Ke Kumu Hawaii, Volume IV, Number 22, 27 March 1839 — Page 88

88 KUMU HAWAII. (MARAKI,

NUNULU, Feb. 16, 1839.

HE MELE NO K.H.

Ua maikai a ua hemolele na mea a pau,
I loaa ia'u ma ke Kumu Hawaii,
Ua onaona aala i kuu maka, a me kuu naau,
Ka lele ku i kuu houpo:
Pili i kuu manawa ka iini,
Kaanoi ka makemake o kuu naau,
Me he mau ia lawalu la,
A me he mau ia koala la;
Me he umu huai la, a me he uala pulehu la,
Me he mau ahui maia la i palaku,
A me he mau mea la i kipe hooala wale ia la,
I ka hala me ka hinano, a me ka lehua;
A me he mea la i hooluuia i ke kupukupu a me ka lau ae;
Me he mea la i hoope wale ia la no ia'u na mea a pau.
Me he mau ia makamaka hou wale no,
Na palapala i loaa ia'u, na Buke:
Oia no hoi ko'u mau makua hanau,
A me na makua hanai;
Pela no hoi oe, e ke K.H.
Aole hoi na e kuu hoa, kuu hoa, kuu hoa hoi, kuu hoakuka,
Hoau, hoaeueu, hoapaipai, hoakahea, hoaala hiamoe.
E kuu keiki! E ala, e ala mai oe,
E hamo i kou poo, a e holoi i kou maka.
Pela ka Iesu i hooike mai ai,
Ma Mataio 6: 17, a pela no hoi ma Epeso 5: l4.
Auhea oukou, e na kanaka a pau, a me na'lii,
A me na hoahanau o'u ma ke kino a me ka Uhane,
O'u hoaluhi, hoahele, hoalealea, ka niki o na aka;
Hoaaeale, hoahooikaika, kukakuka wa olelo,
Haihai olelo liilii, kuhi ano, ma ka hainoa nui.
E ala e ala, e ala e ka hikiku a me ka hikimoe.
E ala e ke apapanuu, e ke apapalani;
E ala e ka hikina, a me ke komohana.
E ala e ke akau, a me ka hema,
E ala ko kai, a me ka uka,
E ala e Kona, me Kau,
E ala e Puna, me Hilo,
E ala e Hamakua, me Kohala,
E ala mai oukou, e ala ae lakou la,
E ala kakou a pau,
E hele ma kela aoao o ka muliwai nui, i iia'i o Ioredane.
Hainoa lehulehu,
Oia ke hai aku ana i ke ano nui,
A me ke ano ponoi, o kekahi mau mea nui i oleloia'i penei:
He mau mauna, he mau aina, a penei hoi;
He poe kanaka, he poe auwaa
O laua ke hai mai ana, a ke kuhi aku ana,
I ke ano like o ka ke Akua olelo ma Epeso 5: 14.
E huli aku oukou malaila a e nana hoi;
A pela no hoi oia e kuhi aku ana ma Mat. 26: 46.
Pono ia oe, ia ia la, ia ia nei, ia lakou nei,
Ia lakou la, ia lakou la aku hoi, ia makou, ia oukou,
Ke lalau i ka Buke a Wehe ae, a alawa'e;
A kiai, a halo, a halalo iho, a alena ae, a ku oe!
He aniani no ia, i kukuluia a nana aku oe,
A ike i kou helehelena a me kou ano,
He pupuka paha, he maikai paha.
Pono ia oukou ke kukulu mai i ko oukou mau aniani,
A nana, a ina he ino, a he pelapela,
Pono ia oukou ke holoi ko oukou mau maka,
A e hoa i ko oukou poo.
Nolaila, e ala mai oukou,
Mai ko oukou palaka ana, a me ka nanea ana,
A me ka ona rama, a me ka ona awa,
A me ka ona baka, A me ka makee, a me ka alunu,
A me na mea ano ino a pau.
Nolaila e ala koke, e wikiwiki; mai lohi:
A ala me ka makau a me ka weliweli.
E puiwa, e hikilele, e ala, e holo, i pakele kou ola.
E nana ma Kinohi 19: 17.
Nolaila, he pono ole ka lohi;
Mai hoohakalia, a hookaulua iho, e wawe,
No ka mea, he lua nui, hohonu,
Ka imua o oukou;
He lua nui lipolipo eleele, a he nihinihi,
A he mama, a he manene wale no.
Aneane oukou e haule,
A he lua ahi enaena, e lapalapa ana.
A e aa mau ana, a e kukuku ana ka lapalapa,
Ke okoko, ka enaena, ka hahana
Ka ikaika, ka wela me he ahi puholo mao la,
He lua'hi e aa mau ana, aole e pio.
A nana ma Mareko 9, 46.
Aole e pono ia oukou ke launa aku ilaila,
Ke kiai iki aku, a ke halo iho,
No ka mea, he lua makau, he lua weliweli,
Lipolipo, naonao ike ole ia'ku.
Aia hoi! Punohu ae la ka uwahi
Mai lalo mai o ua lua nui la.
E nana ma Hoikeana 9, 2.
Auhea oukou, e ka poe kanu baka, a puhi baka,
A me ka poe kanu awa, a inu awa,
A me ka poe kuai rama,
Iloko o na pahu, a me na barela;
Iloko hoi o na huewai ie,
He waina a he aila ka hoohewahewa;
A iloko hoi o na omole a me na lapalapa,
He aila a he waina ka hoonalonalo.
A iloko hoi o na omole aniani liilii me he kauka la,
A e huna ai iloko o ka poli;
Uhi iho na wahi kihei,
A iloko o na pakeke o na lole wawae,
E hoopalamimo ai, a hoopalanehe ole,
A me ka hoohewahewa, hoomaalea i ka hele.
Pela no ka poe hewa a pau,
E like me ka Liona la e imi ai i kana mea e ale ai.
E nana ma Petero 1 - 5, 8.
Auhea oukou ka poe inu rama,
A me ka poe hookaumaha i ka auhau,
A me ka hookoikoi wale aku me he make e la ke ano:
A me ka pee hewa a pau.
E ala mai oukou mai na ilina mai o ka make,
No ka mea, he auwaha a he lua nui imua o oukou,
He wahi e make ai
He pono ke hoomanao i ko ke Akua aloha ia oukou,
E ka poe luhi, a me ke kaumaha,
I na hala, a me na hewa.
E nana ma Mataio l1, 28.
A e hoomanao i kona alakai pio ana mai ia oukou,
E like me kona alakai ana mai
I kona poe kanaka, mai loko mai o Aigupita;
A pela e hoomanao ai oukou i ko oukou alakaiia ana,
Mai loko mai o na kapu kahiko.
Aole anei he aloha kona ia oukou ilaila?
Eia no keia aloha o ke Akua ia oukou,
O kona hoouna ana mai i ka ua,
A me ka hoopuka ana mai i kona la,
Maluna o ka poe hewa a me ka poe pono,
A maluna o ka poe ino a me ka poe maikai.
E nana ma Mataio 5: 45.
A me kona haawi ana mai ia oukou i na mea a pau,
Mai ka lani iluna, a me ka lewa o ka lani,
A mai ka honua ilalo nei,
A me Iesu ke Keiki a ke Akua,
I make ai no oukou ma ke kea.
Oia kona aloha nui ana ia oukou.
A o kona hoouna ana mai i na kumu, a me na buke,
Oia na aniani nana no oukou i hoawiia mai,
Oiaio no;
Ina e kukulu mai oukou i ua mau aniani la,
A e nana aku oukou a ike
I ka piapia o ko oukou mau maka,
A me ka lepo, a me ka pelapela:
Oia ko oukou hewa a pau.
He pono no ke hamo, a ke holoi i ka wai,
I pau ka pilipili, ka ekaeka, ka haueka, ka eeka,
Ka hauna, ka maea, ka polopolona.
Nolaila e ala ae oukou a e nana i ke kiowai haale mai ana;
Oia ka palapala hemolele.
A e iho aku oukou ilalo e holoi ai a e hoa'i;
Malaila e hoikeia mai mai ai, o ke koko o Iesu,
Oia ka wai e holoi ai i ko oukou eka, pelapela iho,
A e holoi oukou i kela wai.
Aole o ko waho wale no,
O ko loko a me ko waho pu kekahi;
Pela e pono ai,
E hoomanao i ko Iesu kahea ana mai ia oukou.
E na makua, na hoahanau, na punahele, na aikane,
Na punalua, na makamaka, na hale kipa o ke ao nei!
E hoomanao i kau'lo a ko kakou Alii nui
E kalokalo mai nei ia kakou,
A e huli papu aku ka umauma ilaila;
A e nana aku i ka mahai nui, oia ke Keikihipa, ka alana.
Ka mea hoopakele ia oukou.
Aia no oia ke uwao la no oukou ma ka lani,
Imua o kona Makua i ola oukou.
He nui loa aku no kona aloha a me ka lokomaikai,
Aole e ikeia'ku la ka loa, a me ka laula,
Ka hohonu, a me ke kiekie.
O ke aloha o ko kakou Haku o Iesu Kristo
Me oukou a pau, Amene. Na HAAHEO