Ka Nonanona, Volume III, Number 15, 12 December 1843 — Page 72

72 KA NONANONA. (NOVEMABA,

Waialua, Oka. 10, 1843.
                E ka Nonanona e; Ke hana hou ia nei kau ninau, ma ka pepa 4, aoao 15. Eia no ua ninau la.
                "Ke ku nei mawaho o Kou nei, ka moku manua o Amerika o Uluhoku (Constellation) kona inoa. I ka wa i kani ai kona mau pu; e ku ana au ma ka hale o Mi Kamalena, a nana aku la au i ka wati, ike mua ia ka malamalama o ka pouda e anapu mai ana, a mahope loheia mai ke kani ana o ka pu ewalu sekona ka wa i hala, mai ka ikea ana mai o ka malamalama a lohea mai ke kani ana. Ua ikea ka holo ana o na leo, he holo malie no, he 1,142 kapuai o kona holo ana i ke sekona hookahi. E hoike mai oe e ka mea akamai i ka helu, Ehia mile ka loa mai ka hale o Mi Kamalena a hiki i ua moku nei?"
                Eia ka loa mai ka hale o Mi Kamalena, a hiki i ka moku, hoo 1 mile, 5 setadia, 8 kaulahao, 4 anana, 4 kapuai,
Na HAONA KAIWI.
                Pehea keia helu ana a Haona Kaiwi? Pono anei?

PULE HOOMAU.

                He pule hoomau ma ka luakini o Kamika, mai ka la 5 a hiki i ka la 9 o Dek. nei. Ua maikai no ka hana; nui ka poe hele mai, aneane piha ka hale. Ua makaala i ka lohe, a ua ikaika na hoahanau i ka pule. Ma na halawai hoahanau, hai aku lakou i ko lakou hewa, kekahi i kekahi, me ka helehelena mihi a me ka makau. Ina he oiaio keia mihi ana, pomaikai maoli keia ekalesia; ina no nae, he mea pau koke wale no, e like me ka hana kamalii, mahuahua auanei ko lakou hewa. Oia ka mea hopohopo, o pau koke keia hana maikai. O ka mea hoomau a hiki i ka hopena, e ola ia.
                O Pareka, O Kamika, a me Limaikaika, na mea olelo i keia hoomau.
                O ka pule hoomau koe ma ka luakini pohaku ma Kawaiahao. I ka la mua o Ianuari e hoomaka'i.
                E na haipule o Hawaii nei, ke lohe mua nei oukou i keia hana nui; a eia kuu manao paipai ia oukou, e pule oukou i ke Akua i haawiia mai kona Uhane mana maanei e kokua ia makou. No ka mea, oia wale no ka mea e pono ai. Make hewa ka hoomau ke ole ka Uhane o ke Akua.
                Eia na manao elua e hooeueu i ka oukou pule.
                1. He nui na hoahanau palaka iloko o keia ekalesia. Me he poe make la lakou. Aole o lakou malamalama, aole liu o ka paakai; ua like ko lakou noho ana me ko ke ao nei; he noho haaheo, mihi ole, wiwo ole, noonoo ole. 2. He nui loa na kanaka aea ma keia kulanakauhale o Honolulu nei. He lehulehu ka poe auwana, hana kolohe, pepa, piliwaiwai, hookamakama, a me na mea like; oia ka lakou hana e hana nei. O ka hookamakama me na haole paha ka hewa nui maanei i keia wa. Nolaila, e pule ka poe haipule no Honolulu nei, i huli mai keia poe hewa, a hoonani i ke Akua. He nui wale na kanaka maanei no kahi e mai; a ua hemahema ko lakou noho ana; aole kuonoono, aole kamaaina, aole launa me ka poe pono. Oia kekahi mea e poino ai keia wahi.

KA MAI O MI. NAPA.

                Aia no ma Koloa o Napa a me kana wahine e noho nei, a ke lohe nei makou ua mahuahua kona mai. I ka la 6 o Dek. nei, palapala mai Mi. Wini laua me Kauka Kamika, penei he ano, "I ka la Sabati iho nei, mai loa o Napakane i ka luai koko; hookahi paha kila koko ana i luai mai ia la; i ka la noa mahuahua ke koko, a loaa iho la ia ia ka nahu ikaika; no ka laau paha keia nahu; a i ka po alua, luai koko hou me ka wela kekahi. I ka po akolu, loaa ia ia ka maha; ua pale ka luai, a ua oluolu kona opu.

Na LIMAIKAIKA e hoopuka'ku.