Ka Nonanona, Volume III, Number 16, 26 December 1843 — Page 75

1843.) KA NONANONA. 75

No ka ike ole o na kanaka, no ka nana ole hoi maloko o ke kanawai o ke Akua me ka noonoo i ke ano o ke kanawai; nolaila , manao iho la lakou, he mea uuku ka hewa. Ua ike lea na haipule o ke Akua ma ke kanawai, he mea ino loa ka hewa, a he mea nui loa hoi: he kiekie, he palahalaha, a hohonu loa ka hewa. Ua ike no hoi na kanaka pono o ke Akua, he kiekie, a he palahalaha, a he pololei, he pono, e he hemolele loa ke kanawai o Iehova, a e pili ana no ia i ka naau, a i na mea a pau maloko o ka naau. Aole like ke kanawai o Iehova me ke kanawai o na'lii, e pili ana i na hana a ke kino wale no. O ko ke Akua kanawai e pili ana no ia i na hana a pau a ke kanaka maloko: ka manao, ka noonoo, a me na kuko, a me na mea a pau a ka naau i hana'i. Penei ka Paulo olelo ma Roma 3: 20, "Nolaila, ma ka hana ana ma ke kanawai, aole kanaka e hoaponoia imua ona; no ka mea, ma ke kanawai ka ike ana i ka hewa." Rom. 7: 7-9. "Heaha hoi ka kakou e olelo nei? He hewa ke kanawai? Aole loa, aka, ma ke kanawai wale no i ike ai au i ka hewa; no ka mea, ina aole i papa mai ke kanawai, Mai kuko wale aku, a ina aole au i ike i ke kuko ana." "Aka, ma ke kauoha i loaa'i ka hewa ka wa maopopo, hoala ae la ia i keia kuko wale i kela kuko wale iloko o'u; no ka mea, me ke kanawai ole ua make ka hewa."
          "No ia hoi, ola no au mamua me ke kanawai ole, a hiki mai ke kauoha, ola ae la ka hewa."
          Oia ka manao o Paulo; oia hoi kona ike ana ia ia iho maloko o ke kanawai. Aole ia i ike i kona hewa nui, a hiki mai ka manawa a ka Uhane mana i hookaakaa i na maka o kona naau, a nana iho la ia iloko o ke aniani o ke kanawai; alaila maopopo ia ia kona helehelena, he hewa nui loa maloko o kona naau; a akaka ae la hoi kona make ma ke kanawai. Ina aole i papa mai ke kanawai, mai kuko wale aku i ka hai, ina aole ia i ike, he hewa ke kuko ana.
          Like me ko Paulo manao, a me kona ike ana ia ia iho ma ke kanawai, he nui loa ka hewa iloko o kona naau, pela ka manao ana a me ka ike ana o na haipule oiaio a pau ia lakou iho. Ua maopopo ia lakou ma ke kanawai, he mea nui ka hewa; a ua akaka hoi ia lakou, o ka naau oia ke kumu o na hewa a pau. Aohe o lakou manao, o ka hewa mawaho, ma ke kino, oia ka hewa nui; aka, o na hewa maloko o ka naau, oia na hewa nui i ko lakou manao, a me ko lakou ike ana i na mea ino, kinikini, lehulehu loa e pili ana i ka naau kahiko. Pela no o Iesu i hoakaka mai ai i ke ano o ka hewa ma ke kanawai. Mat. 5: 27, 28. "Ua lohe oukou i ka olelo ana mai i ka poe kahiko, Mai moe kolohe oe.
          Eia hoi ka'u e olelo aku ia oukou, o ka mea e nana wale aku i ka wahine i mea e kuko hewa aku ai ia ia, ua moe kolohe oia me ia ma kona naau."
            Eia hoi kahi olelo, Mareko 7: 21-23. "No ka mea, noloko mai o ka naau o kanaka i puka mai ai ka manao ino, ka moe i ka hai, ka moe mare ole, ka pepehi kanaka, ka aihue, ka makee waiwai, ka opuinoino, ka wahahee, ka makaleho, ka huahua, ka niania, ka hookano, ka lalau wale. Noloko mai keia mau mea ino a pau i puka mai ai, oia no