Ka Leo o ka Lahui, Volume II, Number 534, 1 September 1892 — Page 4

KA LEO.

John E. Bush.

Luna Hooponopono a me Puuku.

HONOLULU, SEPTEMBER 1, ’92.

 

Na Anoai o ka Ua Loku.

 

Mr. Lunahooponopono.

I keia hebedoma e nee nei, ua hiki mai he 20 a oi kahuli leo lea o ka Makani Kaiaulu o Waianae, e haawi i Aha Mele i na kini o ka ua loku nei, ma o ka hoomaopopo aku o kou mea kakau, i na mea i hana ia, he ku maoli no i ka nani.

Oiai, ua eha ku ana e himeni o ka manu Oo e hooheno i kela mele, Ua Nahunahu, a pela aku. Ua paipai a hehihehi nui ka lehulehu no ka nui o ka maikai.

I ka Poakahi ae, ua haawi lakou he mau paani pili baibala i ku maoli no i ka nani.

Ua hookipaia keia poe e ka Rev. J. Kanoho a me na kamaaina e ae elike me ka hiki ia lakou, ua luana a ua hele kou mea kakau me keia poe e hoomakaikai ia lakou i ka nani o Makaha, kahi i noho ia e ke ala o ka hinahina me ka lauae.

I ka Poalua ae, ua hoomau aku lakou ma ke ala no Kilauea, no ka lakou hana.

A pela wau e kalokalo ae nei, e lawa pono ko lakou anoi.

Ua lilo ae nei ke ko o ka Princeville Plantation i kekahi hui Pake, a e hoomau aku ana no ka mahiko ana o Hanalei nei.

Elua pule i hala ae nei, ua haawi na keiki a me na kaikamahine lalawai o Kilauea i aha mele no ka pono o ko lakou ekalasia, a ua aneane e $100 ka loaa.

Ma keia mau wahi hunahuna uuku, ke hooki nei kou kauwa a kekahi wa aku.

Owau no me ka mahalo.

Kihapiilani-o-kapalilauae.

 

NUHOU KULOKO.

 

Ahaolelo ko keia la, hora 10.

 

Piha-u ka Hale Ahaolelo ma ka po o ka Poalua nei, ke hele ala a kau ka hanu i ke kania-i.

 

He kuai kudala kai malamaia ma ka home o Capt Fuller ma ke Alanui Kukai i ka hora 10 o nehinei.

 

O kahi moku hoopae opiuma i kapaia ka Beagle, ua kuai hoolilo ia aku oia no $3,500 i kekahi mea okoa.

 

Owai aku ana la ka Ilamuku o ke Aupuni? Ua hooheno ia ae, o ka mea he hoaloha kona iloko o ka poai hoopae opiuma oia ka ilamuku. Hewa ia la!

 

O na wahine haole ka hapanui ma ka aoao o na wahine i ka hookolokolo ana i ka Aha Kuhina ma ka po Poalua nei. Uhene kela!

 

I ka Poakahi nei i kukala ae ai ke Kuhina Paka, o Paulo Numana ka Loiko Kuhina o ke Aupuni. I ka po Poalua nei ua olepe ia ae la me kona mau hoa Kuhiha. Aloha oe e Paulo, ke Kuhina o 27 ½ hora.

 

Ua makemakeia na hoa o na Hui a pau loa a ka Moiwahine, e akoakoa ae ma ka Halealii Iolani, ma ka Poaha, Sepatemaba 1, hora 9 A. M. oia hoi Hui Naauao, Hui Hololio, Hui Kuonoono Ka Walu o na Lani.

Ma ke Kauoha.

 

Ma ka Poalua nei, ua ike ia aku la kekahi wahi haole e hookae hele ana i o a ianei, a e pelo ana hoi i kekahi poe Lunamakaainana ana i kamaaina ai mamua, e haawi i ko lakou kokua ana i ka Aha Kuhina. Ua hoolimalima ia anei ia e hana pela.

 

Ua olelo ae kekahi Luna Aupuni ina i holo ka manao hoo moe o ka olelo hooholo hilinai ole a Poakahi, alaila, aole ka he mana nui nana lakou e hoopau mai ko lakou mau wahi aku. E kaua anei e like me Balamaceda? Ua haule iho la nae na olelo a ka haakei.

 

Ua olelo ae la kekahi poe malihini ia lakou e makaikai ana i na hana o ka Ahaolelo o ka po Poalua nei, i ka loihi a kualehelehe hoopau manawa o ka haiolelo ana a kahi poe Lunamakaainana, a ke hoiliili ia na manao a pau i hoopuka ia mai e ua poe eke makani nei, e loaa no o Kuawili ma.

 

Ua hooheno ae ka Lunamakaainana o Hilo Hema, i ke ahiahi Poalua nei, ma ka olelo hooholo hilinai ole i ka Aha Kuhina, e pili ana i ka Loio Kuhina Paul Neumann, he Kuhina oia no na hora he 27 ½ a ina e lawe ia ae kona mau hora hooluolu o ka po, a koe kona mau hora hana wale no, a laila he 17 wale no hora a oi kona kienenei ana iluna o ka noho Kuhina a pau koke no. He pokii oi nei no ka Loio J. L. Kaulukou, ka mea i noho Loio Kuhina no 3 la. Ea! Ma-u ka nele o keia Kuhina.

 

Heaha no hoi ka hoa e like ai, o kekahi o na Alii, a me ka Lunamakaainana a ka lahui i koho ai. I ko lakou wa e ake ana e lilo i waha olelo no ka lahui, ua pahee ka lakou mau olelo, e like me ka aila, e olelo ana e hele ana lakou e hooikaika no ka pono o ka lahui a e hoopau ia mea ma a me ka hoohiki maoli aku no imua o ke akea aole lakou e hoi hope iki ana mai ka lakou mau mea i olelo ai. I ka hiki ana mai nae, o ka manawa o ka hana, a e ike ia ai hoi ko lakou kupaa ua pipika ae la lakou e like me na aweawe o ka Hea. E aho o Nalimaapa a me Pali, i kahi o keia poe hoopunipuni imua o ka lahui.

 

O ke keiki Hawaii opi nana i hoeha o Luukia, ma o ke kani hewa ana o ka pu, ua hoopaa ia he 6 mahina ma ka hana oolea. O Kimaka kona inoa. Mai lawelawe hou i na mea make.

Na Luna Ohi Auhau o ka 1892.

 

Ua aponoia ka poe keonimana malalo iho nei i mau Hope Luna Auhau no keia makahiki, 1892:

OAHU.

Honlulu……………………….T. A. Lloyd

Ewa me Waianae……………S. Hookano

Waialua……………………….

Koolaupoko No. 1……………Asa Kaulia

Koolaupoko No. 2……………E. P. Aikue

Koolauloa……………………….L. J. Aylett

 

MAUI.

Lahaina……………………….David Taylor

Wailuku……………………….Wm. T. Robinson

Makawao……………………….David Morton

Hana…………………………….J. P. Sylva

Molokai me Lanai…………………

 

HAWAII.

Hilo me Hilo Akau………………N. C. Willfond

Hamakua……………………….Chas. Williams

Kohala Hema……………………….Wilmot Vredenburd

Kohala Akau……………………….Eben P. Low

Kona Akau……………………….J. Kaelemakule

Kona Hema……………………….Thos. H. Wright

Kau……………………….…………O. T. Shipman

Puna……………………….…………J. E. Elderts

 

KAUAI.

Waimea me Niihau…………………Th. Brandt

Koloa……………………….…………A. K. Mika

Lihue……………………….…………J. B. Hanaike

Kawaihau……………………….……S. Kaiu

Hanalei……………………….………W. E. Deverill

 

Kauka Yong Kam Pung.

APANA.

Helu 53, Alanui Maunakea.

Ke Kauka Loea o ka Aina Pua!

 

Ua hiki ke hoola ia kela a me keia ano ma'i, mai ko na kane, wahine a me na keiki liilii. O na ma'i ha-no ua hiki loa ia ke hoola ia me ka maalahi. A o na ma'i e pili ana i ka maka pau pu ia i ke ola. Ke hoike ia aku nei, eia ke ola ia nei, me ka oluolu pu o kahi auhau. Ka mea pilikia hanau keiki e holo nui paha o ke koko @@@@ a lohi paha o ka hanau ana, pa paha o ka waha, e hele mai mai i o'u nei.

E kipa mai e ka poe i  hooluuluu ia me na haawina pilihua a ka a ka ma'i a na'u oukou e hooluolu aku.

KAUKA YONG KAM PUNG

Honolulu Sept. 2, 1981.          d3 272–

 

HOOLAHA HOU!

E ALA, E ALA.

 

B. F. Ehlers & Co —PAINAPA,

HELU 99 Alanui Papu.

E hoolohe hou mai e na MAKAMAKA, mai no a lokoino, e hele mau mai no oukou e ike ia PAINAPA, no ka mea, he kanaka oia i noho a kamaaina i keia kulanakauhale.

 

AIA MA KONA HALEKUAI NA

Papale o na kamalii mai ka 25c a pii aku

Kuka         “          “          “ $3 “   “

Kalakoa ano hou, he 8 i-a no 1 dala.

Na kihei pili laula, “          “          “

Papale Wahine………………………………………

Kinamu Nani 8 Ia…………………………………. $1.00

Kalakoa Nani 18 Ia…………………………………$1.00

E kuai aku ana MAKOU i ko makou mau waiwai a pau no ke Kumukuai i haule iho i ke Kumukuai mua.

Na Palule $2.50 he $1.50 wale no, a o na Palule $1.50, he $1.00 wale no. KE ike mai la oukou i ka emi loa ana.

Kupaianaha maoli keia emi naaupo ana e hele koke mai, o nele auane oukou.

B. F. EHLERS & CO

 

Kuai Hoopau!

Kuai Hoopau!

 

Elike me ka mea maa mau

I na Makahiki a pau!

MA KAHI O N. S. SACHS.

 

104 Alanui Papu, Honolulu.

E Hoomaka Ana ma ka Poakahi, Aug. 29,

NO NA PULE POLOLEI HE ELUA NO!

 

O na Waiwai a pau e haawi ia aku ana

MA KE KUMUKUAI I HAULE IHO I KE KUMULILO.

He Kuai Kuio! Aole he Apiki!!

 

He hookahi no a makou kuai huepau o ka makahiki, a ma ia wa wale no makou e hooemi ai i ka makou mau mea kuai iloko o ka halekuai, aole e like me kekahi mau halekuai ae, ka hooemi i kekahi no ka hoowalewale ana, a koe no kekahi, he oiaio ka makou , a o na oiaio wale no.

He Emi me ka Makepono na Mea a pau.

A eia malalo nei kekahi o ka makou mau kumu kuai iloko o keia kuai no na pule elua wale no aole oi aku:

 

20 I-a Kukaenalo no $1.00

12 “ “ Keokeo hinuhinu “

20 “ Kalakoa paa no $1.00

Na Lole Keokeo maikai, kahakaha me kikokiko aulii 8 i-a no “

Na Ginamu nani 10 i-a “

10 i-a Huluhulu Canetona “

5 “ Satina maikai loa “

Na Alapia Eleele, maikai loa laula, o ke ano maikai, hoemiia he hookahi i-a no ke 40c

Peleili komo o na kane, 5 no $1.00

Na Palule i aiana ole ia, he 50c

Na Lakeke kalakoa o na kamalii 5 no $1.00

Na lole keokeo i hana lauia o na Wahine hooemiia no $4.75 o ka lole.

Kaliki o na Wahine, hooemiia 40c

Aikala lilina “ 3 no ka 25c

Na hainaka hooluu like ole o hai, he 60c no 1 kakini.

Papale hele la o na keiki 25c

Na Kawele auau nunui he 25c

 

O na kumukuai maluna e e hooko aku ana makou no keia manawa wale no o ka makou kuai hoopau, oia hoi no

Elua Pule Wale no.

 

:N. S. Sachs:

104 Alanui Papu, Honolulu.