Ke Aloha Aina, Volume V, Number 50, 16 December 1899 — Page 1

This text was transcribed by:	Karen Mah-hing
This work is dedicated to:	To Puakea and Kaui...mahalo nui for inviting us to participate.

KE ALOHA AINA

UA MAU KE EA O KA AINA I KA PONO

HOOKUMUIA I MEI 20, 1895

BUKE 5 HONOLULU, POAONO, DEKEMABA 16, 1899 HELU 50

KA NUPEPA KEALOHA AINA

E hoopuka mau ia aku ana mai ka Poakahi a ka Polima o na pule a pau o kela ame keia mahina.

Ka Uku Pepa, he 20 keneta o ka pule. No ke kope hookahi he 5 keneta.

E loaa no ka pepa maike Keena aku o KE ALOHA AINA, a mai ka lima aku o na Luna Lawe Pepa.

E pai ia no na Olelo Hoolaha, na Kanikau a me na Mele Imoa, me ke Dala @uike. Aole nupepa ma ka owili pakahi e nooona ia ke ole e hookaa mua ia ka uku pepa.

E hoouna pololei mai i na Nuhou na Kumumanao, na Olelo Hoolaha, na Kanikau a me na Mele Inoa i ka Lunahooponopono o keia Pepa.

Aole loa e hoopuka ia a hoolaha ia kekahi manao ma na kolamu o keia Pepa, malalo o kekahi inoa kapakapa ke ole e hooike mai i ka Lunahooponopono i kona inoa ponoi.

Ka Nupepa Puke Pale

Ke – Aloha-Aina

Hookahi makahiki..........$2.00

Eono mahina..................$1.00

Ekolu mahina.................. .50

EMMA A. NAWAHI.

Puuku o

Ke- Aloha – Aina

EDWARD L. LIKE.

Lunahooponopono a Hope Puuku

S.P. KANOA.

Hope Lunahooponopono.

O na kauoha Nupepa me na hookaa Dala, e hoona pololei mai i ka Puuku ma Honolulu.

KE HOOPUIPUI LA I NA MOKUKAUA.

Ladana, Nov. 29, O ka hoounaia ana aku he aumoku kuikawa, no Gibaraleta, ua hoopuipui ae la ia i ka ulu moku o Beritania malalo o Adimarala Hopkins ua hoomaopopo ia oia kekahi ulu mokukaua ikaika loa o keia au hou. I keia wa aia ma kahi o 42 mau moku o na papa like ole e ku nei ma keia mau wahi hoolulu. Ua olelo ia o ko Beritania manao no ke kue ana aku ia Sepania i kona haawi ana ia Centa no Farani. A o kekahi hoi ma o ko Beritania ike mua ana e kokua aku ana kekahi mana nui i na Boa, a pela oia e hoao nei no ke kue ana aku.

Ua lilo ka makana mua o ka hulahula Paele ia Miss Fletcher a me Busch, elua ia Lizzie Victor a me Wm. Prestidge, ekolu ia Haewood a me Fletcher.

HOOUKA IA HE KAUA HAHANA

MAWAENA O NA BOA A ME NA BERITANIA

Hoehaia o Kenerala Methuen—Ke Alihikaua Nui o na Beritania ma Muliwai Modder.

Ladana, Dec 1. O na lono no ka hoouka kaua o ka Muliwai Rodder, eia ke kali ia aku nei me ka mai nui ia e ka lehulehu no ka loaa mai o ka papa inoa o na poe poino, e like hoi me ka ka Haku Methuen @ hoike mai ai oia kekahi o na kaua uahana loa.

O na hunahuna a me ka pau pono ole o ka papa inoa o na poe i make a hoeha ia, ua hookomo mai ia i ua hopohopo iloko o ka lehulehu no ka weliweli o keia kaua. O Konela Northcott, he ukali no Kenerala Methuen, ame Lutamela Konela Stopford o na koa Coldstream Guards, ua make, a o na poe i hoeha ia o Mekia Kauna Gleihen, Lutanela Viscount Acheson, keiki a ka Ela o Gosford, Lutanela Hon. E.H. Lygon, hoahanau o ka Ela Beauchamp.

Ua hoeha pu ia me Kenerala Metheun ma ka uha.

Ua lawe ae o Mekia Kenerala H.E. Colvill, o ke Guards Brigade, i ke alakai ana i na puali mahope o ka hoeha ia ana o Kenerala Methuen ma ke kaua o ka muliwai Rodder.

Orange, Nov. 27. Ma ka hoike a na boa i lawe pio ia o ko lakou poino ma ke kaua o Belmont he 140 a me Gras Pau he 400, a mawaena o ua poe i hopu ia he poe kekahi no ka haukipila, a ua olelo ia ae ua hakaka lakou me na pukaa.

Ladana, Dec. 1. Ua olelo ae na poe lehia hoolala kaua, ua makemake hou ia i mau kanaka ma na wahi a pau. O ke kolamu koa o Methuen ua hoemi ia kona ikaika, Ma Natal o ka puali hoi o Kenerala Clery aole ia i mahuahua loa, a o Kenerala Gataere a me French, he uku loa no ka alo ana aku i na popilikia o keia aina. Nolaila, ua manaoia, he mea pono ka hooana ana aku i ka mahele elima a me eono e ukali aku.

Ua hoopuka ae o Haku Wolseley i keia po, ua hooholo ke keena kaua e kahea i 10,000 koa no ka hoouna hou ana aku i Aferika.

He maikai ke kulana o Ladysmith ma kela Poaono aku nei, a o na puali Beritania e nee ana no ka hoopakele ana iaia, aia lakou ke hoakoakoa la ma Frere. Aia na boa ke emi hope la no Colenso. Ua manao ia e kue hou mai ana na Boa ia lakou ma ka muliwai Tugela, a he hoouka kaua hahana kai manaoia e poha ae ana i na manawa a pau ma ia wahi. O ka nui o na Beritania e komo ana ma keia hakaka ana ma kahi no ia o 18,000, a o na Boa hoi ua manao ia e kue mai ana me 20,000 kanaka.

He oia mau no Mafeking e paa la i kona kulana.

HOPUIA NO KE KUAI RAMA

Ma ka hora 2 o ka wanaao La Pule nei, ua huli ia iho la ka hale o Harvey Chase e ku nei ma ke alanui Waikiki, no ke kuai rama e malama ia ana malaila me ka laikini ole. I ka wa o na makai i komo aku ai iloko o ka hale ua loaa aku la he iwakalua poe e inu rama ana. Ua loaa pu aku maloko o keia hale he poe wahine. Ua hului@a mai lakou a pau no ka halewai. O Harvey Chase ua hopu ia oia no ka hewa kuai rama. A o na wahine opio, ua hookuu ia mai lakou malalo o ka bona o $100 pakahi.

Wahi a kekahi nupepa namu o ke kulanakauhale nei i hoopuka ae ai: Ua ala hou mai la he ninau ano i keia mau la, oia hoi he mana anei ko ke aupuni Hawaii e haawi i mana hookuleana i ka lehulehu? Ua noonooia ke ia ninau e ka Aha Kuhina.

KE HOONEE MUA LA I NA HANA

Madarids, Dec 1. Aia o Sepoia ke haka pono la maluna o na hana e nee mua la ma Gibraleta. Aia na Beritania ke hana la me ka hoomaha ole maluna o na hana like ole, a na lawe hoi i na wahi a pau e kokoke ana i ka papu. Maluna o ka puu pohaku a ka papu e ku la he nui na hana hou e pili ana no kona papu e hoonee mua ia la. Ewalu tansani ka nui o na kanaka. Ua hoolako ia oia me ka nanahu nui hewahewa e lawa ai kona mau aumokukana no kekahi mau makahiki lehulehu. Ma ka lae hema ua @kulu ia he eha pukuniahi nui o 110 tona. Ua hoopau ia aku na limahana Sepania mamuli o ka hopohopo ia o hoike ae lakou i na mea e hana ia nei.

Parisa, Dec 1. O ka Aha Ku ka Kiekie o ka OIhana Kaua Moana, ua noonoo ae lakou i ka hoakoakoa ana aku i na mokukaua e ku makaukau ana no ke pale ana aku ma ke kai Waenahonua i ka wa e lele kaua koke ia mai ai.

PAKELE MAI HOLOAIA.

Manila, Nov. 28. O ka moku lawekoa Manauense, me Lutanela Konela Hayes a me ekolu puali o ka regimana 31 maluna ona, ua hoea mai la ia ianei. A ua pakele mahunehune oia mai poino. No umikumamalua la ke ku ana o na alii a me na koa i ka liu o ka moku me na bakeke. A ua olelo ia ae he moku oia i kupono ole no ka holo hou ana maluna o ka moana. Ua poino kona eneginia, no ekolu la hoi kona loaa ana i ka makani taifuna. I kona wa i hoea mai ai, ma kahi he mau kapuai lehulehu ka hohonu o ka wai maloko o ka moku.

Ke liuliu e mai nei no kekahi poe i ka hoomakaukau ana me na moa, puua, pelehu, a me na mea e ae no ka hoea mai o ke Karisimaka a me ka Hapenu@a. Eleu no ka hoi.

ILI KA MOKUAHI KILOHANA

ILI A NAHAHA MA LAHAINA.

Aohe Ola i Poino ma ke Aumoe o ka Puaono nei.

Ma ka hoea ana mai nei a ka Mauna Kea mai na Kona mai, ua hoihoi mai la oia i kekahi mea @na o ka mokuahi poino Kilohana, ana lakou i hoike mai i ka loohia ana o ka mokuahi Kilohana me ka poino ma na kuaau o Lahaina, i kona wa e hookomo aku ana no loko oia awa, ma ke aumoe o ka po Poaono nei. Aole he i ola poino, a aia oia ke nahaha la ma o ka ulopa ia ana e ke kai.

He mokuahi hou ke a i hoea mai he makahiki a oi i @ ae nei no ka hui mokuahi o Puka ma, a nona hoi ka waiwai oo-$50,000.

EIA HOU NO KEIA POHO O AMERIKA.

Seattle, Nov. 28. Me ka ukana o ua lio a me na hoki e make iho ana a me kanalima-kumamalima mau keena i hoohakahakaia, i huli hoi mai ai ka moku lawe holoholona Vitoria no keia awa ma ka po nei, mamuli o ka halawai ana me ka ino nui mawaho aku o Lae Flattery, a ua hiki ole hoi iaia ke hoomau aku i kana huakai no Pilipine. O na lio a me ua hoki no lakou ka heluna he 410 i lawe ia aku no luna o ka Vitoria ma ka la 23 o Novemaba, he 55 i make maloko o ko lakou mau keena i ka wa a ka ino e pahola ana a o ke koena iho ua nui na palapu i loaa ia lakou ua manao ua aliimoku aole loa lakou e hiki ke hoola ia.

KE KEAKA PAELE

Ua haawi ia ae maloko o ka halekeaka Orpheum he keaka nui o kekahi poe paele o ka moku lawekoa Warren i ka po nei no lakou ka nui ma kahi o kanakolu. He nui ka lealea o ka la kou mau hana keaka, a ua pihau hoi ka hale me na poe makaikai.