Ke Aloha Aina, Volume I, Number 32, 28 December 1895 — Page 5
| This text was transcribed by: | Linda Victor |
| This work is dedicated to: | Awaiaulu |
KE ALOHA AINA
KE ALOHA AINA, POAONO, DEKEMABA 28, 1895
@
i ol o Kamehameha III a hiki i keia wa a Amerika i hana hewa ino loa ai, alaila, aole oia e ae e hana kuikahi me Amerika.
----------------------------
NA HANA KUPAIANAHA
-------------
I ko makou huli pono ana ae i hope, a hoomaka mai ka la 17 mai o Ianuari 1893, loaa pono iho la ia makou ka heluna a me na inoa o na poe i hoike ae i ko lakou mau manao apono i na hana pakaha ia Hawaii nei.
A o ua poe ala, ua hoopai mai la ke Akua ia lakou, me na haawina o ke kulana mainoino, i kau mai maluna ponoi o ko lakou mau kino iho, i hoahewa ia a pepehiia e ko lakou kou mau lunaikehala iho.
O ka mua loa, oia o Kapena Wiltze o ka moku-kaua Boston ka mea nana i kokua i na hana kipi a ko Hawaii nei poe haole. Pehea oia? A heaha kona hopena? Ua hoi aku oia me ka manaolana haakei, i Amerikam me ka manao, e loaa iaia na hoomaikai ana mai he nui wale, no ka holopono ana o kana hana kokua kipi ma Hawaii nei, a me ka manao haakei, nana i huki ae i ka hae Hoku o Amerika maluna o ka Hale Aupuni o Honolulu, ke Kapitala o ke Aupuni Hawaii.
Aka, heaha la ka hopena? I kona wa i lohe ai, na hukiia ua hae Hoku Amerika la ilalom ia wa, ua lele koke ka hauli, aole i liuliu a make koke aku la oia! oia ka make mua i loko o na hana powa ia Hawaii nei.
Owai aku mahope ona? O John L. Stevens, ke Kuhina Amerika nana i kauoha ia Kapea Wiltze o ka Boston, e lele mai e kokua i na poe kipi hookahuli aupuni.
Pehea oia? A auhea oia? I kona wa i lohe ai, ua apono ka Hale Ahaolelo Lahui i ka manao hoike a ke Komite e pili ana no Hawaii nei, ua lele ae la kona hauli a mahope, make koke aku la oia.
Ua ikaika ka hoahewa ana o ka manao o kona lunaikehala iloko ona, a o ka hopena, ua haule a make aku la oia me ka hoao ole e ai i na hua pea ana i olelo ai, ua pala a o ka manawa kupono keia e uhaki mai ai.
O keia ka elua o na mea i make aku, i komo hohonu maoli, iloko o na hana powa ia Hawaii nei.
O ka ekolu oia no je kaikamahine ponoi a ua John L. Stevens nei, i make mainoino ai ma kela awa pali kahakai o Kukaiau, a hoihoi ia mai ai kona kino make maluna o ke Kinau i Honolulu nei.
He kokua nui kela i ka oihana kakauolelo a kona makuakane, a ua hele o ia ma Hamakua e hooikaika ana no na hana hoohui aina ect. ect. A ua hala aku oia mamua o kona luaui.
O ka piha ana o hookahi kauna, oia no keia wahi haole, hookano i haiolele ai ma ka Independence Park, ma ka la 4 o Iulai, 1895, aku nei, a papa loa ia ai e ke Kuhina Willis e n. ho ilalo. No ka mea, mau olelo pili kalaiaina kana i olelo ai ia la, e hoahewa ana i na hana a ka Aha Kuhina o Cleveland, o kona inoa o Joseph Cook.
Ua holo aku kela no Kina, a ilaila ia i noho mai nei, a ma ka mokuahi China o ka Poakolu aku la i hoi mai nei no ka Home. Ua nele oia i na noonoo maikai ana, a ua ano pupule paha; mamuli o kona hilahila i kela papa ia ana ona ma Honolulu nei. Ke hoi nei oia he kino olulo uhane noonoo ole, a ua hoomakaukau e ia no kona pahu kupapau me na lako ialoa, i ole e kiola ia kona kino iloko o ka opu o ka moana.
O keia kekahi o na haole makemake loa e hoopauia ko Hawaii noho Aupuni Kuokoa ana, aka, ke hoi nei oia he kino ua make e no i kona wa e ola ana.
=====================
Nuhou o na Aina E
----------------
Ma ke ku ana mai o ka mokuahi Monowai mai Kapalakiko mai ua loaa mai na mea hou a hiki i ka la 12 iho nei o Dekemaba. Ua hala kona la i manaoia ai e ku mai ana i ka Poaha, a no ka uhipaa ia o ka aina e ka hau, nolaila, ua ulolohi kona ku ana mai.
KA HAIOLELO A PERESIDENA CLEVELAND.
He eiwa kolamu a me ka hapalua o ka nupepa Chronicle i piha pono i ka haiolelo a ka Peresidena Cleveland, a no ka loihi launa ole mai, aole a hiki ia makou ke unuhi pau aku i keia wa, aka, e hoikeike e aku ana makou i ko makou poe heluhelu i na mahele apana i hoakakaia maloku o na haiolelo la. A penei na mahele ano nui ana.
1. Na olelo wehe mau o na aholelo e pili ana i na manao o ka Peresidena e waihola aku ana imua o na hoa o ke Senate a me ka Hale Makaainana..
2. Na mea pili i na Aupuni Repubalika o Amerika Hema.
3. Na launa pili aupuni ana me Kina a me Iapana.
3. Na hoomaopopo hou ana i ka hihia o Waller kela haole i hoopaa ia ai e na mana o Farani ma Madegaseka.
5. Na hoike o ko Farani manao maikai.
6. Ko Amerika mau pono me Geremania.
7. Ke kalepa pili Lahui.
8. Na manao like ole me Enelani.
9. Na Koi poho a Beritania ia Amerika.
10. Na Palena aina o Alasaka.
11. Na palena e pili ana ma na Lokowai, mawaena o Amerika Huipuia a me Canada.
12. Ka hoopaapaa aina mai Venezuela.
13. Na nanehai o Hawaii.
14. Na aelike hana me na poe malihini.
15. Ka holomua o Iapana.
16. No Mekiko a me Guatemala.
17. Ka pilikia ma Nicaragua.
18. Ka noho launa ana me Rusia.
19. Ka ninau no Samoa.
20. Ka poe kipi ma Cuba.
21. Na mea pili i na poe malihini.
22. Ke kulana o Tureke.
23. Ka malama ana i na Amerika.
24. Ka uwao ana no Venezuela.
26. Na lawelawe hana ana a na Kanikela.
26. Ka papa ninaninau.
27. Na wahi noho o na poe Emabasadoa.
28. Na waiwai o ka lahui.
29. Na Greenback (na dala pepa).
30. Hoopau ana i ka papa ana aku.
31. Na dala gula hoomoe.
32. Ka emi ana o na dala hoomoe.
33. Ka haule pu ana o na Bona Hoola.
34. Ke Hui Hoolako Dala Kaulana.
35. Na Banako Lahui a me Mokuaina.
36. Na mea kupono i hoomaopopoia.
37. Na huikau o ke ana dala.
38. Ka ninau dala silava,
39. Ke kue i ka hana dala akea ana.
40. Ke ana kaulike o keia wa e noho nei.
41. Na olelo hoopau e pili ana i ka hana dala ana.
KAHEA IA KA AHA KUHINA.
E olelo ana ka nupepa Call o ka la 12 nei, ua kahe ia aku o Peresidena Cleveland e hoi mai i ka Hale Keokeo, ma Wasinetona, a ua manaoia e hui ana ka Aha Kuhina ma ke Poakahi ae, e noonoo ai no kekahi mau mea ano nui loa i manao ia ai e noonoo ia ana ia wa, oia no ka olelo pane mai a Haku Salisbury e pili ana no ka hoopaapaa ma Venezuela, a me hoopaapaa ma Venezuela, a me ka hoike a Carlisle, ke Kuhina WaiWai. Ua manao ke Kakauolelo o ke Keena Waiwai, ua hiki ole ke waiho aku i ka hoike i ka ahaolelo Lahui, aia a pau pono i ka hoomaopopo pono ia a apono ia e ka Peresidena.
_________________
Ma ke ku ana mai nei o ka Monowai i lohe ia mai nei, aia na keiki o ka Bana Lahui oia Kokomo, Iniana.
HE A ʻ O WALE ME KA UKU OLE.
_____________
Ua lawe ia mai kekahi olelo kukala akea aku e kekahi kumukula malalo o ka Papa Hoonaauao; e hoike aku ana penei.
Ma ka hora 7 p.m. o ka la 6 o Ianuari 1895, e wehea ana he manawa a ʻ o kula, me ka uku ole maloko o ka halekula aupuni ma Keleaka, kini o na alanui Pau a me Kula.
O na poe makemake e hele e ao ia, ua wehe la ka puka, a e hele aku i loaa ka Ike.
MA KE KAUOHA
------------------------------
KE ANAINA HOOLAUNA O SA NA ANARU
______________________
Ma ka hora 7:30 o k Poaono aku nei, ua piha ae he anaina mahuahua aloko o ke keena hoike o na Kaikamahine o ke kula no ka hoolohe ana aku in haawina hana, e like me ia i hoolaha ia ma ka Papa - Kuhikuhi hana.
Ua maikai na hoike hana a pau, pela na himeni ana a me na kokua hookani pila; a ua hoohauoli ia na mea a pau, no ka maikai o na mea a lakou ni lohe ai. A i kela auina la Poakahi, i haawi hou ai lakou he aha hoikelike no na poe i koe aole. I hiki ae ma ka po Poaono nei.
_________________
HOPUIA KA OKU KUNA - HENRIETTA.
__________________
Ma ka po o ka Poaono nei, mawaho aku a Waianae, ua hopuia ke moku kuna Henrietta mai Victoria mai, ua haalele ia wahi ma ka la 7 o Nowemaba, a ike ia Molokai ma kela Poalina aku nei. He elua ae nei pule o ke kalewa ana ma ka moana.
O,W. R. Anderson ke kapena o ka moku, a he ekolu haole kolu o luna no lakou ua moa, Mike Connel, H.W. Wheelwe, J.H.nBrown a me Ho Wai (he pake kuke) a me C.E. Gale ka ohua o luna.
I ka wa i bullits ai ka moku, he 500 galani wai a me na lako ai; a he 1400 paoa ioiums maluna ona. Eia ka moku ke paa ia nei malalo o na lima o ke aupuni.
He hana maumaua loa keia o ka hoopae opiuma mai mua mai, a ua pau pu kekahi poe o ka aina nei iloko o kela bana imi dala.
_____________
Hopuia no ka Aihue
_________________
O Mr. V Lee, kekahi haole, o ka Puali o ke Ola, e ike pinepine ia ana ma na huina alanui o keia kulanakauhale nei, e haiolelo ana, a e pule kukuli ana, ua hopuia ma ke ahiahi Poaono nei, no ka aihue ana he huina nui loa o na pa ka siga a me sikalika mai kekahi wahi halekuai paka aku e ku nei ja ke kihi o na alanui Moi a me Betela.
Ke ike mai ia oukou, eia hou neia wahi haole, mai e lawelawe no ka Puali o ke Ola: Aka, he puali okoa kana i hookauwa iho lm, o ka Puali o Diabolo. A ei iloko o ka halepaahao lawehala ia e noho mai nei. Pehea la keia? E ala hou mai ana no paha auanei o Keaulanaakalani ia makou! Ua hoopaila oia ma ka Poakahi nei, he 4 mlm ma ka hana oolea a me $5 koin.
______________
E hele hoi oukou i ko I. B. KERR Halekua Nui oia ke Alanui Moiwaine. O ka poe kuai nui a elima dala ka lilo, e loaa ke kikiki no ka makana Piano. Laki loa ke lilo mai ia kakou.