Ka Nupepa Kuokoa, Volume III, Number 49, 3 December 1864 — Page 2

Ka Nupepa Kuokoa.

 

KUOKOA - BUKE 4 !
OLELO HOOLAHA !
I NA LUNA A ME NA POE E LAWE ANA I KE KUOKOA.

 

                Ma ka pau ana o ka Buke 3 o ka NUPEPA KUOKOA, oia no ka Helu 52 e hoopukaia'ku ana ma ka la 24 o Dekemaba, e hoopau ana au i ka'u Oihana Luna Hooponopono no keia pepa, no ka mea, ua hoolilo aku au i ke Kuokoa ia Kauka L. H. Gulika. A mahope aku o ka la mua o Ianuari, 1865, e hoopukaia aku no oia, ma kela pule keia pule, e like me kuu hoopuka ana aku i keia wa.
                Nolaila, ke kauoha aku nei au i na Luna e aie mai ana ia'u no ka uku pepa iloko o ko lakou mau apana, a no na Olelo Hoolaha hoi kekahi, e hoouna koke mai i na koena dala, no ka mea, makemake au e hoopau i na helu dala o keia pepa i keia wa. Ua noiia no hoi na poe a pau i aie no ka lakou nupepa, no ka Buke 1, 2, a 3 paha, e uku koke mai i ko lakou mau aie i na Luna pepa o ko lakou apana, a ia'u paha, ma Honolulu nei.
                Mahope o ka la mua o Ianuari, e pono no oukou ke hoouna ia Kauka Gulika i na palapala a pau, e pili ana i ka lawe pepa ana, na Olelo Hoolaha, na Kanikau, a me na manao no hoi e pai ai iloko o ka Buke 4 o ko kakou Pepa Kaulana oia no ke " Kilohana Pookela o ka Lahui Hawaii."
Na'u na H. M. WINI.
Honolulu, Nov. 26, 1864.

 

E NA MAKAMAKA HOI O KE AUPUNI
HAWAII.

 

Ua lohe oukou e hoihoi ia mai ana ke KUOKOA na'u e hooponopono mahope o ka la mua o Ianuari, M. H. 1865.
                E kokua pu ana o H. H. Pareka ma ka hooponopono ana. Ke manao nei maua, e mau ana no ke ano maikai o ka pepa e like me mamua, a e hooikaika ana maua e hoonui ae i kona maikai. He lana no hoi ko maua manao, ke loaa ia maua ka manao maikai i na mea i lawe i ke KUOKOA mamua.
                E like ana kona ano a me kona nui me ka mea a oukou i ike ai i na makahiki i kaahope ae nei. E hoopukaia ana i kela Poaha keia Poaha. Ka uku makahiki, ELUA DALA ($2.00,) a HOOKAHI DALA ($1.00) no na mahina eono ;— me ka hookaa mua no nae. Makemake maua e ike maka i hookahi dala no kela mea keia mea e lawe ana i ka Pepa, mamua o ka la mua o Ianuari.
                He pono i na makamaka ma kahi mamao aku e makaala, a e eleu ma ka hoopaa ana no lakou i wahi kuleana iloko o ke Kilohana Pookela o ka Lahui Hawaii, no ka M. H. 1865, no ka mea, hookahi wale no malama i koe.
                He hiki no i kela mea keia mea e hoouna mai i na kauoha me na dala pu. Aka, eia na inoa o na Luna nui, o kela mokupuni keia mokupuni :

NO HAWAII.

No Kohala Akau — Bona, me Luhiau.
    " " Hema — Laiana, me Pali.
    " Hamakua — Laiana, Kukahekahe, Kaaekuahiwi me Waiau,
  " Hilo me Puna — Koana, Laimana, Hikekoke, Pohano, me Kaina.
  " Kau — Kulika, me Kauhane.
    " Kona Hema — Parika, me Papaula.
    " " Akau — Parika, Kupakee, Pilipo, me Kaonohimaka.

NO MAUI.

No Hana — Bihopa, me Kamakahiki.
  " Kaupo — Naloloa.
  " Honuaula — Manase.
  " Makawao — Poka Gerina.
  " Wailuku — Alekanekero.
  " Kaanapali — Moku.
  " Lahaina — Balauina, me Pogue.

NO MOLOKAI.

Porepe, Hikekoke, me Nueku.

 

NO KAUAI.

No Waimea — Rowela.
  " Koloa — Kauka Mika.
  " Lihue — Paulo Isenbery.
  " Waioli — Ioane.

NO OAHU.

No Ewa — Bikanele.
    " Waianae — Kaoliko, me Keauiaole.
    " Waialua — S. N. Emekona me M. Kuaea.
  " Hauula — Ukeke.
    " Kualoa — Kale (C. H. Judd.)
    " Kaneohe — Pareka.
    " Wailupe — Poli.

NO HONOLULU.

Kawaiahao — Kekauohanui.
  Waikiki — Kawainui.
  Nuuanu, Palama — Hu.
  Alanui Liliha — Kumuhonua.
  Kalihi — Kaoo.
  Pauoa — Naone.
  Manoa — Lima.
  Nuuanu uka — Pualewa.
  No ka Makeke ia — Keana.
  No na Katolika — Kamai.
Na'u na L. H. KULIKA.
Honolulu, Dekemaba 1, 1864.

 

Ka Nupepa Kuokoa.
HONOLULU. DEKEMABA 3, 1864

 

Lincoln & Johnson.
God Save the Union.

 

                I ka Poakolu iho nei, ua hiki mai ka moku Onward, a nana i lawe mai ka lanakila ana o LINEKONA a me JOHNSON ma ke koho balota ; ua kikohuia na papalina Amerika i ka hauoli, a me ka olioli, no ko laua koho hou ia ana. Ma ko laua koho hou ia ana, aole e mau ana ka na kipi hana. Ma ka Poaha a po iho, ua hoomalamalamaia kela hale Amerika, keia hale Amerika, me na kukui ihoiho, a ua kena ae hoi lakou i na ahi lele, na kao, a me na ahi o na wai hooluu ano e.
                Mamua'ku no o ke koho hou ia ana o keia mau Alii Pakui, ua hoohiki ae no na Amerika a pau, aole e hoopau i ke kaua, a hiki i ka wa e pelu ai ko lakou kuli ilalo o ka lepo, me ka hoomaikai, no na ino a lakou i lawelawe lima ai, a hooneoneo ia na haneri home he nui wale, a hoolilo ia hoi he mau tausani wahine, i poe wahine kane make. E like me ko lakou kiola ana'e i na lei bipi o ke kaumaha, a me ka pilihua, ma na kahua kaua o Bunker Hill, a me Saratoga, i na makahiki he kanawalu kumamawalu i kaahope ae, a pela no auanei lakou e kupee ai i ka hae i keia mau la'e i na kipi, ma na kula Rikimona, a ma na papu paha o Kaletona.
                O Amerika holookoa i na la o ka hoomaka ana o ko lakou Kuokoa, hookahi no lakou ka makuahine-kolea hookahi, aka, iloko o ke kanawalu kumamaha o na makahiki o ko lakou noho Kuokoa ana, " wehe i ka piko a o ka hoahanau," a hehi ino i ka uhi-maka o ka Hae Amerika, o kona makuahine, malalo o ko lakou mau kapuai, me ke kikohukohu hoi me na kulu koko manaonao o ke kipi, aloha io no na kanaka Amerika i ko lakou aina, no ka mea, he mau tausani mile ko lakou kaawale mai ko lako aina mai, aka, ke hauoli nei no kana mau pulapula me ia mamao loa.
                Me he mea la, aole nokala i manao ia ai keia mau kanaka, e noho alii a pau keia kaua ana, a haule mai na kipi ilalo o ka lepo, alaila laua haalele ae i ko laua mau noho ia hai, no ka mea ua maikai ae la ; a me he mea la no hoi ua ike mai no ka Lunakanawai kiekie Loa, he pono ka laua aoao i koho ai, a nolaila i hooloihi ia mai ai ko laua noho alii ; no ka mea aole e nana kee mai ana no onohi o ka lani, a aole no hoi e ae mai ia e hehi ia ka pono i ka honua. No ka mea, i ka wa a ke kipi, i hoomaka ai e pani i na ihu o kona makuahine kolea i ole ai e honi hou ia i na ea oluolu, o na manawai o Hurona, a me na kapawai o Lawrena, ke poha koke mai la no ia o na kaulahao, a hakihaki hoi na kupee, i hoopaa ia ai i kaika o ka lahui Amerika, i na makahiki he kanawalu kumamawalu i kaa hope ae nei, a ala mai la na kanaka opiopio, me na lima kila, a me na naau paeu, a hele aku imua e hooauhee aku ia lakou ma na kapa o Antieama, a ma na kula o Pitabuga.
                Ki ola aku la lakou i ka waiwai, a kaua aku la, " no kuu aina, kuu aina pono," a me ka ipu ae no hoi o ka mea e hoino mai ana i ka hae o ko lakou makuahihe he enemi mau loa ia no lakou, a hiki i ka hopena. Aohe no he manawa, a aohe no paha he wahi, e hiki ai ia lakou ke hoopoina i ko lakou aina makuahine, a hoemi mai ai hoi i ke aloha iaia, ka mea a lakou i aie ai. I na wahi a pau loa e welo ai ka Hae Amerika, e houluulu auanei lakou malaila, a e hoolohe i kana mau kauoha mai. I na wahi a pau, e welo. ai, i na paha ma ke kai, a ma ka moana, ua makaukau lakou e hoala ae i ko lakou mau lima a hooho ae, "e hoomauia ka welo ana o kela hae maikai, ma kahi e hana ai o na Kipi, haule nae imua o kakou, na lepo lanakila malalo o ko kakou mau kapuai, a o ka lepa o ka lanakila e welo maluna o kakou."

 

NA MEA HOU O HAWAII NEI.

 

                Ka moku Kilauea.— Aole e holo ana ka mokuahi Kilauea i ka Poakahi, no ka mea he la olioli, a ka Poalua hoomaka aku ia e holo ma na awa mau e holo mau nei.
                MEA LOAA.—I kakahiaka nei ua loaa ia makou kahi mau komolima, mawaho iho o kahi o ka Mea hanohano, Ioane Ii, he komo kula, a he komo pohaku ulaula. E loaa no i ka mea nona na komo, ma ko makou Keena nei.
                I keia mau la e hele nei, ua ikeia'ku ka hoomaka ana'e o ka o ane'e o na kukuna konane aiai o ka Mahina, me kona hoike mai i kona nani lua-ole maluna iho o ka honua, ka mea a ke Akua i haawi iho ai i kukui malamalama no ka poe e noho ana ma ke kae o ka pouli mau.
                E na makamaka mai Hawaii a Kauai, e ala like mai kakou a pau, a e eleu ma ka hapai ana i na mea e hiki mai ana ma ka makahiki hou, a ua kokoke mai ka hopena e kuu ai ka luhi o keia makahiki, a nolaila, e hoomakaukau koke e na makamaka i wahi ola no ke Kilohana Pookela o ka Lahui Hawaii, no ka makahiki hiki mai ana.
                I ka poe mea kanu pulupulu.— Ina kakou e alawa ae i ka oleo a ka Lunapai, no ke ana i na pulupulu, e ike auanei kakou i ka nui o ka pomaikai e loaa mai, me ka nui ole o ka luhi. E wiki mai kakou mai kakou ma ka hana loaa, a e lohi ma ka hana pakeke ole ; no ka mea, o ka hana ka mea i lanakila aku mamua o na mea a pau.
                KA AHAOLELO.— I ka po o ka Poaha iho nei, ua hoopanee ia ka hana, no ka ili ana a po ka manawa e olioli ai no ke koho hou ia ana o Linekona me Johnson. Ua hele aku no hoi na 'Lii, a me na Lunamakaainana e ike i ka Comisina, a me ke Kanikela o Amerika ; a ua mahalo nui loa no makou i keia hana a ko kakou mau Luna.
                I ka po o ka Poakolu iho nei ua komo aku kekahi kanaka iloko o ka hale noho o William Jarrett, Kakauolelo o ke Keena o ko na Aina e, i ka wa o ka ohana e paulehia ana i ka hiamoe, a hoala aku la ia Willamaa olelo mai " i na he pu ka'u, ki ia oe e a'u, e pono e hoi." Ina no i ku mai ia kanaka i ka pu i na no aole makou e hoahewa, no ka mea ua komo oia iloko o ka hale me ka ae ole ia mai.
                No ke koho hoa hou ia ana o Linekona.— Ma ka Poakolu iho nei ua ku mai kekahi moku lawe leta o Onward, a maluna ona i hiki mai ai ka lono no ke koho hou ia ana o Linekona i Peresidena, a o Johnson kona hope. I kona wa i ku mai ai, ua hauoli ae la na puuwai aloha aina o Amerika, a welo ae la na hae, ma na ipuka a hale, a me na pahu hae a pau, o na Amerika aloha lokahi a pau, a me he mea la e hai mai ana " o ka hae o ka wiwo ole, a me ka lanakila, e mau no kona kilepalepa ana."
                Ka La Kuokoa, Nov. 28.— Ma ka Poakahi iho nei ua hiki hou mai ka la o ko kakou Kuokoa ana, aka aole i malama nui loa ia ua la nei, oiai, eia no kakou iloko o ko kakou Kanikau ana no ko kakou Moi aloha i hala e aku, aka e hoomanao kakou ma keia la laua i haawi ai i ka laua ahaaina, a i ke kakahiaka o ka lua o ka la mahope mai oia, ua haalele mai oia, aloha ia kakou. He mau ahaaina no kekahi ia la.
                HANAINO I KA HOLOHOLONA.— Ma ka Poaono o kela pule iho nei, ua hooholo ia kekahi lio e kekahi puna poniponi o Aferika, a no ke go ole paha o ua lio nei, ua lalau ae la ua Aferika nei i ka pauku laau, a uhau i ua lio nei, mawaho iho o Lepekaholo, a make loa. Ua pulu elo no nae ua keiki la o Aferika i ka ua o Nuuanu.
                Heaha ka mea i like ai ke keiki kolohe iloko o ke kula me ke poo leta ? No ka mea, ua hoopili ia laua ma ke kihi.
                I ka wa hea e paweo ai na maka ? I ka wa e ike aku ai i ka hoa.
                I ka wa hea e ike ia ai na kaikamahine opiopio like loa elua ? I ko laua wa e kilohi ai i ke aniani.
                Hale pau ahi.— Ma ka Poalua iho nei la 29 ua pau i ke ahi ka hale noho o W. E. Cutrell, ka mea nona o Union Hotel (Halehai.) I ka hora 3 paha ka hoomaka ana o ke ahi, a i ka wa i koele mua mai ai na bele, ua hiki e aku la i kahi pauahi ke kaa Helu 4 " Hawaii," a mahope aku ona ka hiki makawalu ana aku o na kaa e ae. O ka Helu 4, a me ka 2, na kaa hana nui ia la, a i ka hora eono, ua hale la i ike ia ai i ka hora elua, he wahi haiamu na na hupa o ka poe ili keokeo, ua hoolilo ia i puu lehu ; a he uuku loa na wahi opala i koe iho, i ke ahonui o ke ahi. " O ka hao a ka wai nui, aohe opala koe."
                Ma ka Poakolu ae no ua pau kekahi puu nanahu, ma kahi o Kimo i Pakaka.

 

KA NU HOU

 

Aberahama Linekona ka Paresidena o Amerika Huipuia.
Ua pau o Atlanta i ke ahi !
Ke hele la o Sheremana iloko o Kaletona me 40,000 Koa.

 

                Ua kaua ia ke kuaa nui ma ka Hikina, a ua olioli makou i ka hai aku, aohe he kaua no ke koko, aka he kaua e hoopau ai i ka manao ana o na Kipi e lanakila ana ko lakou koho balota ana maluna o ka Hui Hanohano o Amerika, me ka lokahi, a me ka lahui, a me ka haaheo ana, he lanakila o ka lokahi ana, a me ka Hanohano lahui.
                Ua kuni paa ia o Aberahama Linekona, a me kona poe no ka lokahi, ma na uilani ana a pau, a ua hookomo o McKalelana i ka manaoio e hiki ia ia a me kona mau kokua, ke hoolilo i ka lokahi o Amerika Huipuia, a e mau ka nakeke ana o ke kaulahao o ka hookauwa, ma ko kakou mau ipuka a hale, a he nui no na popilikia e hiki mai ana ke ole lakou e hoopau i ko lakou mau manao hookauwa.
                Ua hookahuliia ka hookauwa i ka make, e like me ka nui o na kanaka manao hookauwa. Aole e nakeke hou na poke kaulahao, ma ka ipuka o ke Capitala o Wasinetona, a e pau ana hoi ka manao ana o Vireginia, e loaa mai iaia, ka waiwai mai ka hookauwa ana. Ua manao no ka o Amerika e paa i kana mau pulapula iloko o ka lanakila o ka hookauwa ole ia. Ua haule ilalo ke Kipi o ka pouli mau loa a ua iho pu no hoi ilalo me kona mau kumu i manao ai, a aole no hoi ia e hoopouli hou ana, ina molaelae, o ka hookauwa ia, ma ka aina puni ole o Amerika Huipuia. Aole no hoi kekahi lahui a makou i ike ai i ka hoohikiwawe ana ia mea, e like me Amerika Huipuia lokahi, a aole no hoi lakou e hoohaahaa hou ana ia lakou ma ka pelu ana i ko lakou mau kuli, imua o ka poe Kipi ; a aole no hoi lakou e hana aku ana i ke ino ; aka e ae hou aku ana o Amerika kupaa e hoi mai, me ka hoolioli ia lakou iho i na pono lokomaikai kahiko, i loaa ai ia lakou mamua ; a mai manao lakou e hoihoi aku ana ke Aupuni Amerika i ko lakou mau aie, o ka lakou mau kaua hookahe koko, a me ka manao hoi e hookauwa hoi i na negero, i hookuu lanakila ia.
                O keia lanakila ana ma ke koho balota, he nani no ka lahuikanaka holookoa, a he mea no hoi ia no ka lahui Amerika e haaheo ai, e hiki ai ia lakou ke kupee i na kipi kuloko, me ka ino a waho e hoouka mai ai. He mea no hoi ia e hoike aku ai i ke ao holookoa o ka poe nana i hooikaika i keia mea i ka makahiki 1861, he poe lakou aohe e kuemi mai ana, a e uhaki hoi i ka lakou mau olelo paa ; a aohe no hoi e noi aku ana e kalaia mai no na mohai a lakou i hoolaa aku ai, ame ka hai pu aku no hoi, he poe lakou i hookaawaleia i ko ke ao nei ma ko lakou ulu koke ana, i ka nui ame ka ikaika ; a ua hai no ka poe Amerika i kipi ole, a he poe lakou e lanakila mau ana, ma na koho balota ana a pau maloko, o ka malama o Okatoba.

 

Ko Sheremana hele ana iloko o Kaletona.

 

                Ua haiia mai nei e na nupepa i hiki mai nei, ke hele la o Sheremana iloko o Kaletona me kona mau koa he 40,000 ; a ua hai ae no hoi na nupepa aohe o lakou kanalua i ka holo o kana mau hana, ke hoao ia e auamo ; a ina nae ia e hookuemi ole mai ma keia hooikaika ana, alaila, e kukuluia ana i Kia Hoomanao nona, maluna o na aoao o na moolelo o na kahua kaua hahana loa ; aohe no paha ona lua ma kana mau hana ana, no ka mea, he hikiwawe ia e like me ke tiga, e manao ana i kana mea i manao ai, a he pomaikai no hoi ka pakele aku mai kona mau poho lima aku.
                He kena mau ia oia i na kaelua o ka pihoihoi, aka, he oluolu, a he malie kana mau hoouka ana ; a aohe i ike kona hookuemiia ana mai ihope e kekahi Kenela kipi. I ka makalii o kela makahiki aku nei, i kona wa i komo aku ai i ka mokuaina o Misisipi, a ia ia i hele aku i Pikabuga, a hiki aku hoi ia iloko ponoi o Alabama, aole mea nana i keakea mai i na kaula huki o kona mau kaulawaha, a aohe no hoi mea nana i hookuemi hope mai i na kaina o na wawae o kona mau koa, ua non plus aaku lakou.
                Ua manao kekahi poe e hele ana oia i Milledgewille, i ke Capitala o Georgia, a ua manao no hoi kekahi poe e holo ana oia i Montgomery, ke Capitala o Alabama, a ua makaukau hoi kekahi poe e hoohiki o Mobile kekahi wahi ana i manao loa ai ; aka, aole kekahi o keia mau wahi i komo iloko o kana lihi. Ua hele aku no ia i ua wahi a pau me ka ike ole o kekahi poe i kana mea e hana aku ai, aka, ua hooneoneo aku oia i na kula momona i hoopihaia i na huila ame na Ota.
                Ua hoounaia aku o Polk ma kekahi aoao e keakea aku iaia, aka, ua waihoia iho oia me ka hoka maluna oka muliwai Tombigee, me ka ninau ana o ua Polk nei, auhea la ka enemi i hoounaia mai ai oia ilaila e kaua aku ; a o Forest hoi, ua hoounaia oia ma kekahi aoao, a ua hiki pono aku oia i o Sheremana la, aka, iloko o kona kahaha nui, ua kiolaia aku oia ame kona poe koa iloko o ke poho o Big Black. E hiki no ia Sheremana ke hele ma na wahi a pau loa ana i makemake ai iloko o na mokuaina o ka Hema.
                A ano ke ike nei kakou iaia, mahope iho o ke pio ana o Atlanta, e nee ana i ka Hikina me ka hikiwawe, ame ka ike mua ole ia o kona manao e nee. Mai Atlanta aku e holo ana elua mau laina kaa ahi, a o kekahi e holo hikina hema ana i Savana, a o kekahi e holo hikina Komohana ana i Kaletona. Aole e hiki i kekahi puali koa nui ke keakea iaia ma ia hele ana. Ua manao o Hoad e noho ana o Sheremana i ka hooilo i Atlanta, nolaila, ua nee aku oia i Tenessee, i mea e hiki ai iaia ke oki i ka launa ana o Sheremana me kona mau luna ae ; aka, ua uhai loa ia aku o Hoad a hala loa i ke Komohana, a hoonoho aku la ia Thomas e kiai i kana mau hana mai, a hele aku la oia ma ka Hikina i Kaletona. O kona hoonee ana i na kanaka mailoko aku o Atlanta, a he hana akamai loa ia nana, he mea hoi ia e haawi aku ai i ka manaoio ana i na kipi, a e noho loa ana oia malaila. Ma keia hana ana, aia o Georgia, ame Karolina Hema malalo o kona ahonui.
                Ua haalele o Makalelana i kona palapala kaua.
                Ua hai ia mai ua haalele o Makalelana i kona palapala ae e noho i ke kaua, me he mea la i ka nana aku no kona hoohalahala i ka haule ana o kona aoao ke Copperhead (ke poo keleawe ;) a i ka manao wale aku no ma keia hoihoi ana i kona palapala hookohu, e haliu mai ana paha kela e nahu mai ma ke kua.

 

Mai ia Grant mai.

 

                NU IOKA, Nov 9.— Wahi a ka nupepa Herald o ka puali koa Potomaka, e olelo ana " ua hoopuka mai na Kipi ma ko makou aoao hema i ka la pule iho nei, aka, ua hoihoi wikiwiki loa ia aku lakou, me he puahiohio la, iloko o ko lakou mau laina." A inehinei ua u-u ae lakou i ka hae keokeo, i mea e hoopau mai ai i ke kaua, a hookuu aku la makou ia lakou e kanu i ko lakou poe make. A ua hai mai no hoi na Kipi i ka nui o ko lakou poe i eha a make loa he elua haneri. A o ke koho barota ana ma ia kahua kaua, a maikai, aohe nui o ka haunaele. Ka puali koa helu 38 o Peneselevenia, ua koho kahi poe he 1,841 no Makalelana, a he 4,449 no Linetona.

 

Lawe pio ia o Morgannia ma
Lousiana e Gen. Buckner o
na Kipi.

                NU IOKA, Nov. 10.— Wahi a ka nupepa World o Nu Oleana, o ka la 29 e olelo ana, ua hookahaha loa ia ka puali koa ma Morgannia, e Gen. Buckner ke poo o na Kipi e noho ana ma ia wahi, ma ka la 26 ke kaua ana, a ua lilo iaia ia kulana, no kekahi mau hora. Ua lawepio ia e ia, he 1,900 o ka poe koa o ka Akau, a me na pono kaua a pau loa."

 

Kuikahi mawaena o Davisa a me Maximilian.

 

                NU IOKA, Nov. 10.— Ua haiia mai e ka nupepa Times, " ke hana nei na Emisari o ka poe Kipi, e noho la ma Canada i kekahi kuikahi mawaena o ka Emepera o Mesiko, a me na Luna nui o Rikemona, oia hoi o Davisa ma."

 

He ulu moku no Iapana.

 

                Ua hoouna ia aku kekahi ulu moku mamamua e holo aku e hoopau i na pilikia, o na kai kuloko o Iapana, i ka la umi iho nei o Sepakemba, ewalu moku Beritania, ekolu moku Farani, elima moku Geremani, a he hookahi moku Amerika.

 

Mai na Mokuaina Kipi mai.

 

                NU IOKA, Nov. 10.— E hai ana ka nupepa Mecury o Kaletona, " no ka manao ana o Setepano, Boyce, a me kekahi poe e ae, e hoihoi aku ia Georgia ma, me ke aupuni kahiko ; ua lilo nae ia i mea pioloke loa i na manao o kekahi poe Kipi, a ua anapu ko lakou manao, me he uila la."
                Ua hai ae kekahi nupepa o Savannah, " i ka pau ana o kekahi mau hale hana i ke ahi ma Kaletona, a ua pau pu no hoi na mea hana a pau i ke ahi, aole hiki ke hoihoi hou ia. Ua pau pu no hoi kekahi mau pu liilii, a me kekahi mau pukuniahi nui i ke ahi." Ke kono la ka nupepa Mail i ka Ahaolelo, e hapai i aha elele no na mokuaaina a pau loa ; a ua makemake hoi ka nupepa Confederacy o Macona i ka hapai ana no ka noonoo i ka ninau no ka noho lokahi ana ; he mea lapuwale nae ia ma ka aoao o na Kipi. Na ino i hana ia e na koa o ka Akau ma Andersonville, ua hana hou ia ma Florence Karolina Hema.

 

He wahi Moolelo no ke Kahua kaua.— Ke Kanela Kanaka Ui.

 

                Eia malalo nei kekahi moolelo i haiia mai e kekahi Alii Koa o Beritania, no Sir. William Napier, kekahi alii o Beritania, a he kanaka kaulana loa no hoi :
                " He Kapena au no kekahi puali koa Sekotia. E hoouka aku ana makou maluna o ka poe enemi ; a e paukiki aku ana makou i ka uhai ana i na enemi, a ike aku la au i kekahi kanaka e moe ana malalo o ke kumu laau oliva, a he kanawalu i-a ka mamao aku mai ko'u puali aku. E kuhi ana au ua eha ino loa oia, a i ole la hoi ia, ua make loa paha, a hele aka la au i ona la me ka niele aku, ' Aole nae paha oe i eha ino loa ?' A kunou hoole mai la kona poo, ' Aole anei e hiki ia'u ke kokua ia oe ?' A hoole hou mai la oia. A hai aku la au iaia he wahi barani ko'u ame ke ti, iaia i lohe mai ai ia, kunou mai la kona poo, a hoouhiia iho la kona helehelena e na kukuna o ka olioli. Haawi aku la au iaia i ka barani ame ka wai, a moni wikiwiki aku la oia me ka pihoihoi ; a haawi hou aku ia au iaia i ka lua o ke kiaha, a i ka pau ana oia, lalau koke mai la kela i ko'u lima a upiki iho la. I aku la au ia ia, ' Aole au i ike ia oe, aka, na ka lani i aloha ia oe,' a holo aku la au e halawai me kuu Comapani.
                " Aole e hiki iki ia'u ke hoomaopopo i kona ano, ame kona lole e komo ana, iwaena o ka puokooko ana o ke ahi ame ka punohu ana o ka uahi. Mahope mai ua hai mau no au no ka ui loa o keia kanaka iloko o na kahua kaua a pau loa. Aole au i launa hou me ke kanaka ui, mahope mai i na uilani ana a pau o ke alo koa, a hala ke umikumamaono makahiki, i ka wa ana e noho ona ma Freshfrrd i Bath. I hele aku au ilaila e ike ai ia Lady Wilson. Mahope iho o ka pau ana o ka paina, a hui aku la na kane me na wahine, a e ku ana au ma kapuahi ; a e kamailio ana na wahine no na kanaka ui, ame na kanaka pupuka. I ko'u lohe ana i ka lakou la olelo, i aku la au, ' Aohe a'u kanaka i ike ai i ka ui, ame kuu hai pu aku ia lakou, i na mea a pau loa a'u i hai aku nei,' a i ka pau ana o keia hai ana aku, lele mai la ua kanaka nei, me ka i mai, ' O oe no auanei na e Wilson ka mea nana i haawi mai ia'u i ke kiaha wai ame ka barani, a oia hoi ka mea i mau ai keia ola ana a hiki i keia wa.' A haule mai la na waimaka e hoike ana i ka'u hana maikai iaia."

 

Na Palapala.

 

No ke aloha i kana mau hana.

 

                E KA NUPEPA KUOKOA E ; Aloha oe: Eia mai ke koena o ke aloha, ke au aku la a loaa aku oe i kahi au i noho mai ai, a halawai pu aku kaua. Oia hoi keia e kau ae nei maluna, " No ke aloha a me kana hana," o ke aloha ea, he mea nui loa ia i ka manao o ka mea nona mai ke ola, penei i hoikeia ma ka Baibala mai ke Akua mai.
                " O ke aloha ko'u makemake, aole ka mohai," a pehea ko ke ao nei, ua hana anei, ua hooko aku anei i ka mea nui nani o ke aloha ? Pehea keia olelo a ka Haku ma ke alo o kana poe Kaula la, me ko lakou makemake e mohai aku i ka hipa-kane momona ? a me ka bipi-keiki, a me na mea ala ma ke kuahu, aka, ua hai ia mai no e kekahi Kahunapule i ka wa o Mose, oia hoi kona hoahanau, (Aalona) ia ia pau ka mohai, a o ke aloha ka mea i makemakeia e ke Akua a hiki i keia la.
                Nolaila, ma keia kukulu manao ana, ua hoomaopopo ia keia mea he aloha e na lahui a pau o ke ao nei. " Oia hoi ka haawina kau-like loa i waiho ia mai i na lahui a pau ka honua nei, malalo ae o ka lani." Ua hoohalikeia keia mea he aloha me he wai hooluu uliuli la, kona noho maikai ana iloko o ka naau o ka poe maikai. (Oia hoi na haipule)
                Eia hou keia mea, no ke aloha mai, ua hoohalikeia ke aloha iloko o ke kane, a me ka wahine i mare ia laua ma ka inoa Hemolele o ka Haku, me he wai la i paila ia i ke ahi ka wela, ka nui, ka ikaika iloko o ka naau o ke kane paha, o ka wahine paha, i ko laua wa e kaawale ai e like pu me ke'Lii Farani, (Napoliona II.,) ua hele ia ma kahi loihi aku i elua makahiki, no ka oihana kaua, a i kona hoi ana mai a hiki ma ko laua hale, ua uwe like laua me ke aloha pumehana, ia laua e ku ana iluna, e lalau ana na lima ma ka paa aku a paa mai.
                Pela anei na wahine ma Hawaii nei i mare ia a me na kane, ke hele kana kane, a i ole ia, o kana wahine paha ? A i ko laua wa e hui ai, he aloha io anei ko laua ? " Ole wale ke aloha io." Pehea e aloha'i na hoolalau ke kane i ka mea e, i kona wa i hele ai, a pela hoi kana wahine, ua lalau pu laua, a o ko laua aloha, he aloha hookamani noia. Nolaila, pela no kekahi poe e ae, aole aloha o ke kane i ka wahine, huhu wale aku no me ka hana ino hoi, me ka malama ole i na olelo i hoikeia mai e Paulo ma Epeso 5 : 26, penei, " E na kane, e aloha aku oukou i ka oukou mau wahine," a pela'ku. Nolaila hoi, e noonoo nui mai kakou i keia olelo i hoike akea ia'ku la imua o oukou, he nui wale na ano o keia mea he aloha, (a ma keia olelo no hoi i hoopaa ia'i ka berita me Abelahama.)
                Nolaila hoi, o ka mua ea, he aloha, aia a ulu ke aloha iloko a ka naau, alaila, ulu pu me ka ikaika, a o ka manao ke pani kiekie o keia mea he aloha. Eia hoi ka Iesu olelo alua i kana poe haumana. " E aloha aku i