Ke Alaula, Volume II, Number 4, 1 July 1867 — Page 16

16 KE ALAULA.

me kona pule no Sodoma. Papa 7—no ko Aberahama mohai ana ia Isaaka. Papa o na pokii—no Mose i kona wa liilii.
                Ua kukulu pakahi ia keia mau kula a me na papa, a ninaninau pono ia no keia mau haawina a pau, a ua ikeia ka makaukau o na kula a me ka mikiala o na haumana. Olioli na makua o ka pono i ka ike ana i ka aoia o na keiki o keia hanauna o Waialua a makaukau ma ka Baibala.
                He nui na malihini a me na makamaka o na apana a me na mokupuni e i launa mai a hauoli pu me na keiki i keia la nui o ka makahiki. Kamailio mai no kekahi o lakou, a hoolana i ka manao o na kumu a me na haumana.
                A pau ka hana o loko o ka luakini, ua kukulu hou ia ka huakai, a hele aku na kula malalo o na hae i kahi o ka lanai nui i hanaia e na makua i wahi e ahaaina ai. Ai pu na keiki, a me na makua, a me na malihini, a me na makamaka, a maona like i na mea momona i hoolakolakoia.

KA HOI ANA MAI O HOKU AO.

                Ua hoohauoliia na puuwai o na kamalii o ke kaona o Honolulu i ka ike ana ia "Hoku Ao" i ke kakahiaka o ka la 10 o Iune mawaho no o ka nuku o ke awa. Hoi pomaikai mai na elele o na Ekalesia o Hawaii nei i holo aku, oia o Rev. T. Koana a me Rev. B. W. Pareka. Ua hoi pomaikai mai hoi na haku wahine opio a kakou i holo aku e makaikai i ka Pae Aina o Nuuhiwa, a e ike i na makua malaila—o Miss Carrie Pareka a me Miss Maria Kekela. Ua malamaia ke ola o ka moku, a me kapena Binamu a me kana wahine, a me ka poe a pau o luna o ka moku.
                Aole no he moku i hoohauoli loa i na naau o ka lehulehu ma na wahi a pau ana e holo aku ai e like me keia moku kamahao o kakou o "Hoku Ao," koe wale no paha ka moku misionari o "Ioane Wilama," e holoholo nei iwaena o na moku o ka Moana Pakipika Hema. Ma na awa ku moku o Hawaii nei, makemake loa na keiki e ike i ka moku i kapiliia mamuli o ka lakou kokua ana. Ma na aina pegana ua ike no na kanaka, o ka moku no keia e lawe mai i na kumu a me ka malamalama o ke ola no lakou. Aka, o na misionari no a kakou ma na aina pouli, o lakou ka oi o ka hauoli nui i ka ike ana'ku i kona mau pea keokeo e kau mai ana, a me kona mau hae e welo ana. Na keia moku e hali aku ia lakou i ka ai a me ka ia, a me na lole e pono ai ko lakou noho ana. Ma keia moku e loaa aku ai ia lakou na leta o na makamaka, na hoahanau, a me na makua o lakou. Na ia nei hoi i halihali aku ia lakou i na nupepa, e hai ana ia lakou i na nu hou, a me na mea a pau e hanaia nei ma ke ao nei. Na keia ahai-leta no hoi i halihali aku ka l akou mau palapala aloha i na makua a me na hoahanau a lakou e noho ana ma na aina o ka malamalama. He hoku ao io no keia no lakou, e hoike ae ana i ke kokoke ana o ka weheia o ke alaula o ke kakahiaka.
                Lohe mai makou e hoomaka ana o Rev. S. Kauwealoha i kula hanai no na keikikane ma Uapou, a e kukuluia ana ma Puamau, Hiwaoa, he kula hanai kaikamahine, malalo o ke alakai ana o Rev. J. Kekela. He pomaikai nui no ia no kela lahui ke holo keia mau kula elua, a hoonaauaoia kekahi o ka lahui opio o Nuuhiwa.
                Ua hoi mai nei o Rev. A. Kaukau, kekahi o ko kakou mau misionari i noho aku nei he umi a keu makahiki ma ia aina. Hoi pu mai no me ia kana wahi keiki uuku hookahi i koe aku ma ia aina. E lohe ana kakou mai o a o i kana pane no ka ninau i ninauia'ku, penei: "E ke kiai, heaha ko ka po?" A eia mai kana: "Ua hiki mai ke kakahiaka, a me ka po kekahi." Hai mai kela i ke anaina nui o ka puali Kula Sabati, ma Kawaiahao no ke Kula Sabati o ka Pae Aina o Nuuhiwa, a hoike mai oia i ko laila Kula Sabati he waa kaua. Ko ke diabolo Kula Sabati, ka, ka nui ma ia pae aina, wahi ana.

KULA POKII.

SABATI I.

1. Pehea ka olelo hoolana a ke Akua ia Adamu ma?
Olelo oia e hoouna mai ana ia i kana Keiki e make no kanaka.
2. Ua piha anei laua i ke aloha i ke Akua?
Aole; no ka mea, ua hewa iho la ko laua naau.
3. He hiki anei i ke Akua ke hoohuli ia laua?
He hiki no, ma kona Uhane Hemolele.
4. Mahea kahi i noho ai ka Uhane Hemolele?
Ma ka lani.
5. He hewa no kakou a pau—nawai e hoohuli?
Na ka Uhane Hemolele o ke Akua.
6. Ina e hookomo mai ke Akua i kona Uhane Hemolele iloko o kakou, e hoi k akou i hea e noho ai?
Ma ka lani, me ka poe pono.
7. Pehea kekahi pule pono ia kakou?
E ka Haku, e haawi mai oe i kou Uhane Hemolele ia'u.

SABATI II.

1. Heaha ka i loaa ia Adamu ma ia hope mai?
Loaa iaia na keiki a me na moopuna he nui wale.
2. Pehea la ka nui o kona mau mamo?
He nui wale; he hiki ole ke heluia.
3. Pehea aku ke Akua i kana Keiki?
E iho aku oe i ke ao.
4. Pehea la ia i noho mua mai ai i ke ao nei?
Ma ke ano keiki liilii.
5. Hoouna mai ke Akua i kana Keiki e lilo i keiki liilii no wai?
Na kekahi wahine ilihune.
6. Owai ka inoa o ua wahine la?
O Maria.
7. Heaha ke ano o ia wahine?
He wahine maikai, i launa ia me ka Uhane Hemolele.

SABATI III.

1. Owai ka i ikea e Maria i kekahi la?
He anela.
2. Pehea o Maria i ka ike ana i ka anela?
Makau.
3. Pehea mai ka anela iaia?
Mai makau oe, e Maria.
4. Pehea hou aku?
Ua alohaia oe e ke Akua.
5. A e hoouna mai ke Akua i kekaha?
I keiki nona.
6. A owai ua keiki la?
Ke Keiki no ia a ke Akua.

SABATI IV.

1. Nawai i kapa aku i ka inoa o ua keiki la?
Na ke Akua.
2. Owai ka inoa ana i kapa aku ai?
O Iesu.
3. Heaha ka hana a Iesu?
E hoola i kana poe kanaka mai ka mana o Satana.
4. Pehea ka manao o Maria i ka lohe ana i keia mau mea a pau?
Kahaha nui oia me ka olioli.
5. A hoi aku ka anela, pehea o Maria?
Himeni hoolea aku kela i ke Akua.
6. Kapa aku o Maria i kana keiki i aha nona?
He Hooloa nona, no ka mea, nana i hoola iaia mai ka make mau loa.

EU A HANA.

1. Eu a hana, kuu kamaiki,
Eu a hana ano no;
Wiki e, mai hoololohi,
Hana no ka Haku mau.
Imi a halalo nui
No na hana e hana'i;
Hana me ka mikioi,
E kuu keiki makamae.
2. Eu a hana, kuu kamaiki,
Akahai, aloha e;
E kokua i kou makua
Nana oe i hanai mai;
Hana lea, hoohauoli
I na kamalii liilii;
Huli i ka poe auwana,
Me ka poe paakiki.
3. Ahonui, kuu kamaiki,
Mai huhu, a paakiki;
Hoohalike me ke Kahu,
Me Iesu ke 'Lii maikai;
Alu i na palupalu,
I na ilihune pu;
E aloha i na hoa,
E aloha ia Iesu.
4. Pule pono, kuu kamaiki,
Pule me ka hiaai,
Pule i kalaia ka hewa,
I hoomaikaiia mai.
Hoomaikai i ka Makua,
Nana oe e kiai,
Nana i haawi mai la
Kana Keiki e ola'i. WAIKOLOA.

KE ALAULA.
He Nupepa Hoikeike Kii.
Hoopuka mau ia ma Honolulu, i kela malama keia malama e ka PAPA HAWAII, no na Kamalii Hawaii.

                25 keneta ka uku no ka makahiki no ka pepa hookahi, 20 keneta pakahi ka uku no na pepa he iwakalua a oi aku paha ma ke ope hookahi, ME KA HOOKAA MUA IA MAI.
O. H. KULIKA, Luna Hoopuka.