Ka Nonanona, Volume III, Number 15, 12 December 1843 — Page 69

KA NONANONA.
"E ka mea hiamoe, e hele oe i ka nonanona, e nana i kona aoao a e hoonaauao iho." SOLOMONA.
Buke 3. HONOLULU, OAHU, DECEMABA 12, 1843. Pepa 15.

PALAPALA A TATINA.
HELU 3.

                E na hoahanau;
                Eia hoi kahi olelo i maopopo ai ka hewa o ko ke kanaka aoao. Roma 8: 7, 8. "No ka mea, o ka manao ma ke kino, he mea ku e i ke Akua; aole ia i malama i ke kanawai o ke Akua, aole loa e hiki. Nolaila o ka poe ma ke kino, aole e hiki ia lakou ke hooluolu i ke Akua."
                Ma keia mau olelo a ke Akua, ua akaka kekahi mau ano o ka noho ana ma ke kino. He ku e ia i ke Akua, aole hoi e hiki i na mea e hele ana malaila, ke malama i ke kanawai o ke Akua. Aole loa hoi e hiki ia lakou, ke hana i na mea e oluolu ai ke Akua. Ua ku e ko lakou noho ana a pau i ka makemake o Iehova. Aole he aloha i ke Akua maloko o lakou, ua ku e ko lakou naau ia ia i na la a pau. Oia ke ano o na kanaka a pau e hele ana ma ko ke kino.
                Ua ike lea na haipule pono, he oiaio keia mau manao, a pehea oukou, e na hoahanau? Ua maopopo anei ia oukou keia mau mea? A ua akaka ole, pehea oukou? He poe kanaka oukou no ke Akua, a ike ole i ko ke kino noho ana? Ua ike pono na haumana ponoi a ka Haku i keia mau mea, o ka noho ana o ka poe ma ko ke kino. E noonoo paha oukou, o kuhi hewa oukou auanei, he poe kanaka oukou no ke Akua, aole ka! he poe ma ko ke kino ka oukou e noho nei! aole mamuli o ka uhane. Olelo mai o Paulo ma Roma 8:13. "No ka mea, ina e noho oukou mamuli o ke kino, e make no oukou; aka, ina ma ka Uhane e hoomake ai oukou i na hana a ke kino, e ola oukou." E ao, o nenenele oukou i ke ola ole. A. TATINA.

HE WAHI PAIO.

Koloa, Nov. 6, 1843.

Aloha oe e ka Nonanona:

                I Honolulu aku nei no au, aole nae kaua i halawai.
                Eia ka'u mea i hele aku nei ilaila; o ka hai aku ia Kauka i ka manao o ka poe kumu kula o Kauai nei; oia ka'u hana i hiki aku ai i Honolulu.
                Eia ko lakou manao o ke akaka pono o ka uku; ua nui no ko maua paio ana, aole nae he paio inoino keia no maua, he paio maikai no.
                I mai o Kauka, "heaha ka pilikia o na kumu, aole he ia, he puaa, he la hana ma Kauai?"
I aku la au "he nui keia mau mea malaila; aole nae e hemo ko lakou pilikia ilaila,"
                "O ke aha la ka mea e hemo ai?"
                "O ke dala no: i waiwai e kekahi, i dala kekahi.
                I mai la kela, "aole pela ke kanawai, o ka waiwai wale no ke uku ia lakou, aole dala."
                I aku la au, "o ke dala o ke kino oia ka i koe; aka o ke dala o ka poalua, aole i papaia mai me he mea la na na kumu kekahi olaila."
                I mai la o Kauka ia'u, "no hea mai ke dala o ka poalua? I aku la au "no ka hana aku i ka hoolimalima."