Ka Makaainana, Volume VII, Number 18, 3 May 1897 — Page 8

Ka Makaainana.

 

8    HONOLULU, OAHU, POAKAHI, MEI 3, 1897.

 

hou la no Larisa, ke kahua-poo o ko Helene pualikaua malalo o ka hoomalu ana a ka Hooilina Moi, ke Kama'lii Konakanakine.  Ua manaoia e malamaia ana he hoouka kaua nui ma na kula o Tesale mawaena o na puali a elua.  Ke hilinai la na Helene ia Larisa no ke keakea ana aku i na Tureke mai ka holopapa ana aku i ka aina a loaa hoi he ala malaelae e hou pololei ai no Atenai. 

 

Na Hunahuna Huikau no ke Kaua

  He 25,000 poe Helene i komo aku i Epiruso mai ka hema.

  Ua lilo o Perevesa, ma ke Kaikuonoo Ata, i mea ole loa i na hoolei'na poka-pahu a na aumokukaua Helene.

  Ma Reveni, ua loaa he lanakila i na Helene a komoia ke kula o Damasi, ma ko Tureke aoao.

  Ua hala aku ka Hooilina Moi no Juanavo, no ke alakai ana i na hoohana kue aku i ko na Tureke komo aku ilaila.

  Ua hoikeia e lele kue aku ana na Helene i ke ala o@  loona i nei la (Aperila 19.)

  Aneane loa o Edeheme Pasa e hopu pio ia ma ka hooili kaua ana ma Reveni, kahi hoi i loaa ai he lanakila hiwahiwa nui i na Helene.  Ma ka na Helene olelo, he 7,000 poe Tuke i make a i eha paha.

 

Ulele Kinipopo Hoihoi Ole.

  O keia poo maluna ae ka hiona pololei loa no ka paani kinipopo o ka auwina la Poaono nei mawaena o na hui Sana Lui me Regimana Ekahi.  Ua komo mua ka aoao hope, a mahope mai ua lilo ka hoa paio i mea paani wale ia no.  Aohe papa o ka popo i ka aoao mua, a o kahi kumu no ia i poino ai.  Laukanaka ia kahua i na poe makai kai, me ka manaoia e oi ae anaka maikai o keia ulele ana mamua o ko ka Poaono mua, eia ka auanei he oi koa aku o ka popopo.  Ua haule ino loa ka mea hopu popo o Sana Lui, oia o Akina o Wailuku, a ua kapaeia ae a paniia aku me C. Aiwohi, a e ahona iki mai ia.  Elua hora a oi o ka ulole ana.  Helelei pinepine kilihune ua a ua hoomauia no ka paani ana a eo i na keiki koa me 20 kue ia 6 aipuni.  Penei iho na ai-puni i loaa:

           

            1          2          3          4          5          6          7          8          9

_____________________________________________________________

Reg      0          5          4          0          7          2          0          2          0 --- 20

S. Lui  0          0          3          0          0          1          0          0          2 ---   6

 

  O na hui Sana Lui me Hoku ko nei Poaono ae e hoohoa ae ai ma ia kahua mokomoko.

 

  Maka Alameda i hoea mai ai a hala loa aku ma kona ala no Enelani ka Mea Hanohano Richard J. Seddou, Puuku panalaau a Kuhina Nui o Nu Kilani, i ukaliia o kana wahine a me elua kaikamahine.  Oiai maanei, ua hookipaia lakou e na luna oihana o kakou nei.

 

Lilo Ke Aloha Aina Oiaio.

  Loihi na la a me na pule i hala ae i loheia ai no ka lilo aku o ka halepai o R. W. Wilikoki o ka nupepa Aloha Aina Oiaio, aka, aole i akaka loa ka lilo a i ka Poaha nei, maopopo loa, no $2,000, i na elemakule o ka Hui Kalaiaina Hawaii.  Akahi no a ko ka moeuhane kahiko loa a J. Kanui no ona halepai a me ona nupepa kaokoa no ia ahahui.  E ole kela, pau ko Wilikoki moraki mua ia W. R. Kakela, a hihia hou aku la hoi kekahi poe o ua Hui Kalalaina la, oia o T. C. Polikapa, W. K. Kaleihuia, D. W. Kamaliikane, Iosia Keau, H. H. R. Kekua a me J. Kanui.

  Ua ikaika no o Wilikoki o ka noke ana a lilo okoa i na hapauea, a maalahi hoi oia i nei wa.  Ma ko Ke Aloha Aina Oiaio helu o ka Poaono nei i hoikeia mai ai ka lilo io o ka nupepa a me ka halepai a e hoomaka ana hoi na ona hou mai keia la aku.  Ua loheia mai no hookahi malama hou aku e hoopukaia ai ka nupepa malalo o kela inoa mua, alaila, hoololiia ae i inoa okoa, i kulike ai hoi me ko na elemakule makemake.  A ua loheia mai no hoi o T. C. Polikapa ana ka ka lunahooponopono hou a me ka puuku pu.

  I waiho ka a pau nei malama, i piha pono ai hoi na malama eono o ke ku ana o ia nupepa, i hiki pono aku ai hoi ke ohi mai i na dala i koe a na poe lawe nupepa e noho aie nei.  O na dala mua i pau, aohe olelo ana no ia, aka, o na koena aku, o kahi pono ia i lilo pu.  Ua laki no o Wilikoki i kona hooki koke ana me ke kuonoono ole loa aku hoi o ka poino.  Aia no ka hale hana ma kahi mua me alanui Konia nei, kokoke i ka Pa Kea.

 

Hala no Kela Aoao.

  Auwina la Poaono nei hora 1:30, ilalo o Manana-kai, Ewa, mahope o ka waiho ma'i pokole ana no hookahi pule, he emi pu wale nai no, ua aili ae la ko aho o Misasa Julia Hawkins Dimond, wahine aloha a Senatoa Hanale Walakahauki, i ke 54 o na makahiki.  Kakahiaka o nehinei, ma kekahi kaamahu kaokoa, i hoihoiia mai ai kona kino no luna nei a nalo i ka hora 3 a mahope iho o ka auwina la mauka o Maemae.  Iloko o Maraki, 1869, i mare ai oia i kana kane a he elima a laua mau keiki (ekolu kane me elua wahine), he hookahi nae hoi keikikane i make opiopio.  Aia me ke kane a me na keiki na haawina luuluu o ke kaumaha paumako.

  I ke ahiahi nei hoi, hora paha, i make ai o T. Kalauao ma kahi noho Misasa Abigaila Kamaio Drew, i ke 80 paha a keu o na makahiki.  No kahi wa i hala ae kona waiho ana i ka nawaliwali a hala aku la.  He hoahanau kahiko oia no ka luakini o Kaumakapili a he lala hoi no ka Papa Kahu Waiwai mua.  Mamuli o ka hoikeia aohe ona ohana, ua kauoha ae ka Ilamuku e kiiia kona kino a laweia ae no ka Halewai e waiho, a e kanuia aku hoi malalo o ko ke Aupuni lilo.  Ua nalo oia i nei kakahiaka, hora @1 paha, malalo o ka pule ana a ka Rev. E. S. Timoteo.

 

E Huli Hoi Mai Ana.

  Ke loheloheia nei e hoea mai aua ka o Misasa Kahele Nahaolelua ma ka mokumahu Monowai o ka Poaha iho, a haalele aku hoi i ke Aliiaimoku i hope O ke kumu o keia huli hoi mai, aohe i maopopo ia makou, eia nae, ua nui na ano olelo like ole e wawaia nei, he ma'i ka kahi, he aloha ohana hoi ka kahi, he hana ano nui hoi ka kahi, a pela wale aku, ua koe nae hoi ke kumu oiaio aia no a hoea io mai oia.  A no ia hoi mai hoi ona, e pani aku ana o Misasa Wakeke Heleluhe, a ma ka mokumahu Auseteralia o ka Poakolu iho oia e holo aku ai.  Ua maopopo loa kona holo aku, no ka mea, eia ke hanaia nei kona mau aahu kupono no ka huakai hele i ko na aina e.  Alaila, he hoike maopopo loa keia i ka pololei o ka Kapena Pama olelo, i ke akaka ole o ko ke Alii wa e huli hoi mai ai a he noho palena ole no ia o

 

KELA A ME KEIA.

  Auwina la Poakolu iho e pelukua aku ai ka mokumahu Auseteralia. 

  Wahi a ka lono, ua unuhi hou aku ka o Hope Loio Kuhina Kole i kona manao haalele.

  Hora 9 a.m. paha o ka Poalima nei i hanau mai ai ka wahine a S. G. Waila he kaikamahine.

  He omaimai ko ke Kuhina Kalaiaina, Kapena Kini, i waiho iho nei, a ua pohala a ke pii noi  kona oluolu.

  Ma ka Auseteralia i huli hoi mai ai o Kale Keo Pu a me kona ohana me na ola maikai.  O kona makuahine pu mai nei no kahi.

  Aumoe Poalua i hala i hoopauia ai ka hoomalu ana i na luna oihana Aupuni iwaho o Waikiki Nui ko lakou hauoli i ka hemo ana, a nawai no hoi e ole.

  He ma'i ano pilikia ko Misasa Kahuila Wilikoki e waiho nei, ma ka lono hope loa ua pau ka hopohopo aua nona.  Ke manao - laua nei makou e pohala loa ae ana oia.

  Poaono iho a aui ka la o malamaia ai ka ahaaina manawalea no ka pomaikai o ka Home Makuahine Kapiolani, mawaho no o kona kahua ma Ululani, Kulaokahua.

  Kakahiaka Poalua iho la i puka ae ai he ma'i samola-poki hou maluna o kekahi keiki Kepani makai  o Kahakaaulana.  Ua hookaawale koke ia aku a ke kiai makaala loa ia la.

  Ua makemakeia na hoahanau o ka Ekalesia Anagalikana (Bihopa) e hele ae ma ke ahiahi o ka la apopo (Poalua), i ka hora 7:30, no ka launa ana aku me ke kahu hou, ka Rev. J. Uebona.

  Ma ka mokumahu Miowera o ke ahiahi Poakahi i hala i kau aku ai he poe Moremona Hawaii (11 kane, 5 wahine me 3 keiki) no ka holo ana no Mauna Pohaku.  Aua ole no hoi ko kakou poe la.

  Pokole no ka hoi ko ke Kuhina Waiwai noho ana ma ke kulana Kuhina o ko na Aina E, no ka mea, Poakolu iho la i waiho aku ai oia a hoihoi ae no ia Kuhina Kupa i kona kulana mua i kuleana ai.

  Haiaumu mau ia ko makou puka aniani me alanui Moi e na poe makemake a ake o ike i ko ke Aliiaimoku mau kii hoolele aka hope loa mai Wasinetona mai.  E hele nui mai no ka pono i ike, o hala auanei hoi ka wa pono loa.

  Ua ulele kinipopo ae ua haumana o ke Kulanui o Iolani me na haumana Pake o ke Kulanui Mila a Farani W. Damona, iwaho o ke kahua kahiko ma Makiki, Kulaokahua, i ka auwina la Poaono nei, a ua eo ia Iolani me 16 kue ia 8 ai-puni o na Pake.

 

YEE SING TIE.

Mea Hana Aelike a Kukulu Hale,

       Mea Pena a Kuai Lako Hale.

Na Noho Ie Pake, Moena Pake,

a me na Pela Moe, no ke Kuai

Emi Loa.

Alanui Papu, mauka ae o Pa Aloha.

mei 3 0 1yr

 

Hoolaha Pane.

  E ike na poe a pau aohe oiaio o ka hoolahaia ana ua apuka au i ke kuleana aina o Kailikea, ma Moanalua, oiai, ua hoolilo pono ia mai no ia'u.  No ko Pahua kuleana noho loihi hoi maluna o ka aina, aohe wahi lihi waiwai o ia koi, no ka mea, ua hoolohe oia i ke ao hewa a kahi poe iaia, oiai, e noho ana no ia malalo aku o Kalilikea.  Nolaila, owau no ka mea i kuleana pono ma ke kuai mai ko'u kaikuahine.

D. W. JOHN HAPA.

Moanalua, Mei 1, 1897.

mei 3 - 2ts

 

 

HE HAAWI NUI AIWAIWA!

No Elima Dala.

E Hoouna aku no makou i na

Waiwai mahope iho:

 

PUOLO HELU 1, KUMUKUAI $5.

15  i-  a  Kukaenalo, 36 iniha laula.

15  i - a  Keokeo, 36 iniha laula.

30  i - a  Kalakoa Amerika.

14  i - a  Makalena.

10  i - a  Ie Kikokohu.

 

PUOLO HELU 2, KUMUKUAI $5.

20  i - a  Keokeo.

12  i - a  Huluhulu Kukaenalo Kakau.

20  i - a  Laholila a me Kalakoa.

18  i - a  Lipine Silika, 1-iniha laula.

12  kakini Pihi Pa Keokeo.

  1  kakini Kawele Opikopiko.

48  i - a  Lihilihi like ole.

 

PUOLO HELU 3, KUMUKUAI $5.

15  i - a  Lole Keokeo.

14  i - a  Makalena Waihooluu.

24  i - a  Lihilihi Lahilahi.

13  i - a  Keokeo Maikai Loa, 36 iniha laula.

16  i - a  Kinamu.

 

PUOLO HELU 4, KUMUKUAI $5.

  3  i - a  Uhi Pakaukau Holei.

  ½ kakini Kawele Waha Lilina.

10  i - a  Kaiapa.

10  i - a  Keokeo Vitoria.

15  i - a  Keokeo Huluhulu.

12  i - a  Makalena Keokeo, 36 iniha laula.

100 Kuikele maikai loa me 4 apana Lina.

 

E UKALI mai ke DALA i na Kauoha Palapala a pau.

 

Agena Kaokoa no na Mikini Humuhumu

 "Wheeler & Wilson"

a me "Domestic."

 

L. B. KERR

Alanui Moiwahine, Honolulu.