Ke Aloha Aina, Volume XII, Number 11, 16 March 1907 — Nu Hou Kuloko. [ARTICLE]

Nu Hou Kuloko.

Oia mau no ke onaona o KE ALOHA AINA ke ohuohu mau i na (pua lehua) mea hou like ole. Aia no he nui no na hoolaha hookomoia mai oia ka mea e hiki ai ke hoonui hou ia ae ke kino o ka pepa. Ua haawi ae ka bana paala o ka Regimana kaulio Umi he aha puhiohe mawaho o Moana Hotele a ua nui ka mahalo ia. Ma na wahi lehulehu o Irelani ua oleloia, he ouli pakalaki ke hiki mai ana i ka mea e makaikai ana i kekahi huakai malalo o ka mamalu. Ma ke kakahiaka Poakolu nei i ku mai ai ka moku lawekoa Thomas me na koa paele o ka regimana Kaulio Umi. Ua lele mai kekahi poe koa o lakou ma ka lakou mau wahine. I keia po e haawi ai ka Hui Hawaii Ponoi he keaka maloko o ka Hale Mele Hou. O na @- balo, na Hula Hawaii a me na Himeni Hawaii na mea ano nui e kuupau ia mai ana e na lala o keia hui. Ua looa mai na hoike ianei i ka Poaono i hala, ua haalele aku la ka mokuahi Heliolis me na limahana Sepania i hiki aku ka heluna i ka 1250 no Hawaii nei. I na la hope o Aperila ae nei e pae mai ai kei mau limahana i Hawaii nei. Ua lawe ia aku no ka halemaʻi pupule o Henry Hogan Hogin [?], kekahi o na loio o ke kulanakauhale nei. Ua loaa aku oia e wawahi ana i na noho mawaho iho o ke kahua o ka halepule Katolika i ka po Poakahi nei. Ma ke kakahiaka Poaono nei i haalele mai ai o J.B. Kaohi i keia ola ana o ka makahi Apaapaa o Kohala ma kahi o Kalua Kaohi kana keiki ma Waikiki. He kanaka oia i ike nui ia a oia kekahi Senatoa i noho ma ke kau ahaolelo mua loa o ke Teritori. Ua uwehe aku la ke akule i ka hohonu i ka Hui Oiwi Hookuonoono o Hilo, i kukuluia ai i kinohi ma ke ano he lala lakou no ko anei Hui Oiwi Hookuonoono e noho Peresidena nui ia nei e Samu [Samuela] Dwight. Ua hoololiia ae la ko lakou inoa i keia wa a ua kapaia he Hui Hawaii Ponoi. Ma ko makou lohe mai ua hoopanee aku la ka holo o ke komite ahaolelo i ke kahua maʻi o Molokai no keia po Poanono aku, Mar 23, mawaho ae o ke komite a me na hoa hanohano o ka ahaolelo na lala o ka Papa Ola a me na poe kakau nupepa, aole he ohana @@@ ia ana e hele e ike i ka lakou mau maʻi e noho mai la iloko o ka ehaeha. Kupanaha no. Ma ka Monegolia i hala aku la no Iapana a me Kina i ka la inehinei i kau aku ai o David L. Ai, ka Lunahooponopono o ka nupepa Kuokoa no Tokio, Iapana, ma ke kulana elele no Hawaii nei iloko o ka aha hui o na Haumana Karati ano o ke ao holookoa e malamaia ana ma ia kulanakauhale i ka la @ ka la @ o Aperila.