Ka Makaainana, Volume V, Number 3, 20 January 1896 — Page 1
Ka Makaainana.
BUKE V. - Ano Hou Honolulu, Oahu, Ianuari 20, 1896. HELU 3
PUALI PUHIOHE LAHUI
-
Kekahi Aoao o ko Lakou Kumu i Mokuahana Nui Ai.
Ano, ua loaa mai he palapala ia makou mai ia R. Wile Aileti mai, i kakauia mai Kapalakiko, Dekemaba 30, 1895. Ma kana hoike i ike iho ai makou no na kumu o ka mokuahana ana o na keiki puhiohe oiwi o kakou ma kela aina malihini a ke hoopukaia aku nei hoi e makou me ka manao na kela a me keia e koho iho owai la ka i pono a o ka wai hoike la ka i oiaio, oia hoi, mai ka makou i hoopuka mua ai a me ka na nupepa e ae. He mea oiaio he elua aoao no kela a me keia ninau, a pela no hoi makou i olelo ai mamua, a no makou iho hoi, ke hilinai nei makou i keia hoike mai ka mea a makou i hilinai piha ai. Eia iho ua hoike la:
"Aloha: Ua hiki mai au i Kaleponi nei i ka manao e loaa ana ka Auseteralia, eia nae, ua lohi loa ko makou kaamahu no ka nui loa ka hau, hala e ka moku. Nolaila, ua haule hou au i Kaleponi nei. E manao ana au e hoi aku ma ke Kina i ka la 31, eia nae, i ko'u halawai ana me ka ona miliona Sepekela, ua hoole mai kela ia'u me ka olelo pu mai nana e hoihoi ia'u i Honolulu, ina he mokumahu holo hou kahi ona i keia mau la iho. A no ka loaa ole, nolaila, ua olelo mai kela ia'u ma ka mokupea au e hoi ai. Ua ae aku au, a ma Hilo ana paha au e pae ai, aia nae hoi i ko i maua hui hou ana aku i ka la apopo e maopopo ai.
"I keia la ua ike iho la maua me ka ona miliona ua pilikia na keiki i ka pololi, a ua ike pu iho no hoi maua na ia ona miliona hou aku la no, o ia o H. Gillig e malama la, a ua olelo mai o Sepekela aohe pilikia.
"No na mea e pili ana no ka makou hana, ua hele aku no na keiki no ke kumu e a makou, oia o Libonio, a ua haalele mai ia maua me kuaana. O ke kumu nui o keia hana i mokua hana ai o na keiki, oia keia:
"I ko makou hiki ana i Kalivilana, Ohio, oiai, he hana ka makou ua hoopaa mua ia ka uku, he $300 no ke puhi ana i hookahi po a me ke ao, ua koi koke mai la o Libonio i kona uku e haawi aku ma ke $70 o ka pule, ina aole e loaa aku, alaila, e haalele mai ana oia ia makou. Ia manawa, ua uluaoa ae la na keiki a hoomaka iho la makou e malama i halawai. I ke koho ana ua hooholo iho la na keiki e uku i umi dala o ka la iaia. Ua kue loa au i kela uku, oiai, aole wahi waihona ma ka lima o ka puuku, a ua aie hou no ka hui ia'u he $50, o ia no na wahi kenikeni i koe iho ia'u. Ua olelo aku au i na keiki, e akahele ka noonoo ana, oiai, he nui no ko makou aie mawaho ae, oia hoi, ka aie i ke kaa he $160; a no na pepa hoolaha o makou kekahi. Eia nae, o keia mau wehewehe a pau a'u, he mea ole wale no ia.
"Ua kohoia iho ka papa hooko e hele aku e hui me ke kumu, a hooholo iho la lakou e ukuia. Ia manawa, hele aku nei au e ao, he hana naaupo loa kela a oukou i hana aku la, mahope ala mai na poe a pau a koi mai i ko lakou uku. Eia kekahi, mahope ala mai kekahi mau aie a hoopaaia ke dala. Aole no he hooloheia mai o ka'u mau a'o ana me ko'u olelo pu aku, 'e ike oukou he pilikia ke loaa ana ia kakou.' He oiaio, ua lohe iho la au e kikooia mai ana he mau bila, nolaila, hana koke iho la au i ka'u bila a haawi ma ka lima o J.H Wilisona, kekakauolelo, me ko'u olelo pu aku iaia e nana mua ia i ko'u pono a mahope aku o waho. Ua ae mai la kela ia'u me kuu manao aia a loaa pau mai ia'u kela mau dala, alaila, na'u no e haawi ma ka lima o ka puuku iluna o ke kaa, aole hoi e like me ka lakou i manao ai. Eia nae, ua hele mua aku la o Libonio a noi aku la ia Wilisona e haawi mai i kona uku a ua hooleia mai, a olelo aku la e hoi na mea a pau iluna o ke kaa a pela pu me a'u. O ka wa iho la no ia o na keiki i nuku mai ai ia'u i ka aihue i ke dala, a pela wale aku. Olelo aku au, ina pela ko oukou manao, e imi-nui o ko oukou pono ma ke kanawai.' Pau ko'u ike ana aku a hoi au iluna o ke kaa, pela pu me Wilison. Hele aku la lakou a pau me Libonio i ka hotele ona, mai laila ka hoi nui ana mai iluna o ke kaa. Loaa mua mai la o Keoni Wilisona a hoomaka mai la o Libonio e puliki iaia, a pela pu no hoi me Wilisona, o ka wa no hoi ia o na keiki i hopu aku ai ia Wilisona a kiloi aku la iwaho o ke kaa. Ia manawa i holo koke aku ai oia e telegarapa i ka mea nona ke kaa e haawi mai i ka mana o ke kikoo ana i ka bila aie iaia, a ua aeia mai la e paa i ke kaa o makou ma ke ano he aie.
"I ke kakahiaka ae ua paaia iho la ke kaa a me na mea a pau o luna, hiki mai la na makai e kiai, paa pu ia iho la hoi me na ohe a makou. Ua hele au e hui me Wilisona, a ua pane mai kela ia'u, 'ina hoolohe mai ua keiki i kau, alaila, hiki loa ia'u ke hookuu i na mea a pau.' I ko'u kamailio ana aku i na keiki, o ko lakou la olelo mai la no ia e pepehi ia'u, me ka olelo pu mai na'u i paa ke kaa a me na mea a pau, olelo pu mai la no hoi e hele ana o Libonio e hoopii. I ka hoopii ana, haule lakou. Hele hou aku au e olelo ia lakou e hoi hou makou e like me namua, alaila, kalaia na pilikia a pau. Aohe nae he hoolohoia mai, a olelo nui mai la e holo ana no lakou me Libonio. Olelo aku au, 'no'u' iho, aole au e hele hou ana, no ka mea, ua ike aku la au he nui na pilikia o mua, oia hoi, ka nui loa o ka lilo.' Ia wa, paa au i na ohe a hele o Libarati i mau ohe na lakou, a o ia ka lakou mau ohe e hele la.
"O ka'u mea kaumaha loa, o ko lakou hele me kahi paa lole puhiohe wale no a me kahi kuka mehana. O na paiki, ua paaia e na makai. O ia iho la ko lakou pilikia nui o hele la. No maua e kuaana, ua noho no maua me Wilisona. O ka maua mau mea e makemake ai ua hiki ia maua ke lawe. O na ohe, aia no ma ka lima o kuaana. Ua olelo aku au iaia, ina oia e pilikia hoolilo aku no oia i na ohe i loaa ai kona alanui e hoi mai ai. Aohe pilikia no kuaana ke noho pu me Wilisona.
"O keia ae la na kumu nui o ko makou mokuahana ana, mamuli no o ke kumu a makou. O ka lua iho la ia o kana hana ana pela, a o ia kekahi kumu o ko'u hoi koke ana i hiki ai ia'u ke hele e hui kino hou me J.D. Sepekela, ina he mea hiki iaia ke kokua i na keiki ke loaa he kuia ia lakou, e hoihoi hou ia i Honolulu. Ina e ae mai, alaila, pau ko lakou pilikia, ua loaa ka mea nana e hoihoi hou i ka aina hanau.
"O ia iho la na mea hou kaumaha o ka makou huakai i keia aina malihini. Me ke aloha.
"R.W. AYLETT."
-
Ohohia loa ia ka Buke Mele Lahui. Na ka hiki mua no ke eo, a na ka hiki hope hoi ka nele a me ka hoka.
MAU IWI ALII.
-
Hunakeleia me he Mau Opeope
la i Nele ka Anoiia.
Poakahi i hala, ua hoea aku iuka o Maunaala he poe paahana malalo o R. Lisimana, a maluna aku o ka pa ka pinana nui ana a komo me ka hoike mua ole ia aku i ke kiai, ia Misasa Maraea Bekele Kaiapeelua. I ka hiki ana ae nae o ke kiai, e eli ana ua poe la i ka luapao o na iwi o na Kamehameha i hunakeleia ai iloko o 1888, e like me ke kauoha a ke Alii Pauahi i make mua. Mahope iho ka hoea ana aku o Samu Damona, Kuhina Waiwai a hope no C.R. Bihopa maanei, a wahi mai a ko makou lohe, ua olelo aku ka i ke kiai e malama no oia i kana hana, oiai no hoi keia hana e hookoia ana.
I kahi la ae i hookaawaleia aku ai na olowaa o na iwi o na Kamehameha II. a me III. a hoihoiia ilalo o ua 1uapao la i hele a kopu i ke kawau a e lana ana ka hoi ka wai ma kahi o eono iniha a keu. Mamua, i ka hunakeleia ana e ka Moi Kalakaua, i ka po ka hanaia ana me ke anoano a me ka eehia, i keia hoi, i ke ao a me ke ano ole. Ho anoano, he eehia, a he eeke kakou ke komo aku iloko o ka hale ilina o na iwi alii o kakou, i keia hoi, ua like me ka ole, i na Pukiki me na aahu ekaeka, me ke kaikai ana kau iluna o kekahi kaa kikane ekaeka, hauhoa kaula ia, hiuia iluna a hookuuia ilalo o ka luapao me he mau pena mauu la. O na pahu e ae no ka hoi o lalo o ua luapao la, ua hele a pau i ka hapaupau a uhi paa pu ia e ka punahelu, a ua ano popopo aku ka hoi kahi. Eia nae, me ka hoomaopopo ole ia ae ia ano, ua uhaoia aku no keia mau iwi ilalo.
Oiai keia mau hana e lawelaweia ana, ilaila ka Moiwahine Kanamake, a ua noi aku nana a me kona poe e hookaawale, i hiki ai hoi ke lawelawe pono ia me ka hoomaopopoia o ka hanohano i ku i ke kulana kiekie o ia mau iwi alii, eia nae, ua hooleia, mai ia noi e ko Samu Damona hope, ka hunona a R.W. Maea o Kalae, Molokai. No keia mau ano hana hoomaopopo pono ole ia, ua hiolo makawalu na waimaka o ke Alii Kapiolani.
Wahi mai a kahi lohe o makou, na C.R. Bihopa ka keia hana i kauoha mai nei i kona hope maanei, a nana hoi ma kona ano Kuhina i ui aku i ke Aupuni a loaa ka aeia mai ma o ke Kuhina Kalaiaina la, i akoakoa ai ka na iwi alii Kamehameha a pau. Ua hanaia ka hana, aole olelo ana i koe, aka, na ke au o ka manawa no auanei e hoike mai no ka hopena a me ka puana a ka moe.