Ka Makaainana, Volume V, Number 4, 27 January 1896 — Page 8
8 HONOLULU, OAHU, POAKAHI, IANUARI 27, 1895.
[Hoomauia mai ka aoao 5.]
-
ae i ka mea i makemakeia, i pakele ai paha hoi ua hui la mai kekahi hoopii koi poho ia aku. He keu no hoi paha a ka nui launa ole mai o ka piha maalea. Ina e hookuuia kela wiliki, e nele ana kekahi hoopii koi poho, eia nae, o ua hui la ka mea maopopo loa i ka hewa no ke ano kapulupulu o ka hana ana i kela alahao.
-
Uluhua no hoi ka noke mau i ka olohaka o ka Waihona Aupuni a me ko ke Kuhina Waiwai hoolauwili mau i na huahelu o kana hoike malama mau, e hoopuka kaokoa ia nei ma ka ohua palemo liula. Iloko no o ka nele a me ka hune, ke nui nei no na hoolilo; a oiai hoi, he $342,000 na loaa auhau o ke Aupuni iloko aku nei o Dekemaba, eia nae, mahope iho o ka uku ana i na lilo a pau, ua koe iho he $22,496 30 wale no. Mawaho ae hoi o keia, eia no ke pii mau nei ka aie lahui.
-
Heaha la ka mea i ake loa ai o kahi poe o kakou e lawe hele i na olelo oiaio ole, a me ka olelo a hoopaakiki iho he oiaio ma muli o ka lohe pono ana. Poakahi i hala, ia makou i aneane ai e puka aku, ua loheia mai ua haawi halawai kalaiaina ae o W.R. Kakela maloko o ka luakini o Kawaiahao i ka auwina la Poaono aku, e pili ana no ke kulana o keia aupuni a me ka manaolana no ke ku hou ae o ke Aupuni Moi. Ua hui pu ko makou Puuku me Kakela, a i ka ninau ana aku no ka oiaio o ia mea, ua hoole loa mai kela. O ka makou wale no e ao aku nei i keia poe puni lawe olelo, mai no a lawe wale i na olelo i akaka lea ole ka oiaio. Ua hoomaopopo no makou he hoopunipuni, i ka hoikeia ana mai o ka mea nana ka olelo, ua lohe pono oiai, oiai, oia kekahi iloko o ia anaina halawai. Ka wahahee no hoi e!
-
Wahi o ka hoike a ka nupepa Buletina ua olelo aku ka na Kuhina o Kuinilani, ia lakou i hele ai e ike i ke Aliiaimoku, he mea pono ka e laweia mai na moo nahesa nahu ole ianei, i pau ai na ponalo, na enuhe a me na ko'e i ka aiia Ua hoole aku ka ke Alii. Ma ko makou manao o ka pololei maoli no ka ke Alii, oiai, ua nui a ua lawa no na moo nahesa maanei iwaena o ka poai hemolele. E hewa anei hoi ia la?
-
Elua hoonaue ana a ke olai ma Kona i ka auwina la Poakolu iho la.
He hoolaha ka ka Moiwahine Kanemake Kapiolani, e pili ana i na poe hookaa hoolimalima iala, aia ma kahi wahi ae o keia helu. Ua hoohana aku oia ia Kama'lii D. Kawananakoa i mea nana e lawelawe i kana hana. O ka pono maoli no ia, pololei.
KELA A ME KEIA.
-
Konane maikai ka mahina o keia mau po.
Ua loheia e hookiekieia ae ana ka Ilamuku ma ke kulana Hope Loio Kuhina. Ina pela io, aohe i maopopo owai ana la kona pani.
Ua hoopii aku nei ka Loio Kuhina i ka wiliki o ke kaamahu o Wailuku, Maui, no ka laweola.
I kakahiaka Poalua iho la i oili mai ai i keia ao he keikikane mai ka puhaka mai o Misasa D. A. Kahookano.
Aia ko Hilo poe kuonoono ilikea ke hoolala la no ke kukulu i banako kaokoa no lakou malaila.
I na hora a pau o keia la e komo mai ai ka Auseteralia iloko nei o Kou. A i ka Poaono no o haalele mai ai no ka Ipuka Gula.
Ua pau i ka hookuuia na poe limahana i hoomaluia iho nei ma Kahakaaulana i ka Poalua nei, a ua pau nui i ka hoounaia i na mahiko.
Ua hoole akea ae o Kanikela Mila i ka oiaio ole o na lono e pili ana no ko Kuhina Amerika Wilisi waiho i kona kulana ma Hawaii nei.
O keia ka la hanau o ka Emeperoa Wiliama o Geremania E hoomanao ana na poe Geremania a pau i keia la e like me ka mea maa mau.
I keia la e hooloheia ai ka hihia hoeha me ka mea make o J. Kaahanui, kela keiki opio i ki pu ai i kana wahine a mahope hoao iho la no e oki iaia iho me ka pahi.
O na Waina oiaio maoli a Makapolena Ma, aia wale no ke kuai ana ma ko lakou halekuai ma Alanui Kaahumanu, a ma na hale inu rama e Kaopuaua a me ka Nekina.
O ka lono hope loa i loaa mai nei no ka Puali Puhiohe Lahui, no ka la 3 nei, mai Kene, Ohio, a na nui ka mahaloia o ka lakou hana malaila. Mai laila aku lakou e hoomau aku ai i ka nee ana no mua.
Nui na lealea heihei i malamaia ma Kapiolani Paka i ka Poaono nei. Ua laukanaka no hoi. Iwaena o na heihei lio, na ka lio o Bila Konuwela o Waikapu ka hapanui o na eo, a haule iho la hoi kona mau hoa paonioni.
O ka Konela Keoki Makapolena hana ka ma Ladana, Enelani, he imi dala aie no keia Aupuni oehaa o kakou o nei nei. E loaa ana paha, aole paha, aia aku no paha hoi a loheia ae i ke akea ma nei mua iho.
Ma ka halawai ana o ka Papa Ola i ka Poakolu iho la i heluheluia ae ai ka palapala noi a Keoni Kolopana, e aeia oia e wehe i pakaukau kuai i'a nona ma alanui Maunakea. Eia ke noonooia nei ua palapala noi nei ana.
Ua huli hoi aku ma ka Warimu o ka po Poaono nei na Kuhina o Kuinilani i luakaha iho nei i ka olu o Hawaii nei. Ua hele aku lakou e ike i ka Moiwahine Liliuokalani, a ua nui ko lakou mahalo i kona kulana naauao. Na ke Komisina Beritania i hoolauna aku ia lakou.
Ke pii malie ae la ka oluolu maikai o ke ola kino Kimo Lene, e noho nei ma ka Halemai Pupule, malalo o ka Kauka Hebeta mau lawelawe ana.
Ua hoemiia ke kino o ka nupepa Kuokoa i keia wa, a he 6 wale no kolamu o ka aoao hookahi. Aole hoi he like me ko na la mua ka hihimanu.
Nui ka hoomakaikaiia iho nei o na Kuhina o Kuinilani e ko kakou poe o nei, e hookipaia ana ma o a maanei. Iuka nui o Maunaala i ka Poakolu iho la.
Ua ku mai i ka auwina la Poaono nei ka Warimu mai ka Akau mai, a i ke aumoe iho no o ia la i hoomau hou aku ai no ke alahele moana no na Panalaau Hema.
Ua lonoia ae he mau makai wae aku ana ka kekahi e komo pu ana iloko o na hana hookuku kiki pu me ko Kaleponi mau keiki ma na la 8 me 11 o Feberuari ae.
E kuai hooemi aku ana o Keoni Walakahauki ma kona halekuai lole ma Alanui Moiwahine. Aohe no e hewa ke hele aku e ikemaka. E nana ae i kana hoolaha ma kahi okoa ae o keia helu.
Ma na lono i loaa mai ia makou aohe no he nui o ka hoihoiia a me ke ohohiaia o Peresidena Kole e ka lehulehu iaia hoi e kaapuni hele la ia Hawaii, koe wale no iwaena o na poe ohakulai a me na poe painuu a paikano aku.
Ia W.R. Kakela ka haiolelo ma ka luakini o Kawaiahao i ka po nei. O na mea e pili ana i kana huakai i holo aku nei i o kana i noke mai ai i ke kukahekahe. He keu no ka a ke pamalo a ku ole loa i kau wahi o ka hoihoi.
Ma ka pukaaniani o ka halekuai Kalahiki kekahi kapa apana nani a maikai o ka hanaia ana kahi i hoikeikeia ai i ka Poalima nei. He hae Hawaii ke ano a me ke kalaunu iwaenakonu me na mahoe, a maluna ae o ia na olelo, - "Ke Aloha Aina." Nui ka makahehiia.
Hora 10:30 a.m. paha o nehinei, ma kahi noho o na makua o ka wahine, ua uoia o Thomas Holstein ia Misi Bernice Kanani Ii. Pau elua hoahanau kane o ka ohana hookahi ia elua hoahanau wahine o ka ohana hookahi. He mea maikai ka mare no na poe a pau, a pela no hoi makou e mahalo aku nei i na opio i hipuu polena ia ae la.
Ua loheia mai nei o ka hihia koi poho a kela poe haole ekolu ma Vitoria, Kolumebia Beritania e kue ana i ka Hui Mokumahu Kanada-Auseteralia, ua kiolaia mai nei iwaho e ka Aha o laila no ka lawa pono ole. Ina ua oiaio keia lono, alaila, e hauoli ana ke Aupuni Repubalika oehaa o kakou nei, no ka uku ole aku ia mau koi poho ina i ko.
Ua kaawe iho kekahi Kepani i hoopaiia mai nei no eono mahina hoopaahao ma Kapaa iaia iho a make loa i ka po Poalua iho la. I ka hele ana aku o ka wiliki i kakahiaka ae e nana, e lewalewa ana ua Kepani la ma kahi kokoke i ka puka komo. I ka haalele ana aku o Kimo Maki ia Kapaa i ke awakea Poakolu nei, e lewalewa ana no ua Kepani la, no ka mea, e kaliia ana no ka hiki ae o Hope Makai Nui Kaiu, mai Wailua mai.
Ua aumoe o ka Poaha iho la, i komo aku ai o Kapena Makai Sekota me Makaikiu Kodesa i ka Halewai me kekahi pahu i piha i ka opiuma no kekahi Pake. Ua loaa aku keia pahu ia laua maloko o kekahi halekuai e ku nei ma ka huina o na alanui Maunakea me Moiwahine. I ka weheia ana ae he lole wale no ka mea o loko e waiho ana, a i ka nanaia aua o loko ae o ka pahu ikeia iho la ua kapiliia ae he elemu hou no ua pahu la, a iloko o laila na tini opiuma ehiku kahi i waiho ai. Ua hopuia ka Pake a hookuiia mai malalo o $250 bona.
He Pake ka i hoao e hoopae malu i ka opiuma i ka Poalima nei i kai o Kahakaaulana mai uka aku nei. Ua hoolimalimaia oia ma ke ano he kiai no ka uwapo Pakipika mamuli o kona hele maoli ana no e noi i na poo o ka Hale Dute, a ua aeia mai. Ua hakilo mau ia oia a hiki iho la i ka Poalima nei, a ia po iho paa oia i ka hopuia Laweia a ka Halewai a hoopaaia. I ka hora 8 no o ia po, hoao iho la ua Pake la e lawe i kona ola ma ke kaawe ana iaia iho. Ua ike koke ia oia e ka wiliki a kiiia e oki ke kaula ana i hoopaa ai i kona puana i. Apopo e hookolokoloia ai no ka ohumu ino
-
HOOLAHA.
Ma keia a mahope aku o keia la ke kauohaia aku nei na poe a pau e paa ana i ko'u mau Aina iloko o keia Aupuni ma ka hoolimalima e uku koke mai i ko lakou auhau hoolimalima, ina ua hiki i ka manawa e hookaa ai, ia Prince David Kawananakoa, ma Honuakaha, Honolulu, Oahu.
KAPIOLANI
Honolulu, Ianuari 23, 1896.
ian 27-3ml
-
Kuai Hoemi
Aia ma ko'u Halekuai ma Alanui Moiwahine he Pakaukau Kaokoa, a aia malaila he mau Waiwai i hookaawaleia, aole i inoino a popopo, aka, me ia mau no o ka maikai. O ia mau waiwai a pau, e kuai hoemi ia aku ana me ka emi, he haule loa malalo iho o ke kumulilo o kinohi.
Mai hoopoina, aka, e hele nui mai no e ike no oukou iho.
J.T. WATERHOUSE
(KEONI WALAKAHAUKI),
Alanui Moiwahine.
ian 27-4mnw
-
NO WAIANAE
O R. & L. CO.
MA NA POAONO A ME NA LA PULE.
E haalele no na Kaamahu ia Honolulu nei ma na hora 9:15 A.M. a me 1:45 P.M o na Poaono. Ke huli hoi mai, e hoea ana i Honolulu nei ma na hora 3:11 a me 5:26 P.M.
Ma na La Pule, e haalele ana ke Kaamahu ma ka hora 9:15 A.M. E hoea hou mai ana i ka hora 5:26 P.M.
NA PALAPALA UKU PUNI:
Papa Ekahi, - - - - - - - $1 75
Papa Elua, - - - - - - - - - 1 25
F.C. SMITH,
Agena Ohua a Palapala Nui.
ok 21-tf