Ke Alaula, Volume VI, Number 1, 1 April 1871 — Page 4
4 KE ALAULA.
UA LOHE AU, HE LEO HOU.
Leo: "I HEARD A VOICE, THE SWEETEST VOICE."--Songs of Gladness.
Ua lo-he au, he lo-o hou, He le-o mai-kai e! No Ie-su mai ia le-o nei. E pai-pai a-na no. Ma-lu-na o'u e le-le-pau, a pau na he-wa o'u. A o-li no ko lo-ko o'u, He o-li o-kou nei.
2. Ua ike au he ano e,
He ano maikai nae,
Iini au e apo ae,
A maha olu mai.
HUI--I olu ia, "e hele mai,
A na'u e hoomaha 'e,
E mihi me ka hilinai,
A maha pomaikai."
3. Ua uluhia kuu naau,
I ua aloha nei,
Pilikia ia hoolana ia'u,
A pau kuu kuihe.
HUI--Ua kau ma kona mau wawae
Kuu hewa, kuu luuluu;
Ua hookauia kou mai aie,
Wahi a kuu Iesu.
4. E Iesu e, e mele au
I kou aloha e,
E mele ma na la a pau
A pau kuu ola nei.
HUI--Alaila pii a mele pu
Me lakou ma ke ao,
A hoomaikai a halelu
I ka Mesia mau.
IE SU IMUA O PILATO.
I ka wa i hopuia'i o Iesu e na koa Roma, ma ka mala o Getesemane ua alakai mua lakou iaia a imua o Anasa, ka makuahonowaikane o Kaiapa. Mai laila aku ko lakou alakai ano iaia a imua o Kaiapa ke Kahunanui. A i ka wanaao, kai aku la lakou ia Iesu a imua o Pilato ke Kiaaina. Hoouna aku la o Pilato iaia a ia Herode, a hoihoi hou mai la o Herode iaia a imua o Pilato. Hookolokolo no hoi o Pilato iaia a loaa ole kona hewa, i aku la oia i na Iudaio, "Aole i loaa ia'u kekahi hewa iki iloko ona." No ke koi loa nae o na Iudaio, ae wale aku la o Pilato i ko lakou manao. "Alaila lalau ae la o Pilato ia Iesu, a hahau iho la iaia. Ulana iho la na koa i leialii kakalaioa, a kau aku la maluna o kona poo, a kahiko aku la iaia i ka aahu ulaula, I aku la, 'Aloha oe, e ke Alii o na Iudaio!' a papai aku la lakou iaia.
Hele hou mai la o Pilato iwaho, i mai la ia lakou, 'Aia hoi, ke alakai mai nei au iaia iwaho i o oukou la, i ike ai oukou, aole i loaa ia'u ka hewa iki iloko ona.'
Alaila hele mai la o Iesu iwaho, e kau ana maluna ona ka leialii kakalaioa, a me ka aahu ulaula. A i aku o Pilato ia lakou, "Eia hoi ke kanaka!'
HE MEA HAIOLELO KA HALE.
Pehea la e lilo ai ka hale i mea haiolelo? wahi a kekahi. Penei. Ke i mai nei ka pohaku kihi, "O Kristo ka pohaku kumu o ke kihi." Ke i mai nei ka puka, "O Kristo no ka puka e komo aku ai i ke ola mau loa." Ke i mai nei ke kukui, "O Kristo ka malamalama o ke ao nei." Nana aku oe iwaho o ka puka a ike aku i na hoku e kau ana i ka po, ke i mai nei lakou, "E nana aku oe ia Kristo, ka Hokuao nani." A puka mai ka la, ke i mai nei oia, "E paulele aku oe ia Kristo, ka La e ola'i." Ina e ai oe i ka berena, e hoomanao oe, na Kristo e haawai mai i ka berena e ola mau ai. Ina e inu oe i ka wai, ke i mai nei oia, "Na Kristo e haawi mai i ka wai o ke ola." I kou wa e moe ai, ke i mai nei ka moe, "E hoomanao ia Kristo, aohe ona wahi e hoomoe ai i kona poo." I ala ae oe i kakahiaka, e hoomanao oe o Kristo ke alahouana a me ke ola.
HE KEIKI ALII MALAMA PONO I KA LA SABATI.
Iloko o ka makahiki 1860, ua hiki makaikai aku ma Atenai, ka Haku Alii Alafarede, ka muli iho o na keikikane a Victoria, ka Moiwahine o Beritania. A ua hoomakaukau mua ko Atenai poe i kekahi mau hana hoolealea no ka lehulehu ke hiki ae ua Keiki Alii nei. O ka heihei lio kekahi hana a lakou i hoomakaukau ai. A ua hoonoho mua ia he Poakahi ka la no ia hana. Loheia nae aole e hiki ana ua Keiki Alii nei a i ka Poaono paha, ua hoopaneeia ka heihei lio a i ka La Sabati aku e heihei ai, me ka manao o ua Keiki Alii nei kekahi malaila. Haiia no hoi ia Alafarede, o ka La Sabati ka la heihei lio, hoole koke aku la oia, "Aole hiki iaia ke kokua aku i ka hana heihei lio ma ka La Hemolele o ka Haku." A nolaila ua hoopanee hou ia a Poalua ae. Mahalo nui ia ke Keiki Alii malama pono i ka La Sabati.
I EHA MAU MEA HOOMANAO MAU.
1. Ua make o Iesu nou.
2. Pono e aloha aku oe ia Iesu.
3. Pono e hoolilo loa oe ia oe iho no Iesu.
4. Ina e aloha aku oe ia Iesu, a e lilo loa oe nona ma keia ao, alaila i kou wa e make ai, e ola mau loa oe me Iesu ma ka lani.
MA KA HANA KA LOAA.
Ua hoonoho ke Akua i na laau nui iloko o ka ululaau. Ke i nei oia i kanaka, "Aia ko oukou mau hale. Na oukou nae e kua i na laau, e kalai, e olo, a e kapili." Aole e loaa ka hale ke ole e kukulu ke kanaka. Pela hoi, na ke Akua i hooulu i na laau, na kanaka nae e hana a loaa na moku. Na ke Akua no i kanu i ka hao iloko o ka honua. Na kanaka nae e eli, a hoheehee, a kui iho. O na pono a pau no ke kino, ma ka hana e loaa ai. Pela hoi na pono naauao a me ka ike; ma ka hooikaika ana i ka noonoo e loaa ai. Na ke Akua i haawi mai i na pohaku. Na kanaka nae e kalai a hoomaikai. Na ke Akua no i haawi mai ka pulupulu a me ka hulu hipa. Na kanaka nae e ohi i ka pulupulu, a e ako i na hipa, a e milo, a e ulana, a oki, a humuhumu, alaila loaa na aahu. O ke kanawai no ia a ke Akua: ina e makemake ana kakou i kekahi pomaikai, ma ka hana e loaa ai.
"AOLE E IMI ANA I KONA IHO."
Ua mele pinepine paha kekahi poe keiki o oukou i kela mele,
"Hoao kakou i like
Me ko kakou Iesu."
A pehea? Ua makemake io anei e hoohalike me Iesu? Ina pela, eia kekahi ano o Iesu. Aole oia i imi wale i kona makemake iho, a i kona pono iho. Imi mau oia i ka pono o hai, a hooikaika mau hoi e hooko o i ka makemake o kona Makua. Aole i manao i ka luhi a i ka pololi, a i ka pilikia, aka ua hoola i na mai, hanai i na pololi, a kokua i ka poe pilikia. Pela kau e hana ai ina ua makemake oe e hoohalike me ia. E haawi oluolu i kou manawa, a me kou ikaika, a me kou waiwai e kokua i ka poe nele, a pilikia paha.
E KE ALAULA--Aloha oe:--He wahi manao ko'u i na hoa heluhelu o ko kakou wahi milimili, e kau amoamo ana ma ka pawa o nei one hanau a kakou. He mea hoonaauao; he leo paipai e kahea mau mai nei i kela malama keia malama; he nani na moolelo pokole e puka mau mai nei, i mea e ao oluolu mai ai ia kakou; he kupono no na elemakule; he kupono no na pokii; a he oluolu loa no ke kumukuai--he wahi hapaha wale no. Nolaila, e na hoa, e makaala kakou a e hoomakaukau e mai i na wahi hapaha a kakou, i ola ko kakou wahi milimili. Pela e pale ai kakou i ke kaumaha o ka poe pai kii, a i ka pololi o ka poe hoonohonoho kepau, a e hoohauoli i na naau o na luna hoopuka.
KAHU KULA SABATI.
I KA LUNA HOOPONOPONO O KE ALAULA--Aloha oe:--Ke kokua aku nei ke Kula Sabati o Wailuku, mokupuni o Maui, i ka haina o ka ninau a ke Kula Sabati o Kawela, Molokai, i paiia ma ka aoao mua o ka Helu 11 o ka malama o Feberuari i hala iho nei, penei: "Heaha la na makamua o ka hewa?" Eia ka haina a ke Kula Sabati o Wailuku: "He hoomaka ana o ka hewa e ulu iloko o ka naau o ke kanaka." O keia iho la ka haina i manaoia. Me ka mahalo.
Na Komite. W. NEHEMIA,
G. H. E. KEAUIAOLE.
Wailuku, Maui, Aperila 4, 1871.