Ka Makaainana, Volume VII, Number 19, 10 May 1897 — Page 6

Ka Makaainana.

6      HONOLULU, OAHU, POAKAHI, MEI 10, 1897.

IOSEPINE

---KA---

EMEPERESE PUUWAI OLU

O FARANI.

MOKUNA X.

KA PONI ANA.

[Mai ka Helu 18.]

I ko Napoliona hoi ana mai kana huakai kaahele, ua lawa ae la oia i ka halealii o Sana Kalauda.  O keia no hoi kekahi o na anuu e hiki aku ai i ka nohoalii ona Borabona.  He makehewa no hoi ka hoike ana aku ua hoohiwahiwa a hoonani piha ia ua kakela nani o na alii kahiko o Farani.  Mamuli o ka uiha a me ka hoowahawaha o na makaai @ana i na hana a me ke ano o ka noho ana malalo o na hooponopono aupuni Repubalika, he mea hauoli loa ia lakou ko lakou ike ana i na hoohiwahiwa ana o ke ano Moi.

Na kekahi kanoha i haawi aku ia Iosepine i "eha mau lede, no ke kokua ana aku iaia e malama i ka hanohano o ka halealii"  Aole paha he mea nana i noho ia mau keena nani me ka malamaia o ko lakou eehia e like me Iosepine; a o Napoliona hoi, ke kanikela mua i hookohuia a pau kona ola, ua noho alii ae la oia me ka ihiihi a me ka mana i loaa ole i kona mau mua.  Aole i loihi mahope iho ua nalohia aku la na wahi koena o ke ano hooponopono aupuni Repubalika.

He kanaka o Napoliona i hilinai ole i ka manaoio Karistiano, a aole oia i manaoio na kukuluia ka oihana Karistiano ma ke kauoha a ke Akua.  Ua pahola ka manaoio Akua ole maluna o Farani, a ua uhi pu ia na kanaka koikoi o ka aina me na noonoo pegana, a aole hoi i pakele ae o Napoliona mai ia mau haawina mai.  Aka, mamuli o ka Iosepine mau hooikaika ana, na kukulu hou ia ae na oihana o ka hoomana Karistiano, he hana hoi na Napoliona i hana ai me ke kue ana i kona lunaikehala, a me he mea la ua hoomaluleia kona naau a he pio hoi na Iosepine.

I kekahi ahiahi, oiai oia e holoholo ana mawaena o ua malapua ma Malamaisona, e kamailio ana me kekahi o na luna aupuni no ka hoomana, ua pane ae la oia i kona kokoolua me ka i ana:

"O ka hoomana" wahi ana, "he mea hiki ole ia ke holoiia ae mai ka puuwai o ke kanaka.  Aole loa e nele kona manaoio i kekahi mea kino oi ae i ike ole ia.  Nawai i hana kela mau mea a pau?" awhi ana i hoomau aku ai me ke kuhikuhi ana ae i na hoku oiai lokou e oiliili mai ana ma na paia lani ahiahi.  "I kela ahiahi La Pule aku nei ia'u e holoholo hookahi ana maanei, ua kani mai la ka bele o ka luakini o kahi kauhale o Ruela i ka napoo ana o ka la   Ua ilihia loa ia au a ua hoomanao koke ae la au i ko'u mau la opio  Ina pela ka haawina i loaa ia'u, pehea aku la i kekahi poe?  Ina he mea hiki i kou poe akeakamai ke wehewehe mai, oia iho la.  He mea hiki ole i na kanaka ke noho me ka hoomana ole.  Manao au, ma ke kukulu hou ana i na oihana Karistiano, o ko'u hooko ana paha ia i ka makemake o ka hapanui o ka lahui."

Aole no paha i kuonoono ko Iosepine wahi ike pili hoomana.  ua malama oia i ka pono Karistiano, aole no kona manaoio maoli, aka, no ka mea, ua hoomaopopo oia he mea oluolu ia i ka manao o na kanaka.  Ua hoomaopopo oia i ka ihiihi o na oihana Karistiano.  Ua ike no oia i ka @hemolele o ke aloha Karistiano, ka maemae o kana mau kauoha, a me na mea e ae a pau ana i manao iho ai he kupono maoli no ke malamaia.  Ua ike oia he poino ke ili mai ana maluna o Farani ina aole ka hoomana.  Ke ole ka hoomana, he mea hoomaewaewa wale no ka mare ana, he aka-ku wale no na noonoo ana, a e lilo hoi ka make i mea hiamoe pau ole.  Nolaila, ua kokua oia me ka hooikaika ana i kana kane e kukulu hou i na oihana a me ka hoomana o Iesu Karisto maloko o Farani.

I kekahi kakahiaka ae, mahope iho o k ahoopukaia ana o ka olelo kuahaua e kukulu hou ia na oihana Karistiano a e hoonoa ia hoi ka haipule ana, ua malamaia he anaina haipule nui maloko o ka luakini o Nota Dame.  A i mea e awaiauluia ai ka noonoo o ka lehulehu, ua haawii aku o Napoliona i ke anaina me ka hanohano a me na hoohiwahiwa piha.  Iaia e hoomakaukau ana e hele i ka luakini, ua komo mai la kekahi o  kona mau hoa kanikela, oia o Kamabasere.

"Auhea oe," wahi a ke kanikela mua, "e hele ana, makou i ka pule i keia kakahiaka, pehea la ka manao o ko Parisa poe no ia mea?"

"He nui na poe e manao ana e hele," wahi a Kamabasere, "no ko lakou makemake e pahenehene ke ike lakou aole he mau mea hooluolu a hoonanea hoi ia lakou iho."

Aole i pau.

Loaa Nui ka Opiuma.

Nui ka hoohauoliia o ka Hale Dute i k ahopuia ana o elua mau haole o ka mokumahu Auseteralia ma ka hoopae mai he 100 kini opiuma iloko o na puolo lole lepo.  Ua huli mua ia no ka keia mau puolo, nalo wale honua mahope iho, a oili hou ae i ka uwapo, a i ka huliia ana aku, loaa ana.  Elua haole o ka moku i hopuia a me J. Nipa, ko kahu o ke kaa haii ukana i kii aku ai e lawa mai i kela mau puolo.  Imua o ka Aha Apana i ka Poaha, Aperila 29, ua hoopau wale ka Ilamuku i ko ke kahukaa hihia, a mahope iho hoi o ka hookolokoloia ana o na haole e ae elua, ua hookuuia laua.  No ka Poakolu aku ko lakou hopuia ana.

Ia kakahia Poaha no hoi i hopuia ai ke kupakako o ka mokumahu Aloameda no ka malama opiuma.  Elua ka ana huakai no uka nei mamoa aku a o keia hoi ka ekolu, paa ai oia i ka hopu hoohuoi ia e Makaikiu Kodese ma kahi kokoke i ka Nekina, alanui Hotele  I ka hoea ana i ka Halewai a huliia, na loaa he 7 kini, iloko o kekahi pakeke kohu eke o hope o kona lolewawae.  Ua hookolokolo koke ia no oia ia la, ua hala ko ka moku wa holo a pau ai.  Elua ona kumu hoopii, ua haule nae hoi ka hewa hoopae a ae oia i kona hewa no ka malama.  Ua hoopaiia oia e uku i $250 no na koina a me hookahi malama hoopaahao, aka, ua hoohalahala no ka hoopaahao.  Mamua ae o kona hiki ana ke holo aku ma kona moku, ua waiho iho oia he bona no $750 a o W. G. Iwini ka hope ma ka aoao o ka Hui Mokumahu Osianika.  Molehulehu iho i hole aku ai ka moku.  He kupakako keia i hilinai nui loa ia, nona ka inoa o J. B. Sutton, a aole i manaoia eia oia ke lawelawe nei ia hana.  Nolaila, ma keia mua aku, e huliia ana na poe a pau o na moku me ka koe ole o kahi, he hana hoi i hana ole ia mamua maluna o na poe i hilinaiia.

Ua ike makou i kekahi kanaka maoli o ke kaalo ana ae i ka auwina la La Pule, Mei 2, malalo o ka ona rama me elua puraifela e paa ana ma kela a me keia lima.  He lala oia no ke kahi pualikoa pualu o ke Aupuni, a i ka hoomaamaa kiki pu paha, oiai, ke mau nei no ia ano hana ma ko ka Haku La.

He mau luina haole mahuka no kekahi o na moku kalepa nunui ka i hopu a hoopaaia ma ka Halewai, a ua hookuukuuia ae hoi iwaho o ka pa e hooluolu ai i lawa no  a kaawale ka wiliki, i hele ka no kekahi hana okoa ae, ua kukulu laua i kekahi noho laau loihi i ka paia papohaku, pinana a holo mahuka aku la.  Eia nae, ua ike koke ia lauu a alualuia a loaa aku iloko o ka pa papa o Alani & Lopikana, malalo kekahi o ka puu papa kahi i pee ai, a o kekahi iho iloko aku o kekahi ipuhao kahiko kahi i pee ai.  No ka Poaono, la 1 nei, keia holo mahuka.

William Kamali.

Pena Hale o na ano a pau, Kau Pepa a Lu One paha, e like me ko oukou makemake.  Ua hiki ke hoohinuhinu i na Umeke, Pakaukau, Pahu-ume, Moe, Puniu, i hiki ole ke hoomaemae hou ia.  Ua hiki ke hookoia na hana me ka eleu loa, a o na kauoha a pau mai na kuaaina mai ua hiki ke hookoia.  He oluolu loa ka uku ma ke kuka olelo ana.  E kipa mai e na makamaka, mai poina.

Keena hana, ma ko S. K. Pua keena.  Helu 7 1/2, Alanui Konia.

Wahi Noho, Kapalama.

E HOOPAA POHO

I Kou Hale a me na Pono o loko

mai ka poino ana i ke Ahi me ka

---HUI---

Panihakahaka Ahi Springfield

WAIWAI IO, $4,105,374.75.

Oluolu a Haahaa loa na hoouku ana.

W. F. WILSON, Agena,

Helu 209, Alanui Kalepa, Honolulu.

HUI HAWAII KUAI AINA

NA LUNA NUI.

JAS. H. BOYD ...                  Peresidena

J. K. KAULIA ...                    Hope Peresidena

C. A. LONG ...                       Puuku

ENOCH JOHNSON ...          Kakauolelo

JOS. PAAKAULA ...             Luna Hooia

W. C. ACHI ...                       Luna Hoohana

NA LALA O KA PAPA ALAKAI.

J. K. KAHOOKANO,     R. W. WILCOX

J. W. BIPIKANE.

He Hui i kukuluia no ka hookuonoono a kokua ana i ka Lahui Hawaii; ua makemakeia na Hawaii a pau loa e komo mai i ka Hui.

Honolulu, Ianuari 11

Hui Papa a Kukulu

Hale Oahu.

(OAHU LUMBER & BUILDING CO.)

Leleo, Alanui Moi, kokoke i ke Kahua o ka Hui Alahao & Aina Oahu

Poe Kalepa laau, Hana Aelike

a me Kukulu Hale.

Poe Hookomo Mai a Hoolilo aku i na

Puka, Olepelepe, Kui,

Pepa, Pena, Aila,

Na Pono Kamana,

A pela aku, a pela aku

Telepone 53.     Pahu Leta.

ED. A. WILLIAMS.

Helu 514, Alanui Papu, ma Ewa iho o

Pa Aloha.

He mea kuai lako hale o na

ano a pau loa.

He mea Hana Pahu Kupapau a Hooponopono Hoolewa.

[graphic:  engraving of horse-drawn hearse]

E hoolakoia no na Kaa Kupapau, na Kaa pio a me na Kaa-ohana.

Ina no e ninau iaia, e loaa no na Poha ku Kia Hoomanao no na He Kupapau.

O ka Ialoa kekahi hana hiki loa iaia aia ia malalo o ka lawelawe ponoi, ana a Ed A. Williams, F. D., he mea i puka pono mai ka Kalaka Kula o ka Ialoa Maikai ana iloko o Mei, 1894.

---NA TELEPONOA---

Keena Helu 179--Kauhale a me Kahea Po

Helu 81B