Ka Nupepa Kuokoa, Volume IV, Number 46, 18 November 1865 — Page 2

Page PDF (1.52 MB)

Ka Nupepa Kuokoa.


               4. Ke kuikui i ka wa kahiko. O ke kuikui oia no ka mokomoko, penei ka hana ana ; ina no Wailuku nei kekahi kanaka ikaika i ke kuikui, a no Waikapu paha kekahi. Alaila, kauohaia ko laua manawa e kuikui ai, a hooholoia ko laua manawa e kuikui ai a hiki i ua la 'la i hooholoia'i, alaila, o ka akoakoa aku la no ia o kela aoao a me keia aoao no ka makaikai i ka ikaika o kela aoao a me keia aoao. A makaukau ka aha, alaila puka mai la na mea kuikui o kela aoao a me keia aoao e ulele i ko laua ikaika, me ka hookikahakaha ana o na moho, me ke kani o kaea i ka waha, oia hoi ka olioli ana, me ke mele, penei kekahi mele.
Ula ka lae i ka lepo a ka makani,
Hoonuanua i Apuakalamaula,
Ike aku kuu manao ia'u ku elua,
Ea mai Kaiolohia, e hoi maua,
Uwe aku o'u hoa i ka ana,
He ane aloha ka uka o Niniwai,
O'u hoa i ka lai a ka manu e.
Manu-a wale i ka hoa lau-kanaka,
I ke ke lau awa ia e ka moe,
E kuhi ana ia'u he kanaka e,
Owau okoa no ia mai luna a lalo e-a.
               A kokoke kekahi a me kekahi, alaila, o ka ulele iho la no ia i na wai moo a ke Kehau, a ina e ku kahi o laua i kekihi. Uwa ka pihe o kekahi aoao a haalele wale ! alaila, puka hou mai no kekahi moho hou o ka aoao i pio e kuikui me ka moho mua no o kekahi aoao a pela e nana'i. O keia hana, he pono kui no, me ke ao ole ia i ke kuikui ana a makaukau. A i ke kui ana o kekahi aoao a kekahi aole e pale ae, ina no e kui ia mai i ka papa auwae aole e alo ae hina o ka make aku la no ia, ai hina ole, aole no i make a pela'ku.


Ka Hui Mokuaikaua.


               Ua kukulu ae na wahine o ka ekalesia o Kailua nei i wahi Hui, a ua kapaia ka " Ahahui Mokuaikaua." O ka imi ana i mau wahi palahaku kookoo ae no Mokuaikaua Halepule, oiai ke uhi iho la ke ohohina o ka hapauea ana maluna o ua elemakule nei.
               Mei 18, 1865 — O ka la no keia i hoomaka ai o keia Hui e noonoo no ka lakou hana
nui e hapai ai. I keia hoomaka ana, he mau hapauea a me kekahi mau Lady o ka aoao palupalu i akoakoa mai ; a o lakou nae ka hapa uuku loa o na wahine o keia Ekalesia, a na lakou no i hooholo paa i keia niau manao penei :
               1. E palua na dala no na wahine hoahanau a pau, a pakahi hoi ko na kane, a he emi mai ko na keiki.
               2. E kukuluia i elua mau ahaaina. Ma Kailua ka mua i ka Poaha mua o Okatoba, a ma Holualoa ka lua i ka Poaha hope oia mahina hookahi no.
               He mau enemi no i hoohalawaiia mai me keia poe palupalu, mawaena o ka la e unikiia'i ka lakou mau hana. O ka poe hoomaloka kekahi — Wahi a keia poe, " Aole e hiki i keia poe ilihune ke hapai i keia hana nui, no ka mea, he Alii Aimoku (J. A. Kuakini) ka mea nana i kukulu i keia Mokuaikaua e ku nei, a he nui kona mau kanaka — A e hiki anei i keia poe ilihune ke kukulu hou i keia hale ?" Ma keia mea i hoomanao ae ai au i ka olelo a Sanebarata a me Tobia na enemi ia Nehemia ma — A o kekahi enemi, o ka ike ole ia aku o ke ala like ana mai o na hoa iloko o ka pono. Aole no nae i hooemi keia poe i ka lakou hana, a hiki i ka hookoia ana.
               Ma ka Poaha mua o Okatoba, aia hoi ka la 6 — Hanaio ka hana a ua poe wahine nei. Ma Kailua ka hoomaka ana e like me ka lakou i hooholo ai. A penei na dala loaa mai ia la :
No na kamaaina ke kokua mua, $152 00
No na malihini hele mai, 35 00
Kokua hou iho mahope me he mau pakaua la, a me ke koena o na mea ai i kuaiia, 25 06
Ka Huina pau, $212 06
                    Aohe i pau loa mai na hoahanau i ke komo mai i ka hana oia la. Ua koe mai elua mau Apana i koe, o Kahului a me Puaa, a ke liuliu nei lakou i keia mau la e kukulu i ka lakou mau hana, no ka mea, ua haule lakou i ka hope waa i ko lakou la i manaoia'i. Ka Poaha hope o Okatoba, o ka la 26 ia. Ku hoi ka e-hu, okala ka hulu o ko Holualoa poe hapaue, a me na Lady o ka aoao palupalu, i ko lakou la omaka-ihe ai e like me ka hooholo ana a ua wahine Hui nei e hoowahawahaia nei e lakou la.
               Eia na mea kaulana oia la, o ka poe i haawi mai, a oi ae mamua o ko lakou mea hooholoia e ua Hui Mokuaikaua nei, a ke hoike pakahi aku nei au i ko lakou mau inoa.

PAPA 1.

Miss. Kealailani, - - - $5.00
Mrs. E. N. Pilipo, - - - 8.00
Miss. Kaohimaunu, - - - 5.00
Mrs. Kamakea, - - - 5.00
Mrs. Nahau, - - - 5.00

PAPA 2.

Mrs. Maihui, - - - $4.00
Mrs. Waika, - - - 4.00
Mrs. Keliiuwe, - - - 4.00
Mrs. Alapai, - - - 4.00
Mrs. Kaaaka. - - - 4.00
Mrs. Kekaula, - - - 4.00

PAPA 3.

Kane (w.) - - - $3.00
Leimakani (w.) - - - 3.00
Wahinenui (w.) - - - 3.00
Kahalauliko (w.) - - - 3.00
Mele (w.) - - - 3.00
G. W. Isaia, - - - 3.00
               Ma ka Papa 4.— Kama 2, Kama 1, Kalei-heana, Kamahalo 1, Ikaika 1, Adamu, Kamahalo 2, Kawai, Limahana, Kuaana. Uku-mea. O keia poe, he poe kane ia i palua na
dala, a hui pu me na kamaina e ae, $247 00
Na na malihini i paina pu, 97 50
Lulu manawalea no ka hooala
hou ana i ka A-ha-a-ha. 25 50
Ka Huina $370 00 Ka Huina mua $212 06
Ka Huina pau loa, $582 06
               Oia ka hua o ka hana a keia poe wahine i hoala ae nei, a ke kali aku nei makou o ka ike ia ae o ka hana a ko Kahului poe wa-hine, alaila hoike hou ia aku.
               Aole au e kaena aku ana no lakou nei, aka, e kaena ae ana wau no ka ka Haku kokua ana mai ia lakou, i hoohokaia'i na olelo a ka poe hoomaloka.
               E ko Kailua e, ua ike no wau i ko oukou uuku loa ana i keia wa, a ua ike no hoi i ko kakou ilihune, aka, i nui ke aho i lanakila ai. E paulele maluna o ko oukou kokua, aia la i ka iuiu, i ka welelau o ka makani. Me ke aloha no,
G. W. PILIPO,
Ke Kupakako o ka Hui Mokuaikaua. Holualoa, N. Kona, Nov. 7, 1865.


Ka Nupepa Kuokoa.
HONOLULU, NOVEMABA 18,1865.
Ka Ahahui Lunakahiko o Maui a me Molokai.


               Halawai ka Ahahui Luna-kahiko o Maui, a me Molokai, ma ka Luakini ma Wailuku ma ka la 27 o Okatoba, hora 10 o ke kakahiaka, makahiki 1865. Elike me ka hoopanee ana o kela halawai.
               Kohoia o Rev. S. E. Bihopa i Lunahoomalu, pule o Bihopa. Eia na Kahu ekalesia a me na Lunakahiko i hiki mai.
               KUMU.— D. Baluina, ma ka ekalesia o Lahaina, D. L. Hakuole, Lunakahiko. J. F. Pogue, ma ka ekalesia o Lahainaluna, Kakina, Lunakahiko. W. P. Alekanedero, ma ka ekalesia o Wailuku, W. P. Kahale, Lunakahiko. J. H. Moku, ma ka ekalesia o Kaanapali, D. H. Hale, Lunakahiko. Mekulana, Lunakahiko, ma Kaluaaha. S. W. Nueku, ma ka ekalesia o Halawa. Kamahaloa, Lunakahiko no Hana. Moku, Lunakahiko no Kaupo. S. Kamakahiki ma ka ekalesia o Keanae, Kauehailua, Lunakahiko. Kalaupapa, aole i hiki mai ke Kumu. N. Pali, ma ka ekalesia o Lanai, Kaunele, Lunakahiko. S. E. Bihopa.
               Eia na keiki o ka Aha i hiki mai o P. W. Kaawa, a me Daniela Puhi.
               Noi mai ka Lunahoomalu, e heluheluia ka moolelo o kela halawai ana. Ua hooholoia. Heluhelu ke Kakauolelo i ka moolelo, a hoapono ia. Hoike mai o W. P. Alekanedero, he palapala aloha na ka " Ahahui o na ekalesia o Kauai" i keia aha. Heluhelu ke kakauolelo i ua palapala la. A ma ke noi a W. P. Alekanedero, na J. H. Moku e pane aku ia palapala. Ua hooholoia. Noi mai ka Lunahoomalu, e hoolohe ka aha i na olelo kakau a na keiki o ka aha. Ua hooholoia. Heluhelu mai o D. Puhi i kona kumumanao, penei : " Pono anei ke bapetizoia na keiki a ka poe mawaho ?" Hooponopono ia e ka aha. Heluhelu mai o J. W. Kaawa i kona kumumanao, penei : " Heaha na ano nui e komo ana iloko o ka pule oiaio ?" Hooponopono ia e ka aha.
               Noi mai o W. P. Alekanedero, e hoolohe ka aha i ua hoike hapaha a na keiki o ka aha. Ua hooholoia. Heluhelu mai o D. Puhi i ka moolelo o kana mau hana ma ka ekalesia ma Hana, a me Kipahulu. Hoike waha mai o Kaawa i ka moolelo o kana mau hana ma ke kihapai o Kalaupapa, Molokai.
               Noi mai o W. P. Alekanedero, na ka Lunahoomalu e koho i mau komite, na lakou e nana a hoomaopopo i kela a me keia buke ekalesia i laweia mai nei e kekahi mau kahu ekalesia. Ua hooholoia. Eia iho na komite o kela buke keia buke.
               No ka buke ekalesia o Koolau, Maui Hikina, J. F. Pogue, a me J. H. Moku, no ka buke o Wailuku, Maui, D. Baluina, a me S. W. Nueku, no ka buke o Kaanapali, Maui, W. P. Alekanedero, a me S. Kamakahiki, no ka buke o Hana Hikina, Maui, H.. Manase, a me W. P. Kahale. A e hoike mai keia poe komite i ko lakou olelo hoike ma ka halawai hou ana o ka aha i ka la apopo. Ua hooholoia.
               Noi mai o W. P. Alekanedero, no ka hiki ole ana mai nei o ka Lunahoomalu o kela halawai, nolaila, he pono ke kohoia o J. P. Pogue i mea haiolelo ma ka hora 12 A. M. o keia la. Ua hooholoia.
               Hoike mai o J. F. Pogue ke komite i kohoia e ka aha, e hoomakaukau i ka moolelo o keia aha, a hoike aku imua o ka " Ahahui Euanelio Hawaii." Ma ka halawai makahiki ana o ia aha ; ma ka malama o Iune i hala iho nei. Ua hana no ia komite e like me ka ka aha i kauoha'i.
               Hoike mai o J. H. Moku, ke komite i kohoia e ka aha, e kii i ka palapala ae ia L. Aholo e haiolelo, ua hana no ia komite e like me ke kauoha a ka aha.
               Ma ke noi a W. P. Alekanedero, ua hooholoia ; e hoopanee i ka halawai, a halawai hou ma ka hora 2 1/2 P. M. Hoolohe ka aha i ka haiolelo a Rev. J. F. Pogue, aia ke pooolelo ma Hoikeana 2 : 2 — 5.
               Halawai hou ka aha ma ka hora 2 1/2 P. M. Pule S. Kamakahiki. Ma ia halawai, ua noho pu mai o Rev. C. B. Anaru o Makawao.
               Noi mai o J. F. Pogue, e lilo ka aha ma ke kukakuka ana ma keia kumumanao, " Heaha la ka hana kupono a na makua e hana'i no ka lakou mau keiki ?" Ua hooholoia, e kukakuka ka aha no ia kumumanao. Hoakaka nui mai o D. Baluina i kona manao no ia kumumanao.
               Noi mai o P. W. Kaawa, e ae aku ka aha iaia e olelo i kona manao. Ua hooholoia. Noi mai o J. F. Pogue, e kohoia o W. P. Alekanedero, C. B. Aneru, S. Kamakahiki, i komite haawi kumumanao na na Kahu ekalesia, a me na keiki o ka aha ; no ka halawai hou ana o ka aha. Ua hooholoia.
               Hoike mai o J. F. Pogue, he manao paipai i na Kahu ekalesia Hawaii a pau o keia aha ; he pono ia lakou, ke holo aku ma Honolulu i ka halawai manawa a pau. Ke ole ka mea nana e keakea mai. Kokua nui o W. P. Alekanedero ia manao paipai.
               Noi mai o W. P. Alekanedero, na ka Lunahoomalu e koho i komite kuka pu me P. W. Kaawa, a me Moku ka Lunakahiko o Kaupo ; no ka pono ia Kaawa ke nee a noho ma Kaupo ma keia hope aku. Ua hooholoia. Koho ka Lunahoomalu ia J. F. Pogue, S. W. Nueku, S. Kamakahiki ; a e hoike mai ke komite i kana olelo hoike ma ka halawai hou ana o ka aha i ka la apopo. Ua hooholoia.
               Noi mai o J. F. Pogue, e hookaawaleia ka hora 9 o ka la apopo i hora haipule i ke Akua. Ua hooholoia. Noi mai o H. Manase, e hoopanee i ka halawai, a halawai hou i ka hora 9 o ka la apopo. Ua hooholo. Halawai hou ka aha ma ka la 28 o Okatoba, hora 9 o ke kakahiaka. Heluheluia ka moolelo i na hana o ka la inehinei, a hoaponoia.
               Hoike mai o W. P. Alekanedero, ka Lunahoomalu o ke komite i kohoia ; e nana a hoomaopopo i ka buke ekalesia o Kaanapali. Ma ka manao o ia komite ; aole i kakauia maloko o ia buke na hana nui e pili ana ma ia ekalesia.
               Hoike mai o D. Baluina, ka Lunahoomalu o ke komite o ka buke o Wailuku ; manao ke komite, he pono i ke Kahu o Wailuku ke kana i mau rula, i lilo ia mau mea i kumu hana na na Kahu ekalesia e kakau ai iloko o ka lakou mau buke moolelo o ka ekalesia. Hoike mai o J. F. Pogue, ka Lunahoomalu o ke komite, ua hoohui pu ia ma ia buke ka moolelo o ka ekalesia o Hana ; aole no hoi i ike ia maloko o ia buke ka manawa i hooliloia'i ko laila Kahu ekalesia e noho nei. Hoike mai o W. P. Kahale, kekahi hoa o ke komite o ka buke ekalesia o Hana, Maui Hikina ; manao ia komite, ua hemahema ma ke kau wahi o ia buke ; ma ke kakau ole ia ana o na inoa o na Lunakahiko ma kekahi mau hana o ia ekalesia. O ka inoa wale no o ke Kahu kai ike ia.
               Noi mai o D. Baluina e kohoia o J. F. Pogue, a me S. E. Bihopa, i komite nana e hoomakaukau i mau loina, na na Kahu ekalesia, e kakau ma ka lakou mau buke moolelo ekalesia. A e hoike mai keia komite i kana olelo hoike ma ka halawai hou ana o ka aha ma keia hope aku. Ua hooholoia. Noi mai o W. P. Alekanedero, na ka Lunahoomalu e koho i mau komite ; na lakou e palapala'ku i ke aloha o keia aha i ka " Ahahui Euanelio o Hawaii Hikina," a me ka " Ahahui Euanelio o Hawaii Komohana," a i ka " Ahahui Euanelio o ka mokupuni o Oahu." Ua hooholoia.
               Kohoia o S. Kamakahiki, nana e palapala aloha aku i ka " Ahahui Euanelio o Hawaii Komohana," a na H. Manase, e palapala aloha aku i ka " Ahahui Euanelio o Hawaii Hikina," a na D. Baluina e palapala aloha aku i ka " Ahahui Euanelio o ka mokupuni o Oahu. Noi mai o J. F. Pogue, e hookaawale keia aha i ka hebedoma mua o Ianuari, makahiki 1866, e hiki mai ana i manawa haipule i ke Akua, a me ka Poaha hope o Feberuali, i manawa pule i ke Akua no na kula a pau. Ua hooholoia.
               Noi mai ka Lunahoomalu, e hoolohe ka aha i ka palapala noi a na hoahanau o Wailau, Molokai, e noi ana, he pono ia lakou e huipu me ka ekalesia o Halawa.
               Noi mai o W. P. Alekanedero, e hoopanee i ka halawai, a halawai hou ma ka hora 2 1/2 P. M. Hoolohe ka aha i ka haiolelo a Rev. S. E. Bihopa ; aia ke Poo-olelo ma Roma 10 : l. Ma ka hora 12 A. M.
               Halawai hou ka aha ma ka hora 2 1/2 P. M. Pule o S. W. Nueku. Hoike mai o J. F. Pogue ka Lunahoomalu o ke komite i kohoia, e kukakuka me P. W. Kaawa, a me Moku ka Lunakahiko o Kaupo ; manao ke komite, he pono ia Kaawa ke hele a noho ma Kaupo ma keia hope aku. Ma ke noi a W. P. Alekanedero, ua lawe ia ka hoike a ke komite a hoapono ia.
               Noi mai o W. P. Alekanedero, e ae aku ka aha i ke noi a na hoahanau o Wailua, Molokai, e hui pu lakou me ka ekalesia o Halawa. Ua hooholoia.
               Noi mai o W. P. Alekanedero, e pono i na Kahu ekalesia i lawe ole mai i ka lakou mau buke moolelo ekalesia e lawe mai lakou ma ka halawai hou ana o ka aha, ma Ianuari e hiki mai ana. Ua hooholoia.
               Noi mai ka Lunahoomalu, e hoolohe ka aha i ka noho ana o na kihapai ekalesia. Ua hooholoia.
               Hoike mai na Kahu ekalesia, a me na Lunakahiko i ka noho ana o na kihapai ekalesia.
Noi mai o W. P. Alekanedero, na S. Kamakahiki e malama i ka ahaaina a ka Haku ma ka ekalesia o Hana. Oiai e noho Kahu ole ana ia ekalesia ; a na H. Manase, e malama i ka ahaaina a ka Haku ma ka ekalasia ma Kaupo ; a na A. O. Forebe, a me S. W. Nueku, e malama i ka ahaaina a ka Haku ma ka ekalesia o Kalaupapa, Molokai. Ua hooholoia.
               Kukakuka ka aha i kahi e halawai hou ai keia aha. Ma ke noi a D. L. Hakuole, ma Lahaina, e halawai ai ka aha ma ka malama o Ianuari. Ua hooholoia.
               Ma ke noi a ka Lunahoomalu, e heluhelu ke kakauolelo i ka moolelo o keia halawai. Ua hooholoia. Heluhelu ke kakauolelo i ka moolelo, a hoaponoia.
               Noi mai o J. F. Pogue, na ke kakauolelo e hooili aku i ke kope o keia moolelo i ka nupepa " Kuokoa." Ua hooholoia. Noi mai o W. P. Alekanedero, e hoopanee i ka halawai, a halawai hou ma Lahaina ma ka la 24 o Ianuari, makahiki 1866. Ua hooholoia. Ke pakui ia'ku nei malalo o ka moolelo ponoi o ka aha ka olelo hoike a ke komite ; i koho ia e ka aha, e hoomakaukau i mau kumumanao na na Kahu ekalesia, a me na keiki o ka aha no ka halawai hou ana o ka aha ma ka malama o Ianuari e hiki mai ana. Eia iho lakou malalo nei.
               1. NO DANIELA PUHI.— Heaha ka hana a na haipule e pio ai ka hewa kahiko e hana ia nei, oia hoi ka lua. ?"
               2. NO P. W. KAAWA.— Pehea la e pakele ai na kamalii Hawaii, i ka moekolohe ana, a hiki i ko lakou mare ana ?
               NO S. KAMAKAHIKI.— Pehea la e piha hou ai na halawai pule o kakou ?
               4. NO H. MANASE.— O na lalau o na makua Hawaii i ka malama ana i na keiki hou o lakou.
               5. NO S. E. BIHOPA.— Pehea la e hiki ai ke hoopakele i na keiki hou o Hawaii nei ; i ole lakou e make koke mahope iho o ka hanau ana ?
               6. NO J. F. POGUE.— Ka eehia ana o ka ahaaina a ka Haku, a me ka Babetizo ana.
               7. NO D. BALUINA.— Pehea la e hiki ai ke hoala hou i na hoahanau o kakou i na hana manawalea ?
               8. NO J. H. MOKU.— Ka heihei lio ana, kona mau hua, a me ka mea e pau ai ia mea.
               9. NO N. PALI.— Kona Hawaii hoopii ana imua o na Ahahookolokolo, na ino o keia hana, a me ka mea e keakea ai iaia.
               10. NO C. B. ANERU.— Ua ilihune anei Maui, a me Molokai, ke hoala i kula kaikamahine no na mokupuni o Maui, a me Molokai ?
               11. NO W. P. ALEKANEDERO.— Heaha ka pono o na ekalesia o Hawaii nei, i na Pake e komo mai ana iloko o keia Aupuni ?
               12. NO S. W. NUEKU.— Ua mau anei ka pule ohana iwaena o na hoahanau o kakou, ua emi paha?
                    13. NO A. O. FOREBE.— Ua makau anei na hoahanau Hawaii.i ka hoohiki wahahee imua o na Ahahookolokolo ?
W. P. Alekanedero, }
C. P. Anaru, } Komite.
S. Kamakahiki. }
J. H. MOKU,
Kakauolelo. Kaanapali, Maui, Nov. 16, 1865.


Aha Hoomalu.


               Nov. 11. Mahiai, aihue huamoa mai kahi mai o Horn, hoopaahaoia ma ka hana oolea, i eono malama ma ka Halepaahao, a me $1. no ke koina. Jin, ona, hoopaiia $2. me $1. koina. Panaewa w, ona, ua hoopaneeia a ka Poaha.
               Nov. 13. Albert Fauel, ona, belaia $6.00. Thos. Callow, hakaka, hoopaiia he 20 la ma ka Halepaahao ma Kawa, me na $3. no ke koina. Benj. Hornblower, hoohaunaele ma kahi kokoke i ka Halepule, hoopaiia ma ka hana oolea i elua pule, me $1. no ke koina.
               Nov, 14. Nahinelua w., ona, hoopaiia $2. me $1 no ke koina. Michael Spinner, hakaka, hoopaneeia a ka Poaha. Frank. Barker, ua hookuuia. William Shavel, hookuu ia. James. Henry, ona, ua belaia.
               Nov. 15. Ami makapo, haawi wale i ka palapala laikini me ka mana ole, ua hoopaiia he $50. me na $3 no ke koina. Samuel Brown, ona, belaia $6. John Punahoa ona, belaia $6. Daniel Traimor, ona, hoopaiia $2., me $1 25 no ke koina. Thos. Liverpool, ona, hoopaiia $5. me $1 37 1/2 no ke koina. Wm. Ellis, ona, hoopaiia $2. a me $1 koina. Chael. Spinner, hakaka, hookuuia.


               MAKENA UA OPELU.— I ka po o ka Poaono i hala aku nei, oia hoi ka la 11 o Novemaba, ikeia ka pae ana o ka opelu ma kaha-one o Kakaoko ; weliweli ka !. ua mea he opelu, kapalili mai ka i ke one.


HUNAHUNA MEA HOU O HAWAII NEI.


               Ua hoomoeia kau leta, e A. W. P. Kalehuamakanoe o Punahoa Hilo no ke ano ole.
               Ua lohe mai makou, ua hoomaha ke Kula Kahunapule a Rev. W. P. Alekanedero, he hookahi mahina ka loihi e hoomaha ai, a ma ia wa e imi ai na haumana i wahi dala e pono ai ka noho ana.
               HE OLAI.— Ua pau i ka hina he 64 mau hale i ke olai ana mai nei ma kekahi kulanakauhale o Sikili ; ma ka la 20 o Augate i i hala'e nei.

               HE OLELO NOI.— Ua noi ae he 7000 kanaka o Genewa i ke Aupuni, e hoihoiia na ohana e noho ana ma na uka, ma na hale kupono ole no ke ola ana o ke kino iloko o ke kaona,

               HE WAHI AIHUE.— Aia ma Ferenetelo (Ferentello) kekahi luakini katolika ; a noloko mai oia luakini i aihue ia'i ka wai hoolaa, nolaila kauoha ae la ka Bihopa o ua luakini la, e pule ua wahi kanaka aihue nei ekolu la e pule ai i uku no ka hewa i hana ia.

               LIO KEIKI.— He wahi lio keiki ko KA MOI o kakou ; noloko mai o kekahi lio o ka poe Keaka Lio i hoi aku nei, a eia ua lio keiki nei ke hanaiia nei i ka waiu me ka barena ma ka hale lio o KA MOI, he wahi lio maikai no i ka nana'ku.

               KAA I KA PALI.— Ua lohe mai makou, ua kaa i ka pali kekahi kanaka kahu kaa hoki ma Haiku Maui, i kela Poaono i hala aku nei, oia hoi ka la 11 o Novemaba nei, nahaha ke poo, eha ka uha, a ua kauia i ka laau e Mr. Hitikoki (E. G. Hitchcock) a ua oluolu ua kanaka la.

               UA LAWE AKU KA MAKE.— Ua lawe ia aku o Iosua Kailikole e ka make, i ka po o ka la 4 o Novemaba, 1865. He keiki oia i hanau ma Honolulu nei, ma ka la 31 o Iulai, 1844, a o ka nui o kona mau makahiki he 21, me 3 malama a me na la 4. A he keiki no hoi i aloha nuiia e kona mau makua, oia hoi o Kailikole ka makuakane, a o Honualewa ka ka makuahine. Ke noho nei laua me ka-u.

               UA MAKE AKU.— Ma na pepa i hiki hope mai nei, ua ike iho makou i ka make ana o Natanaela Igonola ma ka la 13 o Okatoba. O ka nui o kona mau makahiki he kanaha kumamakolu. He kanaka kupa oia no Besetona, aka, ua noho loihi oia ma keia mau mokupuni he umikumamalu makahiki. Ua ikeia oia he kanaka akamai no ke kakau buke kalepa ana, a he kanaka akamai no hoi i ke kakau me ka lima hema a me ka lima akau.

               POE MAI PAKE MA KALIHI.— Ua ike iho makou i ka makaala o ka Papa Ola ma ka hoolaha akea ana ae imua o ke akea, no ka paa ana o ka hale mai lepera ma Kalihi. A i keia pule iho nei, ua nui wale ka poe i loaa i ka mai lepera i hoihoiia, a laweia ae i ua hale mai la, e nana ia'i, a e lapaau kupono ia hoi no ka manaoia e ola hou ae ana a lilo i mea ano hou. Nolaila, ua kauoha ka Papa Ola i kela mea keia mea, e lawe aku i ua Hale mai la i ka poe a pau i loohia i ua mai la.

               PUPUPU LUA KA HOI.— Ia makou i ala ae ai i ke kakahiaka nui o ka Poalua iho nei, i nana aku ka hana i ka nuku o Mamala, e uluaoa mai ana na kiu o na moku Okohola i koe mai, mai ke puhi ana mai a ka moku kipi. Ia makou i helu aku ai i ka nui, aia hoi, eono ko lakou nui. Ekolu moku i hoolei iho i ko lakou mau heleuma i ke kai, a ekolu moku e kau mai ana ka hae kahea i ka mokuahi " Pele."

               UA HALA AKU LA.— Ua haiia mai makou e J. B. Kaohi, no ka make ana o Kalaau k, o Waiapuka, ma ka la 6 o Novemaba nei. He hoahanau kahiko oia no ka ekalesia o Kohala. He hoahanau kupaa iloko o ka Haku, a he makamaka aloha no keia aina iloko o kona mau la e ola ana, a hoi wale aku la i ka halelua o ke kino. He 60 a oi ae kona mau makahiki. He makuakane hoi oia no J. Kamaka e noho haiolelo mai la no Lihue, Kauai.

               HE HOKUWELOWELO HOU.— Ua ikeia iho ma na nupepa o ka Hikina, i ka manaoia e puka mai ana he Hokuwelowelo hou. Ua kukulu ae na kanaka akamai i ka lakou mau ohenana nui e ake ana e ike aku i ka helehelena o ua Hokuwelowelo la. A ma ka la ekahi iho nei o Okatoba, ua ikeia he 110,000,000 na mile mai ka honua aku. A ma ka la ekahi iho nei o Novemaba, ua manao waleia, ua kokoke aku oia i ka hoku makapaa (Markab.) Ua manaoia o ka Hokuwelowelo paha keia i ikeia e Biela.

               EMALANI I ENELANI.— Ua oluolu loa makou i ka hai ana aku hoi imua o ke akea, ma ko makou ike ana iho ma na Nupepa Beritania, no ka hookipa maikaiia ana mai nei o ka Moi Wahine Emalani, ma na wahi no a pau ana e hele aku ai. A ua oluolu no hoi makou i ka hai aku, o ka Lady Franklina, oia hoi ka mea hookipa maikai loa ia ia. O keia wahine no ka wahine i holo mai i Hawaii nei e imi i kana kane mare i kekahi manawa i kaahope aku nei, a ua hookipa maikaiia oia e ko kakou mau Moi ; a me he mea la, i mea e kaupaona like ia ai ko lakou mau aloha, ua hookipa aku oia i ko kakou Moi Wahine Emalani me ka maikai loa a ano hanohano no hoi.

               NO " KILAUEA " MOKUAHI.— I ko makou naue iki ana'ku ma kahi o ke Kilauea e kapiliia nei ; haiia mai la makou e paa ana ke Kilauea iloko o elua pule i koe. Heaha la ia ke paa'e ke Kilauea, ka waea talegarapa nana e lawe hikiwawe ae na nu hou o ke alo alii, a i na kuaaina.

               NALOWALE KA MOUO BELE.— Ma kekahi mau pule i hala iho nei. Ua nalowale aku ka mouo bele mawaho o ka nuku o Mamala. He waapa maoli no ua mouo la, a ua kau ia maluna o ua waapa mouo la, he bele. Nolaila, aole no paha i poina i kekahi poe ka ike ana ia mouo, ke hookomo mai ma ka nuku o Mamala. Ua lohe mai nei makou, ua pae aku ka ua mouo bele la ma Hanalei i Kauai. Mee no hoi ua auwana ana aia wahi mouo i ka moana a pae aku la i ka honua o Manokalanipo.

               UALA NUI LOA.— Ua ike iho makou i ka pule i hala iho nei, i kekahi uala maoli a makou i ike ole aku ai mamua e like meia. Ua kanuia ua uala la ma ka mahina'i o Capt. Worth o Hilo Hawaii, a i ka pule i hala iho nei, ua hoouna mai oia i Honolulu nei, a ua ana ia me na mea kaupaona, a ua ikeia kona kaumaha he iwakalua kumamalua paona. O ka loihi o ua uala la, he umikumamaono inihi, a o kona anapuni, he kanakolu kumamawalu iniha. O ke ano uala o keia, ke manao nei makou, e pau ana paha i ka ai ia e ka ohana iloko o ka malama hookahi. Nui maoli io no.

               MAI KOHO I KE KUMUKULA I JURE.— Ua lohe mai makou mai kekahi mai o ko makou mau makamaka, ua hiki aku ka palapala papa a ke Kahukula Nui imua o ke Kiaaina o Oahu, aole pono e koho houia na kumu kula Aupuni i poe jure ma keia hope aku, oiai, i ka wa e lilo ai na kumu kula i ka oihana jure, ua waiho wale iho no lakou i ka lakou mau halekula me na hope kupono ole. A no ia kumu ke noi ia ana aku, aole e koho hou ia kekahi kumu kula i jure.

               NO NA PAKE PAAHANA.— Ua lohe pono mai makou mai kekahi makamaka kupono mai o makou, no na hana a na Pake paahana a Kauka Hilibarani i hoouna mai nei. Ua hai mai oia, o kekahi poe Pake ma ka aina mahiko o kekahi mau aina o Oahu nei, aohe ka i kupono loa ma ka hana ana, no ka mea, i kekahi wa, ua hana lakou me ka makemake o ka luna hana, a i kekahi wa hoi, ua hana wale aku no mamuli o ko lakou makemake wale iho no me ka hoolohe ole mai.

               HE AIHUE INO LOA,— Eia ma Waimea Hawaii, kahi i hoomaka ia iho nei i keia mau la, keia mea he aihue ino loa, i ka la 29 o ka Poaono hope, ia po iho. Ua wahiia ka pukaaniani e keia kama-eu, oia ka Halekuai o Spencer o Lihue. Ua komo mai i puka i wahi ia'i, a ua laweia ka Pahu Hao okoa, o ka nui o na dala iloko o ua pahu nei, he $100 a oi, a o na sila pu kekahi o na aina i lilo pu i ka aihue ; a o ke kaumaha o ka iwi o ka pahu he 150 paono. He oi keia o ka aihue ikaika i ka hapai ana i ka Pahu Hao. E o'u hoa o ka ua apuupuu o Waimea, ka mea makau o ka aihue, ua manao anei oe o ka aihue ka mea e waiwai ai ? Aole ! O kou mea ia e ilihune loa'i.

               LOLOHILI NO HOI KA MANAO O KAHI POE. Ua loaa mai ia makou he palapala loihi ehiku aoao kanana mai a I. R. Kahuila mai. O kona kumumanao o ka hoopiha ana ia mau aoao kanana, o ka malama pono ole ia o na Leta, a no ka lilo wale o kekahi mau leta i kekahi poe. Ina pela la, i ka Luna Leta no e hoohalahala aku ai, a nana ia e imi hou'e i wahi kupono no na leta. Aole io no he mea kupono no kela mea keia mea e lawe wale i na leta, a heluhelu hoi i na olelo maloko, me ke kakau ole ia o kou inoa mawaho, ua pili no ia i ka aihue. O ka mea no e hana ana pela me ka manao he maikai, e hikikii mai auanei ke Kanawai me ke oolea. E homanao ka pono e na hoa, o pilikia nui wale auanei ke kino i ke Kanawai.

               KA HOI ANA'KU O CAPT. HANAMU.— Ma ke ahiahi o ka Poaha o ka pule i hala'ku nei, ua haalele iho o Capt. Hanamu i ke kulanakauhale alii o Honolulu nei, a ua kau aku maluna o kona kialua hao Themis me ka manao e hoi loa'ku i kona one hanau i Beritania. A i ke awakea o ka Poalima ae, ua hoouna ia'ku ka mokuahi " Pele " mahope o ua kialua nei o Capt. Hanamu, a me ka Ilamuku Nui o ko Hawaii Pae Aina, oia o W. C. Parke. He nui loa na lohe a makou i lohe ai no ka holo ana'ku o ka " Pele" e imi i ua kialua hao la o Capt. Hanamu, aka, aole nae makou i lawe mai ia mau lohe i mea na makou e kamailio ai imua o ke akea. A ma ka hora 10 o ka po o ka La Sabati iho nei, ua hoouna ia'ku ke kialua " Neke Mela" e imi i ua moku hao la. A ua lawe pu aku oia eha pukuniahi, he 20 koa a me na lako kaua. Ua kau pu aku no hoi maluna o Neke, o Kapena Kahoohuli, a me Deviki ka Luna makai. A eia ka mea hope loa a makou i lohe mai nei, ua kalewa aku oia ma ke awa o Kahului i Maui, i ke awakea o ka Poalua o keia pule. A malaila oia i hoolele aku ai ia Rev. Mr. Mason, ke kahunapule Bihopa o Lahaina, a me keiki o ke Kiaaina o Maui. A ua lohe pu mai no hoi makou, mai ili ilaila ua moku la o Capt. Hanamu.