Ke Alaula, Volume VI, Number 1, 1 April 1871 — Page 2

2 KE ALAULA.

KE ALAULA,
He Nupepa Hoikeike Kii,
Hoopuka mau ia ma Honolulu, i kela malama keia malama e ka PAPA HAWAII, no na Kamalii Hawaii.

                25 keneta ka uku no ka makahiki no ka papa hookahi; 20 keneta pakahi ka uku no na pepa he iwakalua a oi aku paha ma ke ope hookahi, ME KA HOOKAA MUA IA MAI.
A. O. POLEPE, Luna Hoopuka.

                E na pokii, a me na makamaka heluhelu ALAULA, aloha oukou. Ua pau aku nei ka Buke Elima o ko kakou wahi pepa nei, a ke hoomaka nei ka Buke Eono. O ka Helu Akahi keia o ka Buke Eono.
                Iloko o ka hapa hope o ka makahiki i kaahope ae nei, ua loaa i ke ALAULA kekahi mau pilikia e alaiia'i kona puka pono ana i ka hebedoma mua o ka malama. A nolaila, ua hoololohi loa oia. Aole nae na ka poe pai ka hewa, aka ua loaa i ka Luna Hooponopono nana e hookele kahi waa o kakou, kekahi mau keakea nui ma kana hana. No ka mea, ua hahau mai ke Akua i kona ohana i ka mai pilikia loa, a ua waiho kekahi lala o ua ohana nei e aumeume ana me ka make iloko o na malama okoa elua. A nolaila, ua lilo ka manawa a me ka ikaika a pau o ka Luna Hooponopono i ke kiai ana, a me ka malama ana i ua wahi mai nei, i ke ao a i ka po, no ia mau hebedoma ewalu. Ma ka lokomaikai lua ole hoi o ko kakou. Makua ma ka lani, ua ola hou kana wahi kaikamahine opio, a ua loaa hou mai me he mea la i hoalaia mai ka make mai. A ke hoonani aku nei makou i ke Akua no keia hana kupaianaha ana i hana ai.
                Eia nae; iloko o ia manawa kupilikii, ua haule na hana e ae a pau i ka hope waa, koe hookahi wale no, o ka make a me ke ola o kahi keiki. A nolaila, o kahi pepa nei a kakou kekahi i emi i hope, a lohi loa kona puka ana. A ke hooikaika nei makou e hoihoi aku iaia i kona kulana mua o ka puka pono ana i ka hebedoma mua o kela me keia malama. Mai paupauaho hoi oukou a kanalua hoi. Ke manaolana nei makou, e holo ke ALAULA ma keia mua aku.

KE KUHINA NOHO KAULANA.

                He kanaka kaulana o Ioane Kuineki Adamu no Amerika Huipuia, i kona wa e ola ana. I kekahi wa ua lilo oia i Kuhina Noho no ke Aupuni o Amerika Huipuia, ma ke Aupuni o Holani. Iaia i noho aku ai malaila, ua hui oia me kekahi poe noiau i halawai pu i kela me keia hebedoma e hoomahuahua i ko lakou ike. I kekahi wa nae, ua hooholoia e halawai hou lakou ma ke ahiahi o ia Sabati ae. Halawai no hoi lakou ia manawa, aole nae i hiki mai o Adamu. A pau ia halawai, hoopaneeia e halawai hou ma ia Sabati aku. Aole no o Adamu. Hoopaneeia e halawai hou aku ma ka la Sabati. Aole no o ua Adamu nei. Minamina kona mau hoa, a haohao no hoi, no ka mea he lala hele mau no ia mamua. Aka, manao iho la lakou ua pilikia paha oia i ka hana. Mahope iho, hoihoi lakou i ko lakou manawa halawai a i kekahi la noa, a ia manawa, hiki aku la o ua o Adamu nei. Ninau aku la na hoa i ke kumu o kona noho ana, a hai aku la oia: "No ko oukou halawai ana ma ka la Sabati. He la kapu kela ia'u." Wiwo ole no ua Kuhina kaulana nei. Ina paha pela ka wiwo ole o na hoahanau a pau no ka pono o Iesu, nani maoli no.

NA LAPIKI.

                He mau Lapiki keokeo keia, me na wahi Lapiki keiki, iloko o ko lakou pa. He wahi holoholona maikai loa keia. Kohu popoki kona kino a me kona hulu. Loloa nae na pepeiao a me na wawae hope. O na lau nahele kona mea ai. He kolohe loa hoi i na mea kanu. Aia iloko o na puu pohaku a me na lua i eliia ma ka lepo kona wahi i noho ai. He ono loa kona io i mea ai.

KA HOEULI.

                He mea liilii ka hoeuli o ka moku, aka he hana nui loa kana. No ka mea, na ua mea liilii nei e hookaa i ka ihu o ka moku mao a maanei e like me ka manao o ke kapena. A i ka wa e hoopiipii ai ka moku i ka makani a me na ale, na ua wahi hoe nei e hoopaa i ka ihu o ka moku i ole oia e huli hou ae a holo aku i kahi e. Ina hoi i pa mai ka makani ino, a popoi mai na ale nunui, e pilikia koke auanei ka moku ke ole kahi hoe nana e hookele akamai iloko o ke ino. Pela no hoi ke hiki aku i ke awa. Ina aole ka hoe nana e hoopololei aku i kona holo ana, e huhewa auanei ka moku, a ili a nahaha. Ina paha ua puka aku na moku he umi i ka manawa hookahi, mai ke awa o Honolulu aku, e holo i Lahaina, a ua nele like lakou a pau i na hoeuli, e manao anei oukou e hiki ana kahi mea hookahi o lakou i Lahaina? Pomaikai wale paha ka hiki ana o kekahi o lakou ilaila.
                Pela no hoi ke kanaka. O ka manaopaa ka hoeuli o ka uhane, e holo lanakila ai oia maluna o ka moana nui o keia ola ana, a pae pono aku i ke awa o ka lani. Ina ua manaopaa ke kanaka ma ka lealea, a ma na mea o keia ao, alaila ua hemahema ka hookele ana, a e pilikia auanei kona uhane. A ina ua manaopaa ke kanaka ma ka pono, alaila ua pololei ka hookele ana, a e holo lanakila kona moku a ku maikai aku i ke awa. A ina ua nele ke kanaka i ka manaopaa, alaila, e lauwili wale kona moku io a ianei, a e pokakaa i ka moana a paholo iloko o ka ino. E imi i ka manaopaa ma ka pono.

KA INOA MANA.

                I ke ahiahi o kekahi la, hiki ae la he malihini, a kikeke aku la ma ka puka hale o kekahi Lunakanawai hanohano. Wehe mai la ke kauwa i ka puka, a ninau aku la ka malihini no ka Haku hale. "Ua hele," wahi a ke kauwa, "aku e komo mai oe a kali ma keia keena, a hoi mai oia." Mahope, hoi mai ka Haku hale, a ninau aku la ke kauwa i ka malihini, "Owai kou inoa, i hai aku ai au i kuu Haku?" Aole nae i pane ka malihini, aka, haawi aku la i kekahi leta, i aku la i ke kauwa, "E oluolu oe e haawi aku i keia leta iaia." Hana no hoi ke kauwa pela. Wehe ae la ka Lunakanawai i ka leta a nana iho la, eia ka, he leta na kana keiki mai. Kahea koke aku la oia e hookomoia mai ka malihini ma kona keena. A i kona komo ana mai, aloha koke aku ka Lunakanawai iaia, i aku la, "Ma ka inoa o kuu keiki, ke hookipa aloha nei au ia oe. E noho no oe maanei, a nou no na pono a pau o keia hale. No ka mea, ke palapala mai nei kuu keiki, a ke hai mai i kona wa mai ma ka aina malihini, a ke noi mai nei oia, "E kuu makuakane, e aloha oe i keia kanaka, a e hookipa maikai iaia no kuu inoa." E noho no oe ma keia hale me he keiki la na'u. No ka mea, ua nui loa kuu aloha i kuu keiki." Pela hoi, e na pokii, ua loaa ka inoa mana nana e wehe ae i ka puka o ka hale alii nani loa ina ka lani; a o ka mea e hahai ana mamuli o ia inoa, e hookipa maikai ia ana malaila. Oia hoi ke Keiki a ke Akua. Ke i mai nei oia, "O ka mea a oukou e nonoi ai ma ko'u inoa, oia ka'u e hooko ai, i hoonaniia'i ka Makua ma o ke Keiki." Ma ka inoa o Kristo Iesu e loaa'i ia kakou na pomaikai a pau o ka home lani maluna.

KA LUNAKANAWAI ME KA PELEHU.

                He kanaka kaulana loa ka Lunakanawai Kiekie o Amerika Huipuia mamua aku nei, o Makala (Marshall) kona inoa. He kanaka hanohano oia, a me ka hohonu o ka ike. Aole nae i hookano a haaheo. O ka poe hanohano oiaio, he poe naau haahaa lakou.
                I kekahi la, hele ae la ua Lunakanawai Kiekie nei, o Makala, ka makeke kuai i na mea ai. Ike aku la oia i kekahi kanaka opio ua kuai i ka pelehu, a e imi ana oia i mea nana e halihali. A no kona loaa ole i ka mea lawe, huhu loa oia, a kuamuamu. Hookokoke aku la ua Lunakanawai Kiekie nei, a ninau aku iaia, "Aia mahea kou hale?" Hai aku la hoi kahi opio. Pane ae la o Makala, "O ko'u ala no hoi ia e hele ai. Na'u e lawe kou pelehu." O ka hele no ia o laua a hiki i ka hale o ua wahi opio nei, ninau aku la oia ia Makala, "Heaha ka'u e uku aku ai ia oe?" "Aohe uku," wahi a Makala. "I kokua wale aku no wau ia oe." Hele aku la o Makala a ninau aku la kahi opio i kekahi kanaka e ku kokoke ana, "Owai la kela wahi elemakule oluolu i lawe mai nei i kuu pelehu me ka uku ole?"
                "Ka! aole ka oe i ike? O Makala kela, ka Lunakanawai Kiekie o Amerika Huipuia."
                "A no ke aha la i lawe mai ai oia i kuu pelehu?"
                "I mea paha e ao aku ai ia oe e hookano ole."