Ka Lahui Hawaii, Volume I, Number 12, 18 March 1875 — Page 4
Na Ekalesia o Kawaiahao a me Kaumakapili.
Halawai kakahiaka, la Sabati .... hora 10½
Halawai po ..... hora 7½
Halawai Apana auina la ..... hora 3½
Kula Sabati ..... hora 9½
NA KULA SA BATI.
NA HAAWINA.
Aper. 11.—Debora a me Baraka—Lunakanawai IV: 1—9.
1 Hana hewa hou aku la na mamo a Iseraela imua o Iehova, mahope iho o ka make ana o Ehuda.
2 Hoolilo aku la o Iehova ia lakou i ka lima o Iabina, ke alii o Kanaana i noho alii ma Hazora, o Sisera ka alihikaua no kona poe koa, a noho no ia ma Harosetagoima.
3 Kahea aku la na mamo a Iseraela ia Iehova, no ka mea, eiwa haneri ona kaakaua hao. Hookaumaha loa oia i na mamo a Iseraela, he iwakalua makakiki.
4 O Debora, he kaula wahine, ka wahine a Lapidota, oia ka i hooponopono i ka Iseraela, ia manawa.
5 Noho iho la ia malalo iho o ka laau pama o Debora, mawaena o Harama a me Betela, ma ka mauna o Eperaima, a hele mai la na mamo a Iseraela io na la i hooponopono ia mai.
6 Hoouna oia, a kii aku la ia Baraka, ke keiki a Abinoama, ma Kedesa-Napetali, i ae la iaia, Aole anei i kauoha mai o Iehova, ke Akua o ka Iseraela, O hele, e hookokoke aku ma ka mauna o Tabora. E lawe pu me oe, i umi tausani kanaka, na mamo a Napetali, a o na mamo a Zebulona.
7 A na'u no e kai mai imua ou, ma ke kahawai o Kisona ia Sisera, ka luna o ko Iabina poe koa, me kona poe kaakaua, a me kona lehulehu, a e haawi aku no au iaia i kou lima.
8 I ae la o Baraka iaia, Ina e hele pu oe me a'u, alaila, hele au, a i ole oe e hele pu me a'u, alaila, aole au e hele.
9 I aku la oia, I ka hele ana, e hele pu no au me oe. Aka, o keia hele ana au e hele ai, aole oe e hoonaniia ilaila, no ka mea, e haawi ana o Iehova ia Sisera i ka lima o kekahi wahine. Ku ae la o Debora, a hele pu aku la me Baraka i Kedesa.
——:o:——
Eia na mea ano nui iloko o keia mokuna. I. Haalele hou ka lahui i ke Akua, p. 1. II. Pilikia lakou i ke alii o Kanaana no na makahiki he iwakalua, p. 2, 3. III. Hooponopono o Debora i ka lahui, pauku 4, 5. IV. Hoopakele ia ka lahui ma ko Debora hele pu ana me Baraka e kaua aku i ua alii la o Kauaana, p. 6—9. O Baraka ka alihikaua ma ka aoao o ka Iseraela, a o Sisera ka alihikaua ma ka aoao o ke alii o Kanaana. I ke kaua ana, haawi mai la ke Akua i ka lanakila nui i ka puali koa o Iseraela, a holo o Sisera me kona poe koa. Holo aku la o Sisera a komo i ka hale o Iaela, ka wahine a Hebera. Hoopunipuni ia oia e ua wahine la, a hoomoe ia a hiamoe, makia ia kona maha me ke kui a me ka hamare, a make loa iho la ia, a lanakila hou ka lahui, p. 10—24. Ko iho la ka olelo a Debora ma ka pauku 9, "aole oe e hoonaniia, no ka mea, e haawi ana o Iehova ia Sisera i ka lima o kekahi wahine."
Nana i ka haawina o keia la, Pauku 1. Mahope o ka make ana o Ehuda, hana hewa hou ka lahui, ina aole ia i make, aole paha hele hewa lakou. O Ehuda ka mea nana i hoopakele i ka lahui mai loko ae o ka lima o Egelona, ke alii o Moaba, e nana ma ka mokuna 3:14—30. Pauku 2. Owai keia Iabina? Ua manao ia he mamo na Iabina i pepehi ia e Iosua, nana ma Iosua 11:1—10. Pauku 3, eiwa haneri kaakaua hao a Iabina, aole paha nana ponoi keia mau kaa a pau, ua noi ia kekahi mau kaa o na'lii e ae, i mea kokua i kana hana. Pauku 4, 5, no Debora. Noho iho la ia malalo o ka laau pama, he ululaau pama. "Noho iho la ia," heaha ke ano? O kona hale noho anei ia, o kona wahi hookolokolo paha? Pauku 6, ka mauna o Tabora, he mauna ku hookahi ma ka aoao hikina akau o ka papu nui o Galilaia, eono paha mile ma ka hema aku o Nazareta, 3600 kapuai paha ke kiekie. Umi tausani, aole ia i hoopaa ia ma keia helu. Na mamo o Napetali me Zebulona, me na mea e ae kekahi, nana i ka Mokuna 5:14—23. Pauku 6—9, ma keia mau pauku na olelo kike a Debora a me Baraka.
Moolelo o ka Ahahui Euanelio o Hawaii Akau.
Halawai ka Ahahui Euanelio o Hawaii Akau, ma Iole, Kohala, i ka la 3 o Maraki, A. D. 1875, hora 10 A. M. Kohoia o S. Papaula i Luna Hoomalu no ka manawa. Weheia na hana me ka pule a ka Luna Hoomalu.
Kohoia o S. Aiwohi me S. Kaaua i komite e hoomaopopo i na lala o ka aha i hiki mai. Eia na Kahu me na Elele i hiki mai.
No ka Ahahui Euanelio o Hawaii Akau.
Hamakua, H., Rev. S. Kaaua, Kauliilii,
" W., ——— Maihoolewa,
" K., ——— Halemanu,
Waimea, ——— Mahuka,
Kohala Hem., S. Aiwohi, Kauwewahine,
" Kom., S. C. Luhiau, Kalawaia,
" Akau, E. Bond, Paku.
No ka Ahahui Euanelio o Hawaii Kom.
Kekaha, Rev. G. B. Kaonohimaka, Paiwa,
Kealakekua, S. W. Papaula, ———
Helani, ———, Kaawale.
No ka Ahahuni Euanelio o Hawaii Hik.
Kalapana, Rev. S. Kamelamela, Timoteo,
Puula, ———, Keahi.
Koho ka hale ia G. W. P. Halemanu i Luna Hoomalu, o S. Aiwohi i kakauolelo.
Kohoia o E. Bond, S. W. Papaula a me S. Kaaua i komite imi hana, a o S. C. Luhiau, G. B. Kaonohimaka a me S. Kamelamela i komite imi haawina. Hookuuia ka aha me ka pule a Timoteo.
Hora 1½, P. M ., halawai hou ka aha. Hoike a ke komite imi hana.
1 Hapalua hora haipule mamua o kela la keia la.
2 Hoike kihapai.
3 Heluhelu haawina.
4 Kula kaikamahine.
5 Palapala hoopii.
6 Ka noho ana o na Ekalesia o keia mokupuni e noho nei.
7 Oihana Misiona.
Hapaiia ke kumuhana 2, "Na hoike kihapai." Na ke kakauolelo i heluhelu mai i ka hoike no ka Ekalesia o Hamakua Waena me Hamakua komohana. Na E. Bond i hoike mai no ka Ekalesia o Kohala Akau.
Heluhelu mai o E. Bond i ka hoike no ke Kula Kaikamahine o ka Mokupuni o Hawaii.
Hoike waha mai o G. B. Kaonohimaka no ka Ekalesia o Kekaha. Pela no hoi o S. W. Papaula no ka Ekalesia o Kealakekua. Hoike o S. Kamelamela no ka Ekalesia o Kalapana, Puna, Hawaii. Hoike mai o Keahi no ka Ekalesia o Puula. Hoike o G. N. Kauwale no ka Ekalesia o Helani.
Noi mai o S. Kamelamela e hoopanee ka halawai a ka hora 9 o ka la apopo. Hooholoia—hookuuia me ka himeni me ka pule a E. Bond.
POAHA, LA HANA 2, MAR. 4.
Malama ka aha i ka hapalua hora haipule. Hoike mai o S. C. Luhiau no ka Ekalesia o Kohala Komohana.
Noi mai o E. Bond e waiho i keia hoike ma ka lima o kekahi komite, ua ae ia.
Koho ka Luna Hoomalu ia E. Bond, G. B. Kaonohimaka a me S. Kaaua i komite.
Noi mai o S. Kamelamela e lilo na hoa a pau i akoakoa mai iloko o ka hale i mau hoa kuka no ka aha. Hooholoia.
Hapai ka aha i ke kumuhana 3,—"Ka heluhelu haawina."
Heluhelu mai o E. Bond i kana haawina, "Ka hope o ko Hawaii nei Paeaina."
Nonoi mai o S. W. Papaula e hoouna i keia kumumanao e paiia ma ka nupepa. Hooholoia.
Heluhelu mai o S. Kamelamela i kona haawina, "Pehea la e hiki ai i na hoahanau hewa ole i poe lawelawe na ka Haku."
Hoike mai o S. Kaaua no ka Ekale sia o Hamakua Hikina.
Hapai ka aha i ke kumuhana 4, "No ke Kula Kaikamahine."
Hoike mai o E. Bond ke poo o keia kula i ke ano a me na hana a pau o ke kula mai kona hoomaka ana a keia wa e ku nei, me ka wehewehe nui mai imua o ka aha, ua konoia na Kahu, na Elele a me na hoa a pau o ka aina, e hele aku e makaikai i ka Halekula kaikamahine me ke kai huakai ana. Hooholoia.
Hoomaha ka aha a ka hora 2 P. M., pule o S. W. Papaula.
Halawai hou ka aha i ka hora 2 P. M., a pule o Paku.
Hapai hou ka aha e kuka no ke "Kula Kaikamahine."
Wehewehe nui mai o J. K. Kaunamano no keia kumuhana, wahi ana, aia a $50.00 ka uku o ka haumana no ka makahiki hookahi, alaila, ola a mau keia kula.
Wahi hoi a kekahi, e hoomau no i ka $25.00 no ka makahiki.
Noi mai ka Luna Hoomalu G. W. P. Halemanu e hookuu iaia, mai kona noho Lunahoomalu ana a e hoi aku i Hamakua no kekahi pilikia nui. Ae ia.
Kohoia o S. Kamelamela i pani ma kona hakahaka.
Waiho mai o E. Bond, he mau olelo hooholo.
Hooholoia.—1 I ka manao o keia aha e pono no ke hoomauia ka uku makahiki no ka haumana ma ke Kula Hanai Kaikamahine a kakou i ka $25.00.
2 A he mea pono no hoi ke kokua makahiki mai na Ekalesia Euanelio a pau, o keia mokupuni i dala hanai no ua kula nei.
3 I ko makou nei manao, he mea ia e pono ai ke Aupuni o ke Akua ma Hawaii nei ke maheleia ko ka makahiki kokua mahinahou i na mahele ekolu, oia keia.
Mai Ianuari 1 a Aperila 30, no ke Kula Kaikamahine, mai Mei 1 a Augate 31, no ka Oihana Mision Kuwaho, a mai Sepatemaba 1 a Dekemaba 31, no ka Oihana Kuloko. Kuka ka aha a hooholo pakahiia.
Hoike mai o E. Bond i ka aha, ua oluolu ia E. C. Bond, e kokua mai i $500.00 no ke Kula Kaikamahine, mamuli o keia mau loina, penei:
I. E hoomau ia keia kula malalo iho o ka hoomana Euanelio me ia e noho nei.
II. E hoohui mau ia na Kahu ili-keokeo o ka hoomana Euanelio ma ka Papa Kahu o keia kula a mau.
III. E hoihoiia i kela me keia makahiki elima hapa-haneri o ka uku hoopanee o ua mau dala nei $500.00 e huiia me ke kumupaa no ka makahiki hou aku; a pela mau no a hala na makahiki he 25, a lilo hoi keia puu dala i $1,500.00, alaila, no ke kula wale no ia puu dala a pau loa.
I V. A haki kekahi o keia mau loina, e lilo loa ka puu dala i oleloia ai maluna a pau loa me ka uku hoopanee no ke Kulanui o ka Punahou.
Hookuuia ka halawai me ka himeni a me ka pule a Maihoolewa.
POALIMA—LA HANA 3, MA R. 5.
Halawai hou ka aha ma ka hora 10 P. M. Hapaiia no ke "Kula Kaikamahine."
Hoike mai o E. Bond i ka nui o na dala i loaa mai no keia Kula Kaikamahine mai kela a mai keia Ahahui mai o ka Mokupuni o Hawaii, a me kekahi mau makamaka e aku i kokua aloha mai i keia Kula Hanai.
No ka Ahahui Euanelio o Hawaii Akau.....$2,067.30
No ka Ahahui Euanelio o Hawaii Hikina.....1,526.34
No ka Ahahui Euanelio o Hawaii Komohana.....440.50
No na makamaka aloha mai.....508.92
Huina pau.....$4,543.26
Noi mai o J. K. Kaunamano, e hoike mai ke poo o ke kula i na wahi i lilo aku ai keia mau dala. Hooholoia.
Na S. Kaaua i noi mai i ka aha i komite e nana a huli i ka oiaio o ka hoike. Hooholoia.
Koho ka Luna Hoomalu ia S. Kaaua, J. K. Kaunamano, S. H. Mahuka i komite. Hooholoia.
Wehewehe hou mai o E. Bond no keia kula, pela no hoi o J. K. Kaunamano, S. H. Mahuka, a me na mea e ae he nui wale. Hoopaneeia ka aha. Pule o G. N. Kauwale.
Halawai hou ka aha ma ka hora 2 P. M., ia Keahi ka pule.
Hapai hou ka aha e kukakuka no ke Kula Kaikamahine.
Noi mai o E. Bond i elua pule no keia kumuhana, ae ia. Pule o S. W. Papaula me S. Kaaua.
Hoike mai ke Komite Imi Haawina i na haawina no ka halawai hou aku.
1 Heaha la ka luli ole o ke Akua i olelo ia ma Iakoba 1:17. L. Laiana.
2 Pehea, e ulu io ana anei ka Lahui Hawaii ma keia mua aku, a e ulu ole ana paha, a pehea e maopopo ai? E. Bond.
3 Heaha la ke ano o ka la Penetekota i oleloia ma Oihana 2:1. J. Bikanela.
4 E hoike mai i kekahi mau hoailona o ka poe i kapaia mai he poe enemi lakou i ke Kea o Kristo i oleloia ma Pilipi 3:18.
S. Aiwohi.
5 Heaha la ka mea e keakea ai i ka holo pono ana o ka Euanelio ma keia Paeaina?
S. C. Luhiau.
6 O ke ola ana o ke Akua nono iho. Heaha la ia? S. Kaaua.
7 Pono anei e aoia na keiki i na kaao kahiko o Hawaii nei? S. H. Mahuka.
8 He mea hoonaauao anei na kaao haku wale iloko o na nupepa.
G . W. P. Halemanu.
9 Heaha la ka mea nui e imi ia ai i ka hoopai ana i ka poe kolohe? Z. Paakiki.
Hoopanee ia ka halawai, pule o G. B. Kaonohimaka.
POAONO—LA HANA 3, MAR. 5.
Hapai ia na hana o ka la 5, "Na palapala hoopii."
Hoike mai ke komite i waihoia no ka palapala hoopii a S. C. Luhiau.
Hui ka oukou komite me ke kahu a me na hoahanau o ia Ekalesia, a me ke kamailio ana, ike pono lakou ua pau e, a pau pono hoi ia mea i ka hooponoponoia iwaena o lakou iho, a nolaila, oki ke komite i ka lakou la apono wale iho no. Aponoia.
Kukakuka ka aha no ke Kumuhana 6, "Na nupepa."
Hoike mai na Kahu a me na Elele o na Ekalesia i hiki mai, mai Kalapana a Kealakekua no keia kumuhana.
He olelo hooholo ka S. Kaaua no keia penei: Hooholoia.—Ma ka manao o keia aha, e hooikaika nui na kahu a me na lala a pau o keia aha, i ko lakou wa e hoi aku ai i ko lakou mau apana i na nupepa me ka paupauaho ole.
Kuka ka aha no kahi e halawai hou aku ai keia aha.
Noi mai o S. H. Mahuka, e halawai ma Waimea ma ka Poakolu mua o Sepatemaba, M. H. 1875. Hooholoia—-ke oluolu i ka Makua Laina. Koho ka aha ia Kanealai me Maihoolewa i mau Elele i ka Ahahui nui ma Honolulu, a o S. H. Mahuka a me Kaaua i mau hope elele ke hiki ole na mua.
Hooholoia.—E hookuu aku ia S. Kamelamela mai keia aha aku a i ka Ahahui Euanelio o Hawaii Hikina.
Hooholoia.—E lilo o S. Kamelamela i elele no keia aha i ka Ahahui Euanelio o Hawaii Hikina.
Hooholoia.—Ke mahalo aku nei keia aha i ka ekalesia o Kohala Akau no ko lakou malama maikai ana i keia aha ma na mea e oluolu ai.
Hooholoia.—Aia a hoopaneeia keia aha e halawai hou oia ma Waimea ma ka Poakolu mua o Sepatemaba, M. H. 1875. Heluheluia ka moolelo a aponoia, alaila hookuuia ka aha. Pule o S. W. Papaula a me E. Bond.
S. AIWOHI, Kakauolelo.
Olelo Hoolaha.
E IKE AUANEI KA POE WAIWAI A PAU e noho ana ma keia Paemoku. Mai haawi i kekahi waiwai ma ke ano aie i kuu wahine mare, oia o KAMEHAIKU. Oiai, ua haalele mai oia ia'u, a hele aku ma kona makemake i kuka pu ole ia, me ka loaa ana o ka lohe ua make, eia ka ke hoonalo nei oia iaia me ke kane e, nolaila, he kuleana ko na kanaka a pau e kiai ma ke kanawai i malama ia ka maluhia, a ina e hoi mai oia, e hoi mai no. Na S. AUKAI.
Manamana, Mar. 15, 1875. 12-2t