Ka Makaainana, Volume IV, Number 11, 9 September 1895 — Page 2
2 HONOLULU, OAHU, POAKAHI, SEPATEMABA 9, 1895.
NA AINA MAMAO.
-
Na Lono Huikau mai kela a me
keia Wahi o ke Ao Nei.
-
Piikai na Poe Paele Amerika.
Nui ka piena o na poe negero o Amerika Huipuia no ka hoeha, pepehi, a luku wale ia o ko lakou poe e na ili-keokeo, a oi loa aku hoi ma na wahi eli lanahu o Colorado, e na poe Italia. Mamuli o keia mau hana hoopoino wale la, ua halawai akea mai nei ko Kikako poe paele alakai no ka hele nui aku e haawi i na kokua ana, a ina e hiki ole me ke akahele, alaila, e hana aku me ka ikaika o na mea kaua. Ua lako na paele ma keia halawai ana me na pu. O ka olelo hoi a kahi mea i haiolelo ae, ina i hiki ole i kahi mea ke kuai i pu, alaila, he lapuwale a he aloha ole oia, a e pono e kapae loa aku iaia. Huinaa loa na paele e hele aku imua a e hakaka no ko lakou mau pono iho.
Hoomanao Kaua Hoohiwahiwa.
Lehulehu na hana hoomanao hoohilahila e malamaia mai la ma Geremania, no na lanakila kaua i loaa ai ia lahui iloko o 1870 me Farani. O na poe i oia mai ma ia mau hoouka kaua ana, ua holo ae ma na la like ole o Augate aku nei e hoohiwahiwa i na he kupapau me na pua, aole i na poe Geremania wale no, aka, pau pu no a me na Farani i kanuia ma kahi hookahi. Palena ole na hoohauoli ana, eia nae, wahi a ka olelo ae a kahi poe, aole keia mau hana i manaoia e hoohaahaa aku ia Farani a e hoike aku paha hoi ia lahui he lahui lakou i pio, aka, he hoike ana hoi keia i ke kukuni paa ia o ka manao aloha aina oiaio iloko o na umauma o na poe Geremania a pau. Ua komo kino ae no o Emeperoa Uilama II. ma na hana o ia mau la, e laa ka hele ana i na anaina pule, ka nana ana i na hookahakaha paikau, a me ke kamailio pu me na poe kea kahiko a ke alina eha i noho alii ai, a ua lilo hoi ia i mea hoohauoli loa i na koa o kona kupunakane.
Pepehiia na Poe Misionari,
I ka pau ana ae la paha hoi o ko Kina kaua ana me Iapana, a no ka nele wahi hana hoohala manawa ole paha hoi kahi a na Pake hiena, ua hoomaka aku lakou e hookau i ko lakou inaina maluna o na poe mikanele. Mai na mikanele Amerika a me Pelekane ka pau i ka lukuia, mai kane, wahine, a me keiki. O na poe i lukuia ma Kukene (Kucheng), he poe Pelekane wale no, a ke koi la ke Aupuni o Beritania Nui no na hoakaka ana no ke kumu i ulu ae ai o nei hana a me ke kai ou aku no hoi o ke Kuhina Beritania ma Kina no ka hoopuka ae o ke Aupuni Pake i na kuhikuhi ana i na luna oihana kuloko e hiki ai ke hoomaluia keia mau hana luku wale ma ia wahi. Aka, iloko no o keia mau koiia ana, he keu no a ka paakiki o na Pake. A ma kekahi mau wahi e ae no hoi o ia aina nui ke lukuia la no na poe mikanele. O ke Aupuni no hoi kahi o Amerika Huipuia e koi la no ka hoopoinoia o kona poe makaaina. Ua hoole loa, wahi a ka oleloia, ke Aupuni Pake e ae i na Kanikela Pelekane me Maleka me Fu Sao a noii aku no keu iuku wale ia o ka Karistiano, no, oiaio, ua hiki kino laua a me kahi mau lala e ae o ke komisina ma ke kahua e na hana hoomainoino. Ua manao wale a ua ulu mai keia mau hana hiena mamuli o ko na Pake inaina no ko lakou pio ana i na Kepani, a me he la pela io ua a hookau i ko lakou inaina maluna o na poe hala ole.
Kue Sepania i ko Amerika Kulana.
E pili ana hoi i ke ano o ko America Huipuia kulana, kona pa apai a me na kanaka, i olelo ia hoi aia ka manao kokua laulaha me na poe Kuba a ke haawi akea la hoi na kooana i ka aoao kipi ua lilo i i mea no ke Kuhina Sepania me Mikiko e olelo ae ai e koi aku ana o Sepania i kekahi hoakaka ana mai ia Amerika Huipuia a e kuunau aku ana hoi i ka loa a me ka laula o na kokai pili aupuni ana mamua ae o ka hoohana hou ana aku, a i wa auanei e hana aku ai e like me me ka mea e ulu ae ana a e konoia mai ana paha hoi e ke kulana o ua lawelawe hana ana. Ua olelo ae ua Kuhina la ua oi loa aku kona ake e ike, ina o ia ka hana hope loa e hiki ana e hoohuiia o Kuba no Mekiko mamua ae o ka lilo ana i mahele no Amerika Huipuia.
Na Hunahuna Laulaha.
Eha pooleta i hoopukaia ae e ke aupuni o Korea.
Ua hoikeia ae ua haawi pio aku na poe kipi o Berazila ma ke kakauinoa ana e malama i ka maluhia me ke Aupuni.
Ua hoike pili oihana ia ae ma Mosekao, Rusia iloko ana paha o Aperila ae e poniia ai o Za Nikolasa II.
Ua paa ka manao o ke Suletana o Tureke aole e ae aku i ke komo keakea mai na hoomalu kuwaho ana ma na hana pili ia Amenia.
O ka hoao ana mai nei o kekahi hiena e hoouna i kekahi mea pahu na ka puolo leta ia A. Rokekaiia, o Parisa, ka mea i poino ai o kekahi maka a me na lima o kekahi kakauolelo ana, ka mea nana i wehe ae.
Kokua o Beritania Nui i kela koi poho a Amerika Huipuia ia Farani, no ka hoopaa hewa ia ana o Kanikela Wala ma Madegasaka.
Ma ka manao o na Repubalika o Amerika Hema e pili ana no ke kahua alakai hana Monoro, o Aferika no na poe o Amerika Akau, oia hoi, aole loa no kahi poe e ae. E kala no o Hawaii noi i ike ai ia mea.
He olai oolea ka i hoonaue ae ia Taruana, ma ka Mokupuni Akau o Nu Zilani, Augate 19, a ua nui ka poino i loaa. Ma Tupo, ua pioloke ko laila poe a holo nui ma ua kula, a ilaila kahi i hoomoana nui ai, i loaa ai paha hoi he palekana ana.
He 26 poe lutanela Perusia i haalele aku ia Berelina, Geremania, no Kili, Amerika Hema, ma ke ano he poe kumuao no ko Kili pulikaua. Ua haawi ka Emeperoa i aha ike no lakou mamua ae o ka haalele nui ana aku.
Mamua i loheia ai ua make o Saledana da Gama, ka Adimerala kipi o Berazila Ano mai nei i lono hou ia mai ai ua loaa kona kino make. Ua kanuia no me na hanohano o ke kulana koa ma Rivera Wahi nae a na hoa'loha ua hoomainoino loa ia ke kino. Ma kona aahu i ikeia ai.
Ua ulu ae he hakaka hahana mawaena o na paahana Farani me Italia ma na wahi hana paakai he 16 mile ma ka akau aku o Maseile, pela ka lono i loaa ae ma Parisa i Augate 25. Elima poe i eha kukonukonu loa mamua ae o ka hoopioia ana e na makai. Lehulehu na alakai i pau i ka hopuhopuia
Ua halawai eono poe hana ma Pitabuga, Penesilivania, Augate 20, me ka make weliweli o ke koala pu ia ana a moa, mamuli o ke pahu ana o kahi hoohee hao kila maloko o kekahi o na hale hana hao o laila. Ewalu poe i eha mainoino, a elua i make i ka laweia ana i ka halemai Ua like ke kahe ana mai a ka hao me he luai pele la, a ua hiki ole ke alo ae.
Ua hoike aku ke Kuhina Kaua o Beritania Nui imua o ka Hale o na Makaainana, Augate 19, i Novemaba 1 e waiho ai ke Duke o Camabarige i kona kulana poo o na pualikaua aole hoe i Okatoba 1, e like me ka mea i hoomaopopo mua ia I hoololiia keia ma ke noi no a ke Duke, i pau pono ai hoi kana nana pono ana i na kea, e like me ka mea maa mau.
He $1,000,000 ke koi poho a Amerika Huipuia ia Farani no ko Kanikela Wala hoopaa hewa ia ana ma Madegasaka, a he $1,500,000 hoi ke koi ia Sepania no ka pono o Mora, ma ka hoopoinoia ana o kona mahiko. He kupa keia Mora no Cuba a ua hookupaia i kupa Amerika. Ua manao o Amerika Huipuia e lawe ae ia Havana a hiki i ka wa e kaa ai o kela koi, a o ka Beritania Nui hana ana ia Nicaragua ke kumu hoohalike hana.
-
Leta Mai Bosetona Mai.
I ka hoa'loha.
J K Kamanaulu;
Aloha nui - Ua loaa mai kau o ka la 19 o Iulai. Mahalo i kou hoomanao mai i keia hana maikai.
Ianei ke Kuhina Nui, F.P. Hasetine , o Hawaii Paeaina ma Wasinetona i ka la 30 o Iulai, a iaia au i lohe mai ai i ka haki ana o ka wawae o kekahi kaikamahine Hawaii. I hele ka i ka auau lele kaw., o ia ke kumu i eha ai. A aia oia ma ka halemai o Luganaspota, Inidiana, a o kekahi poe kaikamahine aia no i Kikako. Aole i maopopo loa ia'u, owai la ka mea i hai ke au. Lalau maoli no keia poe kamaliiwahine. Ua lohe au aohe ka he makemake o kahi poe e hoi hou i Hawaii, alaila, he mea maopopo e lilo ana ko lakou mau helehelena kanaka i Orang Outang (Keko). Pau ka hie.
He leta mua aku nei ka'u i KA MAKAAINANA no na mea hou o Bosetona nei, a pehea la, ua hoopukaia paha, aole paha. E kau hou aku ana no au i ka'u hoike oina iaia, ina nae hoi e hoopuka pono ia ana. A ina aole e hoopuka kela nupepa me ka pololei, aole au e kakau hou aku ia lakou. Ua no noo iho nei au e kakau mau aku i ka nupepa, o ai, na hana luhi maoli no keia la o ke kakau pakahi ana i na hoa'loha, a na ka nupepa ia o hoopuka pau pono ae a hookahi ka ike like ana o na mea a pau.
O ke aloha no kou a nui a me na hoa'loha pu o kaua.
A. O K KAHULUALII
Bosetona, Aug. 2, 1895.
-
He 240 mau tini opiuma i loaa aku i na luna o ka Hale Dute i ka Poakahi i hala, maluna o ka mokupea W H Daimaca. Aole i maopopo ka mea nona ia wa wai.
Imua o ka Aha Apana i ka Poakolu nei, ua hoopaiia o Ako, Pake, no ka aihue ana i ka moa a S K M hoe, kalaiwa kaa, he ekolu malama hana oolea ma Kawa.