Ke Aloha Aina, Volume III, Number 39, 25 September 1897 — Page 6
| This text was transcribed by: | Patty Mancini |
| This work is dedicated to: | In Loving Memory of My Father |
KE ALOHA AINA
6 KE ALOHA AINA, POAONO SEPATEMABA 25, 1897
Mai ka aoao Elima mai.
I ke oki ana iho o keia, ua haawi mai la ka Rev. S. L. Desha i ka pule hoomaikai i ke Akua, me ke anoano a me ka maluhia, a hiki i ka Amene ana, a noho iho la ke anaina ilalo. Mahope o keia wa, kahea ae la ke Komite o Mr. Keawehano, i na hana o ka la, a hoomaka aku la ka nee ana imua.
Na Kekoa me Kuawehano i lawelawe i ka ohi mai i na lulu aloha a ke anaina, no na kokua o ka hale, a me kekahi mau hemahema o ka halawai. Mahope oia wa, hoolauna ia aku la na lala o na wahine, e Mrs. Nailima, ko lakou Peresidena, Ia Mrs Peresidena, Ia Mrs. Peresidena Nui, (Mrs. Campbell), Mahope o kona hooiauna ia ana aku, ku mai la oia iluna, a haawi mai la i ke aloha i na lala o ka hui o na wahine a me na mea a pau, a ua panai mai la no hoi ke anaina i ke aloha pumehana.
Ia manawa oia i haawi mai ai i kana haiolelo pokole, me ka ono loa, a penei oia i puana mua mai ai: "He nui ko'u hauoli no ko'u hui ana me oukou i keia la, a ku imua o keia anaina nui me ka maikai. Hookahi no a'u mea nui e hoike aku ia oukou, oia keia. O ke aloha no ka mea nui mawaena o kakou. E kupaa kakou no ka pono o ko kakou aina a me ka lahui, a malama i ka maluhia. Aole no au i maamaa loa i ke kamailio imua o na anaina nui e like me keia, nolaila, e kala mai no oukou ia'u." I kona hooki ana iho i kana mau olelo, ua paipai ia e ke anaina.
Ma ia wa iho, ua kono ia aku o Mrs. Nawahi. Ia wa no hoi oia i ku mai ai a haawi mai la i na kunou hoomaikai i ka Peresidena Nui a i ke anaina hoi, a hoomaka mai la oia e heluhelu i ka haiolelo maluna o ka pepa i kakauia a o kekahi ia o na haiolelo naauao, a ku hoi i ka oiaio. Pau kana me ka maikai a me ka ono ia, ua kokua aku mahope o ka laua mau haiolelo o Mr. Kekoa.
Mahope oia manawa, ua heluhelu ia imua o ke anaina ka Palapala Hoopii Kue i ka Hoohui Aina, no ke kakau inoa ana mai o na wahine, a na Mrs. Nawahi i hoakaka pono mai i na lawelawe ana e pono ai, i ka wa e kakau ai na inoa a pela aku.
A oiai, i keia manawa maikai, aia he wahine haole mai Kaleponi mai, o Miss Michels kona inoa he mea kakau nupepa, no ka Nupepa Kahea o Kapalakiko, me ka makemake e ike pono i ka manao o na kanaka Hawaii, no kela ninau o ka hoohui aina. Ua ike maka oia.
O ka ninau nui i hapaiia i kela manawa, i mea e ike pono ai kela wahine haole, oia keia "O ka poe a pau e kue a e hoole loa ana, aole e hoohui ia o Hawaii nei me Amerika Huipuia, e kau pololei na lima iluna me ke kuhi ana i ka lani." Ua pau loa ke anaina i ke kau lima, a he mau P. G. ka mea koe. Ia wa no ka mea paiku i hana mai ai i kana hana o ke pai, me ke kauoha ia o keia anaina nui, e hoomau i ke kau ana i na lima iluna, me ke kuhi pololei i ka lani, aole onioni, a pau ke pai ana, ua hookoia pela
Mahope iho oia, he mau ninau pai ku o ka Peresidena. Hookuu ia ka halawai me ke mele. "Kuu Aina Hanau e." a pule o Rev. S. L. Desha, a me le ia ke mele lahui, "Hawaii Ponoi."
KE ALOHA AINA.
Hilo Taona, Sepatemaba 11, 1897.
KA LA HEIHEI WAAPA.
He mau Tausani i hoea ae ma
na Uwapo.
Mamua o ke kani ana o ka hora 9 o ke kakahiaka Poaono nei, ua piha kui ae na uwapo me na poe makaikai o na poe lahui like ole no ka nana ana i na lealea e malamala ana maloko o ke awa, no lakou hoi ka huina i kohoia ma kahi o umi tausani, a ma ka hora 9:55 i kani mai ai ka pu no ka hoomaka ana o na heihei, a penei hoi ka papa kuhikuhi o na heihei a me ka poe i komo:
1.--Heihei Mokukiakahi. Makana mua $50, elua $40.
E hoomaka ana mai ka pahu holo no waho o ke awa mawaena hoi o na hoe, e haalele ana i ka hoe Bele ma ka aoao hema, alaila, poai puni i kekahi waapa me ka hae mawaho o Waikiki, a holo pololei no lalo o Puuloa, a poai puni i kekahi waapa me ka hae mawaho olaila, hoi mai no ka pahu eo.
O na maku i komo ma keia heihei, Hawaii, Bonnie Dundee a me ka Waapa Pailata Helu 2.
Ua lilo ke eo o keia heihei ia Bonnie Dundee, me ka ukali koke mai o Hawaii mahope ona, a o ka awwpa pailata hoi, ua haawi pio oia, mamuli o ka ikaika ole o ka makani.
Manawa i holo ia, he 5,42:46.
2.--Heihei Waapa eono hoe. Makana $40.
E hoomaka ana mai kahi aku o na Lunakanawai no ka hoe hele a hoi mai i kahi o ka heihei.
He elua no waapa i komo ma keia heihei, o ka Matala a me ka Healani, ua lilo ka eo i ka Matala me ka hahani no hoi o ka Healani mahope ona.
Manawa i holo ia e ka Matala 12:56, Healani 13:19.
3.--Heihei Mokukiakahi papa elua Makana mua $40, elua $20.
E hoomaka ana mai ka laina heihei aka a holono waho o ka awa mawaena o na hoe, haalele i ka hoe hele ma ka aoao hema, poai puni a hoi mai no ka pahu eo.
O na moku i komo oia o Clyttie, Pokii, Edith L. Beninetona, a me Abbie M.
Aole maopopo ka mea i lilo ai o ke eo, no ka mea, ua olelo na Lunakanawai, e hiki mai na moku maloko o ekolu hora, aka mamuli o ka makani oe, ua hoi mai na moku me ka pau pono ole o ko lakou wahi e holo ai. o ke Clyie nae kai holo a hiki i ka pau ana o na wahi e holo ai me ka haule ana mahope o ekolu hora, a me he mea la e heihei hou ak uana lakou ma keia mua aku.
Manawa i holo ia e Clytie, 4 11:45
4.--Heihei Waapa umi hoe. Makana $50. Ua like kahi e holo ai me ka heihei elua.
O ka waapa o Beninetona a me Comus kai kom ma keia heihei.
Ua hooikaika na aoao a elua e lilo iaia ka kamakila, a ua manao ia a make ana i ka Pelekane, aka, i ka hoi ana mai nae, ua lilo ke eo i ka waapa Amerika.
Manawa holo o Beninetona 29:29, Comus 31:16.
5.--Heine Tabu. Makana $5.
E hoomaka ana mai ka uapo mai o Eleu a hiki @ o na Lunakanawai.
Na poe i komo, W. F. Love, H. A. Giles a me Cupid Kalanianaole.
He hookahi wale no kanaka i hoea mai ke tabu, a mahope o kona hoe ana mai ka uwapo Pakipika aku a hiki i kahi o na Lunakanawai iloko o elima minute, ua lilo iaia ka makana o $5.
6.--Heihei Au, (100 i-a). Makana Medal.
O na poe i komo. A. Harris, D. B. Renear a me Kimokea.
Ua lilo ke eo o keia heihei ia Kimokeo, me ka ukali mai o Renear, ka haole kaulana o Amerika ma ka au, ua hoopahaohao ia oia ma keia haule ana, no ka mea, ua komo oia ma na heihei au nui ma Kikako a me na kapakai o ka Moana Pakipika ma Amerika, akahi wale no oia a haule ma Hawaii iho la.
Manawa i au ia e Kimokeo no 100 i-a 1,25
7.--Heihei waa eono hoe. Makana mua $15, elua $5.
E hoomaka ana ma ka pahu aku, a holo no ka hoe ulaula mua ma kia aoao hikina o ke awa a hoi hou no ka pahu eo.
O na waa i komo, Kakaake, Honuakaha, Pakaka Nalu a me Kauaheahe.
Ua huikau keia poe waa ma ka hoohuli ana ma ka hoe ulaula, aka, mamuli o ka eleu o ko lakou mau hookele waa. ua hemo mai lakou a lilo ae la ke eo ia Honuakaha me Kakaako helu 2.
Manawa holo o Honuakaha 6:20, Kakaako 6:24.
Ua komo like mai o Kauaheahe me Kakaako a ua manao na Lunakanawai e haawi i $5 makana iaia.
8.--Heihei waapa lawaia o na Iapana Makana $10. E like no me ka heihei ehiku.
O na waapa i komo, Naniwa. Fuji a me Yokohama, a me kekahi waapa okoa ae.
O ka makamua loa keia o neia ano heihei i ike ia ma Honolulu nei, a he okoa loa no hoi mai na heihei waapa maoli ana, he ekolu ka nui o na hoehoe o keia ano waapa, he ekolu ka nui o na Iapana e uneune ana i keia poe hoehoe, me hookahi Iapana kokua mawaho ae o lakou, i ka wa e maluhiluhi ai o kekahi o lakou. Ua lilo ka eo i ka waapa Helu 3 elua Helu 2.
Manawa holo Helu 3, 8:51, Helu 2, 8:54
HOOMAHA ANA.
Mahope o keia heihei i hoomaha ai ka heihei ana, a ike ia aku la he kaoo nui o na kane, na wahine a me na opio e hoi ana no na hale aina, no ka hoopiha ana i ka lua o ka inaina, a ma ka hora i o ka auina la i hoomaka hou ai heihei.
9.--Heihei elua hoe. Makaua $10
E like no me ka heihei ehiku.
O na waapa e komo ana, Honolulu Minnie, Every Time a me Adimarala,
Ua lilo ke eo o keia heihei ia Minnie. Manawa 8:28.
10.--Heihei Luu aho loa no kekahi mau kapuai he $5.00
Na poe i komo, H. Santrom O. J. Whitehead, Kina a me Kona Bay.
Ua lilo ke eo o keia heihei i ke keiki o KOna, nona ka mamao ana i aho loa ai he 100, a o Kina he 80 kapuai
Manawa i luuia he 39 sekona.
11.--Heihei waapa eono hoe. Makana mua $30, elua $10
E like no me ka heihei elua.
O na waapa i komo, Kapiolani, Kanoelani a me ka Beninetona.
Na na makai i hoe ia Kapiolani, a o na poe Pelekane ia Kanoelani, a i na poe hoi o ka Beninetona ka waapa o ke Keena o na Aina E, ua kaa ka lanakila i na makai, a o na Pelekane hoi ka helu elua.
Manawa holo o Kaiolani 27:13, Kanoelani 27:56.
12.--Heihei Au hapalua mile. Makana Medala.
O na poe i komo. Pikalo-J. Marshall, E. Fiorell, W. W. Scotte C Mayne Gillman a me N. Jackson.
Ua lilo ka eo o keia heihei au ia Mayne, helu elua Gillmana.
Manawa Mayne 15:37, Gillmana 15:57
13.--Heihei waapa o na mokuahi. Makana mua $25, elua $15, ekolu $10
E hoomaka ana mai ka laina heihei aku no ka hoe a piki a hoi mai.
O na waapa i komo, Kinau, Kilauea Mokolii a me Helene.
Ua lilo ke eo o keia heihei i ka Helene.
Manawa holo 17:48, Kinau 18:26.
14.--Heihei waapa lawaia Pake Makana $10
E like no me ka heihei ehiku
O na waapa e komo ana, Haka. Ponokee a me Yukon.
Aohe maopopo o ka inoa o ka waapa aka, ua make nae i na poe o ka waapa o Ah Sam, a me Lun Kee helu elua
Manawa Ah Sam 6:35, Lun Kee 6:40.
15.--Heihei waapa eha hoe. Makana mua $30, elua $10.
E hoomaka ana mai kahi aku o na Lunakanawai a ka hoe a piki hoi mai no ka pahu eo.
O na waapa e komo ana, Matala, Healani a me Leilani.
Ua lilo ka eo o keia heihei i ka Leilani me ka pili loa o ka Healani mahope ona.
16.--Heihei waapa huelo hou. Makana mua $30, elua $10.
E like me ka heihei elua.
O na waapa i komo ma keia heihei, Kahilu a me Waapa Pailata Helu 2.
Ua lilo ke eo ia Kihilu. Manawa i holoia, 31:19; Pailata 31:49.
17.--Heihei Waa Pe'a. Makana mua $15, elua $5.
E like no me ka heihei ehiku.
Na waa i komo, Kakaako, Honuakaha, Moanalua, Kahauiki a me Kauaheahe.
Ua lilo ke eo o keia heihei ia Kakaako me Kauaheahe mahope ona. O laua na waa i komo hope loa aku, ua komo mua aku na waa a pau, mamuli o ko lakou hoe ana me ke ake e hiki koke i ka pahu eo, ua lilo ke eo i na waa hope loa, no ka mea, aole laua hoe.
Manawa holo o kakaako 28 minute.
18.--Heihei waapa eono hoa. Makana $25.
E like no me ka heihei ehiku.
O na waapa e komo ana, Carl W., a me Alice M.
He elua manawa i heihei ai o keia mau waapa, o ke Carl W., na keiki e ka Leilani e hoe ana, a o ka Alice M i na keiki o ka Matala, ua nui na hoopaapaa i ulu ae mawaena o laua, mamuli e ka pololei ole o na hana a na keiki o ka Matala, a nolaila, ua hooholo na Lunakawai e heihei hou laua ma ka hora 5:30 o ka auina la Poakolu mamuli o ka poeleele ke kumu i hoopanee ia ai o keia heihei.
HE OPIUMA ILUNA O KE KAA.
Ma ka hora i o ka auina la Poakolu nei, oiai o Charles Chillingworth e hele ana ma ke Alanui Moi, ua ike aku la oia i kekahi pake holoi lole nona ka inoa o Chin On, e kalaiwa ana i kekahi kaa huila lua i piha o luna me ke lole e huki la ana hoi e kekhi lio eha.
Ua hopu koke ia oia a lawe ia aku la no ka halewai, ua lawe ia ka ukana e kau iluna o ka halewai, a i ka wa i la ia aku ai o ka lole iluna o kekahi pakaukau mailoko aku o ke i-e, ua loaa aku la he 20 @ini opiuma helu ekahi, e waiho ana iloko o ua i-e la. Ua hela koke ia no o Chin On, he $500 e kekahi o kona mau hoaloha waiwai.
KALEIPUA PUHIULA KANOA
Ma keia ahiahi i manele ia aku ai ke kino wailua oia makuahine Aloha Aina o ka lahui. Kaleipua Puhiula Kanoa, mai kona home mai ma Koula a ka Ilina o Kawaiahao, ua hoohanohanoia ae kona huakai hope loa e ka Peresidena Nui o ke Aloha Aina, a ua nui na poe Aloha Aina i hoike ae i ko lakou paumako no ia makuahine kupaa o KE ALOHA AINA kekahi iloko oia luuluu.
HE AA HUKI KAULA.
Ua aa na poe hukihuki kaula o lun ao ka Beninetona no ka huki ana me na poe o luna o ka mokukaua Piledelepia, a i ole, me na keiki hoehoe waapa o ka uwapo, a i na e ae aku ana kekah o keia mau hui, alaila, e malama ia ana ka hukihuki kaula maloko o ka halekeaka lio o Bristol, ma ka po o ka Poaono, Okatoba 2.
Maluna o ka Auseteralia i huli hoi aku ai na Lunamakaainana eha me ke koe iho no o Senetoa Mogana a mahope aku nei oia e hoi ai.
Ua hala aku o Ilamuku Baraunu, no ka huli pono ana i ke kumu i make ai o na kanaka elua, i halawai ai me ka ulia poino i ke kuahiwi, ma ka Poaha nei.
He eono poe Pake kalewa mea ai hopu ia no ka hoomainoino holoholona, mamuli o ko lakou kapili ole ana i mau kamaa hao no na wawae o ko lakou mau lio, ma ke kakahiaka Poalua nei.
Ma ka po o ka Poalua nei, ua haawi ia ae ma kahi o Keoni Kamaki haawi ia ae ma kahi o Keoni Kamaki ma Pauoa, he aha huli Hawaii, a ua hoea aku na Lunamakaainana malaila, no ka makaikai ana i ka hula Hawaii.
Ma ka Poalua nei i haalele mai ai keia ola ana o Mrs. Kaleipua Puhiula, ma kona home noho ma koula ae nei, mahope o ka hoomailo loihi ana a ka ma'i maluna o kona kino. Aloha wale na makuahine o ka lahui Hawaii e hele lei liilii nei. Ke komo pu aku nei KE ALOHA AINA iloko ona kumakena pu ana me kona ohana.