou mai ai? Ae, he oiaio no ia, he hoike lua ole keia maanei. He nui paha na lua a oi aku ma na wahi e ae.
Eia ke ano o ua Hoike nei:
1 Ua akoakoa na kumu me na haumana ma ka halekula aupuni ma ke kakahiaka o ka Poalima, la 11 o Augate nei, na kumu kane, na kumu wahine, na haumana kamalii, a haumana makua. Koe nae kekahi hapa no ka ua, no ka mea, he la ua ia. S. H. Mahuka ke Kahu Kula.
2 Ua kai huakai lakou, na kumu, na kumu, na haumana, me na have liilii keokeo o kela, a o keia e pulelo ana maluna iho. Na B. W. Kealoha ka lunahooponopono i ka huakai, a hiki i ka luakini o Imiloa.
3 Weheia ka hana hoike, ma ka pule ana a L. Laiana.
4 Mele ia he Anthem-Hoomaikai-ma ke Karemina Sacra: "E oli ae ia Iehova, oli ia Iehova-- Olioli ia Iehova, olioli ia Iehova, &c."
5 Hoikeia kekahi papa kanaka makua, he kane ke kumu, ma Isaia 42:1-9. Mele-"Ke Kahu hipa maikai." Hae Hoonani.
6 Hoikeia kekahi papa kaikamahine, he wahine ke kumu, ma Mataio 3:1-6. Mele-"Hosana Kamalii." Have Hoonai.
7 Hoike, he papa kanaka makua--he kane ke kumu, ma Luka 2:25-35. Mele-"Hosana Kamalii." Ma ka Lira Kamalii.
8 Hoikeia ka papa a Laiana wahine, he mau keikikane, a kaikamahine liilii kana ua 20 a oi aku-oia ka papa i oi. Ma ka olelo maoli, a olelo haole keia hoike-hoike paanaau ma Isaia 53, ma halelua 95, ka pule a ka Haku. Mele--1. "Come to Jesus just now." 2. "Give O give."
9 Hoike, he papa kaikamahine nui, he wahine ku kumu, ma Luka 3: 1-9. Mele--ma ka Hae Hoonani.
10 Hoikeia, he papa keikikane, he kane kumu, ma Ioane 1:1-14. Mele--"Aina ma o." Hae Hoonani.
11. Hoikeia, he papa wahine makua-he wahine ke kumu-ma Ioane 3:1-11. Mele-"Aina Hanau." Hae Hoonani.
12 Hoikeia, he papa keikikane. Laiana ke kumu-ma Ezekila-5:-Mele-"Mai paupauaho oe."
13 Hoikeia he papa hui keikikane a kaikamahine, he kane ke kumu, ma Ezekiela-4-Mele-"April Shower."-Silver Lute.
Mele, mele, oli pu-
Mele, mele, halelu-
E hookani a maikai,
Pai hooho oli ae,-
La hoike maikai nei
I ke Kula Sabati, &c.
14 Hoikeia he papa kaikamahine, Miss F.M. Laiana ke kumu-Ma Ezekiela 23-Mele-"Ili iki." Hae Hoonani-
15 Hoikeia he papa hui na kaikamahine a keikikane, S.K. Mahuka ke kumu-ma Ezekiela-Mokuna 1-Mele"Tramp, Tramp." Silver Lute.
Ku, ku, ku, ku,
Nauwe ae, a mele pu,
A ku like no,
E ku, ku, ku, ku,
A e nauwa i ke ao,
E naue maikai no,
Cuo-Nauwe me ka oli,
Oli la, oli la no,
E ku, ku, ku, ku,
Nauwe mau i kela ao,
A paio pono mau, &c.
16 hoikeia, he papa elemakule, L. Laiana ke kumu, ma Luka 7:19-29. Mele-"Mai ka lani iho mai la."
Na lakou no i mele ma ke ano mele is ka makahiki 1832. He mele ano elemakule no.
17 Pule-a hoomaha iki ma ka paina ana ma na mea ono a ka Pake.
Ua pau ke kaapuni mua-
Eia ke kaapuni elua.
18 Ka papa a Laiana wahine ma ka noho ana a hana a Iesu, mai ka hanau ana, a laweia'ku i ka lani.
Maikai loa keia hoike-holo-makaukau loa na keiki liilii, emi kanaka makua i hope. Mele-"Ka Iesu kamaiki au."
19 Hoikeia ma (Ioane 3:1-12) na makua. Mele-"Make Iesu no'u."
20 Hoikeia he papa kaikamahine-ma Ioane 4:1-15. Mele-"Just before the battle mother." Silver Lute.
Hui mai na keiki kula,
Ma ka la hoike nei.
Ma ka luakini nani,
Ke ne a hoike mai;
Noonoo, e na hoa kula,
I ka Haku maluna'e,
I ka home ma ka lani,
I ka waiwai makamae.
Cuo-Hui pono, hui aloha,
Hui kuikahi pu,
Hui me ka olioli,
E hoike a halelu-
Hui pono, hui aloha, &c., &c.-
21 Hoikeia, he papa kane-Ma Ioane 4:16-30.
Mele-"Mele anei ma ka lani?"
22 Hoikeia, he papa kaikamahine-ma Mataio 5:1-14.
Mele-"E hahai ia Iesu."
23 Hoikeia, he papa keikikane-ma Mataio 6:1-29.
Mele-"Kai a naue i ka lani."
24 Hoikeia, he pap wahine, ma Mataio 7:1-12.
Mele-Ala ala, ala kamalii-
25 Hoikeia, elua papa kamalii-ma Ezekiela-12-14.
Mele-"Mele oli ae."
26 Hoikeia, he papa kaikamahine-ma Ezekiela-9-11.
Mele-"Kai pololei."
27 Hoikeia ka Mahuka papa keiki-ma Ezekiela-7-8.
Mele-"Mountain Horn" Silver Lute.
Ka pu, ka pu, ka pu mauna no,
E kupinai ana a kani a o,
Ala'e, ala'e, e na pokii e,
A naue maikai i ka hoike nei,
Tra la la la la &c., &c.
28 Pule-
Pau ke kaapuni elua.
Eia ke kaapuni ekolu-
29 Ma ke kaapuni ekolu he mau himeni a pauku baibala ia hoopaa naauia ka i @ mai e kela papa e keia papa-a he mau ninau baibala he kanalima paha a oi, ua imi e ia na haina e kela a e keia papa-a ua hoopaaia mai na haina a me kahi i kakauia'i.
Holo maikai loa keia hana-a mahalo nuiia.
30 He mau manao paipai, na S.H. Mahuka ke kahu kula-a na L. Laiana.
31 Mele-"We are marching on." Alaula.
Nauwe ae kakou na hoa koa nei,
Hana no Iesu, a paio pololei, &c.
Nani loa ke mele ana i keia mele.
32 Ka pule hookuu ia S. H. Mahuka, oia ka pau ana.
Ka Moolelo Makahiki
EWALU O KA PAPA HOOKO
O KA AHAHUI EUANELIO O KA
Pae Aina Hawaii, Iune, 1871.
PALAPALA HOIKE A KA AHAHUI EUANELIO, IUNE, 1871.
Ua hiki mai na kahunapule Hawaii he 36, koe eono; ewalu haiolelo i hiki mai, a 14 hoi elele no na aha mokupuni. O na haole Misionari kahiko i launa mai he 13, na keiki a lakou i hana pu me keia Aha, ekolu; a ua hui pu hoi me kakou ekolu kahunapule, he mau kahu o na ekalesia haole; o ka huina a pau 69.
O ka nui o na ekalesia Hawaii i pili i keia Aha, he 58, e ku ana lakou e like me na ipukukui e malamalama'i na wahi a pau o keia pae moku.
Ua paa hoi ka Papa a keia Aha me na lala hana he 25. Ua hoomakaia ka hana a ka Ahu Euanelio i ka la 5 o Iune, a ua hookuuia i ka la 16 o ia malama no.
HOIKE KIHAPAI.
Ua hana nui ia a ua pau ka @ okoa i keia hana.
NO NA EKALESIA.
Ma na palapala hoike ua akaka ne mea ekolu:
1. Ua hele mua kekahi mau ekalesia, ua pule mau, ua hana ikaika, a ua hua mai ka hua ku i ka pono.
2. Ua noho wale kekahi mau ekalesia, aole akaka ka hele mua, aole akaka ka hoi i hope, aole wela, aole anu, he maalili ke ano. Ua ku hana ole a po ka la. O ka hua ole ka mea e akaka'i ka noho wale.
3. Ua hoi i hope kekahi mau ekalesia, ua hoopalaleha, ua emi ilalo, ua like me he kihapai maloo. O ka hihia a me ka make na mea nui, aole ka hanau hou ana, a me ke ola. Ua pili paha ka olelo a ke Akua i ke kahu ekalesia ma Saradisa ia lakou, "He inoa ola kou, aka, ua make nae. E makaala, a e hooikaika i na mea i koe, na mea i kokoke e make."
4. Ua lohe hewa paha ke Komite i ka manao o kekahi poe, me he mea la e hooili ana ka hewa o ka make maluna o Iehova, no ka launa ole me na ekalesia, a no kona aua ana i kona uhane. Ina pela, he lalau nui ia, no ka mea, ua i mai ka Haku i na haumana manaoio, "Aole au e haalele ia oukou, owau pu me oukou a hiki i ka hopena." A eia hoi, "E haawi au ia oukou i kokua hou, nana no i noho pu ai me oukou a mau loa aku, oia hoi ka Uhane oiaio."
"Aole pokole ka lima o ka Haku, aole hoi kaumaha ka pepeiao, i ole e lohea ka pule." Aka, o ka hewa ka mea e kaawale ai i ke Akua mai o kakou aku, o ka hoeha a me ke kinai i ka Uhane Hemolele, oia ke kumu o ka paakiki o kanaka, a me ka nawaliwali o ka Ekalesia. Nolaila ko kakou lanakila ole iwaena o na Enemi.
He mea maka'u ole ia ka pahikaua hulali i waiho wale ia iloko o kona wahi, aia i unuhiia e ke koa ikaika alaila ua lilo ia he mea weliweli i na enemi. Pela ka pahikaua o ka Uhane, o ka olelo a ka Haku. Aia launa pu kakou me ka Uhane, e lilo kana pahi i mea e lanakila ai ma ko kakou mau lima.
He mea maka'u ole ka pukuniahi nui, me ka pauda, a me ka poka i waiho wale ia. Aia a hooponoponoia ka pu e ka mea makaukau no ia hana, a kuniia ka pauda i ke ahi, alaila e poha kona hekili, a e lele weliweli aku kona uwila a me kona poka e make ai na enemi, pela ka olelo a Iehova i puka mai mailoko mai o kona waha, aole ia i hoi nele mai, aka, e hanaia e like me kona manao ma ka honua nei.
O ka nui o ka poe i hookomoia iloko o na Ekalesia Hawaii ma ka manaoio, i keia makahiki, he 411; a o ka nui o na make me na hihia, he 770; o ka emi ana o na hoahanau, he 359.
NA KULA.
Ina aole kuhihewa ko oukou Komite ua nui ka pono a me ka ikaika o na kula i keia makahiki. Ua hana maikai ke Aupuni o Hawaii nei i ka imi ana i ka pono o na kula e naauao ai. Ua paa na kula la. Ua kokuaia a ua maikai na kula Hawaii, na kula kaikamahine, na kula i aoia ma ka olelo Beritania, ke kula nui ma Lahainaluna, a me na kulo o kela me keia ano. Aole paha makahiki i oi aku mamua o keia no ka pono o na kula me ka ikaika o ka imi ana i ka naauao ma na palapala.
NA KULA SABATI.
Ua mau ia mau kula. A ma na palapala hoike a na kahu me ka elele, ua ikaika maoli kekahi mau Kula Sabati. Ua mahalo kou Komite ia mau kula me ka makemake loa. A o kekahi mau kula nae ua nawaliwali; a ua pipi kekahi mau kula, e like me ke kukui e pio ana, ka aila ole. Pono ke koli hou ia lakou, a e imi hou i aila e aa mau ai.
NO KA HANA ANA I NA HALEPULE.
Aole hemahema nui na Ekalesia Hawaii keia hana maikai. Ua piha pono na mokupuni i na halepule, a ua hanaia kekahi mau hale hou i ka makahiki i hala ae nei, a ua hoomaikai hou ia hoi kekahi mau hale. He mea pono ia a he hana e hauoli ai hoi.
NO KA MANAWALEA.
Aole piha nui ka waihona kala manawalea i keia makahiki, e like me kela makahiki mamua aku. Ua emi mai ka mahina hou a me kekahi mau kokua e ae. Aole pono ia, e aho e hooikaika mau i makaukau ae keia hua maikai.
NA NUPEPA.
Ua nui ka poe lawe i ke Kuokoa i keia makahiki, ua 3,000 paha, a ua maikai ia pepa. He mea pono nui ia, no ka mea, o ka nupepa oiaio, he mea ia e naauao ai na kanaka a me na kamalii ma na mea i hanaia ma ka honua nei, he nui wale.
NA HOOLAHA BAIBALA.
Ua pono iki keia hana. Ua nui iki na Buke Hemolele i kuai ia. Aka, aole i lawa na Ekalesia a pau. Nui ka hemahema i koe. Nui na hale hoahanau i pouli, aole aa o ke kukui iloko. Nui hoi na kanaka e, e noho ana iloko o ka pouli, no ka imi ole i kela malamalama nui mai ka lani mai; auwe ko lakou naaupo a me ka lalau no ko lakou imi ole i keia kukui no ko lakou noonoo, a me ko na keiki a lakou. He hana nui keia a na Kahu Ekalesia e hapai ai, a hoolaha i na hale a pau i keia lamaku o ka Haku.
OIHANA MISIONARI.
Ke hauoli nei ko oukou Komite, no ka makaukau ana o kekahi poe kauwa a ka Haku e holo i na aina Pegana. He mea nani ia, a he mea e olioli ai hoi, no ka mea, oia ka hana nui a Iesu i haawi ai i na haumana ana, "E hele i na aina a pau, a e hoohaumana i na kanaka a pau."
NO NA HALAWAI O KA AHAHUI.
Ua lokahi na manao, a ua nui a maikai ka hana. Ua haipule ka Aha i kela a i keia la, a ua imi pu i na manao, a me na hana, e nani ai ke aupuni o Iesu ma Hawaii nei, a ma na aina e hoi. Ua manao ke komite ua launa mai ka Haku, o Iesu a me ka Uhane Hemolele.
T. Coan,
W. P. Alekanedero, Komite,
H. Manase.
HOIKE NO KE KOMITE NO KA HOOPONOPONO ANA I KA OIHANA O KA AHAHUI EUANELIO HAWAII.
Ua hookumuia na hoike Kihapai imua o ka Aha Misionari i na halawai makahiki, i ka wa he kakaikahi na Ekalesia, aole hoi na Aha Mokupuni. I keia wa ua ano e, he 60 paha Ekalesia i keia wa, a ua hookumu ia na Aha Mokupuni ma Hawaii, ma Maui, ma Oahu, a me Kauai. Nolaila, e hooholo kakou, e waiho kakou i na Hoike Kihapai na na Ahahui Mokupuni, a hoike pakahi mai na Ahahui Mokupuni ia kakou i kela makahiki keia makahiki, e hoika ana i ke ano nui i na kihapai ma ko lakou mau kalana, a me na papa helu o na Ekalesia.
W.P. Alekanedero, Komite,
M. Kuaea.
HOIKE ANA O KE KOMITE NO KA HOOPALAHALAHA ANA I KE KULA KAHUNAPULE.
Ua kukakuka pu ke Komite me na makua e noho paa ana ma Honolulu nei, aole hoi i loaa ka mea e ae ana e hapai i keia hana. Nolaila, ke manao nei keia Komite e hooholo kakou, e noi aku ia Rev. C. B. Anaru, e kokua mai oia i ke Kula Kahuna Pule, ma Wailuki, a e hooikaika nui kakou a pau e alakai i na kanaka @ kupono ma na mea e makaukau ai lakou i ke ao aku i kanaka.
Wm. P. Alekanedero,
T. Koana,
M. Kuaea, Komite.
H. Manase
HOIKE A KE KOMIKE, NO KA HOIKE MAKAHIKI A KA PUUKU O KA PAPA HAWAII.
Ua nana akahele maua i ka Palapala Hoike Makahiki a ka Puuku o ka Papa Hawaii, o E.O. Holo, a ua pololei ka hana.
J.D. Parisa,
M. Kuaea. Komite.
(Aole i pau)
KO HAWAII MAU KAHUNA LAPAAU,
e lapaau nei ma ka aoao kahiko
ME KA PUAA HIVA, KA MANU
Keokeo, a me na mea like;
KOHU PONO ANEI IA HANA I KA
MEA MANAOIO IA IESU
HELU 4.
Aole ma ka manao wale no, a me ka oleloia mai e ka poe e ae; aka, na kekahi no o keia mau kahuna e olelo mai. I mai kekahi, i make ia'u o mea, a o mea, a o mea. Pela lakou e helu mai nei. Ma ia olelo, ua maopopo, he mea pepehi kanaka ia.
Aka, ua olelo kakou, he wahahee ka hana a ia mau kahuna, aohe oiaio, aole no nae ia he mea e ku pono ai ka lakou hana i ka mea manaoio ia Iesu.
O ka wahahee ana o kekahi mau kahuna o Hawaii nei, he kumu no ia e make ai kekahi mau kanaka mai o keia pae aina. Nana aku kekahi mau kahuna o Hawaii nei, a he kanaka ano waiwai ka mai, haanui wale aku no, ma ka i ana, "he mai pilikia keia ou, eia la, ku iho nei ma ka aoao hema, he pokahu lilo ole keia i ka wai, aia no a akamai ke kahuna nana e hana, alaila, lilo no mau ou." Manao iho la kela mai, he kahuna akamai kela, a i aku la, "e lapaau mai no hoi ha oe ia'u?" Ae aku la no ke kahuna, "Ae." I ka lapaau ana, kuhikuhi ka laau i ke kuahiwi, me ka i ana, I pii auanei oe, a i kani ia e ka manu, a i hae ia paha e ka ilio, kahea kua ia mai paha, halawai paha me ke kanaka, mai kii aku oe i ka laau, aia no a maluhia loa, alaila oe kii aku." Pehea, aole anei he wahahee wale iho no keia hana? Nawai i kipaku na manu o ke kuahiwi, i ole ai lakou e noho malaila; a i ole hoi e kani mai e like me ko lakou olioli, i ka wa e haule ana ka ua kilihuna? He imi apa wale iho no keia; o kona apa wale ana pela; nui loa ka mai, a mahope aku o ka make no ia.
Pela no kekahi mau kahuna o Hawaii nei, hele mai no a kahi o ka mai, puu iliili iho la, ekolu dala oia, a kuhikuhi i ka laau, aole nae ola, make no; aka, ua lawe ke-o i na dala ekolu. Heaha ke kumu o keia make? O ka wahahee o kela kahuna, a puni ka poe nana ka mai, aole loaa ke kahuna haole, a i ole, he kanaka ku pono e ae paha. Nolaila make.
I kekehai manawa, lapaau no kekahi mau kahuna, ua ike no i ka pono ole; paha wale iho no, e pahapaha ai, kani ke oli, kalua ka puaa, he kahuna ai puaa ka olelo, aka, o ke ola ole o ka mai, aole ola make no.
Hoomaka'uka'u wale aku kekahi, me ka i ana, He make aumakua kou; i puaa mea, i moa; alaila, pi kai, a kai olena iho, o ke ola no ia, aole nae ole, o ka make no ia. Olelo aku kekahi, ua lilo ko maunu; o ka maka'u no ia o ka mai, a ono ole i ka ai, a mahope aku ka make no ia; no ka wahahee ia aku.
O ka naaupo no kekahi, aole i hoomaopopo lea i ke ano o ke kino o ke kanaka, a hui pu me ka wahahee, a me ka hoomanamana, a o ka make no ia.
Aole kupono ka oihana lapaau i ka mea naaupo, me ke kupono ole o ke kanaka naaupo i kapena moku e holo ai ma ka Lae ino o Kepohoni; a o lawe ia oia e ke au miki, laua me ke au ka, a ili aku ma na mauna hau o ka akau loa. Pela no na kahuna wahahee, a naaupo, aole pono ke lilo i mea e hookele ai i ka waa o ka uhane.
I mai paha nae kekahi poe, ua hiki mai ka naauao i Hawaii nei. Ae, ua hiki no, aka aole nae i pau i ka naauao, o na mea no nei a ka poe pegana loa e hana nei. Aole anei, o kekahi kumu nui loa keia o ka make o keia lahui, o ka nui o na kahuna wahahee a me ka naaupo? Ina pela, he poe pepehi kanaka ia poe. Mai wahahee hou.
A ma keia mau mea, a me na mea e ae a keia mau kahuna i hana ai, ua maopopo, aole kupono ka lakou hana i ka mea manaoio ia Iesu.
Ua hai ia aku nei kekahi mau hana a kela mau kahuna o Hawaii nei. A ina hoi i manao mai kakou e hoomaopopo i na hana a ka mea manaoio ia Iesu: e hoohalike ia mau hana a ia mau kahuna o Hawaii nei, ma ka hana a ia poe manaoio ia Iesu, e ike maopopo lea kakou; aole kupno ka hana a keia mau kahuna i ka mea manaoio ia Iesu.
O ka mea manaoio ia Iesu, ke hooiaio aku nei kona naau i na mea a pau i olelo ia mai maloko o kana olelo. A ke hilinai aku nei maluna o Kristo.
Ke manaoio nei no hoi lakou, ia Iehova, e noho Akua ana oia, aole one kumu, aole loa ia e pau aku, aole one ano hou ae, a me na ano e ae e pili ana.
Ke manaoio nei no hoi lakou i ka Palapala Hemolele, o ka olelo ia a ke Akua, he kumu hookahi wale no ia no ka manaoio ana, a me ka malama pono ana i ke Akua.
A ina i manao mai kakou e ike i na hana a ka mea manaoio ia Iesu, e hoomanawanui oia e huli aku iloko o ka Palapala Hemolele, a e wehewehe hoi, o ka wehewehe ana i kau olelo, oia ka i hoonaauao mai. A maopopo na hana o ia poe manaoio ia Iesu, a me na hana keia mau kahuna o Hawaii nei; a na kakou ia e hoohalike, i ike ia ke ku hi-o io no, o ka hina wale aku no koe.
Poino kakou, ke nui ka poe kahuna e like pu me keia mau kahuna.
HAAWINA KULA SABATI
HELU XXXVI. SEPATEMABA 3, 1871.
KE KALI ANA NO KA HAKU.
Pauku Baibala. Luka 12: 35-48.
35 E kakooia ko oukou mau puhaka, i aa hoi ko oukou mau kukui;
36 A e hoolike hoi oukou me ka poe kanaka, e kali ana i ko lakou haku ke hoi mai ia mai ka k ahaaina mare mai, e hiki ia lakou ke wehe koke ia ia i kona hiki ana mai a kikeke.
37 Pomaikai ka poe kauwa a ka haku e ike ai e kiai ana i kona wa e hiki mai ai. He oiaio kaʻu e olelo aku nei ia oukou, E kakoo no oia ia ia iho, a e hoonoho oia ia lakou e ai; a e hele mai ia e lawelawe na lakou.
38 A hiki mai ia i ka lua paha o ka wati, a hiki mai ia i ke kolu paha o ka wati, a ike mai ia lakou pela, ua pomaikai ua poe kauwa la.
39 I ike hoi oukou i keia, ina ike ka mea hale i ka hora e hiki mai ai ka aihue, ina ua kiai no ia, aole i a e kuu aku i kona hale e wawahiia mai.
40 Nolaila, e noho makaukau hoi oukou, no ka mea, e hiki mai ana ke Keiki a ke kanaka, i ka hora e manao ole ia e oukou.
41 Alaila ninau aku la o Petero ia ia, E ka Haku, no makou anei kau e olelo nei i kela olelo nane? no na mea a pau anei?
42 A olelo mai la ka Haku, Owai la hoi ka puuku malama pono me ke akamai e hooliloiaʻe e kona Haku i luna no kona poe ohua e haawi ma ka manawa pono, i kau wahi ai na lakou?
43 Pomaikai ua kauwa la ke ike mai kona haku ia ia e hana ana pela i kona hiki ana mai.
44 Ke olelo aku nei au ia oukou, E hoolilo oia i mea nana e malama i kana mau mea a pau.
45 Aka, i olelo kela kauwa iloko o kona naau, Ua hoopanee kuu haku i kona hoi ana mai; a i hoomaka hoi e pepehi i na kauwa kane a me na kauwa wahine, e ai ana hoi, a e inu ana a ona;
46 E hoi mai no ka haku o ua kauwa la, i ka la e kiai ole ai ia, a i ka hora e manao ole ai ia, a e hahau ia ia a moku, a e haawi i kona uku me ka poe malama ole.
47 A o ke kauwa i ike i ka makemake o kona haku, aole hoi i hoomakaukau, aole hoi i hana mamuli o kona makemake, oia ke hahau nui ia.
48 A o ka mea i ike ole, a hana hoi i na mea e pono ai ka hahau ana, oia ke hahau uukuia. O ka mea ua haawiia ia ia ka mea nui, ia ia hoi e kii hou ia mai ai ka mea nui; a i nui ka mea i waihoia i ke kanaka, he nui no hoi ka mea e noi hou ia ia.
Pauku Alakai.- O kaʻu i olelo aku nei ia oukou, oia no kaʻu e olelo aku nei i na mea a pau. E makaala. (Mareko 13:37.)
Kumu noonoo.-Ka makaala mau o ka poe pono.
Ninau ano nui.-Owai ka mea a kakou e kali nei a hui mai?
Ninau.-Heaha ke kumu noonoo o keia haawina? E kali ana a aha ka Haku? Hoi, mai mai hea mai?
35. E aha ia na kapa aahu ma ka puhaka? O aha? Ua hiki anei i ke kauwa ke lawelawe me ka aahu helelei? E aha ia na kukui?
36. E hoohalike oukou me wai? E hoi mai ana ua haku la mai hea mai? E makaala ana na kauwa e aha?
37. Pehea na kauwa e hana ana pela? E aha ka haku ia lakou? O ke kauwa hea ka i manao nui ia e kona haku?
38. O ka hora hea ka uwati elua? O ka hora ehia ka uwati ekolu? Heaha ke ano o keia olelo nane ia kakou?
39. O ka hale hea ka i komo ole ia e ka aihue? Ua ikeia anei ka hora e hele mai ai ka aihue?
40. E hoomakaukau no ke aha? Pehea e hele mai ai ke Keiki a ke kanaka ia kakou?
41. Heaha ka ninau a Petero? "o makou," owai ia ana i olelo ai?
42. Owai ka puuku waiwai e kohoia ana e mahele aku i ko kela mea keia mea? Pane ma Pauku 43,44.
45. Pehea ke kauwa naaupo i kona kali loihi ana no kona haku?
46. Heaha kona haku?
47. O ka mea hea ka e hoopai nui ia ana?
48. Owai ka mea e hoemi ia ana kona hoopai? Ina e haawi nui ia mai i kekahi, e pono iaia e aha? Ina e kohoia kekahi e noho ma kahi hanohano, pehea kona pono?
O ka lani ko Iesu wahi e noho ai; a he oia mau no kona ana, inehinei, i keia la, a i ke ao pau ole. Nolaila, pehea ka poe aloha ole ia io ma ka honua nei; ka poe malama ole i kona mau kanawai, a hoowahawaha i kana mau oihana; e hiki anei ia lakou ke noho pu me ia, me ka pomaikai, ma Ierusalema hou?
KA NUPEPA KUOKOA,
HOOPUKA MAU IA MA HONOLULU
Kela Poaono keia Poaono.
$2.00
No na mahina he Umikumamalua!
$1.00 no na mahina eono,
ME KA HOOKAA MUA MAI.
NA OLELO HOOLAHA-aole i oi mamua o 10 laina no ka hoopuka hookahi ana, $1.00; alua komo ana, he $1.50; hookahi malama, $2.00. E uku mua ia mai ke dala o na olelo hoolaha a pau e hoounaia ana mai e pai.
KANIKAU-he 4 keneta no ka lalani hookahi-penei: he 25 lalani, $1.00; 50 lalani, $2.00; a pelaʻku.
KA UKU NO NA OLELO HOOLAHA-ka uku pepa, a me ka uku o ke Kanikau, e haawiia no ma ka lima o na Luna o ke Kuokoa, a i oleia, e hoouna mai ia Kauka Kulika.
NA UKU PEPA A PAU E HOOKAA MUA MAI NO-aole e kauia ka inoa o kekahi haole a kanaka maoli paha, ma ka inoa o ka poe lawe pepa ke ole e hookaa e mai mamua. E pono ke hiipoiia keia mau rula, no ka mea, he emi no ka auhau no keia nupepa.
AIA KE KEENA O KA NUPEPA KUOKOA -ma ke keena i noho mua ia iho nei e J.W. Aukina, maluna ae o ka Hale Leta. O na hora hana, mai ku eiwa o kakahiaka, a i ka ha o ke ahiahi.
H.M. WINI. Luna Hoopuka.
"KA NUPEPA KUOKOA."
In published in Honolulu
EVERY SATURDAY.
$2.00 per annum, or $1.00 per six months, in advance.
Advertisements not exceeding 10 lines, inserted once for $1.00 twice or $1.50; and $2.00 for one month; all advertisements must be paid for in advance.
Kanikaus will be charged 1.00 per page, or 4 cts. a line.
Payments for Advertisements, Subscriptions or Kanikaus, may be paid to any of the Agents of the Kuokoa, or mat be enclosed in a letter to the publisher.
All subscriptions must be prepaid. No names, either of foreigners or natives, will be inserted on the subscription list, until paid for. This rule must be strictly adhered @ on account of the low subscription price
The Office of the Kuokoa over the Post Office. Office hours from 9 A.M. to 4 P.M.
H.M. WHITNEY. Publisher.
Bound Volumes of the Kuokoa, for the sale at the Office over the Bookstore-$3.50 each.
Persons having complete sets of the above, can have @ bound by paying $2.00 each.
NA BUKE
HOOLAHAIA E KA PAPA HAWAII.
Baibala Hemolele Nui ili gula nani me na ku-
hikuhi ma na aoao ……………………………$12 00
" " Nui ili eleele kaekae wai gula …… 6 00
" " uuku iki iho, " " …… 8 00
" " Pananaiki iho ili eleele …………………… 4 00
Kauoha Hou ili gula nani me na kuhikuhi ……………. 3 00
" " eleele kaekae wai gula …………….. 1 00
" " " ………………. 75
Kauoha Hou Hapa Haole ……………………………….. 75
Lira Hawaii 1848 me ke kanawai ……………………….. 25
" " 1855 ………………………………………… 25
Moolelo Ekalesia ……………………………………….. 50
Haiao ili lahilahi…………………………………………. 10
Hele Malihini ana……………………………………….. 25
No ko ke Akua ano……………………………………… 25
Lira Kamalii……………………………………………… 25
Hoike Palapala Hemolele……………..………………… 25
Moolelo o Heneri Opukahaia…………………………… 25
Hoike Akua …………………………………………….. 25
Wehewehehala………………………………………….. 25
Ninau Hoike ili manoanoa……………………………… 25
" " " lahilahi……………………………… 10
Kumumua Kula Sabati ………………………………… 10
Buke Lawe Lima………………………………………… 10
He Buke no ka Pope…………………………………….. 10
Ui Kula Sabati Helu 3…………………………………… 25
" " " " 4…………………………………… 05
" " " " 5…………………………………… 25
Buke Euanelia a Ioane…………………………………… 10
Himeni…………………………………………………… 50
Himeni ili nani ………………………………………….. 1 00
Na Kauoha Hou Pakeke.
Ili Gula nani …………………………………………… 1 50
Ili eleele kaekae nani …………………………………… 50
Ili eleele ………………………………………………… 35
Kauoha Hou Pakeke me na Halelu.
Ili Gula nani…………………………………………….. 1 75
Ili eleele kaekae wai gula ……………………………….. 60
Ili eleele ………………………………………………….. 50
Na Helelu Pakeke.
Ili Gula nani ……………………………………………… 50
Ili eleele kaekae wai gula ………………………………… 30
Ili eleele …………………………………………………. 20
Ka Hae Hoonani (Buke Mele) …………………………… 25
Eia na buke haawi wale.
Palapala Liilii-
Helu 4-Makemake anei oe i ke ola.
Helu 6-E hele i o Kristo la.
Helu 7-Ka hoi ana mai o ke Keiki Uhauha.
Helu 11-No ka hoohiki wahahee i ke Akua.
Helu 16-Ka Eehia ana o ka Ahaaina a ka Haku a me ka Bapetiso ana.
Helu 17-Mai hana ino i na holoholona.
Helu 18-No ka mahi ana, kuai ana a me ka inu ana i ka Awa.
Ka Davida Malo Kumumanao.
Ka Moolelo o Batimea P@aiki.
J.F. POKUE,
Kakauolelo o ka Papa Hooko o ka Ahahui Euanelio o ko Hawaii Pae Aina.