Ka Nupepa Kuokoa, Volume IV, Number 46, 18 November 1865 — Page 3

Page PDF (1.55 MB)

Ka Nupepa Kuokoa.
HUNAHUNA MEA HOU
o na Aina e.

                    UA HOONEE IA AKU O JEFF DAVIS . Ua ike iho makou ma kekahi nupepa, ua hoonee ia aku o Jeff Davis mai kona wahi i hoopaahao mua ia ai ma Papu Monoroe, a eia oia maloko o kekahi hale nui, i kapaia Garroll Hall. Ua ae ia aku oia e heluhelu i hookahi a i ulua paha nupepa, a i ka ike aku, ua olioli nui loa oia i ka hana hou ana i mau uwea olelo. O ka makou ike iho la ia la me kekahi nupepa.

               MARE LEHULEHU. Aole paha he kanaka mare lehulehu e ae e like me Brigham Young ma Amerika Huipuia a me na wahi e ae a pau o ka honua nei. Ua ike iho no nae makou, he nui loa kana mau dala ma kekahi Banako o Enelani mamua o kekahi poe e ae. A ua manao wale ia, no ka nui paha o kana mau dala paha ka mea i makemake ia ai e na wahine, he kanaono kumaiwa ka nui o kana mau wahine i keia wa.

               HE OHANA NUI KIPI OLE . Ua hele aku kekahi luna hooponopono o kekahi nupepa e ike i kekahi kanaka i kapaia ka inoa Cheeseman, ma ke kulanakauhale nui o Carolina Akau. A ua hai mai ia kanaka, he makuakane oia no kekahi ohana nui, he kanaha kumalua ana mau keiki e ola nei, aka, i ka wa i kipi iho nei ka aoao Hema i ka aoao Akau, aole nae i hele iki kekahi o kana mau keiki ma ka aoao kipi. Aole no hoi i hookauwa aku na ka poe kipi a hiki wale mai i ka wa o ka pau ana o ke kaua kuloko mai nei. Ua mahalo ia no ia ohana no ke kipi ole ana'ku i ka hae a ko lakou makua wasinetona i kaua ai me na hoouka kaua he lehulehu me na koa Beritania, oiai lakou e noho kamalii ana malalo o Beritania.

               MANOMANO NO HOI UA LETA. He kanahiku na tona o na leta e nana ia ai e na kakauolelo iloko o ka Hale Leta nui o Nu Ioka i kela la i keia la. O na loaa mai no keia oihana i na malama mua eono o keia alakaiia, ua hiki aku i ka ewalu   kanalima kumalima tausani eiwa haneri iwakaluakumaiwa dala me kanalima kumalua keneta. ($855.929.52.)

               HE MEA AIE NUI KA KE KANAKA WAIWAI. O ke kanaka i loaa ka uku makahiki hookahi miliona dala, he mea kupanaha loa kona haule ana iloko o na pilikia o ka aie. O kekahi keiki Alii o Esatahake, oia hoi kekahi o ka lima o na luna aina nui o Europa, eia oia malalo iho o na ao kaumaha o ka aie. O kona aie ua hiki aku ka huina i ka umi miliona dala. Me e no ua dala o ka aie ana, hapa mai la kona uku makahiki pakeu aku la keia na Pali, na kahi kanaka hoopakeukeu.

               KA NUI O KA POE PIO MA KE KAUA HULIAMAHI O AMERIKA. Ua ike ia ma ka papa hoiike o ka oihana kaua o Amerika Huipuia, o ka nui o na koa i pio i na koa o na puali koa o ka Akau, ua oi aku mamua o ekolu haneri tausani i ka wa o ke kaua huliamahi o ia aupuni. He okoa no ka nui o ka poe i hoopaaia ma ka palota ana, i ka wa e haawi pio wale mai ana na'lii kipi o ka Hema i ko lakou mau koa. O ka nui o ia poe, ua oi ae paha mamua o akahi haneri kanaono tausani. Nolaila, ua malama ia mai keia mau mea hoomanao iloko o na Buke o ke Aupuni, a i mea no hoi paha na lakou e nana ai no kekahi mau kau e hiki mai ana.

               UA HOOKUU IA. Ua hoopuka ae o Peresidena Anderea Ioanekeiki o Amerika Huipuia, he palapala kuauhau e hookuu aku i kekahi poe o ka aoao kipi i hoopaahao ia e ka Akau. O ka nui paha o ia poe, elima wale no, a mawaena o ia poe, ua ike iho makou o Setepino kekahi, oia hoi kekahi haole nana kekahi haiolelo i makemakeia.

               NO WIREZA KA LUNA PAAHAO O ANADONAVILE. I kekahi la, i ka wa e lawe ia mai ana o Wireza mai ka hale hookolokolo mai, ike aku la kekahi wahi luahine haole o Ohio, i ua luna paahao la, hoao aku la oia e hou aku me kona mamalu, aka nae ua pale e ia mai oia e na koa kiai e hele pu ana meia. A ua manao ia, ina e pau ka hookolokolo ana i keia kanaka hookahi, e hiki ana ka lilo o ke Aupuni i ka akahi haneri tausani dala.

               UA HOOPAU IA E KE AHI NUI. Ma kekahi leta i hiki ae i Nu Ioka, mai Konatinopola mai, ua ike ia iho maloko olaila, o ka nui o ka lilo aku i ua ahi la, mai ka aono a hiki i ka ewalu tausani hale, a ua komo pu hoi iloko o ia pau ana i ke ahi, ua oi ae mamua o akahi haneri Hale Alii. Ewalu mau Halepule Mahometa, a me na hale he nui wale o kela ano o keia ano.

               E HOOKOLOKOLOIA O GEN. LI E PONO AI. Ua kahea mai kekahi nupepa o Kikako e hookolokoloia o Gen. Li e pono ai. A ina e hookuu ia oia, alaila e kala aku i kona hewa. Aka, aole o makou makemake e helewale ia me ke ano hookano me he kanaka kipi ole la. Owai auanei ke koa kaulana o na kipi nana i paa ke kaua i na makahiki eha ? O Gen. Li wale no.
               O ka mea hoike wahahee e make no ia, o ke kanaka hoolohe oia ke olelo oiaio. Aohe akamai, aohe noonoo, aole hoi he oleloao e hiki ke kee aku ia Iehova.

He wahi moolelo kupanaha no Kenela Dalagarena (Col. U. Dahlgren.)

                    O ka malama o Maraki 1864, he malama ia e hoomanaoia ai ma Rikemona, no kekahi o na hana nui o ka poe o ka Akau ; i ka wa o ke kaua huliamahi ma ia Aupuni. O ka moolelo o keia Kenela Dalagarena penei no ia. Ua ike pinepine ia no o Kenela Dalagarena e ka poe o ka Akau a ua maa hoi oia ia poe. Ua makemake nui oia e komo aku i Rikemona, no kona aloha i ko lakou poe i hoopaahao ia ai e ka aoao Hema, a ua manao nui hoi oia, ina io e komo oia i Rikemona, alaila, e kii aku no oia i ka poe paahao o ka Akau, a e hookuu wale mai, me kona manao nae e hui aku ana oia me Kenela Kilapalaki, aka, aole nae oia i hui me Kenela Kilaparaki. I kona wa e hele ana me kona puali kaua lio ma kekahi mau wahi, aia hoi, ku mai la oia i ka pu, a haule iho la a make loa. I ka lohe ia ana aku o kona make ana i Rikemona, hoouna mai la ka aoao Hema, he mau kanaka, e kii mai i kona kino kupapau, no ka hooiaio ana ma ka nana ana, oiai, o kona kino kupapau paha aole paha. Ua make oia i ka po Poakolu la 2 o Maraki. I ka hiki ana aku o kona kino kupapau i Rikemona, ua waiho ia kona kino ma kahi e waiho ai na mea kuai. Malaila i waiho ai kona kino me ka makaikai nui ia e na kanaka he nui. A eia ka mea kupanaha, i ka wa ona i make loa ai ma ke kahua kaua, ua oki ia ae kekahi o kona manamana lima uuku, oiai he komo lima daimana kumukuai nui ma ua lima la. I kekahi la ae, ua lawe ia aku kona kino i ka hale oihana o Kenela Elaze. I ka la mahope iho o ka la e olelo ia nei, ua hoo ia iho kona kino iloko o ka pahu laau paina, a lawe ia aku la i ka pa kanu kupapau o Wahieoka, maluna o ke kaa i huki ia e na miula eha. Ua hele pu aku no hoi hookahi luna kipi a me na koa elua. I ka wa a lakou i hiki aku ai, ua kipaku ia aku ka poe eli lua, a me na kanaka nana e nana ka pa, me ka olelo pu ia aku, aole e hoi hou mai ia poe, aia a hai ia aku ka lohe. O kekahi o na negero e noho ana iloko o ke kulanakauhale, huna malu iho la oia iaia iho iloko o ka ululaau e ku koke mai ana, i ike ai oia i na mea e hana ia ana e kela poe. I ka hiki ana aku o ua poe la ma kahi kanu kupapau, eli iho la na negero i ka lua, a waiho aku la i ke kino iloko me ka uhi iho i ka lepo maluna. I ka lohe ana aku o Adimarala Dalagarena i ka make ana o kana keiki, ua kauoha mai oia i ka poe kipi e hoihoi aku i ke kino i ka aoao Akau, aka, aole nae na kipi i ae mai. Aka, i ka haawi ana aku o ka makuakane i puu dala na ka mea nana e hoike mai i kahi i waiho ia ai ke kino o kana keiki, ua hai ia mai e ua wahi negero la, i pee malu ai iloko o ka ululaau.
I                   I ka loaa ana o ua kino kupapau nei, mamuli o ke kuhikuhi ana a kela negero, ua hoihoi ia'ku kona kino i Oarika, (Okaricks) a ua kanu ia kona kino malalo o kekahi kumu ohia e ku koke ana. Pela iho la ka make ana o keia kanaka aloha aina, a mamuli oia aloha, ua haawi aku oia i kona kino i mohai na na poka e lele makawalu mai ana imua ona. Ua nui kona aloha ia e kona ohana a me ka poe no a pau ana i launa oluolu ai.

Na Palapala.

Ka halawai ana o ka Ahahui
Lunakahiko o Maui a
me Molokai.

                    E KA NUPEPA KUOKOA E ; Aloha oe :
               E ae mai ia'u e olelo iloko ou no na mea e pili ana i na hana a ka Aha i olelo ia maluna. Ma ka la Poalima o kela hebetoma i hala aku nei, oia ka la 27 a me ka la 28 o Oct. oia ka la i halawai ai ka Ahahui Lunakahiko o Maui, a me Molokai, ma ka luakini hoole Pope ma Wailuku. E like me ka hoopanee ana o kela halawai.
               Aole au e kamailio ia oe ma keia wahi palapala no ka moolelo ponoi o ua Ahahui la i olelo ia maluna, no ka mea, ua kauoha ia au e ua Aha la, e hooili aku i ke kope o kona moolelo iloko ou ; a ua hana no au pela, e like me kona kauoha. Aka hoi ; ua koe nae iloko o ia moolelo ka wehewehe akaka ana i kekahi mau mea a ko'u naau i paulele ai me ka hilinai nui. A e laa hoi na mea pili ia na Wai-eha, a pela aku.
               I ka nana iho, me he mea la ua ano like ka halawai ana o ia Aha i na la i olelo ia maluna, me ka ikaika i makemake i ke Kikowaena. No ka mea, ilaila kahi i hui pu ai na kahu ekalesia, na Lunakahiko a me na keiki a ka Aha ; na kamaaina hoi, a me na malihini. A he mea hauoli loa no ia no ka manao.
               Aole au e hoopoina i ka hai aku ia oe i ka mikioi a me ka eleu o na Kahunapule ekolu, na lakou i hai mai i ka olelo a ke Akua i ka Aha ; a iwaena o ke anaina, ma ia mau la i hai ai ka Aha. Na Rev. John F. Pogue, ka haiolelo ma ka hora 12 A. M. o ka Poalima. A ia ke poolelo ma Hoikeana 2 : 2 - 5. Ma ia olelo i ike lea ia'ai ko ke Akua mahalo i ka ekalesia o Epeso, a me kana olelo hoahewa i ua ekalesia la, oiai na haalele ua ekalesia la i kona aloha, i kinohi, a me ka olelo paipai a ke Akua i ua ekalesia la. " E hoomanao i kona wahi i haule ai."
               Ua wehewehe ia ke ano nui o ua olelo la, no ka ekalesia i olelo ia ma ka poolelo. A no ke kulike loa o ka noho ana o kekahi mau ekalesia o keia manawa, me ka ekalesia noa Epeso ; nolaila, ua hoopili ia ka olelo i ka oihana ekalesia o keia manawa.
               Ma ka Poaono ae, hora 12 A M. Na Rev. S. E. Bihopa ka haiolelo ia ia. Aia ke poolelo ma Roma 10 : 1. Kulike loa na mea i wehewehe ia ma ia poolelo, a me ka pule a Paulo no na Iudaio, " e ola kakou."
               Ma ka la Sabati ae, pule kakahiaka, ia Rev. D. Baluina ka haiolelo. O kekahi makua kahiko keia nana i lulu ka pono ma keia pae aina, a i ka nana'ku, ua poohina, ua haalulu na lima. Aia kana poolelo i hoike ai ia la ma ka wanana a Hagai ke Kaula Mokuna 1 : 9.
               Ua wehewehe ia ma ia poolelo, ko ke Akua hoahewa nui loa ana i ka poe Iudaio i na la o Hagai ke Kaula. No ko lakou hilinai a paulele nui maluna o ka lakou mau hana iho, e noho hanohano ana iloko o na hale papa kedera, (Pauku 4.) Nolaila, i olelo ai ke Kaula ma ke poolelo, pauku 9. " Kuko aku la oukou i nui a he uuku, lawe aku la oukou iloko o ka hale, a pupuhi aku la au ia. No ke aha, wahi a Iehowa o na lehulehu, no kuu hale no ia neoneo, a holo oukou a pau i ko oukou mau hale."
               Ua paa loa ia'u na iwi, a me na io, o keia mau Hai Ao. Aka, aohe paha wau i ae ia mai e oe e ke Kuokoa, e kamailio loihi no keia mau mea. Ma ka manao o ka mea e kakau nei i keia, no na poolelo i hoike ia ae nei na kumu, ua hiki ia'u ke kikoo a lalau aku, a hookomo iho maanei i kela mau huaolelo hawaii. Aohe loea i ka wai opae. Pela hoi, aohe Kawai, he lolo wale no.
               E olelo iki ae au no na Wai-eha. O na Wai-eha, oia no o Waikapu, Wailuku, Waiehu, a me Waihee. He mau makahiki mamua aku nei kuu hele ole ana i Wailuku, a na ka halawai o ka " Ahahui Lunakahiko" i kahea ia'u e hele i kela hebetoma aku nei, a i ka hiki ana ilaila, olioli no ka naau, a hauoli hoi ka manao, no ka ike ana i na mea hou ma Wailuku, a me na Wahi e ae.
               Me he mea la, e lilo ana o Wailuku i kikowaena no ka mokupuni o Maui, a me na mokupuni e pili ana. " A ma keia hope aku, e neenee ana paha malaila na oihana poo Aupuni o keia mau mokupuni o Maui a me na mokupuni e pili ana.— A no na mea nui e ae iloko o na Wai-eha, ke hoolilo nei au ia'u iho i hoike no na mea a kekahi makamaka aloha i olelo ai iloko o kekahi o kou mau Helu mua aku nei, oia hoi o H. H. Pareka, nona mea ana i ike ai iloko o na Wai-eha.

NO KE ALOHA I NA KAMAAINA.

                    Aole au e hoopoina ma keia kakau manao ana i ka hai aku i ke aloha no na kamaaina ma Wailuku, a ma Waikapu hoi, ka poe nana i hookipa oluolu ia makou na malihini, ma na pono pili kino iloko o ia mau la.— E like me kela olelo, " A i pono ko ka hale kahi i hookipa ia'i, e kau i ko oukou aloha maluna iho o lakou."
               Ua aie nui makou na malihini i ka hoomanao ana iho i ka hookipa maikai ia me ke aloha e Kuihelani, a me W. P. Kahale, Esq. o Wailuku, a i ka nana ana iho, o laua, no kekahi o na kanaka kuonoono, kai pili pu me ka noho ana ulakolako o ia wahi. A malia no i ku ai ka hookipa aloha, ua loaa no i ka lima. Aloha ia laua a me ko laua mau ohana a pau.
               A i ka Poakahi ae, ua hoi kela mea keia mea o makou ma na wahi i hele mai ai, me na lau oliwa a ke aloha. A nou hoi kekahi aloha e ka "Nupepa Kuokoa," ka paahana o ka lehulehu. Me ka mahalo.
J. H. MOKU.
Kahana, Kaanapali, Maui, Nov. 4, 1864.

He mau ninau e pili ana i ka oihana
Bapetizo, a me ka poe kupono
ke bapetizoia.

                    E KA NUPEPA KUOKOA E ; ALOHA OE :— A i oluolu oe ea ; Ke hoouna aku nei au i ou la i na haina, a me na wehewehe ana o kekahi mau ninau i haawiia mai ia'u e Rev. J. D. Parisa, ke Kahunapule o Kona Hema, Hawaii. Penei ua mau ninau la i pelaia mai ai :
               1. Nohea mai ka oihana bapetizo ?
               2. Owai ka poe kupono ke bapetizoia ?
               Haina o ka ninau 1. Mai ke Akua mai ka oihana bapetizo ia Aberahama, aka, he okoa nae ka inoa ia wa, a he okoa hoi i keia wa. O ke okipoepoe ka inoa i ka wa ia Aberahama, a oia no hoi ka inoa a hiki i ka puka ana mai o ka Haku. Kinohi 17 : 10, " Eia ka'u berita e malama ai oukou mawaena o'u a o oukou, a me kuu poe mamo mahope ou. E okipoepoe ia na keiki kane a pau a oukou." A o ka bapetizo hoi, mai a Ioane Bapetite mai ia a hiki i keia ia. O ka manao nui iloko o keia mau inoa, hookahi no ia, oia hoi (he hoailona) a ma ia mau hoailona hoi e hoike akakaia'i ko ke kanaka manaoio ana'ku i ka mea nana ia kauoha. Pela mai o Paulo ma Roma 4 : 11. A ua loaa hoi ia ia ke okipoepoe ia, i hoailona no kona manaoio i kona wa i okipoepoe oleia'i, i lilo ai oia i makua no ka poe e manaoio ana me ke okipoepoe ole ia, i hooliloia'i ka pono ia lakou.
               Na Ioane Bapetite i hoomaka mua i ka oihana bapetizo ma ka muliwai o Ioredane. Mataio 3 : 6. " A bapetizoia iho la lakou e ia iloko o Ioredane, me ka hai ana mai i ko lakou hewa." A mahope aku, na Iesu Kristo no i kauoha mai i kana mau haumana e bapetizo aku. Mataio 28 : 19. " E hele ae oukou e hoohaumana aku i na lahuikanaka a pau, e bapetizo ana ia lakou iloko o ka inoa o ka Makua, a o ke Keiki, a o ka Uhane Hemolele." Pela no hoi ma Mareko 16 : 15, 16.
               Pehea ke ano o ka bapetizo ana'ku, e pipi paha i ka wai ma ke poo, a e lumai paha i ke kino holookoa o ke kanaka iloko o ka wai ? I ko'u manao i ulu mai ma ka ike ana i ka Palapala Hemolele, a ua manao wau, o ka pipi ana me ka wai ka mea kupono ; a ma ka ike ana iho no hoi i ka Palapala Hemolele, oia no ka mea i hana nuiia e na lunaolelo a ka Haku. E nana ma Oihana 2 : 41. " A o ka poe makemake i kana olelo, bapetizoia iho la lakou, a ia la no, huipuia mai la ekolu tausani kanaka." A ia lakou maloko o ka luakini ia wa, aole paha he muliwai, a he luawai hoi malaila. A pela no hoi o Petero ma ka hale o Korenelio. Oihana 10 : 48. Kauoha mai la ia, " e bapetizoia lakou i ka inoa o ka Haku." Pela no hoi o Paulo i ka lunahalepaahao. Oihana 16 : 33. " Ia hora no o ka po, lawe ae la oia ia laua, a holoi iho la me ko laua mau palapu, bapetizo koke ia iho la ia, a me kona poe a pau."
               Ninau 2. Owai la ka poe kupono ke bapetizoia ? 1. O ka poe manaoio aku ia Iesu Kristo, a ua lilo mai i haumana nana, a ua hoolohe i kona ao ana. 2. O na keiki a na makua manaoio ia Iesu Kristo, e like me na keiki a Aberahama. 3. O na ohana o ka poe manaoio a pau, e like me ka ohana o ka lunahalepaahao. Oihana 16 : 33. Pela no hoi ka ohana o Ludia. Oihana 16 : 15. " Bapetizoia iho la ia, a me ko kona hale."
               A pehea ka poe hoomaloka a me ka lakou mau keiki, a me ko lakou mau ohana, he pono anei ke bapetizoia ? Aole, no ka mea, o ke ano nui o keia mau hoailona bapetizo, oia ko ke kanaka hoohiki ana ia ia iho no ka Haku, a e alakai pono hoi i na keiki, a me ka ohana ma ka ke Akua mau kauoha. Nolaila, ua maopopo ka pono ole ke bapetizoia ka poe hoomaloka, a me ko lakou mau keiki, a me ko lakou ohana, no ka mea, e like me kona ano hoomaloka, aia no oia iloko o ka hewa ; a o kana mau hana, oia no ka kana mau keiki e hoohalike aku ai, a me ka ohana.
               Eia nae ka pono, ina e makemake ka makua hoomaloka e bapetizoia kana keiki a me ka ohana, e pono o ka makua mua ; ina he makuakane, a he makuahihine paha, a mahope na keiki. Oia ka'u haina a me na wehewehe ana no keia mau ninau, ia oukou iho no ka nana me ka waewae iho. J. W. KUPAKEE.

Na kupua kahiko o Hamakua.

                    Akahi no a hiki mai nei i o makou nei na kupua, oia hoi keia au, nona ka inoa. J. W. Iaukea, a ma ka ike ana'ku, ua alakai ia mai kekahi poe kupa imua o keia au, ua lukuia na kupua i ike ia ka hewa, a ma keia lukuia ana na kupua, i laweia imua o keia au, ua kau e ka li, o na kupua e ae, a ma ka nana o ka lehulehu i ka noho ana o ka poe malama kupua, ke hoonakulukulu nei lakou, ke na holo nei lakou, me he mau kumupuaa la, he mea oluolu loa keia i ka poe e malama ana i ka pono, o ko lakou kupua nui ma ka lani, oia hoi o Iehova Sabaota, a ma keia mea i oleloia ke hoihoi a paipu nei kekahi mau kupua ma ko lakou mau hale iho. No ka makau a weliweli i ka luku pololei ia e keia au, ke naka nei ko lakou mau papakole, i hana hoonawali ai i na la i kaahope ae nei ma na hana ino, a me ka hoomauhala ana o ka hewa, a ma ka nana ana i ka noho ana o na kupua, he mea pono i ko lakou manao, aka he mea maikai loa ia i ka poe e malama ana i ko lakou kupua nui ma ka lani. Nolaila ke noi aku nei au i ka Haku e haawi nui mai i ka hana maikai ana a keia au i oleloia ka Lunakanawai Apana hou o Hamakua, i hiki ai ia ia ke hoomau aku i ka luku ana i na kupua ino, o Hamakua nei. Me ka mahalo.
S. K. KAANAANA.
Hamakua, Hawii, Nov. 15, 1865.

 

                    O ka palaualelo a me ka naaupo, he mau pepehi kanaka laua.
                    E ka mea hiamoe, e hele oe i ka nonanona e nana i kona aoao, a e hoonaauao iho.
               He hehena pokole ka huhu, o ke aloha ka mea e pau ai.

Poino i ka Lio.


                    Ma ke kakahiaka o ka la 6 o Novemaba, ua hoi mai na kanaka hana o ka wili a A. Unna. Ma ia kakahiaka i hoi mai ai o Pipi mai Honomaele mai maluna o ka lio ; ua hana oia i ke kaula lino hou i kaulu ilikini, a ua paa loa, a ua hookomoia na wawae ma keia kaula a paa ma na uha. Hoi mai la oia a hiki ma ka Hale-wili, a mai laila aku a ma ke kala o ka hale noho o ka poe ku makahiki, e huli ana ma ka hema, a ma ia wa no i emi aoao ae ai ka lio, a kahuli iho la oia ma ka aoao o ka lio, a holo mai la ke kaula a paa ma kona puhaka, a o ka hoomaka aku la no ia o ka lio i ka owala, a o kona lewalewa iho la no ia malalo ae o ka opu, e peku kahiia ana i o a ianei. Komo aku la ke kaula malalo o na wawae hope, a puka aku la kona kino mahope. I ka wa no hoi e owala ae ai ka lio, lele ae la ke kino iluna a haule iho la, ku ae la i ka peku. Pela no i hana mau ai ka lio io a ianei, e hookui ana i na pahu laau a me na paila wahie. Ma ia wa a ka lio e owala nei, a peku ana, ke hoomau nei no kona poe hoa i ke aluala, a me kona haku hana A. Unna, aole nae he loaa iki. Holo aku la ua lio nei i kai, holo ae la hoi o Kaohumu a hopu ae la i ke kaulawaha, a moku mai la kekahi aoao o ke kaulakaohi, a hopu hou ae la oia i ka nuku o ka lio, a ku iho la ua lio nei ; a holo mai la no hoi o Solomona me ka pahi, a oki iho la no hoi i ke kaula, a haule iho la ke kino o ua Pipi nei ua aneane e make. Hoihoi ia aku la ke kino o ua o Pipi a hiki i ka hale. Aole nae i mainoino loa kona kino, aka, ua puka nae ma ke poo a me ka auwae ; a ma ka puhaka, ua ula pu, me he mea la ua hai ka iwikuamoo. Ma ia la mai a hiki i keia la, aole oia i ai, a inu, a ekemu mai, aole no hoi e lohe ke kahea leo nui aku. Ua hooholo iho la ka manao e ka lehulehu e make ana, a ina e ola, no luna mai ia.
               No Kahului paha, Kona A., Hawaii keia keiki, aia no malaila kona Papa a me kona Mama, kona kini a me kona lelehu. Ua holo ae oia i Oahu, a malaila i loaa ai ia A. Unna, ua kepaia mai oia i ka la 6 o Novemaba 1863, a ua hoomaka ka hana i ka la 18 oia mahina no. He nui ka minaminaia o keia keiki no ka ikaika i ka hana, a me ka hoolohe pono, aka, ua poino ia no kona hana naaupo. Ua oleloia mai no hoi, he lio hou no ka keia, no kekahi makamaka ona ma Honomaele (he hale aikane.)
               E hoomanao hoi kakou e ka poe i koe, a e lilo ia i kumu ao ia kakou, i ole ai kakou e hana i na kaula lino, a kaula hou paha i kaula ilikini no ka lio hou, aole no hoi e hookomo i na wawae a paa i ke kaula. He mau iho la ia, o ke aloha no ko oukou e na haku o ka Napepa Kuokoa, eia mai keia wahi nu hou, hoolawaia iho. O ke aloha no.
J. K. PILIPO.
Wananalua, Hana, Maui, Nov. 8, 1865.

Hookupu Dala Hui Halekuai.

                    Ke palapala hou aku nei au i kela mau hua e kau ae la maluna, no ka mea, i ka la hope o ka malama i hala aku nei, e like me ka mea mua i haiiaku ma ka Helu 42 o ke Kuokoa. Ua akoakoa mai na kanaka ma ka Halepule hoole pope ma Wailua. O na dala i loaa ma ia hookupu ana, he $436.50. O ka nui o na inoa he 97, aole nae i lawa pono ka haawina o kekahi poe, ua kaa hapa. O kekahi poe no hoi ua hookaa pau. Aole no i pau ka hookupu dala ana aia i ka la 15 o keia malama, alaila hookupu hou ka poe i hookaa hapa, a me ka poe e makemake mai ana i keia hana maikai.
               He mau ia mau wahi kauna huaolelo a ko kuaaina pali Koolau, o ke kau aku ka iluna o ka kakou papakaukau. E aloha auanei me ka mahalo i na hoa'loha.
J. S. KANEHAILUA.
Kaloa, Koolau, Maui, Nov, 3, 1865.

No ka Ninau a G. M. Koha, haina mai.

                    Malaila ka ulu mahiehie o ko'u manao e hoaiai ae i ike mai ka mea nana ia Ninau e noho mai la i ka lai o Keawaula, a, mea paha o maliu mai kela i ka uwalo aku a ka leo. Ke oluolu mai ka Lunahooponopono, a ke akakuu iho na keiki o ka Halepai e hookomo iho i ko'u wahi manao ma kahi kaawale.
               O ka Ninau o na la kuhao i kunewa'e, ka wa e paio ana ka ino i Puuonioni ; oia hoi keia, " Mahea kahi i pa mua'i ka hamare a Noa ?" Ma ia Ninau i polukuluku ia mai ai ko'u Lunaikehala e na leo wawalo ; mea ae no o ka hamare a Noa, o kahi i pa mua'i o ka hamere a Noa. I ka halalo ana'ku i ko lakou waihona aole ilaila.
               He mea pohihi noia i ka mea aohe i hiki ae i ka pane poo oia kulana. Aohe no e hala ana keia leo i-o, i na no eia ia kakou e hoopu mai nei, haina mai. Ina hoi e hale loa ana i ke keiki o ka ehu kai o Keawaula. E oluolu oe i ka uwalo aku a ka leo. Haina ae. Me ke aloha no.
S. NAPAHUKAPU.
Kapalama, Oahu, Nov. 13, 1865.

                    UA HOI MAI NEI MA HONOLULU.— Ma ke ku ana mai nei o ka moku kuna Prince, ua hoi mai maluna ona o Aberahama Fornander, ka Luna Kula Nui o ka Papa Hoonaauao, mai kana huakai hoike kula ma ka mokupuni o Kauai.

KA NU HOU HOPE LOA.

                    Ma ke ku ana mai nei o kekahi moku kalepa mai Kapalakiko mai iloko o na la he 17, ma ka nuku o Mamala, i ke awakea o ka Poaha iho nei, nolaila, ua lawe mai makou i na nuhou ano nui.

Hoopaiia o Gen. Wireza.

               Ua ike iho makou, ua hoahewaia o Wireza no ke kumu i hoopiiia iho nei ona, oia hoi kona malama maikai ole ana i na koa pio o ka Akau ma Anadonavile.

Ke noi a Iosepa Davis.

                    Ua noi aku o Iosepa Davis i na waiwai a pau o Jeff. Davis ma Misisipi e hoihoi mai ua waiwai la iaia a me kona ohana.

Mai ahulau.

                    Ua hiki aku ka mai ahulau ma Enelani a me na mokupuni e ae o Beritania i keia wa.

Makani Ikaika.

                    Ua nui loa ka olelo a na nupepa o Inia Komohana no ka hiki ana aku o ka makani ikaika ma ia wahi. Ua nui loa na hale i kaikaiia'e e ua makani la, a hooneenee ia'ku ma kahi e.

No Mesiko.

                    He nui no ka hooikaika ana o na aoao kaua o Mesiko i keia wa, a he mau kaua no kekahi e hookahe mai nei i na koko.

Maia nuhou ma Waipio.

                    E KA NUPEPA KUOKOA E ; ALOHA OE :
               Eia ma Waipio nei kekahi maia kupanaha, na kekahi kanaka oia o J. Konohiki. Elua maia kupanaha, ua hua mai kekahi maia elua ahui ; a hookahi no nae kumu, a o kekahi maia hoi, ua hua mai no e like me ke ano mau o ka ahui maia, aia ma ka lua o ka eka o ua maia nei, ua mahele aku ekolu ahui, a ekolu no hoi opuu, aole nae i oo loa keia mau maia hina e i ka makani, a eia kona kino opiopio ma ko'u hale kula kahi i waiho ai, akahi no au a ike i keia maia kupanaha, a pela no hoi paha kekahi poe e ae e nono mai nei. Nolaila, mai pauaho oe i ka lawe aku i keia wahi ukana ma kou lima. Me ke aloha i na hoa puni nuhou.
A, M. P. NUHOU. Waipio, Hamakua, Hawaii, Oct. 17, 1865.

               LAUKANAKA KE KAONA NEI.— Ma keia mau ahiahi iho nei, ua ike iho makou i ka laukanaka o ko kakou nei Kaona, no ka hoi ana mai nei o na keiki aukai o ka moana, ke koena mai hoi a ka moku Senadoa, ke puhiokaoka o na Kai Anu, a eia lakou ke haukawewe nei ma ua Kaona nei. Ua hoi mai no kekahi poe me ka nele, a o kekahi poe, ua hoi mai no me ka hoihoi, a ke hookapeke nei lakou ma o a maanei, me ka hoonuanua o na ai i ka lei, ka lawe papahi i na poo.

MARE.

                    Nov. 11, ma Honolulu, mare o Ioseph Freta me Umi. No Makaho, Honolulu laua. Na Rev. H. H. Pareka i mare.
               Nov. 18, ma Honolulu, mare o Kahananui no Kuaokahua, Honolulu, me Tamara no Kaneohe, Oahu. Na Rev. H. H. Pareka i mare.
               Oct, 22, ma Wananalua, Hana, E Maui, mare o Solomona me Kainapau. Na Kanakaole i mare.
               Dek. 27, ma Kawaihae-kai, mare o S. Wahinenui me Panoku. Na A. Pali i mare.
               Oct. 8, ma Kawaihae-kai, mare o Kamanonui me Kealakai. Na A. Pali i mare.

MAKE.

                    Sept. 21, ma Waikaakihi, Hana, E. Maui, make o Lilia w.
                    Oct. 27, ma Kawaipapa, Hana, E. Maui, make o Daniela k.
                    Oct. 14, ma Kamalino, Niihau, make o Samuela Ami.
                    Oct. 18, ma Kamalino, Niihau, make o Puawaina w.
                    Oct. 17, ma ia wahi no, make o Hopeni k.

OLELO HOOLAHA.

                    E IKE AUANEI NA MEA A PAU MA keia Olelo Hoolaha. Owau o ka mea nona ka inoa malalo nei, ke papa aku nei au ia oukou e ka poe mea waiwai e noho ana malalo o keia Aupuni. Mai hoaie mai oukou i kuu wahine mare Ia Kekulapili.
                    No ka mea, ua haalele kumu ole mai kela ia'u a me ko maua wahi moe, a ke moe hookahi nei au ma ko maua hale i ka po. O kela mea keia mea e hoaie iaia, aole au e hookaa i kona mau aie, maluna no ona ko oukou poho. Me ka mahalo no.
MOSE MANO. Korese, Ewa, Oahu, Nov. 18, 1865. 207-2t*

Olelo Hoolaha !

                    E IKE AUANEI NA MEA A PAU KE nana mai. Owau o ka mea nona ka inoa malalo nei, ke hookapu loa'ku nei au i kuu mau Apana aina e waiho la Ma Kohala, Mokupuni o Hawaii.
                    Oia hoi o Puoko, Kukuiwaluhia, a me Apuakehau. Aole e hele wale na Lio, Bipi, Hoki, Miula maluna oia mau elua, a i na e loaa kekahi oia mau holoholona e hele ana maluna, e uku la no $1.00 no ke poo hookahi, a o na Hipa, Kao, Puaa, e ukuia noia mau holoholona he hapaha no ke poo hookahi ; a ua koho aku au ia KAINAPAU oia kuu Hope nana e hooko na mea a pau i hanaia maluna.
J. MOANAULI
Honolulu, Oahu, Nov. 18, 1865. 207-1t

OLELO HOOLAHA.

                    KE KAHEA AKU NEI AU I KA POE A Kahaleahuawa. (w.) i Aie aku ai a me ka poe i Aie mai iaia, e hoike mai lakou ia'u ma ka la 27 o Dec. 1865. Ina aole oukou e hoike mai ia'u ma ia ia, o ka pau noia.
MAHOE.
Lunahooponopono Waiwai. Honolulu, Nov. 16, 1865. 207-1t*

OLELO HOOLAHA.

LUNA HOOPONOPONO WAIWAI }
O MAELE (K.) }
               E IKE NA KANAKA A PAU I KEIA E like me ka mana i loaa ia'u mai ka Luna Kanawai Kaapuni Apana Ekolu, Mokupuni o Hawaii : Nolaila, ke kahea aku nei au i ka poe i aie mai ia MAELE (k.) o Laupahoehoe, Hilo, Hawaii, i make aku nei, a me ka poe ana i aie aku ai. E hele mai lakou ma kuu hale noho ma Laupahoehoe, Hilo, Hawaii ; no ka hookaa'ku, a me ka hookaa mai i na aie e like me na olelo maluna, i loko o ka malama Elua mai keia la'ku.
J. J. PORTER,
Luna Hooponopono Waiwai. Laupahoehoe, Hilo, Hawaii, Oct. 2, 1865. 203-4t*

KA BUKE UNUHIOLELO A ANERU !

                    UA PAA UA BUKE NEI, E HOIKE ANA I ke ano o na hua olelo Hawaii, a ke kuai ia nei ma ka Hale Kuai Buke o Wini. Elua ano o ua Buke la ma ke kuai ana, $5 Dala ko kekahi, $6 Dala o kekahi. Elima haneri me kanalima kumamaiwa aoao iloko o keia BUKE UNUHIOLELO, a ua piha loa i ka momona o ka naauao.
H. M. WINI. Mea Hoopuka Honolulu, Mei 22, 1865.