Ka Makaainana, Volume III, Number 11, 20 May 1895 — Page 1

Ka Makaainana.
BUKE III---Ano Hou. Honolulu, Oahu, Mei 20, 1895. Helu 11.

 

Kupaa ka Mano me Liliu.

Auhea kakou e ka lahui,
Kupaa ka manao me Liliulani,
O ka heke o na Kahu Aupuni,
Ke Kuini kahikoia la e ke aloha,
E aloha e ke Alii me ka aina,
O ka huaolelo la e kaulana nei,
Kui aku e ka lono lohe o Maleka,
Eia Hawaii i ka ehuehu,
Aia i ka uka o Laeahi,
Ke aloha aina e hoolulu nei,
Aia i ka uka o Laeahi,
Ka uwahi noe o ka pu raifela,
Ua kau e ka weli i na puakea,
Ke aloha aina la o Hawaii nei,
Na ka Ua Kuahine o Mano,
I kono mai ia'u e naue aku,
Ike i ka nani la o ia uka, Kahikoia e ka uhiwai,
Haina ka puana la e o mai,
No ka poe i aloha i ka aina.

 

Ola na Iwi o na Makua.

                Kakahiaka Poaha iho la, Mei 16, mahope o ka noho mare ana no umi makahiki, ua hanau mai la ka wahine a Lunahooponopono Edimana Nere o ke Kuokoa namu he keikikane. Akahi no a loaa keiki ia laua, a ua lohe mai makou he elima wale no ka paona ke koikoi. He awa aku la paha ka olelo ana no ia keiki, a e lilo aku ana paha la i mea nui a puipui. Ea, ikaika no nae hoi ua kanaka o ka paeli ana no umi makahiki, he eluma wale no paona io i loaa. Ke panee aku nei makou i ka mahalo ana i na makua, me ka manaolana e ola loihi ka opio, nona ka inoa a makou e hoomaoe aenei o Holomua. E hewa ia la!

 

Kamehameha kue ia Ikeoleia.

                Hoolaukanaka loa ia ko kahua kinipopo i ka auwina la Poaono nei me na hoa'loha o na poe paani kinipopo, a me na poe makaikai no hoi. Na ka inoa mua ke eo ma ka loaa ana ia lakou he 11 holo i ko ka inoa hope he 4 wale no. Eia iho na aupuni a lakou ma na komo ana eiwa:

                1 2 3 4 5 6 7 8 9

Kameha. 0 0 0 1 0 3 6 1 0
Ikeoleia 1 1 0 0 1 0 0 0 1

 

                Lealea loa na kakoo o ka hui Kamehameha i keia paani ana, a oi loa aku hoi kela poe wahine pauhananuu o luna ae nei o Leleo a me ko mauka ae o Kawaiahao. Aole o ia wale, aka, o kela lunakanawai kaapuni kekahi o Maui, lelele oia iluna o kona papaleme ke kokua pu ia e kela bipi loso o te tura. Eo no ia Maui.
                Ua ano paapaana iki o Kamehameha i keia paani ana. Aole i poina ia Aukai Kamikana kona kulana eleu a me ka mikiala. A nona na mahalo ana o ke anaina kanaka i kona wa i lele ae ai e hopu me kona luma hema i kekahi popo i hahauia aku a paa iaia.
                O ka Hoku me Ikeoleia ko keia auwina la Poaono iho.

 

KAU O MEI.
Na Hana Imua o ka Aha Kaapuni ma ke Kiure. Na Hihia o Kela a me Keia.

                Mawaho ae o na hihia ano nui a makou, i hoike aku ai ma ka helu i hala, eia iho kekahi mau hihia i pau i ka hanaia. Poalua, la 7 nei, ua ae ekolu poe Kepani no ko lakou hewa no na mea ino wale ma ka hoopoino ana me ka manaoino, a ua hoopai nui ia e uku i $50 pakahi a me na koiua. A o F. Gouveia, ahewaia no ka aihue ma ke degere ekolu i Okatoba 26 i hala, no ka aihue ana he eiwa moa o $9 ka waiwai io, a i hoohalahala mai kona hoopaiia ana e ka Lunakanawai Apana no hookahi malama hana oolea a e uku i $5 me ua koina, ua haalele i kana hoohalahala, a ua hoi i Kawa e noho hana ai. Imua o ka Aha i ka Poakahi i hala i hoopaiia ai o Paterika Kulina, i ahewaia i ka Poaono aku no ka laweola ma ke degere ekolu, e noho paahao ma ka hana oolea ma Kawa no elima makahiki.
                A mawaho ae hoi o kekahi mau hihia e ae ma ke keena, na noho ke kiure e hoolohe i ka hihia o Keliikalaea, Pahu a me Keliiaukai no ka aihue ma ke degere ekolu. Hookahi paha degere ekolu. Hookahi paha hora o ke kiure iloko o ka rumi a puka nui aku me ka olelo hooholo aole ka mea mua i hewa, ekolu kue; pela no me ka lua iho, elua kue, a o ke kolu ka i hewa, elua kue. Pau ae la keia, noho ia auwina la iho e hoolohe i ko Keoki Malina hihia no ka hoike wahahee ina ke degere elua. Ua ulu mai keia hihia mai kona hihia mua i hoopiiia ai no ka aihue a hookuuia e ke kiure. Ahewaia oia a hoopaiia i ka Poalua mai no elua makahiki hana oolea.
                Imua o Lunakanawai Kaapuni Waitina, ua aeia ka hoopii oki mare a John Kewala kue ia Lokalia Nakupa, no ka haalele loa.

Moekolohe a Hoike Wahahee.

                Poalua mai i hookolokoloia ai o Kahakauwila me Kilikina no ka hewa noekolohe a ua ahewaia, ekolu kiure kue, Ua hoomaopopoia ua hoike wahahee na mea i hoopiiia, aka, ua hoopaiia mai laua i ka hoopai kiekie lea i kauohaia ma ke kanawai, he hookahi makahiki o ke kane a he eha malama o ka wahine. Kuai Waiona me ka Hoeha.
                O ko Joe Diass hihia no ke kuai waiona me ka laikini ole ka i hanaia i ka Poakolu ae, a ua hookuuia, ekolu kiure kue. Ia auwina la iho i hoomakaia ai ko Kaniku hihia, no ka hoeha ana i kekahi Pake ilalo o Koolau ma ke ki ana me ka pu a ku ma ke kuli, a pau i ka auwina la Poaha ma kona ahewaia ana, ekolu kiure kue. Ua hoopaaia oia e hana oolea no hookahi malama, a e uku i $300 a me na koina i ka Poalima nei a ua waihoia aku he noi no ka hookolokolo hou.

Hoeha Makai o ko Makou Puuku.

                Mahope iho o kela ae la i hooloheia ai ka hihia hoeha makai (a eha ole) o ko makou Puuku a pau ni ia ahiahi molehulehu me ka loaa olelo hooholo ole, oiai nae hoi, ua hora a oi ke kiure iloko o ka rumi. I ke koho mua ana ka, ua pai a pai, a koho hou, ewalu a eha, ma ka hookuu ka hapanui, a koho hou no, oia ka hope loa, ehiku a eli, ma ma ka hookuu. Nolaila, ua hookuuia lakou, a moe hou aku la ia hihia ku i ke ano ole no ke kau ae nei o Augate. Ina no paha hoi i hoolohe ko makou Puuku i ke koi a kona loio e ulaa i na kikania, ina no la hoi paha ua palekana, no ka mea, o na poe a ka loio i manao ai, o lakou no ka i enemi e ahewa iaia, iloko no nae hoi ia la o ka maikai, moakaka a kuokoa o ke a'o ana a ke kahu o ka Aha. Na Hihia Hoopii Waiwai.
                Pau aku la ia o na hihia karaima, a i ka Poalima nei i hoomakaia ai na hihia kivila. O ka hihia mua, oia ka hoopii kipaku a kekahi mau keiki oo ole, oia o Clio H. Newton ma, ma o ko lakou kahu la, Misasa Anola, kue ia S. Kaale, F. Pahia, Kaniku a me Kalaumano (w). Hele no hoi a po ia la, pau ia hana, me ka hooholo lokahi ia o ka pono no ka aoao hoopii.

Kela a me keia Hihia.

                Imua o Lunakanawai Kaapuni Waitina i ka Poaha, na aeia ka hoopii oki mare a Naki K. Raiana kue ia Alaferede P. Raiana, no ka ona mau, hanaino a me ka malama ole. Ia auwina la no i unuhi mai ai o Punuku i kona hoole i kona hewa no ka aihue ma ke degere ekolu, a na ae aku i kona hewa. Ua hoopaiia mai oia e hana oolea no 18 malama a e uku i $10 a me $2.50 koina.
                Ua hoopau wale ka Loio Kuhina i ko Keoni Hapa hihia o ka powa ana i kekahi Pake ilalo o Moanalua, mamuli o ka aeia ana e hookolokolo hou no ka hana paewa o kekahi mau kiure, a kauohaia e hoihoiia i ka AhaApana. I ka Aha ilalo, ua ae oia i kona hewa imua o Lunakanawai Wilikoki i ka Poakahi i hala, no kela powa ana ae ia Wai Tai ma Moanalua, Iulai 21, 1894, a lilo he ekolu-hapaha. Ua hoopaiiia mai oia e hana oolea ma Kawa no hookahi malama a me na koina, a ua hauoli oia i ka hoi ana ae no Kawa, no ka mea, e aho ia mamua a o na makahiki eono i hoopaiia ai i kona ahewa mua ia ana ai e na kiure.

Hoeha Hilahila Ole o ka Po.

                Ua hoopauia aku e Kapena Kuke o na makai kau lio he eha o kona mau makai Olelo E i ka aluna ahiahi o ka Poakahi i hala, no ka ona i ka wa e paikau ana iwaho o ke kahua kinipopo kahiko, a ua hoi mai kela mau haole me ka piha huhu. I ka poeleele ana iho, ia Kuke e iho mai ana ma ke alanui Kalepa me kekahi hoaloha, ua hoio ae la o Nelesona, kekahi o na haole ana i hoopau ai a uhau iaia me ka laau a pale ae la ia me kona lima hema, a eha iho la ia lima ona. Ua holo aku ke kolohe a ua paaono i ka hopuia ia po no maloko o kekahi haleaina. Imua o ka Aha Apana i ka Poalua nei ua hoopaiia oia he eono mahina e noho hana oolea ai ma Kawa. O kona kokoolua, ka mea i kokua pu iaia ma ka hoeha ana i ke kapena, oia o Wisita, i hoopau mua ia no, ua ae i ka hewa imua o ka Aha i ka Poakolu mai, a ua hookauluaia kona hoopai no kona haalele mai i keia Aupuni. He palapala hoohewa imua o ka Aha i ka Poakolu mai, a ua hookauluaia kona hoopai no kona haalele mai i keia Aupuni. He palapala hoopii ka i kakauinoa nui ia iho nei e na poe Olelo E o nei, e kue ana i kona kipakuia.

 

Mau Lono Pili Nupepa.

                He wahi nupepa oiwi hou, wahi mai a ko makou lohe, e puka ae ana i keia la mai ka halepai mai o ka nupepa Kuokoa namu, makai o Ainahou, ma ke ano he puka la, malalo o ka hooponopono ana a na makamaka J. Nawahi a me J.K. Kaunamano, a malalo hoi o ka inoa o "ke Aloha Aina." E hoopuka pu ia aku ana no ka i nupepa puka pule kekahi
                Poaha iho la i lawe maoli ae ai ka mea iaia ka moraki i ka halepai Buletina, oia ka hoomana Katolika Roma, ma o ka hope la, W.F. Alani. Mamuli hoi o ia, ua hoopukaia mai ka nupepa o ia auwina la iho me ka hoololiia ae o ka inoa ma kahi o ka Buletina Puka La, ua lilo ae la o ka Buletina Ahiahi. He poe hou na ona, o B.L. Fina ka luna nui, o J.T. Setaka, ona o ka nupepa Manawa, ka lunahooponopono, a o Keoki Manasona ka mea hanu nu hou. Aohe i like ka maikai me kona mua aku, a he kakoo hoi no keia ano au hooponopono Aupuni. Ua manaoia i keia la, a i ole ia, i kahi la paha o keia pale e puka ae ai ka helu mua loa o ka nupepa oili malama hou Ka Hawaiiana, malalo o ka noho ona a lunahooponopono ana o kekahi haole kakau nupepa malihini, nona ka imoa o Julian D. Haune (Iuliana Heine). Ma ka hoopuka moolelo ana kona oi, a he mau moolelo oolea loa ka kahi ma ka hema aku i nei Aupuni.