Ke Aloha Aina, Volume IV, Number 50, 10 December 1898 — Page 4

KE ALOHA AINA

4                                  KE ALOHA AINA, POAONO, DEKEMABA 10, 1898.

Ke aloha Aina

Hookumuia no ka Pomaikai o ka Lehulehu a he Nupepa na ka Lahui Hawaii.

EDWARD L. LIKE.

Lunahooponopono.

EMMA A. NAWAHI.

Puuku o KE ALOHA AINA.

HONOLULU.....DEC. 10, 1898

 

UA HALA AKU NO WASINETONA.

 

            Maluna o ka mokuahi Coptic i loaa mai ai ia makou na lono e pili ana no ka hoea maalahi ana aku o Kalani Aimoku i Kapalakiko, a ma ka la 23 o Novemaba i haalele iho ai Oia no Wasinetona, a ma ka la 29 oia mahina no i koho wale ia ai, ua hiki hou aku la Kona mau kapuai i Wasinetona.  Aole oia ma ka Hotele Balauwina i pau mai la i ke ahi, nolaila, aohe hopohopo ana nona.  A o ka makou e noi ae nei i na Mana Lani e hahai mau ia Kana huakai e ka pomaikai a hiki i kona pae hou ana mai i ka aina nei.

 

MAI HOOMAHUI I NA HANA PONO OLE.

 

            He mea kahaha no ka naau ka ike ana aku i kekahi poe, e hoomahui mau ana no i na hana pono ole, oia hoi ka hoolilo ana aku i na wahi mea e loaa mai ana ma ka hana me ka ikaika ma na mea waiwai ole e pono ai ka noho ana o ka home, a e ola ai hoi ka wahine a me na keiki, oiai hoi keia mau la a makou e ao pinepine nei i ka lahui he mau la ino o ka noho ana o ka aina, he pilikia a he nele maoli no ka noho ana o kekahi poe.

            A malalo hoi oia kumu i kuleana ai na nupepa e ao aku e ao kanaka mai kakou.  He mea maikai no ke kane a me ka wahine, ka hoao ana e pakiko i na hoolilo ana o ko olua noho ana, a ke malama laua ia rula o ka noho ana, he oluolu a me ka palekana ka mea e loaa ana i ko laua, a i ole i ko lakou noho ana, no ka mea, e ike ana laua i ke alua mea pono e hana ai ke hoea mai ka wa o ka pilikia.

            I kamailio ae la makou i kekahi poe kane, a wahine e hele ana ma ke alanui me na omole ie i piha i ka bia suaipa a me ka waina ulaula, a i ka nana aku i kekahi poe, (aole no paha o na poe a pau loa) aka, o ka pee e nana ole ana i ka noho ana iloko o ko lakou mau home me ka hoomaemae kupono ole ia oia poe, na oi loa aku ko lakou paakiki mahope o na lealea mamua o ka noho oluolu ana, a mai lilo hoi ka makou ao aku, i mea e huhu ia mai ai, aka, i wahi hoi e hoonaauao iho ai i ko oukou mau lanamauao, he mea hewa keia a haalele aku.  O ka lohe ke ola, a o ke kuli ka make.

 

HE OIAIO KA MAKOU E HOIKE AKU NEI.

 

            Mamuli o na manao hoohuoi o kekahi poe, no na mea i hoike ia maloko o kekahi mau nupepa o keia kulanakauhale, no ke kumu ka i kukulu ia ai o ka Ahahui Aloha Aina e ku nei a puhi ka Paeaina, ua hoi ia mai la ko makou oluolu e hoakaka pono aku, ina paha na hoala ae ka poe nana i kukulu mua i keia Ahahui e o nei kona inoa me ka maemae a me ka aloha ia ma na wahi a pau a puni ka Paeaina, i mea kulai a hoohiolo i ke ku ana o ka Ahahui Kalaiaina, kekahi hoi o na Ahahui e paaua like nei i ka pono o ka aina a kakou i ikemaka ai, ua nee ia mailoko aku o na lima o ko kakou Moiwahine i aloha nui ia, a me kona lahui kanaka ilihune a nawaliwali.

                        Mamuli o keia mau leo nohoi, a i wahi hoi e lilo ae ai na olelo oiaio ole i hoolaha ia e pili ana no ko ka Ahahui Aloha Aina kumu i kukulu ia ai, nolaila, me ka manao maikai ke pahola aku nei makou i ka makou mau hoikeike ana no ia mea, a e kala ia mai no hoi makou, ina na lele oi loa aku ka makou mau olelo ana mamua o ka mea kupono, a na kela a me keia e kaana nona iho, ina paha oia ka pololei, aole paha.

            O ka Ahahui Aloha Aina e hoohuoi ia mai nei e kekahi poe i ke kumu o kona kukulu ia ana ae iwaena o ka lahui, aole ia iloko o ka wa e paa ia ana ka mana o ka aina iloko o ka poholima o ko kakou Moiwahine e hooikaika pu nei i ka huli ana i ka pono o ka aina i keia la, aka, i ka wa ia ua kaa aku ka mana a pau iloko o na lima o ka poe hohe wale, a na hiki ole hoi ke hoomaopopo ia, pehea la e mau ai ke aloha o ka lahui kanaka no ko lakou Moiwahine a me ko lakou Moiwahine a me ko lakou aina hanau e noho wale anei me ka hamumu o ka noho malie, a i ole, ma ka hoala ana ae paha, i wahi Ahahui e hiki ai i ka lahui ke ike mai, aia no ka he puuhonua iloko o ke Aupuni Hawaii, e holo ai a loaa ka maha o na manao i hookupilikia ia iloko oia mau la o ka ehaeha.

            O na makahiki mamua aku o ka 1893, aole he Ahahui Aloha Aina i kukulu ia ma Honolulu nei, a ma Hawaii nei a puni, aka, aia no nae he mau Ahahui i kukuluia e kekahi poe Hawaii, oia hoi na Hui Kalaiaina, Liberala, Oiwi o Hawaii a pela aku, a ua ike ia iloko o ko lakou kukuluia ana, aole ia iloko o ka huliamahi o ka lahui me ka ulumahiehie, a kakou no paha a pau e olelo ae ai, he oiaio ia mau mea.

            Ia wa, aole he wahi aweawea a hoomahui Ahahui Aloha Aina i noonooia, oiai, e ku ana ka Ahahui Kalaiaina ia wa, aole nae hoi he ikaika elike me ko ke Aloha Aina hoonea a hooakea ia ana aku imua o ka lahui, aohe Ahahui Aloha Aina i noonoo ia wa, aole no hoi he mau nupepa Hawaii i hoala ia ae ia wa, oiai Ka Leo o ka Lahui e alakai ana i ka lahui ia me ka manaoio hana no ka pono o kona Moiwahine a me ka lahuikanaka holookoa o Hawaii.

            Aka, i ka wa i kahuli ai ka mana hooponopono aupuni maluna o ka aina, mai na lima aku o ko kakou Moiwahine i ka 1893 a mahope mai oia wa, akahi no a noonoo ia e kukulu i Ahahui Aloha Aina iloko o ka hahana o na hooponopono ia ana o ke aupuni ia mau la, e ka mana kakauha o ka poai o Peresedena Dole ma, ka poe hoi no lakou ka leo hoolohe ia e na mana kanawai a puni ka Paeaina.

            A i keia wa la, akahi no a komo mai ka manao Aloha Aina iloko o ka puuwai o kekahi mau Hawaii manao makee i ka ea o ko kakou aina mai ka uuku mai a hiki i kona palahalaha ana, a me he mea la, mahope iho o ka hoea ana mai o Komisina Blount akahi no a hoonee ia aku na hoolala ana no ke kukulu ana i Ahahui Nui o ke Aloha Aina a me kona mau lala a puni ka Pae aina, ka mea hoi a makou e puana ae nei, akahi no a kohu ka inoa Aloha Aina, no ka mea, ua loaa ka mole a me ke kahua i ku ai, a makou hoi e puana a hoole aku nei i na manao koho wale o ka poe manao ino i kukulu ia ka no ke kulai ana aku i kona hoa paaua hana, oia hoi ka Hui Kalaiaina.

            E hoike aku makou, o ka hemahema a me ka hilinai ole ia, oia no ka mea nana e kulai ia Ahahui, pela no ka Ahahui Aloha Aina, ina hemahema kona mau poo, a alakai paha lakou i na hana mawaho ae o ka ka lahui mea i apono ai, e hoea mai auanei he mau mokuahana, a o ka hope aku e pololei ana na olelo a kahi poe, e kulai ia ana ka holomua oia Ahahui a lilo i mea ole.

            Nolaila, e na makamaka, ua la wa paha ka makou hoikeike ana ma keia kumuhana a kahi poe i nonoi mai ai, na makou e hoike aku i ke akea, aole oia i kukulu ia no ke kulai ana aku i ka Hui Kalaiaina elike me na lawena olelo o keia mau la, aka, no ka pono o ke kane, ka wahine a me ke keiki i kue i ke aupuni pakaha o keia mau la, ke kumu i onipaa ai kona mole a hiki i keia la pela, hoi makou i puka mai ai malalo oia pohai hookahi, no ka pono o ka aina, aole no kahi mea okoa ae.

 

I ELELE AHA NO HOI IA?

 

            I ainau ae la makou i keia, mamuli o ka paakiki o na manao o ko makou mau makamaka iloko o ka Ahahui Kalaiaina, no ka hoomau ana aku no i ka hana hoouna Elele i Wasinetona, no ke kiai ana i ka pono o ka lahui, ma ka noho ana o keia Elele ilaila, iloko o ka hotele pii o ka uku, na lilo uku moku o ka hele ana aku a me ka hoi ana mai, na lilo kauahi, a me na holoholo waiwai ole ana iloko o na wahi pana a kaulana o Amerika, malalo o ko ka lahui mau lilo, a i wahi hoi no ka lahui e ike mai ai, eia makou ke hoike piha nei i ko makou mau manao hoakaka, no na mea e hoea mai ana maluna o ka lahui ma keia huakai hele.

            Oiai, eia ka Ahahui Kalaiaina me kona mau Elele mai kekahi mau apana mai o keia mau mokupuni, ke noonoo nei no, no ka hoouna hou ana i mau Elele, a i ole, i hookahi no Elele, oia ka Peresidena oia Ahahui, no ka hoomau ana no i ka hele i Wasinetona e noho wale ai no me ka hana ole, a aole hoi ona leo iloko o ka Aha Senate a me ka hale o na Lunamakaainana, e makepono ai hoi paha ia mau dala o ka hele ana aku, ka noho ana ilaila a me ka hoi ana mai.

            Eia na lono i lawe ia mai imua o makou nei, na hooholo iho nei na Elele o na Ahahui la, a me na iaia o ka Mana Hooko, e hoahu na Ahahui Kalaiaina a puni ka Paeaina, i ka huina o $2,000, no ke ola o ka Elele e noho ai ilaila me ka hana ole.  Mamua, he oiaio o makou kekahi mea i kakoo ikaika no ka hoouna ia ana ona mau Elele mai ka lahui aku, a oiai hoi, he kumu nui no ko makou kakoo ikaika ana no ia mea, oia hoi na palapala memoriala a ka lahui.

            He oiaio, ua hookoia ko makou leo, a ua au aku la i na ale o ka Moana Pakipika, he mau Elele e lawe ana i ka lau oliva o ke ola, no keia lahuikanaka i hoopilikia ia, iloko o ke aloha o na poe ilihune, palupalu, a nele maoli no hoi o kekahi poe, i nana ole ai lakou ia mea, kapae ae i na olelo hooiloilo mahope, a o ka hopena, na hiki pono aku la i kahi i makemakeia, a ua komo aku la hoi ka lakou wahi puolo i lawe aku ai iloko o na paia anoano oloko o ka hale o ka poe Senate, a ma ia mau mei hoi, i hiki ole ai i ke kuikahi a ka Repubalika Hawaii ke holo a hiki i ka lawe maoli ana ae o Amerika, ma ka olelo hooholo bila kanawai, a pela kakou i ike ai i ka welo ana o ka hae Amerika maluna o na kapakai o Hawaii nei.

            Eia hou hoi lakou nei ke noonoo a ke hoomano hou nei ma ka hoouna ana i mau Elele, a i ole i Elele hookahi paha no ka holo hou ana i Wasinetona, a mamuli hoi o keia manao, i ulu mai ai iloko o makou na manao kanaina loa, elike me na hoakaka piha i waihoia mai imua o ko makou pakaukau nei, a ma ia ano, ke nonoi aku nei makou i na hoaloha oia Ahahui, e hoopau ae i na manao e uhu nei no ka holo ana i na aina e, a heaha hoi ka lakou, a i ole, o kana hana paha e noho ai i na aina e, e noho wale anei oia a pau keia mau tausani dala elua i ka ai, alaila kauoha hou mai ia nei e lulu hou aku na Ahahui Kalaiaina a puni ka Paeaina, oia no hoi kekahi poe aloha aina e hoomanawanui nei.

            E ka lahui, e maliu mai, eia iho a hiki aku na Elele o ka Hui Kalaiaina e noi dala no ke ola o na Elele a makou i hoike ae la, a oiai hoi, ua hoike mua aku nei makou i ka makou oleloao, he hana hookaumaha a hoopilikia hou keia i ka lahui, nolaila, mai noho a puni mai i na pepa noi dala oia ano, ua ike kakou i ka ehaeha oia mea, nana hoi i hoopau i ka manao o na Ahahui Aloha Aina e hoouna hou i Elele, a ina e hoopaakiki oukou me ka haalele ana i ka makou mau ao ana, alaila, me oukou no ia, a mai noho a hooili mai i na ahewa ana maluna o makou, oiai hoi ka makou makapeni e waele e ana i ka alahele no ka hoopakele ana ia kakou mai na pilikia mai.

            E olelo ia mai ana paha makou he hana pono ole keia a makou e hoike nei, ma ka hoemi hope ana i ka manaopaa o na Luna Nui o kekahi Ahahui e na'i nei i ka pono o ka aina, aka, ina no nae e loaa ka noonoo maikai i kekahi poe no ka huakai mua a na Elele e ike no lakou, ua hoea mai na leo o ka pilikia i Hawaii nei, a mamuli o ke alu ana o na kane a me na wahine, ua loaa iho la he puu dala nui, i hoopau ia ai ka pilikia o ua poe Elele la, a hoea hou mai ai i Hawaii nei, a pehea hoi keia e manao hou nei e hele, aole anei hoi e hiki ke noonoo pono iho, he hana pilikia maoli no keia.

            Ke hoike nei makou i keia manao, aole ma ke ano hoino pilikino aku ia poe hoaluhi o ka inea, e noho hoomanawanui nei, aka, mamuli no hoi o ka manao ana, ua lawa loa ko ka lahui kuleana e hiki ai ke noonoo pono iho i na kumu koi a ka lahui mai kinohi mai, a hiki aku la i na Memoriala hope loa a ka lahui, ma o na Komisina hooponopono aupuni la i hoea iho ne ia nei a hoi aku la.

            Nolaila, e manaoia, aohe waiwai o ka hele hou ana aku o kekahi Elele me kekahi hana ole